Awora ngeni ekkewe mi Wöüngaü Äpilükülük
1 Jises a mmen aücheani ekkewe mi wöüngaü. Lon ekkoch fansoun a awora älillis ren an föri manaman me echikaratä ekkewe mi samau, nge met a kon ekieki an epwe esilefeili ewe “kapas allim” ngeni ekkewe mi wöüngaü. (Mt. 11:5) Ikenäi, ewe angang Chon Kraist ra föri a chuen efeiöchü ekkewe mi osupwang pwal ekkewe ekkoch.—Mt. 24:14; 28:19, 20.
2 Älillis lon Mwach: Ekkewe nöüwisen Kirisentom ra pwon ngeni ekkewe mi osupwang pwe ika ra fangafangöch ngeni ar kewe mwichefel repwe wöüöchülo. Iwe nge, ewe Paipel a asukula pwe ewe chök mwuun Kot epwe awesalo wöüngaü me an aramas kewe osukosuk. (Kol F. 9:18; 145:16; Ais. 65:21-23) Ren ach äiti ngeni ekkewe mi wöüngaü ewe enlet lon Paipel sia awora ngeniir ewe äpilükülük me älisiir ar repwe mötülo lon pekin ngün.—Mt. 5:3.
3 Ekkewe Farisi lon ränin Jises we ra oput ekkewe aramas mi wöüngaü me ra esiita me eita ngeniir ‘am-ha·’aʹrets, ika “reefönü.” Iwe nge, me ren ekiekin Jises “chaar” ika manauer a “auchea” me ren. (Kol F. 72:13, 14) Sia tongeni äppirü Jises ren ‘ach kirikiröch’ ngeni ekkewe mi wöüngaü me pwal ren ach kichiöch me weweiti ar kewe weires. (SalF. 14:31) Sisap eäni fosun esiit ika ammeef ngeni ir kewe mi wöüngaü pwe esor lamoter me sia chök afalafal ngeniir fan osopwisek. Chommong me lein ekkewe ra etiwa pworausen ewe mwu ir aramas mi wöüngaü.
4 Älisiir Iei: Ach äiti ngeni ekkewe aramas mi wöüngaü an Paipel kewe kapasen emmwen a pwal älisiir ar repwe ekisalo ekkewe mettoch ra aosupwanga manauer iei. Ren chök awewe, ewe Paipel ese mutatä ünüpuch, pet woon moni, chipwang, ün suupwa me pwal ekkoch föfför epwe emmwen ngeni wöüngaü. (SalF. 6:10, 11; 23:21; 2 Kor. 7:1; Ef. 5:5) Ewe Paipel a pesei ekkewe chon angang ar repwe wenechar me angang ‘seni lon letiper,’ pun ikkena ekkewe napanap mi mürinnö fän iten ekkewe chon angang. (Kol. 3:22, 23; Ipru 13:18) A pwüng ena pworaus, lupwen ra kapas eis ngeni ekkewe meilapen kompeni, ra apasa pwe ra äkkäeüin kütta seni nöür chon angang ar repwe wenechar me tuppwöl.
5 Jiowa a meefi ekkewe riäfföü mi tori ekkewe mi wöüngaü. Jises Kraist epwele angasalo “ekkewe chon osupwang lupwen ra kökköri.” (Kol F. 72:12) Nge iei mwo, a wor wisach ach sipwe aururu aramas, pachelong ekkewe mi wöüngaü, ren ewe äpilükülük allim lon Paipel.