Unusen Lukuluku Jiowa Lon Ekkewe Fansoun Weires

“Kot mi ach leenien op o ach pochokkul, ach chon alilis mi tuppwol lon fansoun riaffou.”​—KÖLFEL 46:1.

1, 2. (a) Ifa ewe kapas awewe mi pwarata pwe ese naf ach sipwe chok apasa pwe sia eani lukuluk won Kot? (b) Pwata ese naf ach sipwe chok apasa pwe sia eani lukuluk won Jiowa?

EPWE mecheres ach sipwe apasa pwe sia eani lukuluk won Jiowa, lap seni ach sipwe pwarata ach luku ren ach kewe foffor. Awewe chok, ren langattam fansoun ekkewe kapas “Won Kot Sipwe Eani Lukuluk” ra mak won monien ewe U.S. a Lon 1956, ewe U.S. Congress a pasini ewe alluk mi era pwe ekkena kapas epwe itelapen ewe muun United States. Iwe nge, chommong aramas​—esap lon chok ena fonu nge won unusen fonufan​—ra lukuluku moni me pisek lap seni Kot.​—Luk 12:16-​21.

² Ren kich Chon Kraist, ese naf ach sipwe chok apasa pwe sia eani lukuluk won Jiowa. Ussun chok “luku mi imu seni foffor a malo,” iwe, esap pwal wor lamoten ach sipwe apasa pwe sia eani lukuluk won Kot ika ese pwapwalo ren ach kewe foffor. (Jemes 2:26) Lon ewe lesen mwen ei, sia fen kaeo pwe ach lukuluk won Jiowa epwe pwalo lupwen sipwe iotek ngeni me lupwen sipwe kutta emmwen seni an we Kapas me an we mwicheich. Iwe iei, sipwe kaeo ifa ussun sipwe tongeni apwonueta ekkena ulungat mettoch lon ekkewe fansoun weires.

Lupwen a Pout Seni Emon An Angang are a Kukkun Peioffun

3. Ikkefa ekkewe osukosuk lon pekin moni ra tori noun Jiowa kewe chon angang lon ekkeei “fansoun weires,” iwe, pwata sia silei pwe Kot a mochen alisikich?

³ Lon ekkeei “fansoun weires,” a torikich Chon Kraist aurekin manauach lon pekin moni ussun chok ekkewe ekkoch aramas. (2 Timoti 3:1) Ina minne, epwe tongeni fis pwe sipwe tou seni wisach lon pekin angang. Are sipwe angang weires langattam fansoun ran me ran nge a chok kukkun peioffuch. Fan ena sokkun weires, eni epwe weires ngenikich ach sipwe ‘tumunufichi ach famili.’ (1 Timoti 5:8) Ewe Kot mi Unusen Tekia epwe ita mochen alisikich lon ekkena sokkun fansoun? Fokkun ewer! Pwungun pwe Jiowa esap ti senikich weiresin manauach meinisin lon ei ototen mettoch. Iwe nge, ika sipwe eani lukuluk won i, alon Kol Fel 46:1 epwe pwonuta: “Kot mi ach leenien op o ach pochokkul, ach chon alilis mi tuppwel lon fansoun riaffou.” Nge ifa ussun sipwe tongeni pwarata pwe sia unusen eani lukuluk won Jiowa atun epwe nafangau moni?

4. Lupwen sia kuna osukosuk lon pekin moni, met sipwe tongeni iotek ussun, me ifa ussun Jiowa epwe polueni ekkena sokkun iotek?

⁴ Sipwe tongeni pwarata ach lukuluk won Jiowa ren ach ikkiotek ngeni. Nge met sipwe tongeni iotek ussun? Iwe, lupwen epwe torikich osukosuk lon pekin moni, eni epwe lamot ngenikich tipatchem. Iwe, tingorei Jiowa ussun! An Jiowa we Kapas a alukulukukich: “Are emon leimi mi osupwang ren tipatchem, iwe, epwe tingor ren Kot, ewe mi limmol ngeni aramas meinisin, nge ese laleiti emon; iwe, epwe angei.” (1 Jemes 1:5) Ewer, tingorei Jiowa fan iten tipatchem​—ach tufichin aea ach sile, weweiti poraus, me mirit​—pwe epwe pwung filiach kewe. Semach we mi tong lon lang a alukuluku ngenikich pwe epwe auseling ngeni ena sokkun iotek. A mochen an epwe awenechara alen ir kewe mi eani lukuluk won I ren unusen letiper.​—Kol Fel 65:2; An Salomon Fos 3:5, 6.

5, 6. (a) Pwata sipwe tongeni kutta alillis seni an Kot we Kapas le pwakini osukosuk lon pekin moni? (b) Met sipwe tongeni fori pwe sipwe akukkunatiu aurek lupwen a pout senikich ach angang?

⁵ Ach kutta emmwen seni an Kot we Kapas, ina pwal eu mettoch epwe pwarata pwe sia eani lukuluk won Jiowa. An kewe achechem mi tipatchem lon ewe Paipel a “fokkun enlet.” (Kol Fel 93:5) Inaamwo ika a mak lap seni 1,900 ier lom, nge ena puk mi for fan emmwenien Kot a masou ren emmwen me mirit mi tongeni alisikich le pwakini osukosuk atun a nafangau tufichin manauach. Iwe, sipwe kaeo ussun ekkoch poraus mi tipatchem seni Paipel.

⁶ Lom lom, emon mi tipatchem itan King Salomon a weweiti ena mettoch: “Emon mi angang weires a mour kinamwe, ika a wor ekis chok anan ika chommong. Nge eman mi fokun woumong esap tongeni mour kinamwe ren an aureki woun.” (Än Salomon Afalafal 5:12) A lamot fansoun me moni pwe sipwe limeti, forsefalli, me tuttumunu pisekich kewe. Iwe, ika a pout senikich ach angang, eni sipwe tongeni nennengeni lapalapen manauach me sotun esinna lefilen minne a lamot me mocheniach kkewe. Ren ach sipwe akukkunatiu ach aurek, eni epwe murinno ach sipwe fori ekkoch siwil. Sipwe eis: epwe tufich ach sipwe amecheresi manauach, eni ren ach sipwe mwokut ngeni eu imw mi kukkun seni imwach we iei, are likitalo ekkoch pisekich kewe?​—Mattu 6:22.

7, 8. (a) Ifa ussun Jises a pwarata an weweiti pwe aramas mi rese unusoch repwe kan aureki pisekir kewe? (Nengeni ewe footnote) (b) Ifa an Jises kapasen fon mi mirit ren ifa ussun sisap kon aurek?

⁷ Lon ewe Afalafal won ewe Chuuk, Jises a fonou: “Oute aureki usun manauemi, meeta oupwe ani, are meeta oupwe unumi; are pwal usun inisimi, meeta oupwe ufouf.”b (Mattu 6:25) Jises a silei pwe aramas mi rese unusoch ra kan ekkekieki ussun tufichin manauer. Iwe nge, ifa ussun “sisap aureki” ussun ekkena mettoch? Jises a apasa, “Oupwe kuttafichi lom an we mu.” Ese lifilifil menni sokkun osukosuk epwe torikich, nge a lamot ach sipwe akkomwa ach fel ngeni Jiowa lon manauach. Ika sipwe fori ena, tufichin manauach meinisin epwe “kapach” ngenikich seni Semach we lon lang. A wor an tufichin awora ngenikich meinisin minne mi lamot.​—Mattu 6:33.

⁸ Jises a awora pwal eu kapasen fon: “Oute aureki usun leesor, pun leesor epwe pwisin aureki.” (Mattu 6:34) Esap tipatchem ach sipwe kon aureki ussun met epwe tongeni fis leesor. Emon sou kaeo ena poraus a apasa: “Lap ngeni fansoun meinisin minne sia niuokkusiti ussun mwach kan ese fisita.” Ach tipetekison le alleasochisi an ewe Paipel kapasen fon pwe sipwe akkomwa lon manauach minne mi lamot, me pwakini minne a torikich ran me ran, epwe tongeni alisikich le tumunukich seni ach sisap awatte ach aurek.​—1 Peter 5:6, 7.

9. Lupwen sipwe osukosuk pokiten nafangauen moni, ifa ewe alillis sipwe tongeni kuna lon ekkewe puk seni ewe “chon angang mi tuppwol me tipatchem”?

⁹ Lupwen epwe fis ngenikich osukosuk pokiten nafangauen moni, sipwe pwal tongeni pwarata ach lukuluk won Jiowa ren ach sipwe kutta alillis seni ekkewe puk mi popu seni “ewe chon angang mi tuppwol o tipatchem.” (Mattu 24:45) Fan ekkoch, a mak lon ewe chassi Awake! ekkoch poraus mi alisi aramas le likiitu fan osukosuken nafangauen moni. Ewe poraus “Esor Om Angang​—Met Epwe Alisuk?” lon ewe minen Akos 8, 1991, a makkei wanu kapasen emmwen mi fen alisi chommong ar repwe itepok me ruuepek lon pekin moni me memeef lupwen ese wor ar angang.c Pwungun pwe a lamot pwe ekkena kapasen emmwen repwe fiti ewe ekiek pwung ussun lamoten moni. Ei lesen a mak lon ewe poraus “Och Mettoch mi Lamot Lap Seni Moni,” ewe a mak lon ena chok chassi.​—Än Salomon Afalafal 7:12.

Lupwen Sipwe Lolilen Ussun Apwangapwangen Inisich

10. Ifa ussun porausen King Tafit a pwarata pwe epwe pwung ach sipwe eani lukuluk won Jiowa lupwen epwe urikich och semmwen?

¹⁰ Epwe mirit ach sipwe eani lukuluk won Jiowa lupwen epwe urikich och semmwen watte? Fokkun ewer! Jiowa a tongei ir kewe mi semmwen lein noun kewe aramas. Iwe, a mochen alisir. Ren chok awewe, ekieki ussun King Tafit. Eni a uri och semmwen watte lupwen a mak ussun an Kot foffor ngeni emon chon tuppwol mi semmwen. A apasa: “Ewe Samol epwe tumunu i lon an we kien samau. Ka apochokkula i seni an kewe apwangapwangen samau meinisin.” (Kol Fel 41:1, 3, 7, 8) A fokkun pochokul an Tafit lukuluk won Kot, iwe, mwirin och fansoun ewe king a chikareta seni an semmwen. Iwe nge, ifa ussun sipwe tongeni pwarata ach luku Kot lupwen epwe urikich och semmwen?

11. Lupwen epwe urikich och semmwen, met sipwe tongeni tingor seni Semach we lon lang?

¹¹ Lupwen epwe urikich och semmwen, sipwe tongeni pwarata ach eani lukuluk won Jiowa ren ach sipwe tingormau ngeni lon iotek fan iten alillis pwe sipwe likiitu. Sipwe tongeni tingorei i pwe epwe alisikich pwe sipwe aea “tipatchem” pwe sipwe achocho le tori ukukun pochokkulen inis nonnomun manauach a atufichikich ach sipwe eani. (An Salomon Fos 3:21) Sipwe pwal tongeni tingorei i an epwe alisikich pwe sipwe mosonottam me mokurechou fan ewe semmwen. Iwe, lap seni meinisin, sia mochen tingor pwe Jiowa epwe alikiitukich, iwe, epwe ngenikich pochokkul pwe sipwe tuppwol ngeni me itepok me ruuepek, ese lifilifil met epwe fis. (Filipai 4:13) Ach sipwe akkamwochu ach tuppwol ngeni Kot a lamot watte lap seni ach sipwe akkamwochu manauach lon ei otot. Ika sipwe tuppwol, ewe Chon Efeiochu mi Lapalap epwe ngenikich manau esemuch lon eu inis mi unusoch me unusen pochokkul.​—Ipru 11:6.

12. Ikkefa ekkewe popun alongolongun alluk seni Paipel repwe tongeni alisikich le filioch lupwen sipwe kutta alillis seni emon tokter?

¹² Ach luku Jiowa a pwal amwokutukich le kutta emmwen seni an Kapas, ewe Paipel. Ekkewe popun alongolongun alluk lon ewe Paipel repwe tongeni alisikich ach sipwe filioch ussun ekkewe sokkun alillis sipwe angei lon pekin safei. Awewe chok, pokiten sia silei pwe ewe Paipel a pinei “angangen roong,” sipwe ti senikich ekkewe sokkun alillis mi fiti angangen roong. (Kalesia 5:19-21; Tuteronomi 18:10-12) Iei pwal eu poraus ussun an ewe Paipel tipatchem: “Eman mi wewemang a luku mettoch meinisin, nge eman mi mirit a nengeni ia epwe feila ie.” (An Salomon Fos 14:15) Ina minne, lupwen sipwe ekieki ussun ewe sokkun alillis sipwe nguuri seni emon tokter ika pioing, epwe tipatchem ach sipwe kutta poraus mi wesewesen pwung lap seni ach sipwe “luku iteiten kapas meinisin.” Ena sokkun “ekiek pwung” epwe tongeni alisikich le atittinafichi minne sipwe fori me filata minne a alongolong won ach sile.​—Taitos 2:12.

13, 14. (a) Ikkefa ekkewe poraus ussun ekkoch semmwen ra mak lon ekkewe chassi Leenien Mas me Awake!? (b) Ifa ewe kapasen fon ren met emon epwe tongeni fori le mokurechou fan semmwen mi chok nonnom a mak lon ewe Awake!, minen January 22, 2001?

¹³ Sipwe pwal tongeni pwarata ach lukuluk won Jiowa ren ach sipwe kakkaeo ekkewe puk seni ewe chon angang mi tuppwol. Fan ekkoch a katou seni ekkewe chassi leenien Mas me Awake! ekkoch poraus mi titchik ussun chommong sokkopaten apwangapwangen inis me semmwen.d Fan ekkoch, ekkena chassi ra eani poraus seni ekkewe mi fen uriir ekkena sokkun apwangapwangen inis, semmwen, me tterin inisir. Pwal eu, ekkoch poraus ra awora emmwen seni Paipel me pwal kapasen fon ussun met sipwe tongeni fori ika a urikich och semmwen ese tongeni wes.

¹⁴ Ren chok awewe, ewe Awake!, minen January 22, 2001, a eani fitu poraus fan ewe itelap “Aurur fan iten Ekkewe mi Semmwen”. A awora alillis seni Paipel me pwal ekkoch poraus me sile ewe sou mak a angei seni an fos ngeni ekkewe mi uriir ewe semmwen ren chommong ier. Ewe poraus “Likiitu Fan Om Semmwen​—Ifa Ussun?” a awora ei kapasen emmwen: Ukukun om tufich kopwe kaeo ussun om semmwen. (An Salomon Fos 24:5) Filata ekkewe mettoch kopwe achocho ngeni, kapachelong om kopwe alisi ekkewe ekkoch, nge kopwe weweiti pwe eni kosap tongeni apwonueta minne mi tufich ngeni ekkewe ekkoch. (Foffor 20:35; Kalesia 6:4) Kesap alaemonulo. (An Salomon Fos 18:1) Lupwen ekkewe ekkoch ra etto chuuruk, fori pwe epwe eu fansoun apwapwa ngeniir. (An Salomon Fos 17:22) Lap seni meinisin, akkamwochu om ririoch ngeni Jiowa me chon ewe mwichefel. (Nahum 1:7; Rom 1:11, 12) Sise fen kilisou ren ekkewe kapasen emmwen mi lukuchar Jiowa a awora me ren an we mwicheich?

Lupwen a Chok Nonnom Och Apwangapwangen Fituk

15. Pwata ewe aposel Paul a tongeni pworacho lon an fiffiu ngeni apwangapwangen fitukan mi ese unusoch, iwe, met sia tongeni achifoua?

¹⁵ Ewe aposel Paul a makkei: “Esor och mi murinno mi nonnom lon ngang, lon fitukei.” (Rom 7:18) Paul a fen pwisin silei weiresin an epwe fiu ngeni mochenien me apwangapwangen ewe fituk mi ese unusoch. Iwe nge, Paul a pwal luku pwe epwe tongeni pworacho ngeni. (1 Korint 9:26, 27) Ifa ussun? Ren an epwe unusen eani lukuluk won Jiowa. Ina ewe popun Paul a tongeni apasa: “Ngang emon aramas mi chok riaffou! Io epwe angasaei seni ei inisin malo? Kilisou ngeni Kot ren Jises Kraist ach Samol!” (Rom 7:24, 25) Nge epwe ifa ussuch? Kich mi pwal fiffiu ngeni apwangapwangen fitukach. Fansoun sipwe fiffiu ngeni ekkena sokkun apwangapwangen fitukach, epwe mecheres an epwe kukkunulo ach lukuluk, me ekieki pwe sisap tongeni sopwoch. Nge Jiowa epwe alisikich ika, ussun chok Paul, sipwe unusen eani lukuluk won I, nge sap chok won pwisin ach pochokkul.

16. Lupwen sia okkosukosuk ren och apwangapwangen fitukach met a lamot ach sipwe iotek ussun, me met sipwe fori ika sipwe turutiusefal?

¹⁶ Lupwen sisap tongeni muttir pworaiti och apwangapwangen fitukach, sipwe tongeni pwarata pwe sia eani lukuluk won Jiowa ren ach sipwe iotek ngeni. A lamot ach sipwe tingor, pwal mwo nge siongau ngeni Jiowa ren alillisin an we ngun mi fel. (Luk 11:9-13) Sipwe tongeni titchik le tingor pwe sipwe tongeni nemenifichi inisich, eu uwan an Kot we ngun mi fel. (Kalesia 5:22, 23) Met sipwe fori ika sipwap turutiusefal? Iwe, sisap fangeta. Sisap achanu le iotek ren tipetekison ngeni ach Kot mi umoumoch, me tingor an omusomus me alillis. Jiowa esap tunalo, are kul seni eu letip mi “ta” ren mengiringir. (Kol Fel 51:17) Ika sipwe iotek ngeni seni lon lelukach mi letip-wenechar, Jiowa epwe alisikich le u ngeni ekkewe sossot.​—Filipai 4:6, 7.

17. (a) Pwata epwe alisikich ach sipwe ekieki ussun meefien Jiowa ussun ena apwangapwangen fituk sia fiffiu ngeni? (b) Ikkefa ekkewe wokisin sipwe tongeni amwochulukun ika sia fiffiu ngeni songekai? ren ach sipwe nemenifichi tinauach? ren ach sipwe u ngeni ekiekin katol ekkewe minen apwapwa mi masou ren lisou-mwaal me fofforun akkachofesa?

¹⁷ Sipwe pwal tongeni pwarata ach lukuluk won Jiowa ren ach sipwe kutta alillis seni an we Kapas. Ren ach sipwe nounou eu Bible concordance are ewe Watch Tower Bible Publication Index mi katou lon ewe Leenien Mas, minen Tisemper iteiten ier, sipwe tongeni kutta poluen ei kapas eis, ‘Met meefien Jiowa ussun ewe apwangapwangen fituk ua fiffiu ngeni?’ Ach sipwe ekieki ussun meefien Jiowa epwe tongeni apochokkula ach mochen apwapwai i. Iwe, eni sipwe poputa le eani meefian, weween, sipwe oput minne a oput. (Kol Fel 97:10) Ekkoch ra kuna pwe a murinno ngeniir ar repwe amwochulukun ekkewe wokisin mi kapas ussun ekkewe sokkun apwangapwangen fituk ra fiffiu ngeni. Sia resin achocho le aukatiu ach songekai? Iwe, sipwe tongeni amwochulukun ekkeei wokisin, awewe chok, An Salomon Fos 14:17 me Efisus 4:31. A weires ach sipwe nemeniochu tinauach? Sipwe tongeni amwochulukun An Salomon Fos 12:18 me Efisus 4:29. Sia kan kakkatol ewe sokkun pwapwaan fonufan mi ngau ussun kachito mi masou ren lisou-mwaal me fofforun akkachofesa? Sipwe tongeni achocho le chechemeni Efisus 5:3 me Kolose 3:5.

18. Pwata sisap sau le kutta alillis seni ekkewe elter pwe sipwe pworacho ngeni apwangapwangen fitukach?

¹⁸ Ach sipwe kutta alillis seni ekkewe elter mi seikita ren ewe ngun mi fel, ina pwal eu mettoch epwe pwarata pwe sia kutta alillis seni Jiowa. (Foffor 20:28) Pwungun pwe ekkeei mwan, ir “liffang ngeni aramas” seni Jiowa me ren Kraist pwe epwe tumunu noun kewe siip. (Efisus 4:7, 8, 11-14) Pwungun pwe eni esap mecheres ach sipwe tingor alillis pwe sipwe fiffiu ngeni ach kewe apwangapwang. Eni sipwe sau, iwe, sipwe meefi pwe ekkewe elter repwe ekiekingau ussuch. Nge ese mwaal ekkeei mwan mi asimau lon pekin ngun repwe sufolutikich pokiten ach pwora le tingor alillis. Pwal eu, ekkewe elter ra lapalapeni lapalapen Jiowa kewe lon ar kewe foffor ngeni ekkewe siip. Eni ar kewe kapasen fon mi murinno mi aururu me pwal ekkewe kapasen emmwen seni an Kot we Kapas, ina ewe sokkun alillis mi lamot ngenikich pwe epwe apochokkula ach achocho le pworacho ngeni ach kewe apwangapwang.​—Jemes 5:14-​16.

19. (a) Ifa ussun Satan a sotun aea apilukulukungauen ei otot? (b) Met weween ach sipwe eani lukuluk, me met sipwe achocho ngeni?

¹⁹ Sisap fokkun monuki pwe Satan a silei pwe a mwochomwoch an fansoun. (Pwarata 12:12) A mochen aea ewe apilukulukungauen manau won ei fonufan pwe epwe aletipengauakich pwe sipwe fangeta. Amwo sipwe achifoua minne a mak lon Rom 8:35-39, a era: “Io epwe aimukichelo seni ewe tongen Kraist? Riaffou, are weires, are ninni, are lengita, are selelo, are feiengau, are katilas? . . . Apw, nge sia fakkun pworachofochofoch ngeni ekkeei mettoch meinisin ren ewe mi tongeikich. Pun ua fakkun meefi pwe sap malo are manau, sap chonlang are mu, sap mettoch mi nonnom iei, are mettoch mi epwe feito, are manaman, sap mettoch mi tekia, are mettoch mi tekison, are pwal och lon masouen lang me fonufan, epwe tongeni aimukichelo seni ewe tongen Kot mi nonnom lon Kraist Jises ach Samol.” Met ren murinnoon ena poraus mi pwarata lukuluk won Jiowa! Iwe nge, ena sokkun lukuluk a lu seni och chok memeef. Nge epwe eu sokkun lukuluk mi fiti filioch lon manauach ran me ran. Ina minne, sipwe unusen eani lukuluk won Jiowa lon ekkewe fansoun weires.

En mi Chechemeni?

• Lupwen epwe torikich osukosuk pokiten nafangauen moni, ifa ussun sipwe tongeni pwarata pwe sia eani lukuluk won Jiowa?

• Ifa ussun sipwe tongeni pwarata lukuluk won Jiowa lupwen epwe urikich och semmwen?

• Lupwen sia okkosukosuk ren och apwangapwangen fituk, ifa ussun sipwe tongeni pwarata pwe sia eani lukuluk won Jiowa?

[Sasing lón pekin taropwe 27]

Ika a pout senikich ach angang, eni epwe eu alen mirit ach sipwe atittina nonnomun manauach

[Sasing lón pekin taropwe 28]

Porausen Loida a pwarata ifa ussun an emon eani lukuluk won Jiowa epwe alisi emon pwe epwe likiitu

[Sasing lón pekin taropwe 30]

Sisap sau le tingor alillis pwe sipwe pworacho ngeni apwangapwangen fitukach