Ifa Ukuukun Aucheaan Manauom?
CHOMMONG aramas ra riaffou chapur me ottures ren ar repwe chok manau. Iwe nge ra lukuluk pwe Kot epwe “angasa chokewe mi riafou” seni ar riaffou me weires. (Hiop 36:15) En kopwe eani lukuluk pwe Kot a aucheaani manauen emon me emon aramas. Jiowa Kot, ewe Chon Forata a apasa: “Oupwe kokoriei lon ranin ami riaffou; upwe angasakemilo.”—Kol Fel 50:15.
A weires om luku pwe ewe Chon Forata a ekieki pwe en—emon chok lein ekkewe fite bilion aramas won fonufan—mi fokkun auchea ngeni i? Iwe, kopwe chechchemeni met ewe soufos Aisea a apasa ussun ekkewe fite bilion mwichen fuu lon lang. Sia alleaani: “Oupwe neta lang. Io a forata masouan meinisin? Iwe, Kot a emwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pochokulen an mananam.”—Aisea 40:26.
En mi amwochu weween ena wokisin? Ach we mwichen fuu itan Milky Way—ewe ach we mwichen ekkewe fonufan a nonnom lon—a wor orun 100 bilion fuu. Iwe, mei wor fitu mwichen fuu? Esor emon a wesewesen silei nge ekkoch ra esissin pwe a wor 125 bilion. A ifa me watteen choochoon ekkewe fuu! Iwe nge, ewe Paipel a affata ngenikich pwe ewe Chon Forutaan lang me fonufan a silei iten eu me eu fuu.
“Meten Mokuremi Meinisin Ra Fen Allea”
Iwe nge, ekkoch ra tongeni apasa: ‘Nge an emon silei iten fite bilion fuu—are iten fite bilion aramas—esap anneta pwe a aucheaani emon me emon leir.’ Eu computer mi watte a tongeni chechchemeni iten fite bilion aramas, nge aramas rese ekieki pwe ewe computer a aucheaani ekkan aramas. Iwe nge, ewe Paipel a pwarata pwe Jiowa Kot ese chok silei iten ekkewe fite bilion aramas nge a pwal aucheaani emon me emon leir. Ewe aposel Piter a mak: “Oupwe iseta won i mettoch meinisin, minne oua aurek ren, pun a fen tongeikemi.”—1 Piter 5:7.
Jises Kraist a apasa: “Esap liwinin ruemon litchok senis eu? Nge emon leir esap turutiu won pwul lukun tipen Sememi. Nge meten mokuremi meinisin ra fen allea. Iei minne, oute niuokus, pun ami mi auchea lap seni chommong litchok.” (Mattu 10:29-31) Nengeni pwe Jises ese apasa pwe Kot epwe chok silei met a fis ngeni ekkewe litchok me aramas. A apasa: “Ami mi auchea lap seni chommong litchok.” Pwata en mi auchea lap seniir? Pokiten en mi ffor ‘lon liosun Kot,’ me en mi tongeni amaaraata me pwaralo ekiekoch ussun pwung me mwaal, amaaraata om tufichin ekiek, kaeo, me weweoch, me lapalapeni ekkewe lapalapen ngun mi pwaralo an Kot kewe lapalap mi fokkun tekia.—Keneses 1:26, 27.
“A Angasalo Ekkewe Aramas Mi Osupwang Lupwen Ra Koko”
Inaamwo ika lapalapen manauen chommong aramas a chok weires me riaffou nge, manauen aramas a chuen wewe ngeni eu liffang mi fokkun amwarar. Nengeni mwo met sia fori ren ach sipwe amwochu manauach. Ewe sokkun manau lon mwach kkan Kot a pwonei esap wewe ngeni ach ottures ren ach sipwe chok manau. Kot epwe angasakichelo seni manauach iei mi ur ren metek me lamot mwaal, pwe sipwe tongeni ‘amwochu ewe manau mi enlet’ Kot a akkota fan iten ekkewe aramas a forata me le poputaan.—1 Timoti 6:19.
Ina met Kot epwe fori pokiten emon me emon leich a fokkun auchea ngeni i. A akkota pwe Noun we, Jises Kraist, epwe awora ewe moon kepich mi lamot ika sipwe ngas seni ewe tipis, apwangapwang, me malo sia alemwiri seni semach me inach akkom, Atam me If. (Mattu 20:28) Jises Kraist a apasa: “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku . . . epwe kuna manau esemuch.”—Jon 3:16.
Met Kot epwe fori iei fan iten ekkan aramas mi feiengau ren metek me riaffou? An Kot we Kapas a apasa pwe Noun Kot we epwe “angasalo ekkewe aramas mi osupwang lupwen ra koko, ekkewe mi woungau, o pwal ekkewe esor ar chon alilis. A lolileniesini ekkewe aramas mi apwangapwang, o ekkewe mi osupwang. A penmanauer o angaserelo seni riaffou o mwanesol.” Met popun epwe fori ena? Pokiten “chaar a auchea mwen mesan.”—Kol Fel 72:12-14.
Kanoto chok Kot epwe efisi ‘amurinnosefallin’ mettoch meinisin ren an we Muu fan nemenien Noun we Jises Kraist. (Fofor 3:21; Mattu 6:9, 10) Kopwe chuen nonnom me pwapwaesini ewe sokkun manau Kot a pwonei? Epwe filiom. Sia peseok om kopwe alamota ekkewe minen alillis meinisin Kot a awora ren an epwe efisata ekkena feioch. Ekkewe aramas mi fori ei chassi repwe pwapwa le alisuk.
[Lios lon pekin taropwe 5]
“Ami mi auchea lap seni chommong litchok”