Kapas Eis 2: Met Epwe Fis Atun Upwe Máló?

Kapas Eis 2: Met Epwe Fis Atun Upwe Máló?

LE ÁTIN Roman, emén chiechian a máló lón eú ákseten wóón tarakú. Iei met a apasa. “Málóón chienei we a wesewesen aosukosuka ekieki. Fite ier mwirin ena ákseten, ua ekieki ika met a kan fis ngenikich atun sia máló.”

Pwata aramas ra kan eáni ena kapas eis? Usun itá nge ese fen pwúng án aramas repwe máló. Ese lifilifil fite ierich, nge lap ngenikich sise mochen máló. Chómmóng ra niwokkusiti met epwe fis mwirin ar máló.

Met ekkóch ra pélúwen ngeni ena kapas eis? Chómmóng ra lúkú pwe atun máló, a wor och mettóch lón inisin aramas a chúen manaw. Ra lúkú pwe aramas mi múrinné repwe feitá láng, nge ekkewe mi ngaw repwe riáfféú tori feilfeiló pokiten ar kewe tipis. Pwal ekkóch ra ekieki pwe mwirin málóón ewe inis, ese chúen wor ena emén, iwe, ekis me ekis aramas ra unusen ménúkaaló.

Ika mi pwúng pélúwan kana, iwe, itá met aramas repwe ekieki? Ewe áeúin pélúwan, a pop seni ewe ekiek pwe atun máló, aramas rese wesewesen máló. Ewe oruuan, a pop seni ewe ekiek pwe ese wor lamoten manawach. Chókkewe mi eáni ena ekiek, eli repwe eáni ei esin memmeef: “Ousipwe momongö o ükün, pun lesor sipwe mäla.”—1 Korint 15:32.

Ifa pélúwan me ren Paipel? Ewe Paipel ese asukula pwe atun aramas ra máló a wor och mettóch lón inisiir a chúen manaw. Kot a emmweni King Salomon pwe epwe makkeei: “Ekewe chon manau ra silei pwe repwe mäla. Nge ekewe sotup resap silei och mettoch.” (Än Salomon Afalafal 9:5) Chókkewe rese “silei och mettoch,” rese fókkun meefi are silei met a fiffis. Rese pwal tongeni féri are meefi och mettóch. Iwe ekkewe mi máló rese tongeni álisi are efeiengawa ekkewe mi manaw.

Inaamwo ika a sókkóló met chómmóng aramas ra lúkú, nge seni lepoputáán Jiowa ese tipeni án aramas repwe máló. A fératá ewe áeménún aramas Atam, pwe epwe tufichin manaw tori feilfeiló chék wóón fénúfan. Atun Kot a ereni Atam liwinin álleasolap, ina chék ewe fansoun a fósun máló. A allúkú án Atam esap mwéngé seni ewe efóch irá, me a éúréúra pwe ika a mwéngé seni epwe “fokun mäla.” (Keneses 2:17) Ika Atam me Efa ra álleasochis, iir me mwirimwiriir kewe meinisin mi tuppwél ngeni Kot, repwe manaw wóón ei fénúfan tori feilfeiló chék.

Atam a filatá an epwe tunaló án Kot na éúréúr. A tipis atun a álleasolapa Kot, iwe, a máló. (Rom 6:23) Ese wor och mettóch lón inisin Atam mi manaw mwirin an we a máló. Pwúngún, atun a máló ese chúen wor Atam. Kot a ereni: “Kopwe mongö anom fän molonom tori om kopwe wiliti pwül ka för seni. Pun pwül en, iei popun om kopwe wiliti pwül.” (Keneses 3:19) Pokiten aramas meinisin iir mwirimwirin Atam, iwe, sia álemwiri seni tipis me máló.—Rom 5:12.

Inaamwo ika Atam a filatá an epwe álleasolap, nge Kot epwe chúen apwénúetá minne a tipeni pwe epwe ouraló fénúfan ren aramas mi unuséch, iir mwirimwirin Atam. (Keneses 1:28; Aisea 55:11) Ekiseló chék, Jiowa epwele amanawasefáli lap ngeni chókkewe ra fen máló. Iei alon ewe aposel Paulus usun ena fansoun: “Epwe fis ewe manausefal ren ekkewe mi pung pwal ekkewe rese pung.”—Föför 24:15, TF.

Ren pwal ekkóch pwóróus usun met epwe fis atun máló, ppii sópwun 6 lón ewe puk Met ewe Paipel A Wesewesen Apasa? Ka tongeni kapiinawu seni www.pr2711.com

Met Jesus A Apasa Usun Máló?

Jesus ese tipeeú ngeni ekkewe néúwisin lamalam lón an we fansoun, iir kewe ra apasa pwe ekkewe mi máló resap manawsefál. (Lukas 20:27) I ese pwal asukula pwe mi wor och mettóch lón inisin aramas esap tongeni máló. Nge fen ikkeei met a áiti ngeni aramas.

Máló a usun chék méúr. Lupwen chienen Jesus we Lasarus a máló, Jesus a ereni néún kewe chón káé: “Chiechiach we Lasarus a möürüla, nge ngang üpwe feila pwe üpwe föngünätä.” Néún kewe chón káé rese weweiti weween alón na. Ra ereni Jesus: “Äm Samol, are a möürüla, iwe, epwe pöchökületä.” Ewe Paipel a áweweei pwe “Jesus a fen kapas usun än Lasarus mäla, nge ekewe chon kaiö ra ekieki pwe a chök kapas usun an möür. Iei mine, Jesus a afata ngeniir, ‘Lasarus a mäla.’”—Johannes 11:11-14.

Ekkewe mi máló repwe manawsefál. Lupwen Jesus a wareiti leenien Lasarus we, a aururu fefinan we itan Marta, ren an ereni: “Mongeom we epwe manausefälitä.” Mwirin Jesus a eáni ei pwon mi amwarar: “Ngang ewe manausefäl me ewe manau. Iö a lüküei epwe manau inamwo are epwe fen mäla.” Mi wesewesen pwúng án Jesus ei pwon. Mwen mesen chómmóng aramas a amanawasefáli Lasarus inaamwo ika a fen rúáánú ránin an máló.—Johannes 11:23, 25, 38-45.

Lón kúnaen ewe aposel Johannes, Jesus a pwal pwon pwe ekkewe mi máló repwe manawsefál. A áweweei usun eú fansoun lón mwachkkan atun máló epwe fangetá meinisin iir kewe mi fétek lón máló lón kapas áwewe.—Pwärätä 20:13.