Jiowa Emön Chon Tongei Minne Mi Pwüngöch

Ewe Samol mi Lapalap a apasa, “Ngang [Jiowa] üa efich pwüng.”—AISEA 61:8.

1, 2. (a) Met weween “pwüng” me “pwüngüngaü”? (b) Met ewe Paipel a apasa ussun Jiowa me napanapan we itan pwüngöch?

PWÜNGÖCH a wewe ngeni ‘ese lifilifil aramas, ese eimumu, föri föfför mi öch me wenechar.’ A kapachelong lon pwüngüngaü ekkewe napanap eimumu, aapap, napanap mi ngaü me eriäfföümwäälli ekkewe ekkoch.

² Orun 3,500 ier loom, Moses a mak ussun ewe Epinkepiisom Jiowa: “An kewe al meinisin ra pwung. I eman Kot mi allukuluk, esap wor an mwal, a pwung o wenechar.” (Tuteronomi 32:4) Lap seni füpükü ier mwirin, ren än Kot manaman, Kot a emmweni Aisea an epwe makkei ekkeei kapas: “Ngang üa efich pwüng.” (Aisea 61:8) Iwe, lon ewe äeüin senturi, Paul a apasa: “Mi wor och ese pung ren Kot? Apwi, esap ina!” (Rom 9:14) Lon pwal ewe chök senturi, Piter a apasa: “Kot ese lifilifil aramas, nge lon ekkewe mu meinisin, eka e niuokusiti i o fori minne mi pung, iwe, Kot epwe etiwa i.” (Fofor 10:34, 35) Ewer “ewe Samol a tongei minne mi pung.”—KölFel 37:28; Malakai 3:6.

Pwüngüngaü a Chöüfetäl

3. Ifa ussun pwüngüngaü woon fönüfan a poputä?

³ Ewe napanap pwüngöch ese chöüfetäl ikenäi. Sia tongeni feiengaü ren föfför ese pwüng lon ach leenien angang, lon sukul, lon ach angangfengen me ekkewe nöüwis, me pwal mwo nge lon ach famili. Pwüngün, ekkeei sokkun pwüngungaü rese keran fisitä. A fis pwüngüngaü ngeni aramas lupwen popuch kewe Atam me If ra ü ngeni Kot, iwe, ra wiliti aramas ese pwüng fän etipetipaen ewe ngün mi ü ngeni Kot, ewe a wiliti Setan ewe Tefil. Ese fokkun pwüng än Atam, If, me Setan äeämwäälli ar tufichin pwisin filatä, ewe Jiowa a liffang ngeniir. Ena föfför mi mwääl a efisatä riäfföü watte me mälo ngeni aramas meinisin.—Keneses 3:1-6; Rom 5:12; Ipru 2:14.

4. Ifa ükükün ttamen an a fiffis pwüngüngaü lon uruwon aramas?

⁴ Ükükün wonu ngeröü ier seni fansoun ra ü ngeni Kot lon Ichen, pwüngüngaü a fen chöüiti aramas meinisin. A fis pokiten Setan, i ewe koten ei fönüfan. (2 Korint 4:4) I emön mi kapas chofona me semelapen kapas chofona, ewe chon pweni me emön chon ü ngeni Jiowa. (Jon 8:44) A fokkun ekkefisi pwüngüngaü. Ren chök awewe, a watte än Setan etipetipa aramas me mwen ewe Noter lon ränin Noa we. Iwe, Kot a küna pwe “än aramas föföringau a fokun wattela won fanüfan, nge ekiekin leluker a chök ngauala fansoun meinisin.” (Keneses 6:5) Ei napanap a chüen sopwosopwolo lon fansoun Jises. A apasa: “A naf ngeni eu ran an we ingau,” weween, an kewe osukosuk mi aweiresi aramas lon ena rän, awewe chök, pwüngüngaü. (Mattu 6:34) A pwüng an ewe Paipel apasa: “Masouen lang me fonufan meinisin ra chok ngungufengen tori ei fansoun.”—Rom 8:22.

5. Pwata a lapolo pwüngüngaü lon ach ei fansoun lap seni loom?

⁵ Ina popun, lon unusen uruwon aramas, mettoch mi ngaü ra fisitä pokiten watteen pwüngüngaü. Iei, ena napanap a fen ngaüelo seni loom. Pwata? Pun ei otot mi ngaü ikenäi a nom lon ekkewe “ränin le sopwoloon.” Iwe, ekkeei ränin le sopwoloon mi ur ren “fansoun weires” repwele mwüchülo. Ewe Paipel a oesini pwe aramas lon ei fansoun “repwe tongei pwisin ir, epwe tongei moni, repwe sikasini, lamalam tekia, esiita, . . . resap meefi kilisou, o manauer esap fel, esap wor ar chen, repwe pwisin nemenemenir, repwe luapas, resap mosonoson, repwe mocho, repwe oput minne mi murinno; repwe chon afangema, repwe tumunungau, angolsa.” (2 Timoti 3:1-5) Ekkena napanap mi ngaü ra efisatä sokkopaten pwüngüngaü.

6, 7. Ikkefa ekkewe watteen pwüngüngaü ra fen eriäfföü aramas lon ach ei fansoun?

⁶ Lon ekkewe ipükü ier ra lo, a wakattelo pwüngüngaü seni loom. Maun lon ekkeei ier a watte seni loom. Ren chök awewe, lon chök ewe Oruuen Maunen Fönüfan, ekkewe sou uruwo ra ekieki pwe orun 50 are 60 milion aramas ra mälo, nge lape ngeniir esap sounfiu, nge ir mwan, fefin me semirit. Seni wesiloon ewe maun, fite milion aramas ra pwal ninnilo lon sokkopaten fitikoko, nge lape ngeni esap ir sounfiu. Setan a efisatä ekkeei pwüngüngaü fän an lingeringer pun a silei pwe Jiowa epwele nielo. Ewe Paipel a apasa: “Ewe tefil a fen feitiu remi lon an song mi lap, pun a sinei pwe an we fansoun a chok mochomoch.”—Pwarata 12:12.

⁷ Woon unusen fönüfan, ekkewe mwichen sounfiu ra nöünöü orun eü trilion chala iteiten ier. Fite milion aramas ra echik me osupwang, iwe, ekieki mwo ussun watteen ewe älillis epwe kawor ngeniir ika ra nöünöü ena moni fän iten sokkun föfför mi efisatä kinamwe. Arapakkan eü bilion aramas ese naf aner mongo, nge ekkoch a fokkun chommong aner. Me ren ewe repot seni United Nations, arapakkan nimu milion semirit ra mälo pokiten echik iteiten ier. Ese fokkun pẅung! Iwe, pwal ekieki mwo ussun ekkewe mönüköl mi ninnilo me lon luken iner. Ra ekieki pwe ükükün 40 milion tori 60 milion mönüköl ra fen ninnilo iteiten ier! A ifa me watteen ngaüen ena föfförün pwüngüngaü!

8. Epwe ifa ussun pwüng enlet epwe tori aramas?

⁸ Ekkewe sou nemenem resap tongeni pwäkini ekkewe watte osukosuk mi eriäfföü aramas iei, me nonnomun aramas esap tongeni öchülo ren an aramas achocho. Än Kot we kapas a fen oesini pwe lon ach fansoun “ekkewe aramas ingau, pwal ekkewe chon likotuputup, repwe chok alapalo ar fofor-ingau, ra otupu ekkoch, nge ekkoch ra pwal otupu ir.” (2 Timoti 3:13) A kon watte pwüngüngaü a chöüiti aramas, ina popun aramas resap tongeni amoielo. Ewe chök Koten pwüng epwe tufichin awesalo. I chök epwe tongeni nielo Setan, ekkewe timon, me aramas mi ngaü.—Jeremaia 10:23, 24.

Sia Weweiti Popun Aramas Ra Lolileniesini

9, 10. Pwata Asaf a äpilükülüküngaü?

⁹ Me loom, pwal mwo nge ekkoch chon makkei Paipel rese lien weweiti ika pwata Kot ese angolong lon än aramas kewe osukosuk me wato pwüng mi enlet me pwüngöch. Awewe chök, ewe pworaus asan Kölfel 73 a era pwe ina echö an Asaf köl. Asaf, emon chon Lifai sou köl fän än King Tafit nemenem are a weneiti ekkoch sou köl lon imwen Asaf we. Asaf me mwirimwirin kewe ra makkei chommong köl aramas ra eäni lon ar fel. Iwe nge, a fis eü fansoun lupwen Asaf a äpilükülüküngaü. A küna wöüüöchün aramas rese pwüng, nge ussun itä ra menemenöch, rese pwal kükküna chappen ar kewe föfför-mwääl.

¹⁰ Iei alon we: “Ua lolowo ngeni ekkewe aramas mi lamalam tekia, lupwen ai kuna feiochun ekkewe aramas mi ingau. Pun esor ar metek, inisir mi chok kitekit o pochokul. Ese mo wor ar riaffou epwe usun an ekkewe ekkoch aramas, rese pwal kuna ninni usun ekkewe ekkoch.” (Kölfel 73:2-8) Nge lo, lo, lo, ewe sou mak a mirititi pwe a ekiek-mwääl. (Kölfel 73:15, 16) A achocho le awena an ekiek, nge ese unusen weweiti ika pwata aramas mi ngaü rese angei liwinin ar föfför mi ngaü, nge fän chommong, ekkewe aramas mi pwüng ra küna riäfföü.

11. Met ewe sou köl Asaf a keran weweiti?

¹¹ Ekiselo mwirin, ena mwän mi tuppwöl a keran weweiti met epwe fis ngeni ekkewe aramas mi ngaü, pwe Jiowa epwe awena mettoch meinisin. (Kölfel 73:17-19) Tafit a makkei: “Kopwe witiwiti ewe Samol, o kopwe chok fetal lon an we al, iwe, epwe seikuketa pwe kopwe fonueni ewe fonu; kopwe nennengeni poutmwalin ekkewe aramas ingau.”—Kölfel 37:9, 11, 34.

12. (a) Ifa än Jiowa kokkot ussun föfföringaü me pwüngüngaü? (b) Met meefiom ussun ena kotun awesalo pwüngüngaü?

¹² Ren pwüngün, Jiowa a akkota pwe epwe awesalo föfför mi pworongaü me pwüngüngaü seni ei fönüfan lon pwisin an fansoun. Iei och mettoch epwe öch ekkewe chon Kraist mi tuppwöl repwe achema ngeni pwisin ir iteitan. Jiowa epwe nielo chon ü ngeni letipan we me epwe efeiöchü chokkewe mi atipeeüfengenni manauer ngeni. “Mesan kewe ra nennengeni, apwolun mesan kewe ra sotuni ekkewe aramas. Ewe SAMOL a sotuni ekkewe aramas mi pung, o pwal ekkewe mi ingau; o ngunun a oputa ekkewe ir mi mochen mwanesol. Epwe apungatiu mochen ekkei o primston won ir kewe mi ingau; epwe aineti ngeni sepier och asapwal mi pwichikar . . . Pokiten ewe SAMOL mi chok pung, iei minne a tongei fofor mi pung.”—Kölfel 11:4-7.

Eü Fönüfan Sefö, Ikkewe Pwüngöch Epwe Nom Ie

13, 14. Pwata pwüng me pwüngöch repwe nonnom lon ewe fönüfan sefö?

¹³ Lupwen Jiowa epwe ataielo ei otot mi ngaü fän nemenien Setan, Jiowa epwe föratä eü fönüfan sefö mi amwarar. Ena fönüfan epwe nom fän nemenemen ewe Mwuun Kot, ewe mwu Jises a ereni nöün kewe chon käeö ar repwe ioteki. Pwüng me pwüngöch repwe siwili föfföringaü me pwüngüngaü, iwe, ina atun ewe iotek epwe unusen pwönüetä: “Muom epwe feito, letipom epwe pwonueta, won fonufan usun chok lon lang.”—Mattu 6:10.

¹⁴ Ewe Paipel a äiti ngenikich ewe sokkun nemenem sipwe tongeni küna, ina ewe nemenem meinisin aramas mi pwüng ra äneänei. Kölfel 145:16 epwele unusen pwönüetä: “Ka [Jiowa Kot] suukalo poum, o ka amötalo mettoch meinisin minne mi manau.” Pwal eü, Aisea 32:1 a apasa: “Nengeni, eman king [Jises lon läng] epwe nemenem fan pwüng, nge ekewe samol [chon tupuni Jises woon fönüfan] repwe nemenem fän pwüngüöch.” Ewe oesini lon Aisea 9:7 a oesini ussun ewe King Jises Kraist: “Iwe, nemeneman epwe chök wattela, nge mwün epwe chök kinamwe fansoun meinisin. Epwe siwili Tafit lon wisan wisen king o nemeni mwün. Epwe aüetä o apöchöküla mwün ren apwüng me pwüngüöch seni ikenai tori feilfeilachök. Iwe, ewe Samol mi Unusen Manaman epwe tiliken le apwönüetä ei.” Ka tongeni anchangei om nonnom fän ena nemenem mi pwüng?

15. Met Jiowa epwe föri fän iten aramas lon ewe fönüfan sefö?

¹⁵ Lon än Kot we fönüfan sefö, esap chüen wor popun ach sipwe aloni alon Än Salomon Afalafal 4:1, a erä: “Iwe, üa nenengenisefäli o küna ekewe riaföü ra fis won fanüfan. Chokewe mi küna riaföü ra kechü, nge esap wor eman a alisiir. Iwe, ekewe chon ariaföüür a wor ar pöchökül, iei minne esap wor eman a alisi ekewe chon riaföü.” Eli epwe weires ach sipwe anchangei amwararen ena fönüfan mi ur ren mettoch mi pwüng me wenechar pun ach ekiek ese unusöch. Mettoch mi ngaü resap chuen nom; iteiten rän epwe ur ren mettoch mi mürinnö. Ewer, Jiowa epwe apwüngü mettoch mi mwääl nge epwe lu seni minne sipwe tongeni anchangei. Ina minne, Jiowa a emmweni Piter an epwe makkei: “Nge usun an we pwon, sia witiwiti lang sefo o pwal fonufan sefo, ikewe pung epwe nonnom ie.”—2 Piter 3:13.

16. Ifa ussun ewe “lang sefo” a fisitä, me ifa ussun älükülüküün ewe “fonufan sefo”a fiffis iei?

¹⁶ Enlet, ewe “lang sefo,” än Kot we mwu lon läng a nom lepoun Kraist a fen fisitä. Lon ekkeei ränin le sopwoloon, a fiffis ioifengennin ekkewe aramas repwe wiliti longolongun ewe “fonufan sefo,” eü mineföön mwichen aramas mi pwüng. Iei, choochoon ekkena aramas a arapakkan fisu milion lon 235 fönü me lon 100,000 som mwichefel. Pokiten ekkeei fitu milion aramas ra käeö än Jiowa kewe al mi pwüng, iwe, ewe ririin tong a atipeeüfengenni ir meinisin woon unusen fönüfan. Ar tipeeüfengen a kon pwäpwälo me lüküchar seni meinisin lon uruwon fönüfan. Esap tufich ei sokkun tipeeüfengen epwe nom lein nöün Setan kewe aramas. Ei sokkun tong mi aririfengennikich, ina liosun ekkewe mettoch mi amwarar epwe fis lon än Kot we fönüfan sefö, ewe epwe nom fän nemenem mi pwüng me pwüngöch.—Aisea 2:2-4; Jon 13:34, 35; Kolose 3:14.

Än Setan Maun Ngenikich Epwe Sopwongaü

17. Pwata Setan esap win lon an we amwüchülöön maun ngeni nöün Jiowa kewe?

¹⁷ Ekiselo chök, Setan me chienan kewe repwe maunei chon fel ngeni Jiowa pwe repwe sotun aroserelo. (Isikiel 38:14-23) Iei eü kinikinin met Jises a eita ngeni ewe “riaffou lapalap, usun chok esaamo fis seni me le poputan fonufan tori ikenai, o esap pwal usun chok mwirin.” (Mattu 24:21) Setan epwe win? Aapw. Än Kot Kapas a alükülükü ngenikich: “Pun ewe Samol a tongei minne mi pung; esap likitalo noun kewe aramas mi fel. Epwe tutumunu ekkewe aramas mi pung feilfeilo chok, nge noun ekkewe aramas ingau epwe poku seni. Ekkewe aramas mi pung repwe fonueni ewe fonu, o repwe nonnom lon, feilfeilo chok.”—Kölfel 37:28, 29.

18. (a) Met Jiowa epwe föri lupwen Setan epwe maunei nöün kewe aramas? (b) Pwata a mürinnö om kopwe enniwili ei pworaus seni ewe Paipel ussun pworachoon me chöchöloon minne mi pwüngöch?

¹⁸ Än Setan me chienan kewe maun ngeni nöün Jiowa kewe, ina epwe amwüchülöön an turunufasei Jiowa. Jiowa a oesini me ren Sekaraia: “Chokewe mi atapakemi ra atapa fituken lon mesan.” (Sekaraia 2:8) Epwe ussun itä nge emön a tikilong efoch autun poun lon mesen Jiowa. Iwe, Jiowa epwe mwittir mwöküt le äralo ewe chon föfföringaü. Nöün Jiowa kewe chon angang woon fönüfan ra fokkun tongfengen, tipeeüfengen, kinamwefengen, me sou apwönüetä allük. Ina pwata, ese wor popun me ese fokkun pwüng än Setan mauner. Ewe chon “tongei minne mi pwung” esap fokkun mutatä. Lupwen Jiowa epwe tümünü nöün kewe, ekkewe chon ü ngeni repwe ninnilo, pwüngöch epwe pworacho, me chon fel ngeni ewe Kot mi enlet repwe küna amanau. Met ren amwararen ekkena napanap repwele fis lon mwach kan!—Än Salomon Fos 2:21, 22.

Ifa Ussun Kopwe Pölüeni?

• Pwata a chöüfetäl föfför mi ngaü?

• Epwe ifa ussun Jiowa epwe awesalo osukosuken pwüngüngaü me woon fönüfan?

• Met a kkü letipom lon ei käeö ussun pworachoon minne mi pwüng?

[Picture on page 23]

Föfföringaü a chöülo me mwen ewe Noter me a pwal chöüfetäl lon ekkeei “ränin le sopwoloon”

[Picture on page 24]

Lon än Kot we fönüfan sefö, pwüngöch me föfföröch repwe siwili föfföringaü