Kukkutta Jiowa, Ewe Sou Atittina Letipen Aramas
“Oupwe kuttaei pwe oupwe manau.”—AMOS 5:4.
JIOWA KOT a ereni ewe soufos Samuel: “Aramas ra nennengeni lapalapen mesen eman, nge ngang ua nennengeni leluken aramas.” (1 Samuel 16:7) Ifa ussun Jiowa a “nennengeni leluken aramas”?
2 Lon ewe Paipel, fan chommong ewe letip a liosueta lapalapen emon me lon—minne a tipeni, ekiekin kewe, meefian kewe, me minne a acheni. Ina minne, lupwen ewe Paipel a apasa pwe Kot a nennengeni letipen aramas, a wewe ngeni pwe ese chok nennengeni ewe aramas me lukun nge a atittina lapalapan me lon.
Kot a Atittina Israel
3 Lupwen ewe Sou Atittina letipen aramas a nennetiu won ekkewe engol einangen muun Israel lon ranin Amos kewe, met a kuna? Amos 6:4-6 a kapas ussun ekkewe mwan mi ‘kon won peet mi fout seni ngiin alafant me asoso won ekkewe leenien mot mi pwotete.’ Ra “ochei fituken nienifon sip me fituken nienifon kow mi kitinup.” Ekkena mwan ra “fori pisekin likettik” me “un wain lon sepi.”
4 Lupwen sia keran alleani, ussun ita nge a murinno lapalapen ena poraus. Lon kinamween imwer kewe mi lingoch, ekkewe mi woummong ra pwapwaesini aner me unumer mi murinno seni meinisin me rongorong kol me won pisekin nikattik mi murinno seni meinisin. Ra pwal eani ekkewe “peet mi fout seni ngiin alafant.” Ekkewe sou kaeo pisekin lom lom ra kuna ekkoch pisek mi fal seni ngiin alafant lon Sameria, iolapen ewe muun Israel. (1 King 10:22) Ese mwaal, chommong leir ra pin pacheta ngeni ekkewe leenien mot me tencho.
5 Jiowa a ita oput pwe a murinno nonnomun ekkewe chon Israel, ar pwapwaesini mongo mi anno, ar ukkunumi wain mi murinno, me ar auseling ngeni kol mi ngingioch? Aapwi! Pwungun pwe I a awora ekkena mettoch pwe aramas repwe pwapwaiti. (1 Timoti 6:17) Jiowa a letipengau ren ar kewe mocheniangau, letiper mi ngau, ar sufolungaueiti Kot, me nafangauen ar tongei chiener kewe chon Israel.
6 Lo, lo, repwe mairu ‘ekkewe mi asoso won ar kewe leenien mot, ochei fituken siip, ukkunumi wain, me fori ekkewe pisekin likettik fan iten ar repwe kol.’ Emon a kapas eis ngeni ekkena mwan: “Ami ousap mochen luku pwe ewe ranin feiengau a arap?” Repwe ita lolileniesini minne a fiffis lon Israel, nge rese “letipeta pwe Israel a tala.” (Amos 6:3-6) Inaamwo ika a woummong ewe muu, nge Kot a kuna pwe Josef—are Israel—a ngangauolo lon pekin ngun. Iwe nge, ekkewe aramas ra foffori ar kewe foffor ran me ran, nge rese meefi och. A pwal ina ussun chommong aramas ikenai. Eni repwe apasa pwe a weires ach ei fansoun, nge pokiten ese wesewesen kku pwisin manauer, resap lolilen ussun minne a fiffis ngeni ekkewe ekkoch aramas me rese ekieki ussun ekkewe mettochun ngun.
Israel—Eu Muu mi Ngangauolo
7 Ewe puken Amos a kapas ussun eu muu mi ngangauolo, inaamwo ika ussun ita nge a woummong. Pokiten ar tunalo ekkewe kapasen ourour seni Kot me rese pwal apwungu ar ekiek, Jiowa esap chuen tuttumunur seni chon oputer. Ekkewe chon Asiria repwe supuriir seni me won ar kewe leenien kokkon mi for seni ngiin alafant pwe repwe eolo. Esap chuen kinamwe manauer!
8 Pwata a ngangauolo ekkewe chon Israel? Ei lapalap a poputa le fis lon 997 B.C.E., lupwen Reopoam a siwili seman we King Solomon pwe epwe kingen ekkewe engol einangen Israel mi imulo seni ekkewe einangen Juta me Peniamin. Jeropoam, “noun Nepat” i ewe aemonun kingen ekkewe engol einangen muun Israel. (1 King 11:26) Jeropoam a etipetipa ekkewe aramas fan nemenian pwe epwe kon weires ngeniir ar repwe sai ngeni Jerusalem pwe repwe fel ngeni Jiowa ikewe ie. Iwe nge, ese wesewesen lolileniesini ekkewe aramas. Nge a ekiekin tumunu minne a lamot ngeni pwisin i. (1 King 12:26) Jeropoam a niuokkus pun ika ekkewe chon Israel repwe kan sassai ngeni ewe imwenfel lon Jerusalem fan iten ekkewe fetellap mi asamolu Jiowa mi fiffis iteiten ier, iwe, lo, lo, lo, resap chuen tuppwol ngeni ewe muun Israel nge repwe tuppwol ngeni muun Juta. Ren an epwe pinei ena mettoch, Jeropoam a iseta ruu uluulun appanen kou mi for seni kolt, eu lon Tan me ewe eu lon Petel. Ina minne, ewe fel ngeni kou a wiliti lamalamen ewe muun Israel.—2 Kronika 11:13-15.
9 Jeropoam a sotun fori minne epwe epinalo ena esin lamalam mwen mesen aramas. A akkota pwe epwe fis ekkoch fetellap mi ussun chok ekkewe fetellap mi fiffis lon Jerusalem. Lon 1 King 12:32, sia alleani: “Iwe, Jeropoam a pwal filata eu ranin chulap lon engol me limuen ranin ewe awaluen maram, usun ewe ranin chulap mi fis lon Juta. Iwe, a asor won ewe rongen asor me lon Petel.”
10 Jiowa ese fokkun tipeeu ngeni ekkena sokkun fetellapen lamalam mi chofona. A wesewesen affata meefian me ren Amos lap seni ipuku ier mwirin, atun nemenien Jeropoam II, ewe emon mi wiseni ewe wis kingen ekkewe engol einangen muun Israel orun 844 B.C.E. (Amos 1:1) Me ren Amos 5:21-24, Kot a apasa: “Ua oput ami kewe chulap mi pin. Usap fokun pwapwaitiir. Inamwo ika oua eani asoren kek ngeniei me asoren mongo, ngang usap etiweer. Usap pwal nenengeni ami eani asoren kinamwe noumi monun asor mi kitinup. Oupwe atoaua seniei akurangen ami kol, usap mochen rongorong ngingin noumi kitar. Nge oupwe eanifochei pwunguoch ngeni ekewe chon woungau, usun eu chanpupu a pupufochofoch. Oupwe chok fori mine a pwung, usun koluk a chok putiu.”
Minne a Lollo ngeni Lon Ach Ei Fansoun
11 A ffat pwe Jiowa a nennengeni letipen ekkewe mi fiffiti an Israel kewe ranin chulap me oputa ar kewe foffor me asor. Pwal ussun chok ikenai, Kot a oputa an Kristendom kewe fetellap mi popu seni ekkewe lamalamen lukun, awewe chok, apwapwaan Krismas me Easter. Ren ekkewe chon fel ngeni Jiowa, esap tongeni fis chiechifengen lefilen pwung me atai alluk, esap wor iokfengen lefilen saram me rochopwak.—2 Korint 6:14-16.
12 Iwe, mei wor pwal ekkoch fofforun lamalam ekkewe chon Israel mi fel ngeni ewe appanen kou mi wewe chok me minne a pwal fis lon Kristendom. Inaamwo ika ekkoch mi era pwe ir Chon Kraist ra etiwa ewe enlet seni kapasen Kot, nge an Kristendom fel ese popu seni tong enlet ngeni Kot. Ika a tongei Kot, epwe ekilapei an epwe fel ngeni Jiowa “ren ngun me enlet” pun ina ewe sokkun fel epwe apwapwai i. (Jon 4:24) Pwal eu, Kristendom ese “eanifochei pwunguoch usun eu chanpupu a pupufochofoch, me minne mi pwung, usun koluk a chok putiu.” Nge a kan ameef ngeni aramas pwe a lamot-kisikis ewe manau mi limoch Kot a kan kukkutta seni aramas. Iwe, a mumuta lisou-mwaal me pwal ekkoch tipis watte, iwe, a pwal mwo nge epini pupulu lefilen mwan me mwan me pwal fefin me fefin!
“Tongei Minne mi Murinno”
13 Kot a apasa ngeni meinisin mi mochen fel ngeni Jiowa ren ewe lapalap mi apwapwai i: “Oput minne mi ngau, me tongei minne mi murinno.” (Amos 5:15, NW) Tong me oput, ir sokkun memmeef mi pochokkul ra popu seni ewe letip lon kapas monomon. Pokiten ewe letip a fokkun otuputup, a lamot ach sipwe tuttumunu. (An Salomon Fos 4:23; Jeremaia 17:9) Ika sipwe mut ngeni letipach an epwe mocheniaiti minne ese pwung, epwe tongeni fis pwe sipwe poputa le tongei minne mi ngau me oputa minne mi murinno. Iwe, ika sipwe apwonueta ach kewe mocheniangau ren ach sipwe foffori tipis, ach achocho are tinikken esap achasefallikich ngeni Kot. Ina minne, sipwe iotek fan iten an Kot alillis pwe sipwe “oput minne mi ngau, me tongei minne mi murinno.”
14 Sap meinisin chon Israel ra foffori minne mi ngau mwen mesen Jiowa. Awewe chok, Hosia me Amos ra ‘tongei minne mi murinno’ me angang ngeni Jiowa fan tuppwol lon ewe wis soufos. Pwal ekkoch ra fori eu pwon pwe repwe wiliti chon Nasir. Atun ra fori ena, ra apini seniir uwan ewe iran krep, akkaeuin, wain. (Numperis 6:1-4) Met meefien ekkewe ekkoch chon Israel ussun chokkewe mi pennukuolo pwisin letiper me akkachocho ngeni ekkewe mettoch mi murinno? Poluen ena kapas eis mi fokkun amairu a pwarata ukukuun watten an a ngangauolo ewe muu lon pekin ngun. Amos 2:12 a apasa: “Nge ami oua aunu ngeni ekewe Nasir wain o alluku ngeni ekewe soufos pwe resap osuni.”
15 Lupwen repwe kuna tuppwolun ekkewe chon Nasir me ekkewe soufos, ekkena chon Israel repwe ita meefi sau me siwili alen manauer. Iwe nge, pokiten ese naf ar tong, ra sotun etipetipa ekkewe mi tuppwol pwe resap chuen alingalo Kot. Iwe, sisap pesei chienach kewe Chon Kraist mi fiti ewe angangen pioneer, ekkewe misineri, ekkewe elter mi saifetal, are chon angang lon Petel ar repwe ukutiu seni ar angang ngeni Jiowa full-time fan iten chok ar repwe liwiniti ewe sokkun manau lap ngeni aramas ra manaueni. Iwe nge, sipwe peser ar repwe likiitu lon ekkena wis mi murinno!
16 Lon ranin Amos we, inaamwo ika chommong chon Israel ra pwapwaesini chommongun pisekir kewe, nge rese “pisekisek ren Kot.” (Luk 12:13-21) Samasamer kewe ra mongo manna chok lon ewe fonu poon ukukuun 40 ier. Rese ochei fituken kou mi eani aner mongo lon ekkewe leenien amongouni man are liseangas le kokkon won peet mi for seni ngiin alafant. Iwe nge, a pwung alon Moses ngeniir: “Iwe, ewe Samol mi Lapalap ami we Kot a afeiochu angangen poumi meinisin. I a tumwunu ami saifetal lon ewe fanuapo mi watte. . . . a etikemi lon ekei faik ier, pwe ousap osupwang ren och mettoch.” (Tuteronomi 2:7) Ewer, lon ewe fonu poon ekkewe chon Israel rese fokkun osupwang ren minne a lamot ngeniir. Akkaeuin, a kawor ngenir an Kot tong, tumun, me alillis!
17 Jiowa a achema ngeni pilon Amos kewe pwe I a emmweni samasamer kewe ngeni ewe fonuen pwon me alisiir pwe repwe akkufu ekkewe chon u ngeniir meinisin. (Amos 2:9, 10) Nge ifa ewe popun Kot a emmweni ekkewe chon Israel seni Isip tori ewe fonuen pwon? Epwe ita fan iten ar repwe manaueni ewe sokkun manau mi mecheres me likitalo ar we Kot? Aapwi! Nge a fori ena mettoch pwe repwe ngaselo le fel ngeni I ussun aramas mi limelimoch lon pekin ngun. Nge chon ekkewe engol einangen muun Israel rese oputa minne mi ngau me tongei minne mi murinno. Ra alingalo ekkewe ululuun, nge sap Jiowa Kot. A ifa me watten asauen ena foffor!
A Tori Fansoun Jiowa Epwe Apwungur
18 Kot esap tunalo fofforingauen ekkewe chon Israel. A affata an ekiek lupwen a apasa: “Nge pokiten ami kewe tipis ra kon fokun ngau, iei mine upwe fokun apwungukemi.” (Amos 3:2) Ekkena kapas epwe amwokutukich lon ach ei fansoun pwe sipwe ekieki ussun pwisin ach ngaselo seni ach kichiniwel ngeni Isip, weween, ei otot lon kapas monomon. Jiowa ese angasakichelo lon pekin ngun fan iten ach sipwe chok chechei pwisin letipach. Nge a angasakichelo pwe sipwe tongeni mwareiti seni lon letipach me eani ewe sokkun fel mi limoch. Iwe, kich meinisin sipwe pwarata en me manauan ngeni Kot ren ifa ussun sia eani ach ngaselo.—Rom 14:12.
19 Solapan, a lap me lein chon Israel meinisin ra kan tunalo an Amos we afalafal mi manaman. Ewe soufos a pwarata lapalapengauen letiper lon ekkeei kapas mi mak lon Amos 4:4, 5: “Ami chon Israel, oupwe feila Petel o fori tipis, oupwe feila Kilkal o achomongala ami tipis, . . . pun iei usun oua efich.” Ekkewe chon Israel rese amaari mochenin letiper mi murinno. Rese tuttumunu leluker. Mwiriloon, a lap me leir ra poputa le tongei minne mi ngau me oputa minne mi murinno. Iwe, ekkena chon fel ngeni appanen kou mi lukumach rese siwil. Jiowa epwe apwungur, iwe, repwe chok tittipis tori ar repwe ninnilo!
20 Eni ese mecheres ngeni aramas mi nonnom lon Israel lon ena fansoun ar repwe akkamwochu ar tuppwol ngeni Jiowa. A kan weires ngeni emon an epwe manaueni ewe esin manau mi sokko seni lape ngeni aramas meinisin, ussun chok Chon Kraist ikenai ra kuna, ekkewe kukkun me ekkewe watte. Nge tongen Kot me ar mochen apwapwai I a amwokutu ekkoch chon Israel pwe repwe eani ewe fel mi enlet. Jiowa a eani ei kapasen etiwatiw ngeniir mi mak lon Amos 5:4: “Oupwe kuttaei pwe oupwe manau.” Ikenai, Kot a pwal pwarata umoumoch ngeni ir kewe mi aier me kukkutta i ren ar kakkaeofichi poraus mi enlet me lon an we Kapas me ar foffori letipan. Iwe, esap mecheres ach sipwe fori ena, nge epwe emmwenikich ngeni manau esemuch.—Jon 17:3.
Wouuoch Atun An A Fis Lengita lon Pekin Ngun
21 Met epwe souni ekkewe rese peppeni ewe fel mi enlet? Ewe sokkun lengita mi ngau seni meinisin—lengita lon pekin ngun! Ewe Samol mi Lapalap seni meinisin, Jiowa, a apasa: “Epwe war ewe fansoun lupwen upwe tinato lengita won ewe fanu. Esap eu echiken mongo ika kakan koluk, nge i eu mwonen an aramas repwe mochen rong an ewe Samol mi Lapalap kapas.” (Amos 8:11) Kristendom a nonnom lon ena esin lengita lon pekin ngun. Nge ekkewe mi letip-wenechar lein chon Kristendom ra tongeni kuna wouuochun noun Kot kewe aramas lon pekin ngun, iwe, ra kilong lon an Kot we mwicheich. Sokkofesennin nonnomun chon Kristendom me an ekkewe Chon Kraist mi enlet a pwapwalo lon alon Jiowa, a era: “Nei chon angang repwe mongo o un, nge ami oupwe echik o kaka. Nei chon angang repwe pwapwa, nge ami oupwe saw.”—Aisea 65:13.
22 Kich noun Jiowa kewe chon angang, sia pwisin aucheani ekkewe minen alillis me feioch lon pekin ngun? Lupwen sipwe kaeo ewe Paipel me nouch kkewe puken alillis me pwal fiffiti ach kewe mwich me mwichelap, sia enletin mochen puchor ren pwapwa pokiten lapalapochun letipach. Sia pwapwaesini ffatochun weween an Kot we Kapas, pachelong an Amos we oesini mi popu seni Kot.
23 Fan iten aramas meinisin mi tongei Kot me mochen alingalo I, an Amos we oesini a awora porausen apilukuluk allim. Ese lifilifil ifa nonnomuch lon pekin moni, are ekkewe sossot sipwe kuna lon ei fonufan mi ur ren osukosuk, nge kich mi tongei Kot sipwe pwapwaesini ekkewe feioch seni Kot me ewe mongo lon pekin ngun mi murinno seni meinisin. (An Salomon Fos 10:22; Mattu 24:45-47) Ina minne, mei fich ngeni Kot an epwe angei ling pun I a kan faffangoto mettoch meinisin pwe sipwe feioch ren. Ina minne, amwo sipwe ekitekit le mwareiti i seni lon letipach tori feilfeilo chok. Ina wisach mi apwapwa ika sipwe kukkutta Jiowa, ewe Sou Atittina lelukach.
Ifa Ussun Kopwe Polueni?
• Ikkefa lapalapen Israel lon ranin Amos we?
• Ikkefa ekkewe lapalap lon ekkewe engol einangen muun Israel ra lollo ngeni minne a fiffis ikenai?
• Ifa ewe lengita Amos a oesini ussun a pwonueta iei, nge ese kku io kewe?
[Ekkewe kapas eis fan iten ewe lesen]
1, 2. Met weween alon Paipel lupwen a apasa pwe Jiowa a “nennengeni leluken aramas”?
3, 4. Me ren Amos 6:4-6, met sokkun lapalap a fiffis lon ekkewe engol einangen muun Israel?
5. Pwata Kot ese pwapwa ren ekkewe chon Israel lon ranin Amos we?
6. Ifa lapalapen Israel lon pekin ngun lon anein Amos?
7. Met epwe fis ika ekkewe chon Israel rese alleasochisi an Kot kewe kapasen aurour?
8. Pwata Israel a ngangauolo lon pekin ngun?
9, 10. (a) Ikkefa ekkewe fofforun fel King Jeropoam I a akkota? (b) Met ekiekin Kot ussun ekkewe fetellap ra fis lon Israel lon ranin King Jeropoam II?
11, 12. Ikkefa ekkewe fofforun lamalam mi fiffis lon Israel lom ra lollo ngeni minne a fiffis lon Kristendom?
13. Pwata a lamot pwe sipwe alleasochisi Amos 5:15?
14, 15. (a) Lon Israel, io kewe ra nom lein chokkewe mi foffori minne mi murinno, nge ifa fofforun aramas ngeni ekkoch leir? (b) Ifa ussun sipwe tongeni apochokkula letipen ekkewe mi angang ngeni Jiowa full-time ikenai?
16. Pwata sipwe tongeni apasa pwe a murinno lapalapen chon Israel lon pekin ngun lon ranin Moses we lap seni lon fansoun Amos?
17. Pwata Jiowa a emmwenalong ekkewe chon Israel lom lom lon ewe Fonuen Pwon?
18. Pwata Jiowa a angasakichelo lon pekin ngun?
19. Me ren Amos 4:4, 5, met lap me lein ekkewe chon Israel ra tongei?
20. Epwe ifa ussun emon epwe tongeni atipeeufengenni manauan ngeni minne a mak lon Amos 5:4?
21. Ifa ewe lengita epwe fis ngeni ekkewe rese eani ewe fel mi enlet?
22. Pwata a wor popun ach sipwe pwapwa?
23. Ifa ewe mettoch ekkewe mi alinga Kot ra pwapwaesini?
[Lios lon pekin taropwe 17]
Chommong chon Israel ra pisekisek nge rese woummong lon pekin ngun
[Lios lon pekin taropwe 19]
Pesei ekkewe chon angang full-time ar repwe likiitu lon ar angang mi murinno