Sam Me In Kana, Tumunuochu Alemwiriemi Mi Fokkun Auchea
“Mirit a alisi aramas . . . Eman mi mirit a tumwunu pusin manauan.” —AN SALOMON AFALAFAL 7:12.
EKKEWE sam me in ra efisata fisitaan emon aramas mi fo won fonufan mi lapalapeni lapalaper kewe. Ewe Paipel a apasa pwe ekkewe kukkun ir ‘alemwirier me ren ewe SAMOL.’ (Kol Fel 127:3) Pokiten Jiowa ewe popun ei manau mi fo, a chok likit ngeni ewe sam me in minne wesewesen pwisin an. (Kol Fel 36:9) Sam me in kana, ifa ami ekiek ussun ei liffang mi auchea seni Kot?
2 Ren enletin, aramas repwe angei ei liffang fan kilisou me tipetekison. Lap seni 3,000 ier me loom, a ina ussun ewe chon Israel, Manoa, lupwen emon chonlang a esile ngeni puluwan we pwe epwe nounou. Lupwen Manoa a rongorong ena poraus allim, a iotek: “Ai Samol, ua tungor ngonuk pwe kopwe mwut ngeni ewe aramasen Kot, ka piin tinato, epwe liwinsefalito rem, pwe epwe aiti ngenikem mine aipwe fori ngeni ewe at epwe uputiu.” (Soukapwung 13:8) Sam me in kana, met oua tongeni kaeo seni an Manoa pisekin nengeni?
Ewe Popun Alillis Seni Kot A Lamot Iei
3 Iei, lap seni me loom, ekkewe sam me in ra osupwangen an Jiowa alillis ren amaarin nour kewe. Met popun? Setan ewe Tefil me noun kewe chonlang ra fen koturutiu me ra nonnom orun fonufan. Ewe Paipel a ourourakich: “Nge riaffou ngenikemi, fonufan o matau, pun ewe tefil a fen feitiu remi lon an song mi lap, pun a sinei pwe an we fansoun a chok mochomoch.” (Pwarata 12:7-9, 12) “Usun chok emon laion mi orior,” ewe Paipel a awewei, Setan “a kukkutta emon pwe epwe oromalo.” (1 Piter 5:8) Ekkewe laion ra kan liapeni ekkewe man mi apwangapwang, fan chommong ekkewe kukkun. Sam me in chon Kraist mi tipatchem ra kutta alillis seni Jiowa ren ar repwe tumunu nour kewe semirit. Ifa ukuukun ami achocho le tumunu noumi kewe?
4 Ika oua silei pwe emon laion a feilfetal lon ami sopw, pwungun pwe oupwe akkomwa tumunun noumi kewe. Setan a kutta ifa ussun a tongeni liapeni aramas. A kutta ifa ussun epwe aingaualo noun Kot kewe aramas, pwe resap chuen fich ngeniir an Kot chen. (Hiop 2:1-7; 1 Jon 5:19) Semirit mi apwangapwang. Ika repwe su seni an Setan kewe ssar, a lamot ar repwe silei me alleasochisi Jiowa. A fokkun lamot ewe sile seni ewe Paipel. Jises a apasa: “Iwe, iei ewe manau esemuch, pwe repwe sinei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Pwal och, ekkewe kukkun ra osupwangen tipatchem—ewe tufichin weweochuuti me apwonueta minne ra kaeo. Pun ‘mirit a tumunu pwisin manauen’ emon, a lamot pwe ami sam me in oupwe fotukalong ewe poraus mi enlet lon letipen noumi kewe. (An Salomon Afalafal 7:12) Ifa ussun oupwe fori ena?
5 Oua tongeni—me ita oupwe—allea an Kot we Kapas ngeni noumi kewe. Iwe nge, ika repwe tongei me alleasochisi Jiowa, ouse tongeni chok allea ngeniir. A lamot ar repwe weweiti minne ra rongorong. Neman emon semirit epwe rongorong pwe esap tongeni epwe pwerelo epek ewe aal ika ese akkom le nengeni ir me ruu pekin ewe aal. Iwe, ekkoch semirit rese alleasochis. Met popun? Eli ese naf ekkewe fansoun ra rongorong are ese ffatoch ewe awewe ussun watteen feiengauer ika efoch chitosa a pureiir, ewe awewe a tongeni asuelo ewe “tiparoch” mi emmwen ngeniir feiengau. A lamot fansoun me mosonottam ren aupwe alisata ar tipatchem. Nge tipatchem a fokkun auchea! Alon ewe Paipel: “Tipachem a tongeni awora pwapwa lon manauom o emweni ngonuk kinamwe. Tipachem epwe aworato manau ngeni chokewe mi kamwoch won, nge chokewe mi fitipacheiti ra pwapwa.”—An Salomon Fos 3:13-18; 22:15.
Ewe Sokkun Asukul A Awora Tipatchem
6 Fan chommong ekkewe kukkun rese fori minne mi pwung, esap pokiten rese kait ussun minne mi pwung, nge pokiten minne ra kaeo ese achungu letiper. Ewe Tefil a ussun ita a maunei ekkewe kukkun ren an epwe winneni letiper. A rauangauer ren ekkewe etipetipaen fonufan mi aniuoput ngeni Kot. A kan angang won ar ekkewe apwangapwang, alemwiriir kewe mi efisata ar mochen fori minne mi ngau. (Keneses 8:21; Kol Fel 51:5) A lamot pwe sam me in meinisin repwe silei ussun ei maun fan iten nemenem won letipen nour kewe.
7 Lupwen ekkewe sam me in ra ereni nour kewe minne mi pwung are mwaal, ra kan luku pwe ewe nau a kaeo seniir eu kapasen alongolongun alluk ussun pwung me mwaal. Neman repwe ereni ewe nau pwe mei mwaal kapas chofona, sola, are foffor lefilen mwan me fefin lupwen rese pupulufengen. Iwe nge, a lamot ngeni ewe nau eu popun epwe alleasochis nge ese naf an alleasochis pokiten ekkena alluk seni chok mama me papa. Ir alluk seni Jiowa. Ewe nau epwe kaeo pwe alleasochis ngeni an Kot kewe alluk ewe aal mi tipatchem.—An Salomon Fos 6:16-19; Ipru 13:4.
8 Tokoraraan lang, ekkewe chommong, chommong sokkopaten monumanau, ekkewe fansoun pwas me pungun ran—ir meinisin minen alillis mi alisata an emon nau lukuluk won nonnomun emon Chon Forata mi silei meinisin. (Rom 1:20; Ipru 3:4) Pwal och, ewe nau epwe kaeo pwe Kot a tongei i, pwe Kot a akkota ifa ussun epwe manau tori feilfeilo ren asorun Noun we, me a tongeni apwapwai Kot ren alleasochis. Ika a kaeo ekkena poraus, epwe chuen mochen angang ngeni Jiowa lupwen ewe Tefil a sotun pinei an epwe fori.—An Salomon Fos 22:6; 27:11; Jon 3:16.
9 Epwe chommong ekkewe awa oupwe aea, me epwe watte ami ekieki ussun met oupwe fori, me oupwe akkotaochu met oua filata, ika ami asukul epwe tumunu noumi kewe me amwokutuur ar repwe fori minne mi pwung. A lamot pwe ekkewe sam me in repwe etiwa emmwen seni Kot. Ewe Paipel a apasa: “Pwal ami sam kena, . . . oupwe foleniochu ir ren sokkun amirit me fonou me ren ewe Samol.” (Efisus 6:4) Ifa weween ena poraus? “Fonou,” lon fosun Krik, a wewe ngeni “walong ekiek lon.” Iwe, ekkewe sam repwe walong ekiekin Jiowa lon nour kewe. A ifa me watteen ewe tumun epwe kawor ngeni ekkewe kukkun! Ika ekkewe semirit ra eani an Kot ekiek, me lapalapen an ekiek a nonnom lon tupuwer, repwe kuna tumun seni fofforingau.
Eu Mochen A Fisita Pokiten Tong
10 Ika ami mochen pwe noumi epwe wiliiti emon aramas mi asimau epwe pwonueta, ami achocho epwe alongolong won tong. Porausfengen eu minen alillis mi lamot. Oupwe kutta met a foffori me an ekiek me memmeef won sokkopaten poraus. Atun fansoun asoso, oupwe pesei an epwe fos ngenikemi. Fan ekkoch, neman oupwe mairu ren met a apasa. Tumunu pwe ami mairu are song esap pwalo lon ami fos. Nge, oupwe auseling me pwaralo pwe oua aucheaani i.
11 Eli oua fen allea ngeni noumi ussun an Kot kewe alluk lon ewe Paipel ussun lisowu mwaal, neman fan chommong. (1 Korint 6:18; Efisus 5:5) Pokiten ami achocho, noumi kewe ra tongeni chechchemeni minne Jiowa a pwapwa ren me minne ese pwapwa ren. Iwe nge, ika ekiekin Jiowa epwe fotolong lon ekiekin ewe nau, mei pwal wor ekkoch mettoch oupwe achocho ngeni. Ekkewe nau ra osupwangen alillis ngeni ar repwe pwungupwung won aucheaan an Jiowa kewe alluk. A lamot ami anneta ngeniir pwe an kewe alluk ra pwung me murinno me a lamot ar lukuluk pwe alleasochis ngeni ekkena alluk a pwung me a pwaralo tong. Oua tongeni apasa pwe oua fotukalong ekiekin Jiowa lon noumi kewe ika oua pwungupwung ngeniir won ewe Paipel pwe repwe etiwa me lukuluk won an Kot ekiek.
12 Lupwen oua fos ussun foffor lefilen mwan me fefin, eli oupwe eis, “En mi luku pwe alleasochis ngeni an Jiowa alluk pwe esap wor foffor lefilen mwan me fefin mwen pupulu a pinei seni aramas ar pwapwa?” Pesei noumi an epwe awewei won met a polueni. Mwirin oua fos ussun an Kot kewe kokkot mi amwarar fan iten nounou, neman oupwe eis: “En mi luku pwe ach Kot mi tong epwe fori alluk ren an epwe pinei ach pwapwa? Are, en mi luku pwe an kewe alluk ra ffor fan iten kefisitaan pwapwa me tumun?” (Kol Fel 119:1, 2; Aisea 48:17) Kutta met noumi a wesewesen luku ussun ekkeei kapas eis. Mwirin oua tongeni achema ngeni ifa ussun lisowu mwaal a emmwen ngeni letipechu me osukosuk. (2 Samuel 13:1-33) Ren ami pwungupwungfengen ussun ekkeei poraus pwe noumi epwe weweiti me etiwa an Kot ekiek, oupwe fokkun feffeita ngeni ami fotukalong ekiekin Jiowa lon tupuwan. Iwe nge, mei wor pwal och mettoch oua tongeni fori.
13 Oua tipatchem ika ouse chok aiti ngeni noumi ewe liwinin alleasolap ngeni Jiowa nge oupwe pwal awewei ifa ussun lapalapen manauan a kku Jiowa. Aiti ngeni noumi ren ami nounou ewe Paipel pwe Jiowa a tongeni letipechou pokiten met sia fori. (Kol Fel 78:41) Oua tongeni eani kapas eis, “Met popun kese mochen pwe Jiowa epwe letipechou pokiten met ka fori?” me awewei: “Ewe chon oput Kot, Setan, a apasa pwe sia angang ngeni Kot pokiten met sia tongeni angei seni i nge sap pokiten sia tongei i.” Mwirin, oupwe awewei pwe Jop a apwapwai letipen Jiowa ren an tuppwol, me ifa ussun a awora poraus a tongeni polueni an Setan kapas mi mwakel. (Hiop 1:9-11; 27:5) A fokkun lamot pwe noumi epwe weweiti pwe Jiowa a tongeni pwapwa are letipechou pokiten met a fori. (An Salomon Fos 27:11) Oua tongeni ait ngeni noumi we ei lesen, me pwal ekkoch lesen mi lamot lon ewe puk Learn From the Great Teacher.a
Feioch Mi Apwapwa
14 Emon chinnap lon Croatia a alleaani ewe Teacher puk fengen me noun, noun we fisu ierin, a makkei met ewe at a era: “Mama a apasa upwe fori och angang, nge ua chipwang. Iwe, ua chechchemeni ewe sopwun a awewei ifa ussun alleasochis a tumunukich. Iwe, ua feilo ren, ren ai upwe apasa pwe upwe alleasochisi i.” Eu pupulu lon Florida, U.S.A. ra makkei ei poraus ussun ewe sopwun a awewei pwe sisap kapas chofona: “Ei puk a awora ekkewe kapas eis mi etiwa ekkewe nau ar repwe suukalo letiper me pwaralo ar kewe tipis rese mochen pwari ngenikich.”
15 Mei wor lap seni 230 lios lon ewe Teacher puk, me a wor poraus are eu kapas eis fan iten eu me eu lios are fan iten fitu lios mi chufengen. Emon inelap a pwapwaiti ei puk a apasa: “Fan chommong nei we at epwe atola eu lios me ese chuen mochen siwili ewe pekin taropwe. Saminne ekkewe lios ra chok ling, nge sia tongeni kaeo seniir, are repwe efisi kapas eis seni ekkewe semirit. Nei we at a eani kapas eis ussun liosun emon semirit a katol TV lon eu ruum mi kiroch, ‘Mama, met ena at a fori?’ me ngiingiin a pwaralo pwe a silei pwe met ewe at a fori a ngau.” Iei ewe poraus fan ena lios: “Io a tongeni kuna mettoch meinisin sia fori?”
Kait Mi Lamot Fan Iten Ei Fansoun
16 A lamot pwe ekkewe semirit repwe kaeo ussun nounoun pisekin fan maser fan iten minne mi pwung me minne ese pwung. Iwe nge, ach foffos ussun ena mettoch ese fokkun mecheres. Emon a makkei poraus lon simpung a apasa pwe lon an we fansoun, nounoun kapas mi weneiti pisekin fan mas a wesewesen ngau. Iwe, a makkei ei poraus ussun an asukula noun kewe: “Mei lamot pwe upwe akkufu ai sau.” Ren enletin, lupwen ekkewe sam me in rese mochen fos ngeni nour kewe ussun foffor lefilen mwan me fefin pokiten ra sau, rese tumunuochu nour kewe. A fokkun mecheres pwe aramas mi ngau repwe efeiengaua emon semirit lupwen ese naf an silei ussun inisin are ussun foffor lefilen mwan me fefin. Learn From the Great Teacher a awewei ei poraus lon eu lapalap mi limoch me sufol. Aweween foffor lefilen mwan me fefin ngeni ekkewe nau esap efisata mochenia lon letiper, nge ar rese weweiti a tongeni efeiengauer.
17 Lon sopwun 10, ren ewe poraus ussun ekkewe chonlang ra feitiu fonufan ren ar repwe pupulu me nounou, a wor kapas eis fan iten ewe semirit: “Met ka silei ussun foffor lefilen mwan me fefin?” Ewe puk a awora eu awewe mi mecheres me sufol. Mwirin, sopwun 32 a awewei ifa ussun semirit repwe kuna tumun seni aramas mi kirikiringau ngeni semirit. Ach we ofes a angei chommong taropwe mi affata lamoten ei kait. Iei poraus lon eu taropwe: “Lon ewe wiik ewe tokter a cheki nei we at, Javan. Ewe tokter a eis ika aua fen fos ngeni ussun ekkewe pisekin fan mas. Ewe tokter a ingeiti ifa ussun aua fori ena ren nounoun nouch we minefoon puk.”
18 Pwal eu sopwun a awewe won ewe poraus lon Paipel ussun ekkewe ulumon aluwon re Ipru, Satrak, Misak, me Apetneko, lupwen rese mochen chapetiu mwen ewe uluulun a liosueta Muun Papilon. (Taniel 3:1-30) Eli ekkoch resap kuna ifa ussun ei poraus a weneiti an emon kapong ngeni eu filaik, ussun chok a mak lon ewe Teacher puk. Iwe nge, nengeni met emon soumak itan Edward Gaffney a apasa atun eu interview lon ewe chassi U.S. Catholic. A apasa pwe lupwen noun we nengngin a era pwe a kaeo “eu minefoon iotek” lon an we aewin ranin sukul, a tingor pwe epwe apasawu ewe iotek. Gaffney a apasa: “Poun a attapa fan mwarin me a apasawu, ‘Ua pwon pwe upwe tuppwol ngeni ewe filaik . . . ’ ” A sopweilo an poraus: “Muttir chok, ua saramelo. Mei pwung ekkewe Chon Pwarata Jiowa. A ussun ita pwe ewe sukul a alisata eu sokkun fel ngeni muu—eu tuppwol mi tekia seni meinisin [ngeni ewe muu]—lon letipen nouch kewe mi kukkun.”
Liwinin Achocho
19 Pwungun pwe ami asukula noumi kewe epwe wor liwinin. Emon inelap lon Kansas, U.S.A., a kechiu lupwen a nouni echo taropwe seni noun we aluwon. Ewe aluwon a makkei: “Ua meefi pwe ua feioch pokiten lapalapen ami emiriitiei a efisi ai nukuchar me unus lon pekin memmeef. Ua mwareitikemi mama me papa.” (An Salomon Fos 31:28) Learn From the Great Teacher a tongeni alisi chommong sam me in ar repwe asukula nour kewe me tumunuochu alemwirier.
20 A fich ngeni nouch kewe unusen ewe fansoun me achocho sia tongeni awora ngeniir. Ir kukkun ren eu fansoun mi mwochomwoch. Oupwe alamota ekkewe fansoun meinisin oua tongeni nonnom reer me alisiir. Ousap niamam. Repwe tongeikemi. Fansoun meinisin oupwe chechchemeni pwe ir an Kot liffang ngenikemi. A ifa me aucheaan ei alemwir! (Kol Fel 127:3-5) Iwe, oupwe tumunuochuur ussun chok oupwe tumunu eu alemwir mi auchea, fan ewe ekiek pwe Kot a akkatola ami angang, pun, ren enletin, a ina met a fori.
[Footnotes]
a Forien Chon Pwarata Jiowa. Nengeni sopwun 40, “How to Make God Happy.”
Ifa Ussun Kopwe Polueni?
• Met popun iei ewe fansoun a fokkun lamot ekkewe sam me in repwe tumunu nour kewe?
• Met sokun asukul a awora tipatchem?
• Ikkefa ekkewe poraus mi lamot oupwe fos ngeni noumi kewe ussur?
• Ifa ussun ewe Teacher puk a alisi ekkewe sam me in ar repwe asukula nour kewe?
[Ekkewe kapas eis fan iten ewe lesen]
1. Met popun ekkewe sam me in repwe ekieki pwe nour kewe ra ussun chok eu liffang?
2. Met Manoa a fori lupwen a rongorong pwe puluwan we epwe nounou?
3. Met popun a fokkun watte lamoten alillis seni Kot ren tumunuochun semirit lon ei fansoun?
4. (a) Ekkewe sam me in repwe fori met ika a wor emon laion a feilfetal lon sopwur? (b) Met epwe tumunu ekkewe semirit?
5. (a) Ifa ussun semirit ra tongeni tipatchemelo? (b) Ifa ussun ewe puken An Salomon Fos a awewei ewe lamoten tipatchem?
6. (a) Met popun semirit rese kan mwokut fan tipatchem? (b) Menni ewe maun a fiffis?
7. Met popun ese naf ach sipwe chok ereni nouch kewe minne mi pwung me mwaal?
8. Met sokkun asukul epwe alisaata ekkewe semirit ar repwe mwokutukut fan tipatchem?
9. (a) Met epwe kapachelong lon asukul mi amanaua semirit? (b) Ifa wiisen ekkewe sam, me met a kapachelong lon wiiser?
10. Ren ami oupwe lipwakoch le asukula noumi, a lamot pwe oupwe silei met?
11. Ifa ussun emon sam are in a tongeni fotukalong ekiekin Kot lon tupuwen emon semirit?
12. Ifa ussun emon sam are in a tongeni alisi noun we an epwe eani ekiek pwung ussun foffor lefilen mwan me fefin?
13. Weweochun met a tongeni amwokutu emon semirit an epwe alleasochisi Jiowa?
14, 15. (a) Ikkefa ekkewe lesen lon ewe Teacher puk ra fen achungu letipen semirit? (b) Ifa porausen om nounou ei puk?
16. A fokkun lamot pwe semirit repwe kait ussun met ikenai, me met popun?
17. Ifa ussun ewe Teacher puk a alisi ekkewe sam me in ar repwe aiti ngeni nour kewe ussun foffor lefilen mwan me fefin?
18. Ifa ussun ewe Teacher puk a awewe won sufol ngeni ekkewe lios fan iten eu muu?
19. Ikkefa ekkewe feioch seni ami asukula noumi kewe?
20. Met ekkewe sam me in repwe chechchemeni, me ifa ussun ei poraus epwe achungu letiper?
[Lios lon pekin taropwe 24]
Sam me in kana, met oupwe kaeo seni Manoa?
[Lios lon pekin taropwe 25]
Ami kukkun, met oupwe kaeo seni ekkewe ulumon re Ipru?
[Lios lon pekin taropwe 26]
Ekkewe lios me porauser lon ewe “Teacher” puk ir minen asukul mi manaman
[Lios lon pekin taropwe 26]
Ifa ewe kapas chofona Ananias a ereni Piter?
[Lios lon pekin taropwe 26]
Io a tongeni kuna mettoch meinisin sia fori?
[DO NOT SET] References
Based on convention talk number 24.