Jiowa A Kan Äkkäiti Ekkan Chon Masen Siip Fän Äsengesin An We Mwichen Siip
“Pun ewe Samol mi Lapalap a fangala tipachem, i a atowu silelap me weweöch.”—ÄN SALOMON FOS 2:6.
1, 2. Pwata ekkan mwän mi papatais ra kan ekiekin wiseni ekkan wis lon ewe mwichefel?
IEI ALON Nick, emön mi wiseni ewe wis elter ükükün fisu ier: “Ua fakkun pwapwa lupwen ua seikitä ngeni elter. Ai ekiek nge iei eü wis mi atufichi ai awatteelo ai angang ngeni Jiowa. Ua meefi pwe wisei ai upwe pwäratä ai kilisou ngeni ren mettoch meinisin a fen föri fän äsengesi. Ua pwal mochen älisi chon ewe mwichefel ükükün ai tufich me ua mochen älisiir ussun chök än ekkewe elter älisiei me mwan.” Iwe nge, aürek a pwal pacheri an chengel. Nick a pwal apasa pwe “Pokiten a chök rüwe me fite ieri lupwen ua seikitä, ua lolilen ika esap naf ai mirit me tipatchem fän iten wisei, wisen ai upwe ekkemmweniöchü ewe mwichefel.”
2 A wor chommong popun ar repwe pwapwa chokkewe Jiowa a seikiiretä pwe repwe wisen tüttümünü an we mwichen siip. Ewe aposel Paul a ächema ngeni ekkewe elter seni Efisus ussun eü me lein ekkena popun lupwen a aloni alon Jises ei: “Sia feiöch ren ach fang lap seni ach angei mettoch.” (Fofor 20:35) Ika ekkan mwän mi papatais repwe wiseni ewe wis ministerial servant are elter, epwe suuk ngeniir alen ar repwe tufichin ukkuwouto ngeni Jiowa me ewe mwichefel ar kewe liffang. Ren chök awewe, ministerial servant ra angangfengen me ekkewe elter. Ekkena servant ra pwal föri chommong angang mi lamot, nge a watte ewe fansoun ra awora fän iter. Ekkena brother ra achocho le awora älillis mi fakkun aüchea pokiten ar tong ngeni Kot me chon orur kewe.—Mark 12:30, 31.
3. Pwata ekkoch resap lien mochen wiseni ekkan wis lon ewe mwichefel?
3 Ifa ussun ekkan mwän mi tipemwaramwar ussun ar tufichin wiseni ewe wis servant, iwe mwirin, ewe wis elter, pokiten ar meefi pwe ra lipwäkingaü? Ussun Nick, eli ra lolilen pokiten ar meefi pwe ra lipwäkingaü fän iten ewe wis chon masen siip. Ika en emön brother mi papatais, a ina ussun meefiom? A pwüng om kopwe meefi lolilen. Ekkan mwän mi seikitä ngeni chon mas repwe etittin mwen mesen Jiowa ren lapalapen ar emmweni ewe mwichen siip. Iei alon Jises: “Eman aramas mi angei chomong, repwe pwal mochen angei chomong me ren, nge are aramas ra lükü ngeni eman chomong, repwe pwal mochen angei met mi lap seni.”—Luk 12:48.
4. Ifa ussun Jiowa a kan älisi chokkewe a seikiiretä pwe repwe wisen tümünü nöün kewe siip?
4 Itä iei ekiekin Jiowa, pwe chokkewe a seikiiretä ngeni servant me elter repwe pwisin mwärei oser mi chou? Aapw, nge a akkawora älillis mi atufichiir ar repwe lipwäköch me mämäröch lon wiser kana. Ussun sia fen käeö lon ewe lesen mwen ei, Jiowa a ngeniir an we ngün mi fel, iwe, uwaan a älisiir le tümünüfichi ekkewe siip. (Fofor 20:28; Kalesia 5:22, 23) Jiowa a pwal awora ngeniir tipatchem, silelap, me mirit. (Än Salomon Fos 2:6) Ifa ussun a föfföri ena? Sipwe käeö ülüngät mettoch Jiowa a akkota pwe epwe äkkäiti ekkan mwän a seikiiretä pwe repwe wisen tümünü nöün kewe siip.
Käit Seni Chon Mas mi Äsimaü
5. Pwata Piter me Jon, ir chon masen siip mi lipwäköch?
5 Lupwen ekkewe aposel Piter me Jon ra ütä mwen ewe Sanhetrin, ekkena sou kapwüng ra eäni tipatchemen aramas, iwe, ra ekieki pwe ekkena mwän “ir aramas resap fiti sukul.” Pwüngün pwe ra silei älleä me mak, nge rese käeö Paipel seni ekkewe sense. Inaamwo, nge Piter, Jon, me ekkewe pwal fitemön chon käeö, ir sense mi lipwäköch, pun ra fen älisi chommong me lein ir kewe mi aüseling ngeniir pwe repwe wiliti chon lükü. Pwata ekkena mwän ra tufichin wiliti sense mi sokkolo angöchür? Mwirin än ekkena sou kapwüng aüseling ngeni Piter me Jon, “ra mefi pwe ir fen chiechien Jesus.” (Fofor 4:1-4, 13) A enlet pwe ra angei ewe ngün mi fel. (Fofor 1:8) Nge a pwal ffat ngeni pwal mwo nge ekkena sou kapwüng mi chun lon pekin ngün pwe Jises a äkkäiti ekkena mwän. Lupwen Jises a nonnom ren ekkewe aposel won fönüfan, a äitiir ifa ussun repwe ioni aramas mi ussun siip me pwal ifa ussun repwe tümünüür lupwen repwe tolong lon ewe mwichen siip.—Mattu 11:29; 20:24-28; 1 Piter 5:4.
6. Ifa ewe leenien äppirü Jises me Paul ra isetiu fän iten ewe mettoch äkkäiti aramas?
6 Mwirin än Jises manausefäl, a sopwelo an äkkäiti ir kewe mi seikitä ngeni chon mas. (Pwäratä 1:1; 2:1–3:22) Ren chök awewe, a pwisin filatä Paul me a akkota ifa ussun epwe äkkäiti. (Fofor 22:6-10) Paul a kilisou ren ewe käit a angei me a äiti ekkewe elter minne a käeö. (Fofor 20:17-35) Ren chök awewe, a awora watteen fansoun me an pöchökkül le äkkäiti Timoti pwe epwe “eman chon angang esap säw ren an angang” ngeni Kot. (2 Timoti 2:15) Mwirin, a fisitä pacheöchfengen lefiler. Mesemwan, iei makkeian Paul ussun Timoti: “I me ngang aia angangfengen fän iten ewe Pworausen Manau usun chök eman nau a angangfengen me saman.” (Filipai 2:22) Paul ese ekiekin etipetipa Timoti are pwal emön pwe repwe nöün chon käeö. Nge, a pesei chienan kewe chon lükü pwe repwe ‘äppirü i ussun i a äppirü Kraist.’—1 Korint 11:1.
7, 8. (a) Menni pworaus a affata pwe epwe wor uwa mi mürinnö lupwen ekkan elter repwe äppirü Jises me Paul? (b) Inet atun ekkan elter repwe poputä le äkkäiti ekkan brother fän iten ar repwe tufichin wiseni ewe wis ministerial servant me elter?
7 Pokiten ar äppirü Jises me Paul, chon mas mi äsimaü ra kan achocho le äkkäiti ekkan brother mi papatais, iwe, a pwal uwaöch ar angang. Ekieki mwo pworausen Chad. An famili a kinikinfesen lon pekin lamalam, nge kanoto chök a seikitä ngeni elter. Iei alon: “Lon ekkewe ier ra lo, fitemön elter mi äsimaü ra älisiei pwe upwe äsimaüetä lon pekin ngün. Pokiten semei emön chon lükün, a mmen watte än ekkena elter tümünüei, iwe mwirin, ra ussun chök semei lon pekin ngün. Ra awora fansoun pwe repwe äkkäitiei lon ewe angangen afalafal, iwe mwirin, emön leir a äkkäitiei fän iten ekkewe wis upwap wiseni lon ewe mwichefel.”
8 Ussun an a ffatolo ren pworausen Chad, chon mas mi mirit ra kan poputä le äkkäiti ekkan brother fansoun langattam me mwen ar repwe feffeitä lon pekin ngün tori ewe ükükün ar ra tufich ngeni ewe wis ministerial servant me elter. Met popun? Popun, pun me ren allükün Paipel, epwe limöch me wenechar manauen ministerial servant me elter, me epwe pöchökkül ar lükülük mwen ar repwe seikitä ngeni ekkena wis. Repwe “etittin akkom, ika ir mi tufich ngeni.”—1 Timoti 3:1-10.
9. Met wisen chon mas mi äsimaü, me met popun?
9 Ika ekkana brother mi papatais repwe etittin, epwe pwüng ar repwe akkom käit. Ren chök awewe, ika emön chon sukul epwe angei eü skeng mi fakkun weires, nge ekkewe sense rese akkom äkkäiti, ewe chon sukul epwe itä pass? Neman esap. Ina minne, a lamot an epwe käit. Iwe nge, ekkana sense mi tinikken ra kan äkkäiti chon sukul pwe sap minne repwe chök pass lon eü skeng, pwe pwal fän iten ar repwe äeä minne repwe käeö. Iwe, pwal ussun chök, ekkana elter mi uwonnük ra kan älisi ekkana brother mi papatais pwe repwe ämäri ekkewe sokkun lapalap epwe nom ren ekkana mwän mi seikitä ngeni wis ren ar awora ngeniir ewe sokkun käit mi fichiiti emön me emön leir. Sap minne ra chök älisiir pwe repwe seikitä ngeni och wis, pwe pwal fän iten ar repwe tufichin tümünüöchü ewe mwichen siip. (2 Timoti 2:2) Pwüngün pwe ekkana brother mi papatais repwe pwisin mwärei oser me achocho ngeni ar repwe eäni ekkewe sokkun tufich epwe nom ren ministerial servant are elter. (Taitos 1:5-9) Iwe nge, ren ar tipemecheeresin äkkäiti chokkana mi ekiekin wiseni ekkana wis lon ewe mwichefel, chon mas mi äsimaü repwe tongeni amwittiri ar feffeitä lon pekin ngün.
10, 11. Ifa ussun chon mas repwe tongeni äkkäiti ekkan brother pwe repwe tufichin wiseni ekkan wis?
10 Ifa ussun chon mas mi äsimaü repwe tongeni awora ewe sokkun käit mi fichiiti emön me emön pwe repwe tufich ngeni ekkan wis lon ewe mwichefel? Akkom, repwe ekiekifichi ekkewe brother lon ewe mwichefel, weween, repwe fiffitiir lon ewe angangen afalafal me äkkälisiir pwe repwe tufichin “afalafala än Kot kapas mi let fän pwüng.” (2 Timoti 2:15) Chon mas mi äsimaü repwe kapasfengen me ekkena brother ussun ewe pwapwa repwe küna seni ar angang ngeni aramas me ewe pwapwa pwisin ir ra küna seni ar akkota me apwönüetä minne ra ekiekin föri lon pekin ngün. Fän kirikiröch, ra pwal affata met ekkan brother repwe mürinnölo ren fän iten ar repwe wiliti eü “lenien apirü ngeni ewe mwich.”—1 Piter 5:3, 5.
11 Ika emön a seikitä ngeni ministerial servant, chon mas mi äsimaü repwe sopwelo ar äkkäiti. Iei alon Bruce, emön mi wisen elter fite, fite, ier: “Ua kan efich ai upwe motfengen me emön mi kerän seikitä me aweweei ngeni ekkewe kapasen emmwen mi katowu seni ewe chon angang mi tuppwöl me tipatchem. Äm aua pwal älleäni ekkewe minen emmwen ussun wisan we, iwe, ua efich ai upwe äkkälisi tori an epwe eörenalo wisan kewe.” Lupwen emön servant epwe äsimaüetä, epwe pwal tongeni käit fän iten ewe angangen äämwa ekkewe siip. Bruce a pwal apasa, “Lupwen emön ministerial servant epwe etiei le äämwa emön, ua älisi le filatä ekkoch wokisin epwe tongeni apöchökküla are achüngü letipen ewe emön are ewe famili aupwele chuuriir. A mmen lamot än ekkan servant käeö ifa ussun ar repwe nöünöü Paipel le achüngü ewe letip fän iten ar repwe wiliti chon mas mi lipwäköch.”—Ipru 4:12; 5:14.
12. Ifa ussun chon mas mi äsimaü repwe tongeni äkkäiti ekkan brother mi kerän seikitä ngeni elter?
12 Mineföön chon mas mi kerän seikitä repwe pwal küna watte älillis ika epwe sopwosopwolo ar käit. Iei alon Nick, ewe mi mak pworausan me mwan: “A mmen watte älillisin ewe sokkun käit ua angei seni rüüemön chon mas mi watte mwei. Ekkeei brother ra kan weweiti ifa ussun sipwe angang won ekkoch mettoch. Fansoun meinisin ra mosonottam le aüseling ngeniei me ekiekifichi meefiei, inaamwo ika rese tipeeü ngeni. Ua käeö chommong mettoch seni ai nengeni ewe tipetekison me süföl ra pwäratä ngeni pwiich kewe lon ewe mwichefel. Ekkena elter ra affata ngeniei lamoten ach sipwe angöch le nöünöü ewe Paipel ika sipwe ataweei och osukosuk are ekiekin apöchökküla aramas.”
Käit Seni Än Kot we Kapas
13. (a) Met a lamot ngeni ekkan brother fän iten ar repwe chon mas mi lipwäköch? (b) Pwata Jises a apasa: “Mine üa eäni afalafal esap püsin ai”?
13 A enlet pwe a wor ekkewe sokkun allük, kapasen alongolongun allük, me pworaus mi lamot ngeni chon mas lon än Kot we Kapas, ewe Paipel, fän iten ar repwe “fokun tufich o lipwäköch ngeni sokun angang mürina meinisin.” (2 Timoti 3:16, 17) Eli a watte än emön brother sukul, nge silean lon Paipel me an äeäfichi silean na a kan älisi i pwe epwe chon mas mi lipwäköch. Ekieki mwo föfförün Jises. I ewe chon mas mi silelap, mirit, me tipatchem seni chon mas meinisin mi manau won fönüfan, nge ese lükü pwisin tipatcheman lupwen a äkkäiti nöün Jiowa kewe siip. Iei alon: “Mine üa eäni afalafal esap püsin ai, nge a pop seni Kot ewe mi tinieito.” Pwata Jises a mwareiti Seman we lon läng? Iei alon: “Eman mi kapas fän püsin itan, a chök püsin kutta iteüöchün.”—Jon 7:16, 18.
14. Ifa ussun chon mas ra kan tümünüür seni ar kütta pwisin linger?
14 Chon mas mi tuppwöl ra kan tümünüür pwe rete kütta pwisin linger. Sap minne repwe uwawu ffön me kapasen apöchökkül seni pwisin tipatchemer, pwe seni än Kot we Kapas. Ra mirititi pwe wisen chon mas ar repwe älisi ewe mwichen siip pwe repwe eäni “ekiekin Kraist,” nge esap ekiekin ekkewe elter. (1 Korint 2:14-16) Ren chök awewe, epwe ifa ussun ika emön elter mi älisi eü pwüpwülü ren ar kewe osukosuk epwe uwawu an ffön seni pwisin künaan, nge esap seni än Paipel kewe kapasen alongolongun allük me ekkewe pworaus mi kawor me ren “ewe chon angang mi tuppwel o tipatchem”? (Mattu 24:45) Eli an ffön epwe kon longolong won eörenien fönüer me epwe nafangaü pokiten üküngaüen silean. Pwüngün pwe ese ngaü ekkoch eöreni, me eli a watte künaen ena elter. Nge ekkewe siip repwe äkkäeüin küna älillis ika chon mas repwe peseer pwe repwe aüseling ngeni leüwen Jises me Jiowa, nge esap ekiekin aramas are aitien än aramas kewe eöreni.—Kölfel 12:6; Än Salomon Fos 3:5, 6.
Käit Seni “ewe Chon Angang mi Tuppwel me Tipatchem”
15. Menni angang Jises a awisa ngeni “ewe chon angang mi tuppwel me tipatchem,” me ifa eü popun a uwaöch angangen ena kümiin chon atawe?
15 Ekkoch chon mas, awewe chök ren ekkewe aposel Piter, Jon, me Paul, ir chon ewe kümi itan “ewe chon angang mi tuppwel me tipatchem” me ren alon Jises. Ena kümiin chon angang a fförütä seni pwiin Jises kewe mi kepit won fönüfan, iwe, ar äpilükülük pwe repwe eti Kraist le nemenem lon läng. (Pwarata 5:9, 10) Le atun ekkeei ränin le sopwoloon, a fen chokisikisilo lusun pwiin Kraist kewe won fönüfan. Iwe nge, ewe angang Jises a awisa ngeniir ar repwe föri, weween, ar afalafala pworaus allimen ewe Mwu mwen warotoon ewe sopwoloon, a fakkun chöüfetäl iei lap seni loom. Ina mwo, nge a mmen uwaöch angangen ewe kümiin chon angang. Met popun? Pun ra kan äkkäiti chon ewe mwichen ‘pwal fitemön siip’ pwe repwe älisiir lon ewe angangen afalafala me asukula aramas. (Jon 10:16; Mattu 24:14; 25:40) Lon ei fansoun, lape ngeni ena angang a kan pwöpwönütä ren chon ena mwichen aramas mi tuppwöl.
16. Ifa ussun ewe mwichen chon angang a kan äkkäiti ekkewe mwän mi seikitä ngeni chon mas?
16 Ifa ussun ena kümiin chon angang a kan awora ena sokkun käit? Lon ewe äeüin senturi, chon tupuni ena kümiin chon atawe ra wisen äkkäiti me seikatä chon emmwen lon ekkewe mwichefel, iwe mwirin, ekkena chon emmwen ra kan äkkäiti ewe mwichen siip. (1 Korint 4:17) Mi pwal enlet ena lon ei fansoun. Ewe Mwichen Sou Emmwen, weween, ewe kükkün kümiin elter mi kepit, nge ir chon tupuni ewe mwichen chon angang, ra kan awisa ngeni ir kewe mi tupuni pwe repwe wisen äkkäiti me seikatä ministerial servant me elter lon ekkewe fitu kit ngerou mwichefel won unusen fönüfan. Pwal och, ena mwichen Sou Emmwen a kan akkota sukul fän iten ar repwe äkkäiti chon ekkewe Branch Committee, chon mas mi rounfetäl, elter, me ministerial servant ren ifa ussun repwe tümünüfichi ekkewe siip. A pwal kawor emmwen lon taropwe, lon ekkan lesen mi mak lon Ewe Leenien Mas, me pwal lon fitu sokkun puk, awewe chök ren Organized to Do Jehovah’s Will (Eu Mwicheich mi Kokkotöch le Föri Letipen Jiowa).a
17. (a) Ifa ussun Jises a pwäratä pwe a watte an lükülük won ewe mwichen chon angang? (b) Ifa ussun chon mas lon pekin ngün ra kan pwäratä pwe a wor ar lükülük won ewe mwichen chon atawe?
17 A mmen watte än Jises lükülük won ewe mwichen chon angang pwe iwe a seikatä won “pisekin meinisin,” weween, pisekin kewe meinisin lon pekin ngün won fönüfan. (Mattu 24:47) Mwän mi seikitä ngeni chon mas ra kan affata pwe a pwal wor ar lükülük won ena mwichen chon angang ren ar akkapwönüetä ewe emmwen ra akkangei seni ewe Mwichen Sou Emmwen mi tupwu seni ewe mwichen chon angang mi tuppwöl me tipatchem. Ewer, lupwen chon mas ra kan äkkäiti pwal fitemön, tipemecheresin käit seni än Kot we Kapas, me lupwen ra akkapwönüetä ewe käit seni ewe mwichen chon angang, ra kan akkalapalo tipeeü lein ewe pwin siip. A ifa me watteen ach kilisou pwe Jiowa a kan äkkäiti ekkan mwän mi wesewesen tongei emön me emön chon ewe mwichefelin Kraist!
[Footnote]
a Förien Chon Pwäratä Jiowa.
Ifa Ussun Kopwe Pölüeni?
• Ifa ussun chon mas mi äsimaü ra kan äkkäiti pwal fitemön?
• Pwata chon mas rese kan äkkäiti aramas me ren pwisin ekiekiir?
• Ifa ussun me met popun chon mas ra kan pwäratä pwe a wor ar lükülük won ewe mwichen chon angang?
[Sasing lon pekin taropwe 11]
Chon Kraist elter ra kan äkkäiti ekkewe mwän mi kükkün seniir lon ewe mwichefel
[Sasing lon pekin taropwe 12]
“Ewe chon angang mi tuppwel me tipatchem” a akkawora minen käit mi chommong fän iten ekkan elter