Jiowa, Ewe Koten Enlet

“Ka fen angasaeilo, O Jiowa, ewe Koten [Enlet NW].”​—KOL FEL 31:5.

1. Ifa lapalapen lang me fonufan fansoun ese mo wor kapas chofona?

A FEN wor eu fansoun lupwen ese wor kapas chofona. Lon ena fansoun, lang a masou ren ekkewe ngun mi unusoch mi angang ngeni ewe Chon Foriir, “ewe Koten enlet.” (Kol Fel 31:⁠5) Ese wor kapas chofona me fofforun otupotup. Jiowa a esilei ngeni noun kewe ngun minne a enlet. A fori ena mettoch pun a tonger me a ekkekieki minne epwe murinno ngeniir. Iwe, a pwal ina ussun won fonufan. Jiowa a forata ewe aemonun mwan me fefin, iwe, ren an we alen poraus, minne a esilei ngeniir a ffatafatoch, wenewen, me enlet fansoun meinisin. Met ren amwararen ena mettoch!

2. Io a poputani kapas chofona, iwe, pwata?

² Iwe nge, lo, lo, lo, emon noun Kot we chonlang a foralo pwisin i pwal emon kot mi u ngeni Jiowa. Ena chonlang mi wiliiti Setan ewe Tefil, a mochen pwe ekkewe ekkoch repwe fel ngeni i.  Ren an epwe apwonueta letipan, a poputani kapas chofona fan iten an epwe nemenirelo. Ren an fori ena mettoch, a wiliiti “emon chon kapas chofona me semen kapas chofona.”​—Jon 8:44.

3. Met Atam me If ra fori lupwen Satan a kapas chofona ngenir, me met mwiriloon?

³ Ren an nounou emon serepenit, Setan a ereni ewe aemonun fefin, If, pwe ika epwe alleasolapa an Kot we alluk me ochei ewe foun ira mi pin, esap malo. Ina eu kapas chofona. A pwal ereni i pwe ika epwe ochei, epwe ussun chok Kot me silei minne mi pwung me ngau. A pwal chofona ena poraus. Inaamwo ika esaamwo fis fan eu pwe emon a kapas chofona ngeni If, nge ese mwaal a esinna pwe alon ewe serepenit ese tipeeu ngeni minne Kot a ereni puluan we, Atam. Nge a filata an epwe luku Setan, nge sap Jiowa. Pokiten a unusen tupulo, a angei ewe foun ira me ochei. Mwirin, Atam a pwal ochei ewe foun ira. (Keneses 3:1-6) Ussun chok If, Atam ese fen rongorong eu kapas chofona fan eu, nge ese tupulo. (1 Timoti 2:14) Ren an kewe foffor, a pwarata pwe a sap seni ewe Chon Forata. Ena mettoch a efisata watte feiengau ngeni aramas meinisin. Pokiten an Atam alleasolap, tipis me malo​—⁠pwal fofforingau watte me riaffoun aramas​—⁠ra tori mwirimwirin kewe meinisin.​—Rom 5:12.

4. (a) Ikkefa ekkewe kapas chofona ngeni ekkewe popun aramas lon Ichen? (b) Met sipwe fori pwe sisap tupulo ren Satan?

⁴  A pwal choufetalelo kapas chofona. A lamot ngenikich ach sipwe weweiti pwe ekkena kapas chofona lon ewe malamalen Ichen ra efisata tipemwaramwar ussun wenecharen Jiowa. Ussun ita nge Satan a era pwe Kot a otupur pun a mochen amwochu seni ewe aemonun pean aramas och mettoch mi murinno. Nge esap fokkun ina. Atam me If rese kuna feioch seni ar alleasolap. Ra malo, ussun chok Jiowa a ereniir epwe fis. Iwe nge, Satan a sopweilo le pweni Jiowa, iwe, fitepuku ier mwirin, ewe aposel Jon a makkei fan emmwenien ewe ngun mi fel pwe Setan a “otupu fonufan meinisin.” (Pwarata 12:9) Ren ach sisap tupulo ren Setan ewe Tefil, epwe lamot ach sipwe eani lukuluk won enletin Jiowa me an we Kapas. Ifa ussun kopwe tongeni amarata om lukuluk won Jiowa me apochokkula pwisin en pwe kesap tupulo ren ekkewe fofforun otupotup me ekkewe kapas chofona, efisien ewe chon U ngeni i?

Jiowa a Silei ewe Enlet

5, 6. (a) Ifa ewe sile Jiowa a eani? (b) Sileien aramas a lollo ngeni sileien Jiowa?

⁵  Ewe Paipel a kkan affata pwe Jiowa a “forata mettoch meinisin.” (Efisus 3:⁠9) I “mi foriata lang me fonufan me sat, o pwal masouer meinisin.” (Foffor 4:24) Pokiten Jiowa, ewe Chon Forata, a silei ewe enlet ussun mettoch meinisin. Awewe chok: Ekieki mwo ussun emon mwan mi anapanapa me pwisin aueta imwan we, iwe, a mina iteiten ira meinisin me amani iteiten chufol meinisin. Epwe unusen sileiochu ena imw, iwe, an sile epwe watte seni sileien meinisin ekkewe chon katol. Aramas ra sileifichi minne ra anapanapa me forata. Iwe, pwal ussun chok, ewe Chon Fori a unusen sileifichi minne a forata.

⁶ Ewe soufos Aisea a kapas ussun ukuukun watten an Jiowa sile. Sia alleani: “Io a tongeni auku lolon lematau lon poun, ika auku kiannin lang ren eangen poun? Io a tongeni achufengeni pwulun won fanufan lon eu sepi ika kiloni ekewe chukutekia me ekewe chukutekison won eu kilo? Io a emweni Ngunun ewe Samol mi Lapalap, nge io sou ourour a aiti ngeni mine epwe fori? Io Kot a kutta an ourour seni pwe epwe saram letipan, io a pwal aiti ngeni mine a pwung? Nge io a atipachema pwe epwe wor an silelap me weweoch?” (Aisea 40:12-14) Enlet, Jiowa i emon “Kot mi silei mettoch meinisin” me “ewe mi unus lon an silelap.” (1 Samuel 2:3; Hiop 36:4; 37:16) Met ren kisikisin ach sile! Inaamwo ika a fokkun watte an aramas sile, nge ach wewe ussun forien Jiowa kewe ese tikeri pwal mwo nge “eu kukkun kinikinin an kewe fofor.” A ussun chok ach alollofengenni “eu mongunungun” me “eu chopulap watte.”​—Hiop 26:14.

7. Met Tafit a weweiti ussun sileien Jiowa, ina popun, met sipwe pwal sinneni?

⁷ Pokiten Jiowa a forikich, epwe pwung ach sipwe apasa pwe a sileifichikich. King Tafit a weweiti ei mettoch. A makkei: “Ai Samol mi Lapalap, ka fen sotuniei, o ka pwal sinei usi! Ka sinei ai fansoun momot, o pwal ai fansoun uta. Ka meefi usun ekiekin letipei seni touau. Ka fen kukutta ai we al, o pwal ai kokonelo, o ka sinei usun lapalapen ai fofor meinisin. Mwen fansoun och kapas a nom won chonmongoi, nengeni, Samol, ka fen sinei usun.” (Kol Fel 139:1-4) Pwungun pwe Tafit a weweiti pwe aramas repwe tongeni filata alen manauer​—⁠Kot a ngenikich ewe tufichin alleasochisi are alleasolapa i. (Tuteronomi 30:19, 20; Josua 24:15) Iwe nge, Jiowa a sileikich lap seni ach pwisin sileikich. A mochen ach sipwe sopwoch, iwe, a tongeni emmweniochu manauach. (Jeremaia 10:23) Enlet, ese wor emon sense, are emon sou tipatchem, are emon sou emmwen mi lipwakoch lap seni Jiowa pwe epwe aiti ngenikich ewe enlet me atipatchemakich me apwapwaikich.

Jiowa A Kapas Enlet

8. Pwata sia silei pwe Jiowa a kapas enlet?

⁸ A sokkofesen an emon silei minne mi enlet me an epwe kapas enlet, an epwe wenechar. Awewe chok, ewe Tefil, a filata pwe esap “uppwos lon ewe enlet.” (Jon 8:44) Nge Jiowa a “eani . . . enlet.” (Ekistos 34:6, NW) Ewe Paipel a kkan kakkapas ussun wenecharen Jiowa. Ewe aposel Paul a apasa pwe “Kot esap tongeni kapas chofona,” me Kot “mi enlet”. (Ipru 6:18; Taitos 1:2, NW) Wenechar a lamot lein lapalapen Kot kewe. Sipwe tongeni eani lukuluk won Jiowa pokiten an wenechar; ese otupu noun kewe chon tuppwol.

9. Ifa ussun iten Jiowa we a riri ngeni kapas enlet?

⁹ Pwisin itan we Jiowa a pwarata ussun an wenechar. Ewe it mi pin a wewe ngeni “I A Wiisen Efisata.” Weween, Jiowa ewe emon mi wiliiti ewe Chon Apwonueta an kewe pwon meinisin ekis me ekis. Ese wor pwal emon epwe tufichin fori ena mettoch. Pokiten Jiowa i ewe mi Unusen Tekia, ese wor eu mettoch epwe tongeni pinei pwonuetaan an kewe kokkot. Jiowa ese chok wenechar nge pwal I chok a wor ewe manaman me ewe tipatchem pwe epwe apwonueta meinisin minne a apasa.

10. (a) Ifa ussun Josua a kuna enletin Jiowa? (b) Ka fen kuna pwonuetaan menni lein an Jiowa kkewe pwon?

¹⁰ Josua, i emon me lein chommong mi kuna ekkoch foffor mi amwarar ra pwarata wenecharen Jiowa. Josua a nonnom lon Isip lupwen Jiowa a efisata ekkewe engol riaffou won ena muu, nge a akkom oesini me mwen eu me eu riaffou met epwe fis. Lein ekkewe oesini a pwonuta, Josua a kuna pwonuetaan an Jiowa kewe pwon pwe epwe angasalo ekkewe chon Israel seni Isip me emmweniirelong lon ewe Fonuen Pwon, me pwal ar pworaiti ekkewe sounfiun Keinan mi pochokkul mi u ngeniir. Lupwen epwele muchulo manauan, Josua a ereni ekkewe chinnap mwan lon ewe muun Israel: “Ami meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi murina meinisin a pwon ngenikemi. Iteiten ekewe pwon a eani ngenikemi ra pwonueta, nge esap wor eu me leir esap pwonueta.” (Josua 23:14) Inaamwo ika en won inisum kese kuna ekkewe manaman Josua a kuna, nge ka fen kuna wenecharen an Kot kewe pwon lon anein manauom?

Jiowa A Pwaralo ewe Enlet

11. Met a pwarata pwe Jiowa a mochen esilei ngeni aramas ewe enlet?

¹¹ Ekieki mwo ussun emon sam mi silelap nge ese kan foffos ngeni noun kewe. Kese kilisou pwe esap ina ussun Jiowa? Ren tong, a watte an Jiowa popporaus ngeni aramas. Ewe Paipel a eita ngeni ewe “Soukait.” (Aisea 30:20) Lon an tong, a pwal mwo nge poraus ngeni ekkewe rese mochen auseling ngeni. Awewe chok, Isikiel a wiiseni ewe wiis an epwe afalafala ir kewe Jiowa a silei resap mochen auseling. Jiowa a apasa: “Noun aramas, kopwe fokun feila ren chon Israel o ureniir ai kewe kapas.” Iwe, a ouroura: “Nge chon Israel resap mochen auselingok, pun resap pwal mochen auselingaei. Ir meinisin ra tipepochokul o tipeweires.” A fokkun weires wiisan we, nge ren tuppwol, Isikiel a unusen apwonueta wiisan we, iwe, ren an fori ena mettoch, a pwarata an Jiowa umoumoch. Ika epwe fis pwe epwe weires ngonuk wiisom we lon ewe angangen afalafal nge kopwe lukuluk won Jiowa, iwe, kopwe luku pwe epwe apochokkulok ussun an a fori ngeni noun we soufos Isikiel.​—Isikiel 3:4, 7-9.

12, 13. Ifa ussun Kot a esilei ngeni aramas poraus?

¹² Jiowa a mochen pwe “aramas meinisin repwe kuna amanauen ngunur o sineifichi minne mi enlet.” (1 Timoti 2:⁠4) A fos me ren ekkewe soufos, ekkewe chonlang, me pwal mwo nge ren Noun we mi achengicheng, Jises Kraist. (Ipru 1:1, 2; 2:⁠2) Jises a apasa ngeni Pailat: “Iei popun ua feitiu fonufan, pwe upwe pwarata usun ewe enlet. Iteiten aramas meinisin mi peni ewe enlet epwe auseling leuwei.” A suuk ngeni Pailat ewe tufichin kaeo seni Noun Kot we ewe enlet ussun an Jiowa we angangen amanaua aramas. Iwe nge, Pailat ese kan etiwa ewe enlet, iwe, ese pwal mochen kaeo seni Jises. Nge, Paipat a lukulukummang le polueni: “Meeta ewe enlet?” (Jon 18:37, 38) Solapan! Iwe nge, chommong ra auseling ngeni ewe enlet Jises a afalafala. A apasa ngeni noun kewe chon kaeo: “Nge a feioch mesemi, pwe ra kuna, o selingemi, pwe ra rong.”​—Mattu 13:16.

¹³ Ren ewe Paipel Jiowa a alukuluku ewe enlet, iwe, a akkawora ngeni aramas ekis meinisin. Ewe Paipel a pwarata enletin mettoch meinisin. A kapas ussun lapalapen Kot kewe, an kewe kokkot me alluk, me pwal enletin minne a tori aramasen fonufan. Jises a apasa lon an iotek ngeni Jiowa: “Om kapas mi enlet.” (Jon 17:17) Pokiten ena, ewe Paipel a sokko seni ekkewe ekkoch puk meinisin. I chok a mak fan emmwenien ewe Kot mi silei mettoch meinisin. (2 Timoti 3:16) Ina eu liffang mi auchea ngeni aramas, ewe puk noun Kot kewe chon angang ra fokkun aucheani. Epwe pwari tipatchem ach sipwe alleani iteiten ran.

Amwochuluku ewe Enlet

14. Ikkefa ekkoch mettoch Jiowa a apasa epwe fori, iwe, pwata sipwe luku i?

¹⁴ Sia mochen alamota minne Jiowa a erenikich lon an we Kapas. I epwe ussun chok minne a apasa epwe wiliti, me epwe fori minne a apasa epwe fori. Mei wor popun ach sipwe eani lukuluk won Kot. Sipwe tongeni luku lupwen Jiowa a apasa pwe epwe “liwini ngeni ir ekkewe rese sinei Kot, pwal ir ekkewe rese alleasochisi ewe kapas allim usun ach Samol Jises.” (2 Tesalonika 1:⁠8) Sipwe pwal tongeni luku Jiowa lupwen a apasa pwe a tongei ekkewe mi chechei minne mi pwung, lupwen a apasa pwe epwe fang ngeni ekkewe mi anganga ar luku manau esemuch, me lupwen a apasa pwe epwe amoielo metek, puchor, me pwal mwo nge malo. Jiowa a menlapei pochokkulen ewe saingoon pwon ren an ngeni ewe aposel Jon ei kapasen emmwen, a era: “Kopwe makketiu ei mettoch, pun ekkeei kapas mi tuppwel o enlet.”​—Pwarata 21:4, 5; An Salomon Fos 15:9; Jon 3:36.

15. Ikkefa ekkoch kapas chofona Satan a akkaea?

¹⁵ Satan a unusen sokko seni Jiowa. Ese asarama aramas, nge a kan otupur. Ren an epwe apwonueta letipan pwe epwe okullu aramas seni ewe fel mi limoch, Satan a akkaea chommong kapas chofona. Awewe chok, Satan a mochen ach sipwe luku pwe Kot a touau senikich me ese afanni ewe riaffou mi fiffis won fonufan. Iwe nge, ewe Paipel a pwarata pwe Jiowa a fokkun tongei aramas me oputa fofforingau me riaffou. (Foffor 17:24-30) Satan a pwal mochen pwe aramas repwe luku pwe a lus-mwaal an aramas achocho ngeni ekkewe mettochun ngun. Iwe nge, ewe Paipel a alukuluku ngenikich pwe “Kot mi pung, o esap monukalo ami angang me tong fan asengesin itan.” Pwal eu, a affata pwe “a liwini ngeni ir ekkewe mi kukutta i.”​—Ipru 6:10; 11:6.

16. Pwata a lamot ngeni Chon Kraist ar repwe mammasa me akkamwochu ewe enlet?

¹⁶ Ewe aposel Paul a mak ussun Satan: “Pun ewe koten ei fonufan a fen achunalo letipen ekkewe chon lukulukumang, pwe resap chuen tongeni kuna saramen ewe kapas allim usun ewe lingen Kraist, atewe mi lapalapeni lapalapen Kot.” (2 Korint 4:⁠4) Ussun chok If, ekkoch ra unusen tupulo ren Satan ewe Tefil. Pwal ekkoch ra tapweilo mwirin Atam, atewe ese tupulo nge a pwisin filata an epwe fetal won ewe alen alleasolap. (Juta 5, 11) Ina minne, a lamot ngeni chon Kraist ar repwe mammasa me akkamwochu ewe enlet.

Jiowa A Kutta Seni Aramas “Luku mi Imu Seni Fofforun Likotupotup”

17. Met sipwe fori fan iten ach sipwe kuna an Jiowa we chen?

¹⁷ Pokiten a unusen enlet lon mettoch meinisin, Jiowa epwe kutta seni ekkewe mi fel ngeni ar repwe pwal kapas enlet. Ewe sou kol a makkei: “Samol, io epwe siamu lon om we imw mangaku, io epwe nonnom won om we chukuchukuta mi fel? Ekkena ir mi fefetal lon minne mi enlet, o forata minne mi pung, ir mi apasata minne mi enlet seni lon letiper.” (Kol Fel 15:1, 2) Ese mwaal, ekkewe chon Jus mi eani ena kol mi kapas ussun ewe chuukun Jiowa mi pin ra chechemeni ewe Chuukun Saion, ikkewe King Tafit a uwouto pworun ewe pwon ngeni ewe imw mangaku a kauta ie. (2 Samuel 6:12, 17) Ewe chuuk me ewe imw mangaku a achema ngeniir ussun ewe leeni Jiowa a nonnom ie lon kapas monomon. Aramas repwe tongeni feilo ikkewe ie me tingorei an we chen.

18. (a) Met Kot epwe kutta seni ir kkewe mi mochen chiechi ngeni I? (b) Met sipwe kaeo lon ewe lesen mwirin ei?

¹⁸  A lamot ngeni emon mi mochen chiechi ngeni Jiowa an epwe kapas enlet “lon letipan,” nge sap seni chok ren tinauan. A lamot ngeni chiechien Kot kewe mi enlet ar repwe letip-wenechar me awora pisekin annetata ar “luku mi imu seni fofforun likotupotup,” pun fofforun enlet a popu seni ewe letip. (1 Timoti 1:5, NW; Mattu 12:34, 35) Emon chiechien Kot esap emon chon kapas chofona are chon otupotup, pun “ewe Samol a nioput . . . chon otupu aramas.” (Kol Fel 5:⁠6) Chon Pwarata Jiowa won unusen fonufan ra akkachocho ngeni ar repwe kapas enlet pwe repwe akkappiru ar Kot. Sipwe kaeo ussun ei mettoch lon ewe lesen mwirin ei.

Ifa Ussun Kopwe Polueni?

• Pwata Jiowa a silei ewe enlet ussun mettoch meinisin?

• Met a pwarata pwe Jiowa a kapas wenechar?

• Ifa ussun Jiowa a pwaralo ngeni aramas ewe enlet?

• Ren ewe enlet, ifa wiisach?

[Picture on page 20]

Ewe Koten enlet a silei mettoch meinisin ussun minne a forata

[Picture on page 23]

Epwe pwonuta an Jiowa kewe pwon