Kapasen Emmwen Mi Tipatchem Fan Iten Ekkewe Mi Pupulu
“Ami fefin kena, oupwe alleasochisi puluemi usun chok ach Samol. Ami mwan kena, oupwe tongei puluemi.”—EFISUS 5:22, 25.
JISES a apasa pwe eu pupulu epwe wewe ngeni pwe Kot a iokfengenni emon mwan me fefin pwe repwe “eu chok fituk.” (Mattu 19:5, 6) Weween, ekkena ruuemon mi sokkofesen ar ekiek me lapalaper repwe kutta minne ir me ruuemon repwe tongeni pwapwa ren me ar repwe angangfengen won minne repwe achocho ngeni lon manauer. Pupulu, ina eu kokkot pwe ruuemon repwe pwonfengen pwe repwe nonnomfengen tori malo, malo chok epwap aimufesennir, nge sap eu atipeeu mi epwe nom fansoun mwochomwoch chok me mi mecheres an emon epwe likitalo. Lon chommong fonuen fonufan, ese weires ekkewe pupulu ar repwe mufesen, nge me ren Chon Kraist, mi pin ewe ririin pupulu. Epwe tongeni chok wes pokiten eu popun mi fokkun watte.—Mattu 19:9.
2 Emon sou fon fan iten pupulu a apasa: “Eu pupulu mi murinno epwe sissiwil atun epwe fisita minefoon nonnomun manauer, ekkoch osukosuk repwe piita, me repwe akkaea minne a kawor ngeniir lon eu me eu kinikinin manauer.” Ren ekkewe mwan me fefin Chon Kraist, epwe kapachelong lein ekkewe minen alillis kapasen fon mi tipatchem seni Paipel, alillis seni chiener kewe Chon Kraist, me ar ririoch ngeni Jiowa ren iotek. Eu pupulu mi murinno epwe likiitu fan weires, iwe, lo, lo, epwe atoto ngenir pwapwa me menemenoch. Nge, iei ewe mettoch mi lamot lap seni meinisin, epwe asamolu Jiowa Kot, ewe Chon Poputani pupulu.—Keneses 2:18, 21-24; 1 Korint 10:31; Efisus 3:15; 1 Tesalonika 5:17.
Appiru Jises me An we Mwichefel
3 Ruu ngerou ier loom, ewe aposel Paul a awora ngeni ekkewe pupulu Chon Kraist kapasen fon mi tipatchem lupwen a makkei: “Iwe, usun ewe mwichefel a nonnom fan nemenien Kraist, epwe pwal iei usun ren fefin ngeni puluer lon mettoch meinisin. Ami mwan kena, oupwe tongei puluemi, usun chok Kraist a pwal tongei ewe mwichefel, o a pwisin fangelo manauan fan asengesin i.” (Efisus 5:24, 25) A ifa me murinoon ekkewe awewe a mak ikkeei ie! Ekkewe fin Kraist mi tipetekison le nonnom fan nemenien puluer ra akkappiru ewe mwichefel ren ar esinna me alleasochisi ewe popun alongolongun alluk ussun mokuren ewe famili. Ekkewe mwan chon luku mi tottongei puluer lon fansoun kinamwe are fansoun weires, ra pwarata pwe ra nikappiru an Kraist we leenien appiru le tottongei me tuttumunu ewe mwichefel.
4 Ekkewe mwan pupulu, ir mokuren ar kewe famili, nge mei pwal wor mokurer, ina i Jises. (1 Korint 11:3) Ina minne, ussun Jises a tuttumunu an we mwichefel, a pwal ina ussun ekkewe mwan pupulu repwe tuttumunu ar kewe famili fan tong lon pekin ngun me pekin inis, ra pwal mwo nge pennukuolo pwisin letiper. Repwe akkomwa minne a lamot ngeni ar kewe famili, nge sap pwisin ar kewe mochen. Jises a apasa: “Iei minne, mettoch meinisin minne oua mochen pwe aramas repwe fori ngenikemi, epwe chok iei usun ami oupwe fori ngenir.” (Mattu 7:12) Ena popun alongolongun alluk a akkaeuin weneiti ewe kkotun pupulu. Paul a pwarata ena mettoch lupwen a apasa: “Epwe chok pwal iei usun ren mwan, pwe repwe tongei puluer usun chok pwisin inisir. . . . Pun esor emon mi oput pwisin fitukan, pwe a chok foleniochu o aucheani.” (Efisus 5:28, 29) Emon mwan epwe tinikken le amongouni me acheni puluan we ussun chok an epwe amongouni me acheni pwisin i.
5 Ekkewe fin pupulu mi fel ngeni Kot repwe akkappiru ewe mwichefelin Chon Kraist. Lupwen Jises a nonnom won fonufan, noun kewe chon kaeo ra pwapwa le likitalo minne ra fen akkachocho ngeni lon manauer fan iten ar repwe tapwelo mwirin i. Mwirin an we malo, ra chuen nonnom fan nemenian, iwe, ren arapakan 2,000 ier, ewe mwichefelin Chon Kraist mi enlet ra nonnom fan nemenien Jises me alleasochisi an emmwen lon mettoch meinisin. Pwal ussun chok, ekkewe fin pupulu Chon Kraist rese sufolungaueiti are alamotengaua an ewe Paipel kkotun nemenem lon pupulu. Nge ra alisaata ena kokkot me nonnom fan nemenien puluer kewe, me pwal apochokkulereta. Lupwen epwe ina ussun fofforun ewe mwan pupulu me puluan we, ar pupulu epwe sopwoch me ir me ruuemon repwe kuna pwapwa lon ar ririfengen.
Oupwe Nonnom Reer
6 Ewe aposel Piter a pwal awora kapasen fon fan iten ekkewe chon pupulu, iwe, a fokkun ttuwenewen alon ngeni ekkewe mwan pupulu. Iwe, a apasa: “Pwal usun chok, ami mwan kena, oupwe nonnom ren [puluemi] ren ach tipatchemen Soulang; oupwe asamolu ir, pun fefin mi apwangapwang senikemi, o ami oupwe alemwiri ewe chenin manau, pwe esap wor och epwe pinei ami kewe iotek.” (1 Piter 3:7) Sia kuna choun an Piter we kapasen fon lon ekkewe amuchuloon kapas lon ena wokisin. Ika emon mwan pupulu ese asamolu puluan we, epwe angawa an riri ngeni Jiowa. Epwe pinepin an kewe iotek.
7 Iwe, ifa ussun ekkewe mwan pupulu repwe tongeni asamolu puluer kewe? Emon epwe asamolu puluan ren an kewe foffor mi fiti tong me sufol me aucheani neminewe. Chommong aramas repwe mairu ren an emon mwan foffor mi kirokiroch ngeni puluan we. Emon re Kris sou kaeo a makkei: “Fan ewe allukun Rom, ese wor an fefin pwuung. Fan ewe alluk, epwe ussun chok nge i emon semirit. . . . A unusen nom fan nemenien puluan we, ese lifilifil minne atewe epwe fori ngeni.” Iwe, a fokkun sokko seni met chon Kraist ra kaeo! Ekkewe mwan pupulu Chon Kraist ra kan asamolu puluer kkewe. Ar kkewe foffor ngeni puluer kkewe ra kan alongolong won an Chon Kraist we popun alongolongun alluk, nge sap pwisin ekiekiir. Pwal eu, ra afanni neminkewe “ren tipatchem,” iwe, ra mirititi pwe puluer kewe ra apwangapwang seniir.
Ifa Ussun Emon Fefin A “Apwangapwang”?
8 Lupwen a era pwe a “apwangapwang” ewe fefin, sap minne a wewe ngeni pwe fefin ra apwangapwang seni mwan lon pekin sile me pekin luku. Pwungun pwe lon ewe mwichefel, chommong mwan Chon Kraist ra wiseni ekkoch wis ekkewe fefin rese tongeni wiseni, pwal lon ewe famili, fefin repwe nonnom fan nemenien puluer. (1 Korint 14:35; 1 Timoti 2:12) Iwe nge, a lamot ngeni meinisin, mwan me fefin, ewe mettoch luku, likiitu, me ar repwe manaueni ewe manau mi limoch. Iwe, ussun Piter a apasa, emon mwan me puluan we repwe “alemwiri ewe chenin manau.” Ren ar repwe kuna amanau, ir me ruuemon repwe chok lollo mwen mesen Jiowa Kot. (Kalesia 3:28) Piter a mak ngeni ekkewe Chon Kraist mi kepit lon ewe aeuin senturi. Ina minne, alon kewe ra achema ngeni ekkewe mwan pupulu Chon Kraist pwe pokiten ir “chienen Kraist le alemwir,” ir me puluwer kewe ra eani ewe chok apilukulukun manau lon lang. (Rom 8:17) Eu ran, ekkewe mwan me fefin repwe samol-fel me king lon an Kot we Muu lon lang!—Pwarata 5:10.
9 Pwungun pwe ekkewe fefin Chon Kraist mi kepit rese kis seni puluwer kewe Chon Kraist mi kepit. Iwe, epwe pwal ina chok ussun ren ekkewe mi eani ewe apilukulukun manau won fonufan. Ekkewe mwan me fefin me lein ewe “mwich mi lapalap” ra sopuni me apwechepwechalo ufer ren chaan ewe Lam. Won unusen fonufan, ekkewe mwan me fefin ra pupuchorun kapasen mwareiti Jiowa “le ran me le pwin.” (Pwarata 7:9, 10, 14, 15) Ekkewe mwan me fefin ra nenneloi ewe fansoun repwe pwapwaesini ar “repwe eti noun Kot kewe lon ewe ngas mi ling,” lupwen repwe pwapwaiti “ewe manau mi enlet.” (Rom 8:21; 1 Timoti 6:19) Ese lifilifil ika ekkewe mi kepit are ekkewe ekkoch siip, nge Chon Kraist meinisin mi angang ngeni Jiowa repwe “eu chok mwich” fan “emon chok chon maser.” (Jon 10:16) A ifa me murinnoon ewe popun emon mwan Chon Kraist me puluan we repwe asamolufengennir!
10 Met weween pwe ekkewe fefin ra ‘apwangapwang’? Eni alon Piter ei a wewe ngeni pwe lap ngeni meinisin fefin a kukkun pochokuleer seni an mwan pochokkul lon pekin aion. Pwal eu, pokiten sise unusoch, ewe wis auchea, an fefin tufichin nounatiu monukol, a aweiresi aionen fefin. Fefin mi tori ierin tufichin nounou ra tongeni kukkuna apwangapwangen inisir. A lamot ngenir tumun me an puluwer afannir lupwen a weires are pekkus inisir fansoun ra pwopwo me nounou. Emon mwan pupulu mi asamolu puluwan we epwe alisaata ar pupulu pun a esinna lamoten an epwe afanni an puluwan kewe osupwang.
Lon eu Famili mi Tipefesen lon Pekin Lamalam
11 Iwe nge, met repwe fori ika a sokkofesen ar luku pun emon leir a etiwa an chon Kraist poraus mi enlet mwirin ar ra pupulufengen, nge puluwan we ese etiwa? Epwe tongeni sopwoch ena pupulu? Ewer, chommong ena esin pupulu ra sopwoch. Emon mwan me puluwan we mi sokkolo ar luku ra chuen tongeni nonnomfengen me pwapwafengen. Ar pupulu mi pin mwen mesen Jiowa; ir mi chuen “eu chok fituk”. Ina minne, Paipel a pesei chon Kraist ar repwe nonnom ren puluwer ese luku ika emonewe a tipeeu ngeni. Ika a wor nour kewe semirit, repwe feioch seni tuppwolun semer are iner mi fiti lamalamen Kraist.—1 Korint 7:12-14.
12 Piter a awora kapasen fon mi kirokiroch ngeni chon Kraist fefin mi wor puluwer nge rese luku. Alon kewe ra pwal weneiti chon Kraist mwan mi wor puluwer rese luku. Piter a makkei: “Ami fefin kena, oupwe alleasochisi puluemi, pwe, inaamwo ika ekkoch leir rese alleasochisi ewe kapas, nge repwe chok soulangelo ren an puluwer foffor-murinno, nge esap ren ar kapas, lupwen ra nennengeni ami fofor mi limelimoch, eti niuokus.”—1 Piter 3:1, 2.
13 Epwe murinno ika emon fefin epwe tongeni awewei ngeni puluwan we an luku fan kapas pwetete. Iwe nge, met ika atewe ese mochen auseling? Ena filian. Iwe nge, sisap apilukulukungau pun an chon Kraist kkewe foffor-murinno, ina eu pisekin pwarata mi manaman. Chommong mwan mi rese kon lien etiwa are ra fen u ngeni lukuen puluwer kewe le poputaan, nge ra wiliti aramas mi “fich ngeni manau esemuch” mwirin ar ra nennengeni an puluwer kewe foffor-murinno. (Fofor 13:48) Inaamwo ika emon mwan esap nguuri lukuen Chon Kraist, nge ren an mwaar ren an puluwan we kewe foffor-murinno, a apochokkulata ar ririin pupulu. Emon mwan mi pupulueni emon Chon Pwarata Jiowa a anneta pwe i won inisin ese tongeni manaueni ewe manau mi limelimoch chon Pwarata Jiowa ra manaueni. Iwe nge, a era pwe i “emon mwan pupulu mi pwapwa ren puluwan we mi fokkun echipwor”, me a mwareiti puluwan we me chienan kewe Chon Pwarata lon noun we taropwe lon simpung.
14 Chon Kraist mwan mi apwonueta an Piter kapasen fon ra pwal lukeaato puluwer kewe ren ar kkewe foffor-murinno. Neminkewe ra kuna pwe puluwer kewe ra lipwakochulo le apwonueta wiser kewe, me rese chuen asolapaalo nour moni ren suppwa, sakau, me pelei, rese pwal chuen eani kapas pochokkul are kapasingau. Ekkoch leir ra chuuri ekkoch chon ewe mwichefelin chon Kraist. Ra ingeiti ar pwipwiochfengen me tongfengen lefiler, iwe, minne ra nennengeni a lukiir ngeni Jiowa.—Jon 13:34, 35.
“Fouten Letiper mi Monomon”
15 Met sokkun foffor epwe luki emon mwan pupulu? Enlet, ina ewe sokkun foffor chon Kraist fefin ra kan amaari lon manauer. Piter a era: “Foutemi esap fouten lukun, ren firesin mokuremi, are fouten gold, are ufouf mangaku mi lingoch, nge epwe fouten letipemi mi monomon ren ewe fout mi esap morelo, fouten ngunumi mi mosonoson o tipemecheres ei sokkun fout mi fakkun auchea fan mesen Kot. Pun a chok iei usun ekkewe fin loom ra foutei pwisin ir, neminkewe mi apilukuluk allim ren Kot o alleasochisi puluwer, usun chok Sera a alleasochisi Eperiam, o a eita ngeni i samol. Iwe, iei ami oupwe noun neminewe, are oupwe fori minne mi murinno, o ousap niuokusiti och mettoch.”—1 Piter 3:3-6.
16 Piter a fonou emon fin Kraist an esap apilukuluku fouten lukun. Iwe nge, an neminan kkewe foffor-murinno epwe amwokutu puluwan we an epwe mirititi ochun aitien ewe Paipel won letipan mi monomon. Puluwan we epwe kuna an neminan lapalapeni ewe lapalap mi fo. Neman epwe kuna pwe a fokkun sokkolo seni loom lapalapen neminewe. (Efisus 4:22-24) Epwe fokkun meefi pwe a murinno me lingoch “fouten [ngunun] mi mosonoson o tipemecheres”. Ena sokkun ngun esap chok apwapwai emon mwan pupulu nge epwe pwal “fokkun auchea fan mesen Kot.”—Kolose 3:12.
17 A kapas ussun an Sera we leenien appiru, iwe, epwe murinno ekkewe fin Kraist pupulu repwe appiru Sera ika puluwer kewe ra luku are rese luku. Ese fokkun wor tipemwaramwar pwe Sera a ekieki pwe Eperiam, i mokuran. Pwal mwo nge lon letipan, a kori Eperiam an “samol”. (Keneses 18:12) Iwe nge, ese akukkunalo auchean. Sera, wesewesen emon fefin mi pochokkul lon pekin ngun, a wor pwisin an luku mi tipeppos ngeni Jiowa. Enlet, i emon me lein “chommong chon pwarata mi ussun chok eu kuchu mi lap”, iwe, ar kewe leenien appiru ren ar luku epwe ita amwokutuukich ach sipwe “likiitu le sa lon ewe kitir mi nom mwach.” (Ipru 11:11; 12:1) Ese akukkunalo auchean emon fin pupulu an epwe ussun chok Sera.
18 Lon eu famili mi sokkofesen ar luku, ewe mwan mi chuen mokuren ewe famili. Ika ewe mwan a nonnom lon ewe lamalam enlet, epwe afanni lukuen puluwan we nge esap fangeta ren an alleasolap ngeni minne a pwisin luku. Ika ewe fefin a luku ewe enlet, i esap pwal u ngeni minne a pwisin luku. (Fofor 5:29) Iwe nge, neminewe esap u ngeni an puluwan we nemenem won. Epwe asamolu wisan we me nonnom fan “allukun puluwan we.”—Rom 7:2.
An ewe Paipel Kapasen Emmwen mi Tipatchem
19 Ikenai, chommong mettoch repwe tongeni aweiresi ewe ririin pupulu. Ekkoch mwan rese uwei oser kewe. Ekkoch fefin rese mochen nonnom fan nemenien puluwer kewe. Lon ekkoch pupulu, emon leir a eriaffou puluwan we ren an efeiengaua inisin are ren an kapasechou. Chon Kraist mi pupulu repwe tongeni kuna sossotun ar tuppwol ren weires lon pekin moni, ar kewe apwangapwang pun rese unusoch, me ngunun fonufan eti fofforingau me sokkofesenin memefin ar memef won mettoch mi auchea. Iwe nge, Chon Kraist mwan me fefin mi apwonueta ekkewe kapasen alongolongun alluk lon Paipel repwe tongeni kuna feioch seni Jiowa. Inaamwo ika emon chok lon ewe pupulu a apwonueta an Paipel kewe kapasen emmwen, nge epwe fen murinno nonnomur lap seni ika esor emon leir a fori ena. Pwal eu, Jiowa a tongei me alisi noun kewe chon angang mi apwonueta ar kewe pwonen pupulu pwal mwo nge fan weires. Esap monukalo ar tuppwol.—Kol Fel 18:25; Ipru 6:10; 1 Piter 3:12.
20 Mwirin an fonou mwan pupulu me fin pupulu, ewe aposel Piter a asopwalo ren kapasen apochokkul. A apasa: “Iwe, mwirilon, ami meinisin oupwe tipeeufengen o tongfengen, oupwe tongei pwimi kewe Soulang, o letipemi epwe umoumoch pwal tipetekison. Ousap liwini ingau ngeni ingau, are lalingau ngeni lalingau, nge epwe fen murinno are oupwe afeiochu, pun iei popun a korikemi, pwe oupwe alemwiri feiochumi.” (1 Piter 3:8, 9) Ena kapasen fon mi tipatchem fan iten meinisin, akkaeuin, chon pupulu!
En mi Chechemeni?
• Ifa ussun chon Kraist mwan pupulu repwe akkappiru Jises?
• Ifa ussun chon Kraist fin pupulu repwe akkappiru ewe mwichefel?
• Ifa ussun ekkewe mwan pupulu repwe asamolu puluwer?
• Ifa ewe al mi murinno seni meinisin emon fin Kraist epwe aleni ika puluwan we ese fiti lon an luku?
[Ekkewe kapas eis fan iten ewe lesen]
1. Ifa ewe ekiek mi pwung ussun pupulu?
2. (a) Met sokkun alillis a kawor ngeni chon pupulu? (b) Pwata a lamot ach sipwe achocho ngeni sopwochun ach pupulu?
3. (a) Menlapei an Paul kapasen fon ngeni chon pupulu. (b) Ifa ewe leenien appiru mi murinno Jises a isetiu?
4. Ifa ussun ekkewe mwan pupulu repwe akkappiru Jises?
5. Ifa ussun ekkewe fin pupulu repwe akkappiru ewe mwichefelin chon Kraist?
6. Ifa ewe kapasen fon Piter a ngeni ekkewe mwan pupulu, iwe, pwata a lamot?
7. Ifa ussun emon mwan pupulu epwe asamolu puluwan we?
8, 9. A ifa ussun fefin ra lollo ngeni mwan?
10. Ifa ussun ekkewe fefin ra ‘apwangapwang’?
11. Ifa ussun eu pupulu epwe sopwoch inaamwo ika ewe mwan me puluwan we ra fiti en me an lamalam mi sokkofesen?
12, 13. Ren ar apwonueta an Piter we kapasen fon, ifa ussun ekkewe fin pupulu chon Kraist repwe alisaata puluwer rese tipeeu ngeni ar luku?
14. Ifa ussun ekkewe mwan chon Kraist repwe tongeni alisaata puluwer kewe rese tipeeu ngeni ar luku?
15, 16. Met sokkun fofforun fin Kraist epwe lukeato puluwer kewe rese tipeeu ngeni ar luku?
17. Ifa ussun Sera a isetiu eu leenien appiru mi murinno fan iten chon Kraist fin pupulu?
18. Ikkefa ekkoch kapasen alongolongun alluk sipwe apwonueta lon eu famili mi tipefesen ren lamalam?
19. Ikkefa ekkoch sossot mi tongeni aweiresi ewe ririin pupulu, nge ifa ussun sipwe pworacho ngenir?
20. Ifa ewe kapasen fon Piter a awora ngeni chon Kraist meinisin?
[Lios lon pekin taropwe 27]
Emon chon Kraist mwan pupulu a tongei me tuttumunu puluwan we
[Lios lon pekin taropwe 27]
Emon chon Kraist fin pupulu a sufoluti me asamolu puluwan we
[Lios lon pekin taropwe 29]
Sokko seni allukun Rom, aitien Kraist a awisa ngeni emon mwan pupulu an epwe asamolu puluwan we
[Lios lon pekin taropwe 30]
Iirfengen mwan pwal fefin, chon “ewe mwich mi lapalap” ra nennelo manau esemuch lon Paratis
[Lios lon pekin taropwe 31]
Sera a ekieki pwe Eperiam, i an we samol