Eu Fonufan Esor Mwelele Ie A Arapoto
ARAMAS mi mwelele ra kan saani liosun Paratis, ussun chok ewe lios won lukunpoon ei chassi. Ewe aewin pean aramas, Atam me If, ra nonnom lon eu wesewesen paratis. Leenier ewe malamalen Ichen. (Keneses 2:7-23) Inaamwo ika ena Paratis a poutulo nge, an aramas lukuluk won eu paratis lon mwach kkan—lon eu fonufan sefo ikewe esor mwelele ie—esap chok eu mettoch aramas ra aneanei. Ena apilukuluk mi lukulukoch a alongolong won ekkewe pwon lon ewe Paipel.
Ekieki mwo an Jises pwon lon ewe saingoon ranin manauan won fonufan. Emon lein ekkewe chon fofforingau a malo unukkun Jises a pwari an lukuluk won an Kot tufichin pwakini an aramas kewe osukosuk. A apasa: “Jises, kopwe chechemeniei lupwen om kopwe pwato lon om manamanen king.” Ekkeei kapas ra affata pwe ena chon fofforingau a luku pwe Jises epwe nemenem me a luku pwe ekkewe mi malo repwe manausefal. Iwe, Jises a polueni: “Enlet, upwe apasa ngonuk, pwe ikenai kopwe nonnom rei lon Paratis.”—Luk 23:42, 43.
A wor ekkeei kapas ussun chokkewe repwe nonnom lon Paratis lon ewe Paipel: “Iwe, repwe aueta imwer o nonom lon, repwe pwal fotuki iran wain o ochei uan.” (Aisea 65:21) Ewer, “eman me eman epwe nom lon an tanipin wain me fan an ira fiik fan kinamwe, nge esap wor eman epwe eniuokusu, pun ewe Samol mi Unusen Manaman a pwonei.”—Mika 4:4.
Iwe nge, met popun mwelele a mumuta iei? Met sokkun alillis Kot a awora ngeni ekkewe mi mwelele? Ineet mwelele epwe wesilo?
Met Popun A Mumuta Mwelele?
Ewe Paratis ikewe Atam me If ra nonnom ie a poutulo pokiten ewe osukosuk emon chonlang mi ngau, Setan ewe Tefil, a efisata. Setan a nounou emon serepenit mi aueni auan me a etipetipa If an epwe atai an Kot alluk ussun uwan efoch ira. A otupu If ren ewe ekiek pwe manauan epwe murinnoolo ika epwe ngaselo seni an Kot nemenem. Lupwen If a ngeni Atam uwan ewe ira, a pwal ochei. A kul seni Jiowa ren an epwe nonnom ren puluwan.—Keneses 3:1-6; 1 Timoti 2:14.
A pwung pwe ekkeei ruuemon mi u ngeni Kot repwe katowu seni Paratis me seni ena fansoun ra chok angang weires ren ar repwe atufichi manauer. Tori ei fansoun, Jiowa a mut ngeni an Setan nemenem won chon fonufan mi tipis me a pwalo ewe liwinin alleasolap ngeni Kot. Uruwoon aramas a anneta pwe chon fonufan rese tongeni siwili fonufan ngeni Paratis. (Jeremaia 10:23) Ren enletin, an aramas pwisin nemenemenir me lukun an Kot nemenem a efisata chommong osukosuk watte, kapachelong mwelele.—An Salomon Afalafal 8:9.
Iwe nge, saminne esor alillis fan iten chon mwelele lon eu fonufan mi ur ren osukosuk. An Kot we Kapas, ewe Paipel, a awora emmwen mi auchea fan iter.
‘Oute Aurek’
Lupwen Jises a fos ngeni eu pwin aramas a kapachelong chommong chon mwelele, a apasa: “Oupwe chok nennengeni ekkewe mansusu fan lang. Rese fotuki, rese pwal kini are ionfengenni lon imwen iseis; nge Sememi lang a amongour. Sap ami mi auchea senir? . . . Iei minne, oute aureki o apasa, ‘Meeta sipwe ani?’ are ‘Meeta sipwe unumi?’ are ‘Meeta sipwe ufeni? Pun ekkewe re Jentail ra kukutta ekkeei mettoch meinisin, nge Sememi lang a sinei pwe mi wor ami osupwang ren ekkeei mettoch meinisin. Nge oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.”—Mattu 6:26-33.
Esor popun emon mi mwelele epwe sola. (An Salomon Fos 6:30, 31) Epwe kuna minne mi lamot ngeni manauan ika Kot epwe akkom lon manauan. Fan iten chon Kraist, sola esap eu mettoch mi mumuta pokiten ir mi osupwang. Ra lukuluk won an Jiowa tufichin awora minne ra osupwang ren. (Ipru 13:5, 6) Eu minen awora alillis, ina ewe mwicheichen chon fel ngeni i won unusen fonufan mi tongeefengennir.
Iei pwal eu minen alillis. Jiowa a ngenikich fon mi affata ifa ussun sipwe manaueni manauach. Iei alon Paipel: “Chon sola esap chuen solani, nge epwe chon angang o fori ren poun minne mi murinno, pwe epwe wor minne epwe tongeni liffang ngeni chon osupwang.” (Efisus 4:28) Lupwen rese tongeni kuna angang, chommong ra pwisin efisi sokkopaten angang fan iter, ren chok awewe ren angangen atake. Ewe Paipel a pwal alisi aramas ar repwe nounouochu nour moni ren ar tunalo foffor mi ngau, ussun chok unnummong sakau.—Efisus 5:18.
Wesiloon Mwelele—Ineet?
Ewe Paipel a affata pwe sia nonnom lon “ekkewe ran le sopolon” an Setan nemenem. (2 Timoti 3:1) Ekiselo chok, Jiowa epwe tinalo Jises Kraist an epwe apwungu aramas. Met epwe fisita lon ena fansoun? Jises a polueni lon eu me lein an kewe kapas awewe. A apasa: “Iwe, lupwen ewe Noun-Aramas epwe waroto lon lingan, eti chonlang meinisin, epwe mottiu won an leenien motun king mi ling. Iwe, epwe ionfengenni einang meinisin mwen mesan, o epwe aimufeseni ir usun chok emon chon mas a aimufeseni siip me siike; o epwe pwal aleenier siip peliefichin, siike peliemongun.”—Mattu 25:31-33.
Ekkewe siip lon ei kapas awewe ir ekkewe aramas mi pwisin anomuur fan an Jises nemenem. Jises a apasa pwe ir mi ussun chok siip pokiten ra tapwelo mwirin ewe Chon Masen Siip. (Jon 10:16) Ekkeei aramas mi nikinikin siip repwe manau fan an Jises nemenem mi unusoch. Manauer epwe pwapwa lon eu minefoon fonufan ikewe esap wor mwelele ie. Ekkewe aramas mi ussun chok siike, mi u ngeni an Jises nemenem, repwe feilo lon ninni esemuch.—Mattu 25:46.
Muun Kot epwe awesi fofforingau. Iwe, esap chuen wor mwelele. Ewe fonufan epwe masou ren aramas mi tongeefengennir me tumunufengennir. Ewe tufichin fisitaan ena esin fonufan a letelo ren ewe tongen pwipwi lefilen ekkewe Chon Pwarata Jiowa pun Jises a apasa: “Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.”—Jon 13:35.