Sisap Chuen Manau Fan Asengesich
“[Kraist] a malo fan asengesin aramas meinisin, pwe ir mi chuen manau resap manau ngeni pwisin ir.”—2 KORINT 5:15.
INA saingoon pwinin manauen Jises won fonufan. Lon fitu chok awa, epwe fangolo manauan fan asengesin chokkewe meinisin repwe eani lukuluk won i. Lon ena pwinin, Jises a ereni noun kewe aposel mi tuppwol chommong mettoch mi lamot. Eu me leir, eu alluk ussun eu lapalap epwe esissinnata noun kewe chon kaeo. Jises a apasa, “Upwe ngenikemi eu alluk mi fo, pwe oupwe tongfengen lefilemi, usun chok ua tongeikemi, pwe ami oupwe tongfengen lefilemi. Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.”—Jon 13:34, 35.
2 Ekkewe chon Kraist mi enlet repwe pwarata ewe esin tong lefiler a amwokutuur le pennukuolo pwisin manauer me akkomwa kalisitaan osupwangen chiener kewe chon luku. Repwe pwal mwo nge ‘fangelo manauer fan iten chiener.’ (Jon 15:13) Met meefien ekkewe chon Kraist loom ussun ewe minefoon alluk? Lon noun we puk mi itefoulo itan Apology, ewe soumak lon ewe oruuen-senturi itan Tertullian a makketiu minne aramas ra apasa ussun ekkewe chon Kraist: ‘Nengeni ifa ussun ra tongeifengenniir; ifa ussun ra mmonleta le malo fan iten chiener.’
3 A lamot ach sipwe ‘uwoufengen ach chourek, iei usun sipwe apwonueta allukun Kraist.’ (Kalesia 6:2) Iwe nge, maicha eu minen eppet mi lapalap seni meinisin ngeni ach alleasochisi ewe allukun Kraist me ngeni ach ‘tongei ach Samol Kot ren unusen letipach, ngunuch, ekiekich me ach tongei chon oruch usun chok pwisin kich.’ (Mattu 22:37-39) Pokiten sise unusoch, sia kan akkomwa pwisin letipach. Pwal och, aurekin manauach, ewe ngunun emiisfengen lon sukul me lon ewe leenien angang, me weiresin ach atufichikich, a alapalo ei lapalap a nonnom ren kich meinisin. An aramas akkomwa chok pwisin letiper ese kisikisilo. Ewe aposel Paul a ourourakich: “Lon ekkewe ran le sopolon . . . aramas repwe tongei pwisin ir.”—2 Timoti 3:1, 2.
4 Le muchuloon an Jises angangen afalafal won fonufan, a aiti ngeni noun kewe chon kaeo ulungat mettoch mi tongeni alisata ar pworacho ngeni maicha. Ikkefa ekkena minen alillis ra tongeni alisikich?
Eu Safei Mi Manaman!
5 Jises a afalafal lon kiannin Seseria Filipai lon ennefennin Kalili. Eli ei leeni mi kinamwe me ling epwe murinno fan iten kukkulou, nge esap eu leeni fan iten pennukuolo ach mochen. Iwe nge, lupwen ra nonnom ikena ie, Jises a poputa le ereni noun kewe chon kaeo pwe “epwe fakkun feilo Jerusalem, pwal kuna chommong riaffou me ren ekkewe chinnap me ekkewe samol-fel mi lap me ekkewe soumak, o epwe pwal kuna malo; nge mwirin ulungat ran epwe pwal manaueta.” (Mattu 16:21) A ifa me rukoon noun Jises kewe chon kaeo, pun tori ena fansoun ra ekieki pwe nour we sou Emmwen epwe poputaani an we Muu won fonufan!—Luk 19:11; Fofor 1:6.
6 Piter a muttir “angei [Jises], o a popueta apungu i, a apasa, ‘Apwi! Ai Samol! Amo Kot a pinei! Esap mo fis reom iei usun.’ ” Ifa ussun Jises a polueni? “Jises a kullu o a kapas ngeni Piter, ‘Sulo le sokuri, Satan! En mi minen oturukapaei, pun kose tipeni usun mettochun Kot pwe mettochun aramas chok.’ ” A ifa me sokkofesennin ar ekiek! Jises a tipemecheres le nguuri alen pennukuolo manauan ren met Kot a awiisa ngeni—eu aal epwe aleno ngeni malo won efoch iraan nninni lon fitu chok maram. Piter a pese ngeni Jises ei alen kinamwe. Iei alon Piter: “Amo Kot a pinei!” Ese mwaal Piter a apasa ena pokiten an tongei Jises. Nge Jises a apwungu i pokiten lon ena fansoun, Piter a mut ngeni Setan an epwe emmweni an ekiek. Piter ese “tipeni usun mettochun Kot pwe mettochun aramas chok.”—Mattu 16:22, 23.
7 Tori ikenai sia tongeni rongorong poraus ussun chok alon Piter ngeni Jises. Fan chommong aramas ra pesei emon aramas le ‘tumunu chok pwisin inisin’ are ‘fetal lon ewe aal mi mecheres.’ Nge Jises a pesei aramas ar repwe eani ekiek mi sokko seni ena. A ereni noun kewe chon kaeo: “Are emon a mochen feito mwiri, epwe pwisin pennukuolo manauan, pwal mwarei an we iraan nninni me tattapwelo mwiri.” (Mattu 16:24, NW) Alon The Interpreter’s Bible, “Ekkeei kapas rese wewe ngeni eu kapasen etiwetiw pwe emon epwe wiliiti emon chon luku nge, eu pesepes ngeni chokkewe mi fen etiwa ewe kokkoon Kraist pwe repwe ekieki ussun weween wiiser.” Ekkewe ulungat mettoch Jises a kapas ussun lon ena wokisin ra mak fan iten ekkewe chon luku. Sipwe kaeo ussun eu me eu leir.
8 Aewin, a lamot ach sipwe pwisin pennukuolo manauach. Ewe kapasen Krik “pwisin pennukuolo manauach” a wewe ngeni ach sipwe tipemecheres le apasa aapw ngeni pwisin ach mochen are kinamween manauach. Ach pwisin pennukuolo manauach ese chok wewe ngeni likitaalo ekkoch minen apwapwa fan ekkoch, are ach eriaffou are efeiengaua inisich. Sise chuen ‘pwisin nouch’ pokiten sia fangolo unusen manauach me mettoch meinisin mi nonnom rech ngeni Jiowa. (1 Korint 6:19, 20) Sisap chuen akkomwa pwisin letipach nge, sipwe akkomwa letipen Kot. Ach pwisin pennukuolo manauach ita ussun a wewe ngeni ach apposa letipach le fori letipen Kot, inaamwo ika ese tipeeu ngeni met sia mochen fori. Sia pwarata pwe sia tongei Kot chok lupwen sia fangolo manauach ngeni i me papatais. Mwirin sia achocho le apwonueta ach pwon ngeni Kot lon unusen manauach.
9 Oruuan, sipwe mwarei ach we iraan nninni. Lon ewe aewin senturi, efoch iraan nninni a wewe ngeni riaffou, itengau, me malo. Ekkewe chon atai alluk ra kan nninniilo won efoch iraan nninni are ra eitiuata inisir won efoch ira mwirin ra malo. Ren ekkeei kapas, Jises a pwarata pwe emon chon Kraist epwe mmonleta ngeni an epwe riaffou mwaal, koput, are pwal mwo nge malo, pokiten i ese fiti ei fonufan. (Jon 15:18-20) An chon Kraist kewe minen aukuk ra aimufesenikich seni ekkewe aramas won fonufan, iwe, ina popun ra ‘turunufaseikich.’ (1 Piter 4:4) A tongeni fis lon sukul, lon ach leenien angang, are pwal mwo nge lon imwach. (Luk 9:23) Iwe nge, pokiten sise chuen manau fan asengesich sia tongeni likiitu fan an ei fonufan koput. Jises a apasa: “Ami oupwe feioch, lupwen repwe laleitikemi are eriaffoukemi are chofonata sokkun mi ingau meinisin usun ami pokitei. Ami oupwe chengel o pwapwa chapur, pun liwinimi epwe lapalap lon lang.” (Mattu 5:11, 12) Enletin, ika a nonnom rech an Kot chen ina ewe mettoch mi lamot seni meinisin.
10 Aulungatin, Jises Kraist a apasa pwe sipwe tattapwelo mwirin i. Me ren An Expository Dictionary of New Testament Words, makkeien W. E. Vine, tattapwelo mwirin a wewe ngeni an emon wiliiti chienen emon—“mwin le feilo ngeni eu chok leeni.” Aewin Jon 2:6 a apasa: “Are emon a apasa pwe a nonnom lon i, iwe, epwe fakkun fefetal usun chok i [Kraist] a fefetal.” Ifa ussun lapalapen an Jises fetal? Jises ese maicha pokiten an tongei Seman we lon lang me noun kewe chon kaeo. “Kraist ese mo apwapwai pwisin i,” alon Paul. (Rom 15:3) Pwal mwo nge lupwen Jises a molulu are echik, a ekieki met aramas ra osupwang ren akkomw. (Mark 6:31-34) Jesus a pwal mwotores ngeni ewe angangen afalafala me asukula aramas porausen ewe Muu. Met sisap pwal appiru i ren ach sipwe achocho le apwonueta wiisach le ‘asoulangalo chon fonu meinisin, me afalafaler pwe repwe alleasochisi mettoch meinisin minne Jises a alluku?’ (Mattu 28:19, 20) Lon an foffor meinisin, Kraist a isetiu eu leenien appiru fan itach, me a lamot ach sipwe “tapwelo mwirin lon ipwan.”—1 Piter 2:21.
11 A fokkun lamot ach sipwe pwisin pennukuolo manauach, mwarei ach we iraan nninni, me tattapwelo mwirin ewe Leenien Appiru. Ach fori ena, ina ewe minen eppetin maicha—ewe mettoch a tongeni pineikich seni ach pwaralo ewe sokkun tong a amwokutukich le pennukuolo pwisin manauach. Pwal och, Jises a apasa: “Pun are emon a mochen selani manauan, iwe, epwe pout seni; nge are emon epwe pout seni manauan pokitei, iwe, a epwe kuna. Pwe epwe meeta winan emon are a aunusalo fonufan meinisin nge a fen pout seni manauan? Pwal meeta emon epwe ngeni pwe siwilin manauan.”—Mattu 16:25, 26.
Sise Tongeni Angang Ngeni Ruuemon Masta
12 Fitu maram mwirin Jises a menlapei ewe lamoten an noun kewe chon kaeo pennukuolo manauer, emon aluwon mi pisekisek a feito ren Jises me a apasa: “Sense, meeta mi murinno upwe fori pwe upwe kuna manau esemuch?” Jises a ereni atewe pwe epwe “alleasochisi ekkewe alluk” me mwirin a apasawu ekkoch leir. Atewe a apasa: “Ua fen alleasochisi ekkeei mettoch meinisin.” Ese mwaal pwe ewe aluwon a letip wenechar me a fori ukuukun an tufich le alleasochisi alon ewe Alluk. Iwe a eis: “Nge meeta esaamo nom rei?” Jises a polueni ren an etiwa ewe aluwon: “Are ka mochen kopwe unusoch, kopwe chok feilo amomolo om pisek o liffang ngeni ir mi woungau. Iwe, om pisek epwe wor lon lang; o kopwe feito mwiri.”—Mattu 19:16-21.
13 Me ren Jises, ewe aluwon epwe tongeni angang ngeni Jiowa ren unusen letipan ika epwe poutalo ewe watteen mettoch a aosukosuka manauan—woun kewe. Emon noun Jises chon kaeo mi enlet ese tongeni angang ngeni ruuemon masta. Ese “tongeni angang ngeni Kot me mammon.” (Mattu 6:24) A lamot pwe ‘mesan mi murinno’ repwe anefota ekkewe mettochun ngun. (Mattu 6:22) An emon fangolo pisekin kewe me ngeni ir mi woungau eu foffor mi pwarata an pennukuolo manauan. Ren siwilin ei asor lon pekin aion, Jises a ereni ewe aluwon pwe epwe tufichin pisekisekilo lon lang—ren eu pisek auchea a wewe ngeni an epwe kuna manau esemuch me feil, feil, epwe nemenem ren Kraist lon lang. Ewe aluwon esaamwo mochen pennukuolo manauan. “A chok feilo fan letipechou, pun i emon mi pisekisek.” (Mattu 19:22) Iwe nge, ekkewe ekkoch lein noun Jises chon kaeo rese ina ussun.
14 Orun ruu ier me mwan, Jises a awora ena esin etiwetiw ngeni fomon chon attau iter Piter, Antru, Jemes, me Jon. Ruuemon ra attau lon ena fansoun, me ekkewe ruuemon ra onefi nour kewe epino. Jises a ereniir: “Oupwe feito mwiri, o upwe fori ami chon attauato aramas.” Ekkewe fomon ra muttir likitalo ar kewe angang me ra tapwelo mwirin Jises ren unusen manauer.—Mattu 4:18-22.
15 Chommong chon Kraist ikenai ra appiru met ekkewe fomon chon attau ra fori nge, esap met ewe aluwon mi pisekisek a fori. Ra fangolo wou me itetekia lon ei fonufan pwe repwe angang ngeni Jiowa. “Lupwen ua 22 ieri, a sereniei eu kefil mi fokkun watte,” alon Deborah. Iwe, a awewei: “Ua fen kaeo Paipel orun wonu maram, me ua mochen fangolo manauei ngeni Jiowa, nge ai famili a fokkun u ngeni ai mochen. A fokkun lapalap wouochur, me ra meefi pwe upwe asauer mwen mesen chiener kewe ika ua wiliiti emon Chon Pwarata. Ra ngeniei 24 awa ren ai upwe filata lefilen manau mi ur ren wou me pisek are ewe enlet. Ika use ukutiu seni ai chiechi ngeni ekkewe Chon Pwarata, ai famili epwe akaufochelo ekkewe pisek upwe alemwiri seniir. Jiowa a alisiei le filioch me a apochokkulaei le apwonueta filiei. Ua angang ngeni Jiowa full-time ren 42 ier, me use niamam ren filiei. Ren ai kullu seni eu manauen maicha mi akkomwa pwapwa, ua ti seniei ewe manau mi poon me letipechou ua kuna ren chon ai famili. Ren alillisin puluwei, ua fen alisi lap seni ipuku aramas ar repwe kaeo ewe enlet. Nei keei lon pekin ngun ra auchea ngeniei lap seni wou meinisin.” Fite milion Chon Pwarata ra meefi ina ussun. Nge ifa ussun en?
16 Ar rese chuen mochen manau fan asengesiir a amwokutu fite ngerou Chon Pwarata Jiowa ar repwe pioneer, are afalafala ewe Muu full-time. Ekkoch, pokiten nonnomur ese atufichiir le afalafal full-time, ra amaaraata ewe ngunun pioneer me alisata ewe angangen afalafala ewe Muu ren ukuukun ar tufich. Ekkewe sam me in ra pwal pwarata ena esin ekiek lupwen ra eani watteen ar fansoun me pennukuolo ar mochen pwe repwe emmweni nour kewe lon pekin ngun. Oukich meinisin mi tongeni pwarata pwe ekkewe mettoch mi weneiti ewe Muu ra akkomw lon manauach.—Mattu 6:33.
Tongen Io A Amwokutukich?
17 Ese mecheres ach pwarata ewe tong mi amwokutukich le pennukuolo pwisin manauach. Nge ekieki mwo ussun met a amwokutukich. Paul a makkei: “Ewe tong a nom ren Kraist a amwokutukich, pun sia lemenata pwe emon a fen malo fan asengesin aramas meinisin . . . O atewe a malo fan asengesin aramas meinisin, pwe ir mi chuen manau resap manau ngeni pwisin ir, nge ngeni atewe mi malo o manausefallita.” (2 Korint 5:14, 15) Tongen Kraist ewe minen amwokut ngenikich pwe sisap chuen manau fan asengesich. A ifa me pochokkulen ena minen amwokut! Pokiten Kraist a malo fan asengesich, sise miritiiti wiisach le manaueni manauach fan asengesin i? Pwungun pwe, ach kilisou fan iten ewe tong mi alollol Kot me Kraist ra pwarata ngenikich a fen amwokutukich le fangolo manauach ngeni Kot me wiliiti noun Kraist chon kaeo.—Jon 3:16; 1 Jon 4:10, 11.
18 Mi lamot ach sisap chuen manaueni manauach fan asengesin pwisin kich? Lupwen ewe aluwon mi pisekisek ese etiwa alon Jises me a feilo seni, Piter a ereni Jises: “Nengeni, am aua fen likitalo mettoch meinisin pwe aupwe feilo mwirum. Iwe, meeta epwe wor rem?” (Mattu 19:27) Piter me ekkewe aposel ra wesewesen pennukuolo manauer ngeni Kot. Ifa liwiniir? Jises a akkom kapas ussun ewe wiis mi auchea ar repwe angei le fiti i le nemenem ren lon lang. (Mattu 19:28) Lon ena fansoun, Jises a pwal kapas ussun ekkewe feioch noun kewe chon kaeo meinisin repwe tongeni pwapwaesini. Jises a apasa: “Ese mo wor emon a likitalo imwan, are pwin kewe, are mongean kewe, are inan, are seman, are noun kewe, are fonuan kewe, pokitei pwal ewe kapas allim, nge esap angei fan ipuku iei, . . . nge lon ewe fansoun epwe feito, epwap angei manau esemuch.” (Mark 10:29, 30) Sia angei lap seni met sia fen fangolo. Esap pwe semach kewe, inach kewe, mongeach kewe, fefinach kewe, me nouch kewe lon pekin ngun mi auchea lap seni ekkewe mettoch sia fen fangolo fan asengesin ewe Muu? Io a sopwoch seni meinisin lon manauan—Piter are ewe aluwon mi pisekisek?
19 Ren an kewe kapas me foffor, Jises a pwarata pwe pwapwa a feito seni fangolo me seni angang ngeni aramas, nge esap seni maicha. (Mattu 20:28; Fofor 20:35) Lupwen sise chuen manau fan asengesich nge sia tattapwelo mwirin Jises, sia menemenoch lon manauach iei me sia apilukulukun kuna manau esemuch lon mwach kkan. Pwungun pwe, lupwen sia pennukuolo manauach, Jiowa a wiliiti nouch Masta. Sia wiliiti noun Kot kewe chon angang. Met popun ei wiis a efeiochukich? Ifa ussun a kku ekkewe kefil lon manauach. Ewe lesen mwirin epwe poraus ussun ekkeei kapas eis.
En Mi Chechchemeni?
• Met popun sipwe u ngeni lapalapach mi maicha?
• Met weween ach sipwe pwisin pennukuolo manauach, mwarei ach iraan nninni, me tattapwelo mwirin Jises?
• Met a amwokutukich pwe sisap chuen manau fan asengesich?
• Met popun a lamot ach pwisin pennukuolo manauach?
[Ekkewe kapas eis fan iten ewe lesen]
1, 2. Menni allukun Paipel a amwokutu noun Jises kewe lon ewe aewin senturi ar repwe pworacho ngeni maicha?
3, 4. (a) Met popun sipwe u ngeni maicha? (b) Met sipwe kaeo lon ei lesen?
5. Lupwen Jises a afalafal lon ennefennin Kalili, met Jises a pwaralo ngeni noun kewe chon kaeo, me met popun ra ruko ren met a apasa?
6. Met popun Jises a pochokkul le apwungu Piter?
7. Ussun chok a mak lon Mattu 16:24, met sokkun manau Jises a apasa noun kewe chon kaeo repwe manaueni?
8. Awewei weween ach pwisin pennukuolo manauach.
9. (a) Lupwen Jises a nonnom won fonufan, efoch iraan nninni a wewe ngeni met? (b) Ifa ussun sia mwarei ach iraan nninni?
10. Met a kapachelong lon ach tattapwelo mwirin Jises?
11. Met popun a lamot ach pwisin pennukuolo manauach, mwarei ach iraan nninni, me tattapwelo mwirin Jises Kraist?
12, 13. (a) Ifa osukosuken ewe aluwon mi pisekisek mi tingor an Jises alillis? (b) Ifa ewe kapasen emmwen Jises a ngeni ewe aluwon, me met popun?
14. Met ekkewe fomon chon attau ra fori lupwen Jises a etiwer le tapwelo mwirin i?
15. Ifa ussun emon Chon Pwarata Jiowa a pennukuolo an mochen pwe epwe tapwelo mwirin Jises?
16. Ifa ussun sipwe tongeni pwarata pwe sise chuen manau fan asengesich?
17. Met a amwokutukich le pennukuolo ach kewe mochen?
18. Met popun mi auchea ach pwisin pennukuolo manauach?
19. (a) Pwapwa mi enlet a longolong won met? (b) Met sipwe kaeo lon ewe lesen mwirin?
[Lios lon pekin taropwe 7]
“Apwi! Ai Samol! Amo Kot A pinei!”
[Lios lon pekin taropwe 9]
Met a pinei ewe aluwol mi pisekisek an epwe tapwelo mwirin Jises?
[Lios lon pekin taropwe 11]
Tong a amwokutu Chon Pwarata Jiowa ar repwe achocho le eani wiiser le esilefeili ewe Muu