En Mi Kan “Witiwit Fan Mosonottam”?

“Ewe sokkun aramas ami oupwe sokkuni lon foffor mi pin me foffor mi fichiiti chon fitipacheiti Kot, atun oupwe witiwiti me ekilapei warotoon ewe ranin Jiowa!”​—2⁠PITER 3:​11, 12, NW.

1, 2. Ifa ussun sipwe tongeni awewei ewe mettoch “witiwit fan mosonottam” ren ranin Jiowa we?

SIPWE era pwe eu famili a witi warotoon nour kewe wasola fan iten ar repwe mongoon lefaaf. A muttirito kulokun ar repwe war. Ewe fefin a atapwalen awesi ewe mongo. Puluwan we me nour kewe ra alisi le akkotaochu mettoch meinisin. Ir meinisin ra mmeseik. Ewer, unusen ena famili ra mwotoresin witiwiti warotoon ekkewe wasola me ra ekkekieki ewe mongo mi anno me pwapwaan ar repwe chufengen.

² Pokiten kich chon Kraist, sia kan witiwiti och mettoch mi lamot seni ena. Ifa ena mettoch? Maa, oukich meinisin sia kan witi “ewe ranin Jiowa”! Tori an epwe war, a lamot ach sipwe ussun ewe soufos Maika, nge iei alon: “Upwe nennefeil ren Jiowa. Upwe witiwit fan mosonottam ren Kot, ai chon amanau.” (Maika 7:​7, NW) A ita wewe ngeni pwe sipwe chok nonnommwaal? Aapw. A mmen chommong ekkewe angang sipwe apwonueta.

³ Ewe aposel Piter a alisikich le eani ekiek mi pwung atun ach sipwe witiwit. Iei alon: “Ewe sokkun aramas ami oupwe sokkuni lon foffor mi pin me foffor mi fichiiti chon fitipacheiti Kot, atun oupwe witiwiti me ekilapei warotoon ewe ranin Jiowa!” (2 Piter 3:​11, 12) Nengeni mwo pwe Piter a awewei och mettoch. Sap minne a eani eu kapas eis. Lon makkeian kewe ruuacho taropwe mi fel, a awewei ika mei fet lapalapen chon Kraist. A pwal peser pwe repwe akkeani “foffor mi pin me foffor mi fichiiti chon fitipacheiti Kot.” Inaamwo ika a fen lulo 30 ier seni ewe fansoun an Jises Kraist kapas ussun esissinnen “sopwoloon ewe otot minen lom,” nge chon Kraist resap ukutiu seni ar mammasa. Repwe “witiwiti me ekilapei” warotoon ranin Jiowa.

⁴ Ewe kapasen Kriik mi afou ngeni “ekilapei” a wesewesen wewe ngeni “amuttiri.” Pwungun pwe sisap tufichin wesewesen ‘amuttiri’ ranin Jiowa we. Mi wenewenen enlet pwe sise pwal silei “ranin are kulokun” an Jises Kraist waroto pwe epwe apwungu chon koputen Seman we. (Mattu 24:36; 25:13) Eu puk a awewei pwe ena kapas “amuttiri” a popu seni eu kapas mi wewe ngeni “ ‘apachiki,’ ina minne, weween ena kapas a kan ngeni ‘tinikken, akkangang, ekkekieki och mettoch.’ ” Ina popun, Piter a pesei chienan kewe chon luku pwe repwe “mwotoresiiti” warotoon ranin Jiowa we. Repwe tongeni fori ena mettoch ren ar ekkekieki ena ran fansoun meinisin. (2 Piter 3:​12) Pokiten a wenewenen akkarap “ewe ran mi lapalap me aniuokkus, ranin Jiowa we,” sipwe pwal eani ena chok sokkun ekiek.​—Joel 2:​31, NW.

Witiwit fan “Foffor mi Fel”

⁵ Ika sia mwotoresiiti ach sipwe manau lupwen ranin Jiowa we epwe war, sipwe pwarata ena mettoch ren ach eani “foffor mi fel me foffor mi fichiiti chon fitipacheiti Kot.” Eli ena kapas “foffor mi fel” epwe achema ngenikich ussun an Piter ei fon: “Usun semirit mi alleasochis, ousap appiru ami kewe mochenia-ingau mi nom remi lom, lon ami rochopwak; nge pokiten ewe emon mi fen korikemi a fel, iwe, ami oupwe pwal fel, lon ami kena fofor meinisin. Pun a fen makketiu, ‘Ami oupwe fel, pun ngang ua fel.’ ”​—1 Piter 1:​14-​16.

⁶ Ren ach sipwe aramas mi fel, sipwe tuttumunu pwe sipwe limoch lon pekin aion, ekiek, letip, me ngun. Sia kan akkammon fan iten “ewe ranin Jiowa” ren ach pippi pwe sipwe aramas mi fel fansoun meinisin pokiten iten Jiowa we a nom woch? Lon ei fansoun ese mecheres ach sipwe limelimoch fansoun meinisin pun a kan ngauolo an chon fonufan minen aukuuk ussun met sokkun foffor a limoch me wenechar. (1 Korint 7:​31; 2 Timoti 3:​13) Sia kan ita kukkuna pwe a lapalapelo towaufesenin ach kewe minen aukuuk fan iten foffor mi limoch me wenechar me an chon fonufan? Ika sia kuna pwe ese ikkina ussun, a wor popun ach sipwe aurek. Epwe ita tufich pwe a kan ngauolo ach kewe minen aukuuk, inaamwo ika ra tekia seni an chon fonufan? Ika ina, a lamot ach sipwe achocho le awenechara minne mi mwaal ren ach sipwe tufichin apwapwai Kot.

⁷ Lupwen a poputa ffichin ekkewe sasing mi limengau won ewe Internet me pokiten an aramas tufichin katol ekkena sasing lon pwisin imwer, ekkoch mi fen pinepin seniir me loom ekkena mettoch mi limengau ra kuna pwe iei “ese kauk ekkewe al mi suuk ngeniir, alen fofforun sikepwach,” nge ina alon emon tokter. Ika sipwe kutta ena sokkun minen afetalalo poraus mi limengau won ewe Internet, epwe wewe ngeni ach sipwe tunalo an Paipel we alluk, allukun ach sisap “atapa och mettoch mi limengau.” (Aisea 52:11) Epwe ita ina ussun ach sipwe wesewesen “ekilapei warotoon ewe ranin Jiowa”? Are sia fen ussun ita ammanga warotoon ena ran ren ach eani ewe ekiek pwe inaamwo ika sipwe akkalimengaua ekiekich iei ren mettoch mi limengau, nge a chuen wor fansoun fan iten ach sipwe alimochusefallikich lon mwach kkan? Ika a wor ach osukosuk ren ena sokkun mettoch, a mmen lamot ach sipwe tingorei Jiowa iei chok pwe epwe ‘okullu mesach pwe sisap nengeni ekkewe mettoch mi mwal me epwe amanauakich lon an kewe al’!​—Kol Fel 119:37.

⁸ A lap me lein Chon Pwarata Jiowa, kukkun me watte, ar ra kamwochunnuk won an Kot kewe minen aukuuk mi tekia fan iten foffor mi limoch me wenechar, iwe, ra kan ttitti seniir an ei fonufan kewe sossot, sossotun foffor mi sikepwach. Pokiten ar miritiiti arapotoon ewe sopwoloon me an Piter we ourour pwe “ranin Jiowa epwe war ussun emon chon sola,” ra likiitu le akkeani “foffor mi fel.” (2 Piter 3:​10) Ar kewe foffor ra anneta pwe ir mi “witiwiti me ekilapei warotoon ewe ranin Jiowa.”a

Witiwit Fan “Foffor mi Fichiiti Chon Fitipacheiti Kot”

⁹ Ren ach sipwe tufichin ekkekieki ranin Jiowa we, a pwal lamot ach sipwe eani “foffor mi fichiiti chon fitipacheiti Kot.” Ena kapas “fitipacheiti Kot” a wewe ngeni ach sipwe sufoliiti Kot, iwe, epwe amwokutukich pwe sipwe foffori minne epwe apwapwai i. Ewe mettoch ririoch ngeni Jiowa, iei ewe minen amwokut fan iten ekkena foffor mi fichiiti chon fitipacheiti Kot. A iei letipan, pwe “sokkun aramas meinisin repwe kuna ewe alen amanau me enletin silei minne mi enlet.” (1 Timoti 2:⁠4, NW) Kot “ese mochen pwe emon epwe poutmwalilo, pwe aramas meinisin repwe tori aier.” (2 Piter 3:9) Ina minne, esap pwe ach fitipach ngeni Kot epwe amwokutukich pwe sipwe alapalo ach kewe fofforun alisi aramas pwe repwe kaeo ussun Jiowa me akkappiru i?​—Efisus 5:1.

¹⁰ Manauach epwe ur ren foffor mi fichiiti chon fitipacheiti Kot ika sipwe chechchei an Kot we Muu akkom. (Mattu 6:​33) A wewe ngeni pwe epwe itepok me ruuepek ach ekiek ussun mettochun aion. Iei an Jises ourour: “Oupwe nengeni o tumunukemi seni sokkun mochenian pisek meinisin, pun aramas resap manau ren chommongun pisek.” (Luk 12:15) Inaamwo ika epwe weires ach sipwe ekieki pwe sipwe tufichin chunulo ren tongen moni, nge epwe murinno ach sipwe chechchemeni pwe “aurekin ei otot minen lom me ewe manaman mi otuputup, manamanen wouun fonufan” epwe tongeni “pwoluelo ewe kapasen” Kot. (Mattu 13:​22, NW) Eli esap mecheres ach sipwe angang fan iten tufichin manauach. Ina popun, lon ekkoch fonu, chommong ra ekieki pwe ren ar repwe tufichin amurinnolo manauer, repwe mwokut ngeni eu fonu mi watte wouun, iwe, eli repwe lo seni ar kewe famili fite, fite ier. Pwal mwo nge ekkoch me lein noun Kot kewe aramas ra fen eani ena sokkun ekiek. Ika repwe feilo ngeni pwal eu fonu, eli repwe tufichin awora ngeni ar kewe famili ekkan pisek minefo. Iwe nge, met epwe tongeni fis lon pekin ngun ngeni attonger kewe mi nonnomotiu lon pukun leenier we? Ika ekkewe mwan rese apwonueta wiiser, wiisen chon emmwen lon ar kewe famili, epwe nafoch pochokkulen ar kana famili lon pekin ngun fan iten ar repwe manau atun an epwe war ranin Jiowa we?

¹¹ Emon chon angang mi lo seni pukun fonuan itan Philippines a kaeo ekkewe poraus mi enlet lon Paipel seni Chon Pwarata Jiowa lon Japan. Lupwen a silei ussun wiisan we, wiisen mokuren famili seni ewe Paipel, a weweiti pwe a mmen lamot an epwe alisi an famili pwe repwe fel ngeni Jiowa. (1 Korint 11:3) Puluwan we mi nonnom lon pukun fonuer a fokkun pochokkul le u ngeni ewe minefoon lamalam a keran poputa le fiti, iwe, a mochen pwe epwe chuen chok tittinalo moni ngeni, nge esap liwiniiti fonuer pwe epwe aiti ngeniir minne a luku seni Paipel. Iwe nge, pokiten a akkarap ewe sopwoloon me an aureki attongan kewe, a liwiniiti fonuan. A kuna liwinin an pwarata mosonottam lon an kewe foffor ngeni chon le imwan kewe. Mwirin och fansoun, chon an we famili ra tipeeufengen lon ewe fel mi enlet, me puluwan we a poputa le fiti ewe angangen afalafal full-time.

¹² Eli nonnomuch epwe ussun aramas mi nom lon eu imw mi ngeten ekkei. Sipwe ita tipachchem ika sipwe nikasassafetal le angei pisekich kewe seni ena imw epwele unusen karelo? Nge esap lamot seni ena ach sipwe selani aramas​—weween, pwisin manauach, manauen chon ach famili, me manauen ekkewe pwal fitemon mi nom lon ena imw? Iwe, ei otot minen loom a muttir fetal ngeni an epwe unusen katalo, me aramas repwe tongeni fitalo. Pokiten ach miritiiti ena mettoch, a wenewenen pwung pwe mi lamot ach sipwe akkomwa mettochun ngun me annefota fan tinikken ewe angangen afalafala porausen ewe Muu, pun ena angang epwe tongeni amanaua aramas.​—1 Timoti 4:​16.

A Lamot An Esap Wor Ach “Tikitikippwul”

¹³ Piter a menlapei lamoten ach sipwe witiwit fan mosonottam pwe iei alon: “Ami kana mi achengicheng, pokiten oua witiwiti ekkeei mettoch, oupwe achocho ren unusen tufichimi pwe esap wor och tikitikippwul me oreinu remi me oupwe nonnom lon kinamwe me fan mesan [Kot].” (2 Piter 3:​14, NW) Piter a apacha ngeni an kapasen pesepes fan iten foffor mi fel me foffor mi fichiiti chon fitipacheiti Kot, pwal och kapas mi menlapei lamoten ach sipwe aramas mi fen limochulo ren chchaan Jises mi auchea lupwen Jiowa epwe atittinakich le sopwoloon. (Pwarata 7:​9, 14) Iei weween ena mettoch, pwe aramas repwe pwarata ar luku an Jises we asor, iwe, repwe fangolo manauer ngeni Jiowa me papatais fan iten ar repwe noun chon angang.

¹⁴ Piter a peseikich pwe sipwe achocho ren unusen tufichich pwe esap wor och “tikitikippwul” rech. Sia kan ita pippi pwe esor och “tikitikippwul” won ufach kewe, ufen fofforun me lapalapen chon Kraist? Ika sipwe kuna och ppwul won ufach, sipwe kan muttir tolu. Ika sia wenewenen acheni ufach na, sia kan tumunuochu pwe epwe limoch. A ita ina ussun meefiach ika ufach kewe, ufen chon Kraist epwe ussun ita manuchun, pokiten a wor och mettoch mi ngau ren lapalapach are fofforuch?

¹⁵ Wiisen chon Israel ar repwe “fori foutei lepwulun ufer” me “pacheeta me kukutaan fouten lepwulun ufer efoch terech mi arau.” Met popun? Fan iten ar repwe chechchemeni an Jiowa kewe alluk, alleasochisiir, me wiliiti aramas mi “pin” mwen mesen ar we Kot. (Numperis 15:38-​40) Pokiten kich noun Jiowa chon angang lon ei fansoun, sia sokkolo seni chon fonufan pun sia kan alleasochisi ekkan alluk me kapasen alongolongun alluk mi fel. Ren chok awewe, sia tuttumunu pwe letipach epwe limoch me wenechar, sia sufoliiti pinin chcha, me sise fel ngeni meinisin forien Kot kewe are forien aramas kewe. (Fofor 15:28, 29) Chommong aramas ra kan sufoliitikich pokiten ach tipeppos fan iten ach sisap limengauolo.​—Jemes 1:​27.

A Lamot Ach Sisap “Oreinu”

¹⁶ Piter a pwal apasa pwe sisap “oreinu.” Ifa ussun epwe tufich ena? Sipwe tongeni tolu och tikitikippwul nge esap ina ussun och oreinu. Och oreinu a affata pwe och mettoch lon ewe letip a mwaal are ngau. Iei an Paul we fon ngeni chon Kraist lon Filipai: “Oupwe foriata mettoch meinisin lukun ngulungul are eispat, pwe oupwe chok limoch, nge esap wor ami tikitikipwul; o oupwe pwal noun Kot mi sap mwalilo lein ei tappin aramas mi chok pwor pwal sokkosokkongau, o oupwe titinoch leir, usun ekkewe saram lon fonufan.” (Filipai 2:​14, 15) Ika sipwe apwonueta ena fon, sisap ngunungun me anini me epwe pwung ewe popun sia angang ngeni Kot. Tong ngeni Kot me chon oruch kewe epwe amwokutukich fansoun ach sipwe afalafala “ei poraus allimen ewe muu.” (Mattu 22:35-​40; 24:​14, NW) Pwal och, sipwe sopweilo ach esilefeili ewe poraus allim inaamwo ika aramas resap weweiti ewe popun sia akkawora ach fansoun le alisi aramas pwe repwe kaeo ussun Kot me an we Kapas, ewe Paipel.

¹⁷ Pokiten sia mochen pwe sisap “oreinu,” epwe lamot ach sipwe atittina ewe popun sia fori mettoch meinisin. Sia fen likitalo nikinikin chon fonufan, weween, ar foffori chommong mettoch pokiten ar tipemmong, awewe chok ren ar achocho ngeni wouun fonufan are pochokkulen nemenem. Ika sia kan mochen wiiseni ekkoch wiis lon ewe mwichefelin Kraist, amwo epwe pwung ewe popun ach achocho ngeni ekkena wiis me amwo tong ngeni Jiowa me aramas epwe akkamwokutukich fansoun meinisin. A mmen apwapwa ach kukkuna ekkan mwan mi asimau lon pekin ngun ar ra “akkachocho ngeni ewe wiis chon mas” fan chengel me tipetekison, tipetekisonun ar mochen angang weires fan iten Jiowa me chiener kewe chon luku. (1 Timoti 3:1, NW; 2 Korint 1:​24) Pwungun pwe chokewe mi tufichin wiiseni wiisen elter ra kan ‘tutumunu noun Kot kewe siip . . . seni lon letiper, sap seni mochenia moni mi asau, nge pokiten wesewesen letiper; sap usun ita repwe lapalapeni lapalapen samol ngenir mi nom fan nemenier, nge repwe forirelo pwe leenien appiru ngeni ekkewe siip.’​—1 Piter 5:​1-4.

A Lamot Ach Sipwe Nonnom lon “Kinamwe”

¹⁸ Iwe saingoon, Piter a erenikich pwe sipwe nonnom lon “kinamwe.” Ren ach sipwe tufichin fori ena mettoch, a lamot an epwe wor kinamwe lefilach me Jiowa me chon oruch kewe. Piter a menlapei lamoten an epwe wor “tong mi lapalap lefilach” me lamoten ach sipwe anukunukatiu kinamwe lefilach me chienach kewe chon Kraist. (1 Piter 2:​17; 3:​10, 11; 4:8; 2 Piter 1:​5-7) Ren ach sipwe anukunukatiu ach kinamwefengen, epwe wesewesen wor tong lefilach. (Jon 13:34, 35; Efisus 4:​1, 2) Ach tong me kinamwe a kan akkaewin pwalo lupwen epwe wor ach kewe international convention. Lon eu mwichelap lon Costa Rica lon 1999, emon chon amomo lon ewe kasoro a song pun ekkewe Chon Pwarata mi souni ekkewe chon ekis mi waroto ra eppeti aramas seni ar tufichin kuna an we leenien amomo. Iwe nge, lon ewe oruuen ran, a kuna ewe tong me kinamwe ekkewe chon sousou ra pwarata lupwen ra mwasangasangen etiwa ekkewe chon ekis, inaamwo ika rese sissileer. Lon ewe saingoon ran, ena chon amomo a fiti ekkewe chon sousou me a tingor pwe emon epwe kaeo Paipel ngeni.

¹⁹ Eli ukuukun ach mochen anukunukatiu kinamwe lefilach me pwiich kewe epwe kku ukuukun watteen ach tinikken le witiwiti ranin Jiowa we me ewe fonufan sefo a fen pwonei. (Kol Fel 37:11; 2 Piter 3:​13) Sipwe era pwe a weires ach sipwe kikkinamwefengen me emon chienach chon luku. Sipwe asuku ika epwe tufich ach sipwe nonnomfengen me emonna fan kinamwe lon Paratis? Ika emon a meefi pwe sia fen tipis ngeni, sipwe muttir ‘chasefal ngeni.’ (Mattu 5:​23, 24) A lamot ach sipwe fori ena mettoch ren ach sipwe tufichin kinamwefengen me Jiowa.​—Kol Fel 35:27; 1 Jon 4:​20.

²⁰ Sia kan pwisin “witiwiti me ekilapei warotoon ranin Jiowa we”? Ika sia wesewesen mochen kuna sopwoloon fofforingau, iwe, epwe pwalo ena mettoch ren ach likiitu le manaueni manau mi pin lon ei fonufan mi ur ren fofforingau. Pwal och, ach mwotoresiiti warotoon ranin Jiowa we me ach kuna manau fan nemenien ewe Muu epwe pwalo ren ach akkeani foffor mi fichiiti chon fitipacheiti Kot. Iwe, ach ekiekin kuna manau lon ewe minefoon fonufan mi kinamwe epwe pwalo ren ach achocho le anukunukatiu kinamwe lefilach me chienach kewe chon luku iei. Ren ekkena mettoch, sipwe pwarata pwe sia kan “witiwit fan mosonottam” me sia kan “ekilapei warotoon ranin Jiowa we.”

[Footnotes]

En Mi Chechchemeni?

• Met weween ach sipwe “ekilapei warotoon ranin Jiowa we”?

• Ifa ussun ewe mettoch “witiwit fan mosonottam” a kan pwapwalo lon fofforuch kewe?

• Pwata a mmen lamot “foffor mi fichiiti chon fitipacheiti Kot”?

• Met sipwe fori pwe esap nom rech och “tikitikippwul me oreinu, iwe, sipwe nonnom lon kinamwe” lupwen Jiowa epwe atittinakich?

3. Me ren 2 Piter 3:​11, 12, epwe fet ekiekin chon Kraist?

4. Met weween ach sipwe “ekilapei warotoon ranin Jiowa we”?

5. Ifa ussun sipwe tongeni pwarata pwe sia kan “mwotoresiiti” ach sipwe kuna “ranin Jiowa we”?

6. Ren ach sipwe aramas mi fel, met sipwe fori?

7, 8. (a) Ifa ussun sipwe tongeni monukalo lamoten ach sipwe akkeani “foffor mi pin”? (b) Ika pwe mi lamot, ifa ussun sipwe tufichin kul seni minne ese pwung?

9. Ach fitipacheiti Kot epwe amwokutukich pwe sipwe fet?

10. Pwata sipwe tumunukich seni “ewe manaman mi otuputup, manamanen wouun fonufan”?

11. Ifa ussun emon mi angang lon eu fonuen ekis a pwarata pwe foffor mi fichiiti chon fitipacheiti Kot a lamot seni wouun fonufan?

12. Pwata sipwe akkomwa mettochun ngun lon manauach?

13. Sia mochen pwe epwe fet lapalapach lupwen ranin Jiowa we epwe war?

14. Met weween ach sisap “tikitikippwul”?

15. (a) Met popun chon Israel repwe foutei le ppwulun ufer? (b) Pwata mi sokkolo lapalapen noun Jiowa kewe chon angang lon ei fansoun?

16. Met weween ach sisap “oreinu”?

17. Ach achocho fan iten ekkan wiis lon ewe mwichefelin Kraist epwe ita popu seni met?

18. Chon Pwarata Jiowa ra kan itefoulo pokiten ar eani met sokkun lapalap?

19. Pwata a mmen lamot ach sipwe anukunukatiu kinamwe lefilach me chienach kewe chon luku?

20. Ifa ussun epwe pwalo pwe sia kan “witiwit fan mosonottam”?

[Picture on page 9]

Ach “witiwit fan mosonottam” a kan pwapwalo lon foffor mi fel

[Picture on page 10]

Ewe angangen afalafala porausen ewe Muu a kan amanaua aramas

[Picture on page 12]

Atun ach sipwe witiwiti warotoon ranin Jiowa we, sipwe achocho ngeni ach sipwe kinamwefengen me aramas meinisin