Jiowa A Fen Alleaani “Meten Mokuremi Meinisin”
‘Nge emon [litchok] esap turutiu won pwul lukun tipen Sememi. Nge meten mokuremi meinisin ra fen allea.’ —MATTU 10:29, 30.
“UA SIO ngonuk, ai Kot, nge kosap polueniei, lupwen ua iotek ngonuk, kosap afaliei. Ka kulitiei o fokun ariafouuei, ka afeiengauaei ren pochokulen poum.” Ewe mwan a apasawu ekkena kapas a fokkun riaffou. Sisap mairu pwe a ina ussun meefian! Ese chuen tongeni angang, noun kewe ra malo lupwen a fis eu taifun, me a uri semmwen mi chou. Iten ewe mwan Jop, me porausen an riaffou a mak lon ewe Paipel pwe epwe alisikich.—Hiop 30:20, 21.
2 A ussun ita pwe alon Jop we a u ngeni Kot, nge esap ina ussun. Jop a chok pwaralo weiresin letipan. (Hiop 6:2, 3) Ese silei pwe Setan a efisata an kewe sossot, iwe, ina popun a mwaal an ekiek pwe Kot a fen likitalo i. Fan eu, Jop a pwal mwo ereni Jiowa: “Pwota ka aopalo mesom seniei o atolongaei lon tettelin chon oputom?”a—Hiop 13:24.
3 Ikenai, chommong noun Jiowa kewe aramas ra riaffou pokiten maun, osukosuk lon muu, taifun, chinnap, semmwen, mwelele, me pinepinin ar angang ren ekkewe muu. Ese mwaal a pwal toruk eu sokkun osukosuk. Fan ekkoch, eli ka fen ekieki pwe Jiowa ese chuen alisuk. Iwe, en mi sileiochu alon Jon 3:16: “Pwe a chok iei usun an Kot tongei fonufan, pwe a fangelo Noun we Alaemon.” Nge, lupwen ka riaffou me a ussun ita kesap ngas seni, ka tongeni ekieki: ‘Kot a wesewesen tongeiei? A kuna pwe ua riaffou? A afanniei?’
4 Ekieki mwo met a fisita ngeni ewe aposel Paul. A makkei: “A ngeniei efoch folun ira lon fitukei, emon chon kuno seni Satan, pwe epwe ninniei, pwe ute lamalam tekia. Fan ulungat ua tingor ren ewe Samol usun ei mettoch, pwe epwe feil seniei.” Jiowa a rongorong an tingor nge, a ereni Paul pwe an osukosuk esap wes ren eu manaman. Iwe, a lamot pwe Paul epwe eani lukuluk won an Kot we manaman fan iten alillis ren an epwe likiitu fan ‘efoch folun ira lon fitukan.’b (2 Korint 12:7-9) Ussun chok Paul, eli en ka likiitu fan eu osukosuk. Eli ka ekieki, ‘Iwe, Jiowa ese awesi ai osukosuk. Weween pwe ese tepereni met a fiffis ngeniei are ese tongeiei?’Aapwi! Met Jises a ereni noun kewe aposel ekis chok mwirin a filiireta a menlapei watteen an Jiowa tong mi alollol fan iten emon me emon lein noun kewe chon angang mi tuppwol. Sipwe ppii ifa ussun an kewe kapas ra alisikich ikenai.
“Oute Niuokkus”—Met Popun?
5 Ekkewe aposel ra angei manaman mi amwarar seni Jises, kapachelong ar tufichin “asulo ngun limengau,” me “apochokkulata sokkun samau meinisin me apwangapwang meinisin.” Nge saminne resap chuen osukosuk me riaffou. Jises a titchikin awewei ekkoch ekkewe osukosuk repwe toriir. Iwe nge, a peseer: “Oute niuokusiti ir mi nielo inisich, nge rese tongeni nielo ngunuch. Nge oupwe niuokusiti ewe mi tongeni ataielo ngunuch me inisich lon Keena.”—Mattu 10:1, 16-22, 28.
6 Ren an epwe alisi noun kewe aposel le weweiti ewe popun rete niuokkus, Jises a eani ruu kapas monomon. A ereniir: “Esap liwinin ruemon litchok senis eu? Nge emon leir esap turutiu won pwul lukun tipen Sememi. Nge meten mokuremi meinisin ra fen allea. Iei minne, oute niuokus, pun ami mi auchea lap seni chommong litchok.” (Mattu 10:29-31) Chemeni mwo pwe Jises a rifengenni ach sisap niuokkus lupwen a torikich riaffou ren ach lukuluk pwe Jiowa a tongeikich. Iwe, ewe aposel Paul a eani ena esin luku. A makkei: “Iwe, meeta sipwe apasa ren ekkeei mettoch? Are Kot epwe penikich, io epwe u ngenikich? Ese mo lolileniesini pwisin Noun we, nge a afangema i fan asengesin kich meinisin; iwe, ifa usun, esap pwal fangeto rech atewe, o pwal mettoch meinisin?” (Rom 8:31, 32) Ese lifilifil met sokkun osukosuk ra toruk, kopwe lukuluk pwe Jiowa a tongeiok ika kopwe amwochu om tuppwol ngeni i. Epwe lapelo pwapwaloon an tong fan itom lupwen sia atittinafichi an Jises fon ngeni noun kewe aposel.
Ewe Aucheaan Emon Litchok
7 An Jises kewe kapas monomon a ochun awewei an Jiowa tong fan iten emon me emon Noun kewe chon angang. Ekieki mwo akkom an poraus ussun ekkewe litchok. Lon ranin Jises we, aramas ra kan oput ekkewe litchok inaamwo ika ra ocheer, pokiten ekkewe litchok ra atai uwan atake. A wor chommong litchok me a kukkun liwiniir. Aramas ra tongeni kamo ruuemon ren kis seni senis limu. Ren senis engol, kopwe mooni limon. A ussun ita pwe ewe alimuen litchok esor aucheaan!—Luk 12:6.
8 Ekieki mwo saisin ei matchang. Ewe litchok emon matchang mi fokkun kukkun. Nge ewe kapasen Krik mi afou ngeni “ekkewe litchok” lon Mattu 10:29 a titchikin wewe ngeni ekkewe kukkun litchok. Jises a mochen pwe noun kewe aposel repwe ekieki ussun ewe matchang mi kukkun me lamot kisikis seni meinisin.
9 An Jises kapas monomon ussun ekkewe litchok a ngenikich eu lesen mi manaman: Mettoch mi lamot mwaal ngeni aramas a lamot ngeni Jiowa Kot. Jises a menlapei enletin ei poraus ren an apasa pwe emon kukkun litchok esap “turutiu won pwul” lukun tipen Jiowa. Mi ffat ewe lesen. Ika Jiowa a afanni emon matchang mi kukkun me lamot kisikis, epwe ifa me watteen an ekieki ussun emon aramas mi angang ngeni i!
10 Jises a pwal apasa: “Nge meten mokuremi meinisin ra fen allea.” (Mattu 10:30) Ei poraus mi mwochomwoch a menlapei ewe lamoten an Jises kapas awewe ussun ekkewe litchok. Chechchemeni: Mei wor arapakan 100,000 meten mokuren emon aramas. Ir meinisin wewe chok. Nge, Jiowa Kot a kuna me alleaani meten mokurach meinisin. Iwe, mei wor och mettoch lon manauach Jiowa ese silei ussun? Pwungun pwe Jiowa a weweiti lapalapen emon me emon noun kewe chon angang. Pwungun pwe a “nenengeni leluken aramas.”—1 Samuel 16:7.
11 Tafit, a kuna chommong osukuosuk, nge a luku pwe Jiowa a silei ussun an kewe osukosuk. A apasa: “SAMOL, ka fen sotuniei, o ka sinei usi! Ka sinei ai fansoun mommot, o pwal ai fansoun uta. Ka meefi usun ekiekin letipei seni touau.” (Kol Fel 139:1, 2) Kopwe pwal luku pwe Jiowa a sileiok. (Jeremaia 17:10) Kesap muttir ekieki pwe en mi lamot kisikis ngeni Jiowa.
“Kopwe Isenalong Chonun Mesei Lon Om Rume”
12 Jiowa ese chok silei emon me emon noun kewe chon angang nge a pwal silei ar kewe riaffou. Ren chok awewe, lupwen ekkewe chon Israel ra riaffou pokiten ir chon kichiniwel, Jiowa a ereni Moses: “Ua kuna riafoun nei aramas mi nonom Isip o rongorong ar sio pokiten an chon Isip nemenemengau ngeniir, ua pwal silei ar weires meinisin.”(Ekistos 3:7) Ach miritiiti pwe Jiowa a kuna met a fiffis me a rongorong ach sio lupwen sia riaffou a auruuru kich! Jiowa a letipechou lupwen sia riaffou.
13 An Jiowa tumun fan iten chokkewe mi chiechi ngeni a pwalo ren meefian fan iten ekkewe chon Israel. Inaamwo ika fan chommong ar riaffou a fisita pokiten pwisin ar tipeforea, iei met Aisea a apasa ussun Jiowa: “A riaffou lupwen ra riaffou.” (Aisea 63:9, NW) Ina popun, pokiten en emon noun Jiowa chon angang mi tuppwol, kopwe tongeni luku pwe Jiowa a riaffou lupwen ka riaffou. Ena luku a apochokkuloketa ren om kopwe pwaracho ngeni sossot me likiitu le fori ukuukun om tufich lon an angang, ika met?
14 An King Tafit luku pwe Jiowa a tongei i a pwalo lon Kol Fel 56. Tafit a makkei ei kol lupwen a su seni King Saul. Tafit a su ngeni Kat, nge a lolilen pwe ekkewe chon Filistia repwe liapeni lupwen ra esinna i. A makkei: “Ekkewe chon oputaei ra purietiu unusen ran, pun chommong aramas ra chok fiu ngeniei ren ar lamalam tekia.” Tafit a eani lukuluk won Jiowa pokiten watteen an osukosuk. A apasa: “Ar ekiek meinisin ra chok ekiekingau ngeniei.”—Kol Fel 56:2, 5.
15 Mwirin, Tafit a makkei ekkeei poraus lon Kol Fel 56:8: “Ka fen alleani o chechemeni ai kewe mokutukut won ai po; kopwe isenalong chonun mesei lon om rume! Esap pwe ekkeei mettoch ra nonnom lon noum puk?” Mwa met ren ochun ei aweween an Jiowa tumun! Lupwen sia osukosuk, neman sipwe kechiu lupwen sia sio ngeni Jiowa. Pwal mwo nge Jises, ewe mwan mi unusoch, a fori ena. (Ipru 5:7) Tafit a luku pwe Jiowa a kuna i me epwe chechchemeni an riaffou. A ussun ita pwe Jiowa a isenalong chonun mesan lon eu rume are a makkelong ewe poraus lon eu puk.c Eli ka meefi pwe chonun mesom epwe auraalo ena rume are porausom epwe amasoua chommong pekin taropwe lon ena puk. Ika a ina ussum, ei poraus mi mak lon Paipel epwe auruuru letipom: “Ewe SAMOL a chok arap ngeni chon letipeta, a pwal amanaua ekkewe mi ta lon ngunur.”—Kol Fel 34:18.
Wiliiti Emon Mi Chiechioch Me Kot
16 An Jiowa alleaani ‘meten mokurach meinisin’ a pwarata pwe i emon Kot mi afannikich me tongeikich. Inaamwo ika sipwe witiwit tori warotoon ewe fonufan sefo fan iten wesiloon metek me riaffou meinisin nge, Jiowa a fori eu mettoch mi amwarar fan asengesin noun kewe aramas ikenai. Iei alon Tafit: “Ewe SAMOL epwe chiechi ngeni ir ekkewe mi niueiti i, o epwe esinei ngeni ir an we pwon.”—Kol Fel 25:14.
17 ‘Chiechioch me Jiowa.’ A ussun ita pwe aramas rese tongeni weweiti ifa ussun repwe fori ena pokiten rese unusoch! Nge, Jiowa a etiwa chokkewe mi niueiti i ar repwe nonnom lon an we imw mangaku. (Kol Fel 15:5) Iwe, met Jiowa a fori fan asengesin noun kewe wasola? A aiti ngeniir an we pwon me ren Tafit. Jiowa a pwari ngeni noun kewe soufos “mine a ekiekieta” pwe repwe silei an kewe kokkot me met repwe fori pwe repwe atipeeufengenni manauer ngeniir.—Amos 3:7.
18 Pwungun pwe a mmen apwapwa pwe aramas mi tipis ra tongeni chiechioch me Jiowa Kot, ewe Mi Lapalap seni Meinisin. Ren enletin, a peseikich ach sipwe fori ena mettoch. Alon ewe Paipel: “Oupwe arap ngeni Kot, iwe, epwe arap ngenikemi.” (Jemes 4:8.) Jiowa a mochen pwe sipwe chiechioch ngeni. A fen akkota ifa ussun ei chiechi a fisita. An Jises asor a fen suuki ewe asam pwe sipwe chiechi ngeni ewe Kot mi Lapalap seni Meinisin. Ewe Paipel a apasa: “Sia meefi tong, pun a fen tongeikich akkom.”—1 Jon 4:19.
19 Ena chiechi a pochokkulelo lupwen sia likiitu fan osukosuk watte. Ewe chon kaeo Jemes a makkei: “Iwe, likiitu epwe unusochulo lon ami manau, pwe oupwe unusoch o iteuoch, o manauemi esap osupwang ren och mettoch.” (Jemes 1:4) Met a pwonueta lupwen sia likiitu fan riaffou? Chechchemeni mwo an Paul ‘folun ira lon fitukan.’ Met Paul a apwonueta pokiten an likiitu? Paul a apasa ussun an kewe riaffou: “Iei minne, upwe fakkun pwapwa o sikasini ai apwangapwang, pwe ewe manamanen Kraist epwe nonnom rei. Iwe, fan asengesin Kraist, upwe pwapwa ren apwangapwang, ren pweni, ren feiengau, ren ninni, ren weires; pun fansoun ai apwangapwang, iei ai pochokkul.” (2 Korint 12:9, 10) Paul a kuna pwe Jiowa epwe awora ewe manaman mi lamot, “ewe manaman mi nonnom ren Kot”, fan iten an epwe likiitu. Iwe, an meefi an Jiowa alillis a apochokkula ewe ririoch ngeni Kraist me Jiowa Kot.—2 Korint 4:7; Filipai 4:11-13.
20 Eli Jiowa a mut ngeni om kewe riaffou ar repwe sopwosopwolo. Ika a ina ussum, kopwe chechchemeni an we pwon ngeni chokkewe mi niuokkusiiti i: “Usap fakkun likitukelo, o usap fakkun poutukelo.” (Ipru 13:5) Kopwe kuna ena esin alillis me auruur. Jiowa a fen alleaani ‘meten mokurom meinisin.’ A kuna om likiitu. A meefi om riaffou. A wesewesen tongeiok. Me esap “monukalo ami angang me tong fan asengesin itan.”—Ipru 6:10.
[Footnotes]
a Minne Tafit, emon mi pwung me noun Kora kewe mi tuppwol ra pwal apasa a ussun chok minne Jop a apasa.—Kol Fel 10:1; 44:24.
b Ewe Paipel ese titchikin affata met ewe ‘ folun ira lon fituken’ Paul. Eli mesan mi apwangapwang. Are ewe ‘efoch folun ira lon fitukan’ a wewe ngeni ekkewe aposel mi chofona ra apasa pwe Paul emon aposel me emon chon afalafal mi ngau.—2 Korint 11:6, 13-15; Kalesia 4:15; 6:11.
c Me loom, ekkewe rume ei wokisin a fos ussun ra ffor seni sinin siip, siike, me kow. Aramas ra iseni milik, poto, cheese, are konik lon ekkeei sokkun rume. Nge lon ekkeei sokkun rume mi pochokkul, aramas ra tongeni isoni oil are wine lon.
En Mi Chechchemeni?
• Met a tongeni ammeef ngenikich pwe Kot a likitikichelo?
• Ifa ewe lesen sia kaeo seni an Jises kapas awewe ussun ekkewe litchok me ussun an Kot alleaani meten mokurach meinisin?
• Ifa ussun Jiowa a isenalong cholun mesach lon an “rume” are lon noun we “puk”?
• Ifa ussun sipwe ‘chiechioch ngeni Jiowa?’
[Ekkewe kapas eis fan iten ewe lesen]
1, 2. (a) Met popun Jop a meefi pwe Kot a likitaalo i? (b) Alon Jop a wewe ngeni pwe a sap seni Jiowa? Awewei.
3. Met sia chechchemeni lupwen a torikich osukosuk?
4. Menni osukosuk Paul a likiitu fan, me ifa ussun ena esin osukosuk a tongeni kku kich?
5, 6. (a) Ifa ussun Jises a alisi ekkewe aposel pwe resap niueiti met epwe fis lon mwach kkan? (b) Ifa ussun Paul a eani lukuluk won an Jiowa tumun?
7, 8. (a) Met ekiekin aramas ussun ekkewe litchok lon ranin Jises we? (b) Met popun Mattu 10:29 a fos ussun emon kukkun litchok lon fosun Krik ?
9. Menni poraus Jises a mochen affata ren an awewe ussun ewe litchok?
10. Ifa lamoten ewe poraus: “Nge meten mokuremi meinisin ra fen allea”?
11. Ifa ussun Tafit a pwarata an lukuluk pwe Jiowa a tongei i?
12. Ifa ussun sia silei pwe Jiowa a kuna riaffoun noun kewe aramas?
13. Met a pwarata pwe Jiowa a enletin afanni noun kewe chon angang?
14. Met popun Tafit a makkei Kol Fel 56?
15. (a) Met weween an Tafit tingor pwe Jiowa epwe isenalong chonun mesan lon eu rume are lon eu puk?(b) Lupwen a torikich sossot, met sipwe lukuluk won?
16, 17. (a) Ifa ussun sia silei pwe Jiowa a afanni ekkewe osukosuk ra tori noun kewe aramas?(b) Met Jiowa a fen fori pwe aramas repwe tongeni chiechioch ngeni?
18. Ifa ussun sia silei pwe Jiowa a mochen pwe sipwe chiechioch ngeni i?
19. Ifa ussun likiitu a tongeni apochokkula ach chiechi ngeni Jiowa?
20. Ifa ussun sia silei pwe Jiowa epwe alisikich me auruurukich fan osukosuk?
[Lios lon pekin taropwe 19]
Met sipwe kaeo seni an Jises kapas awewe ussun ekkewe litchok?
[Lios lon pekin taropwe 19]
© J. Heidecker/VIREO
[Lios lon pekin taropwe 20]
Met popun Jiowa ese awesi an Paul “folun ira lon fitukan”?
[Lios lon pekin taropwe 21]
Ren ach akkalleaani ewe Paipel, ach luku pwe Kot a tongeikich a pochokkulelo