Mi Fichitiir Ar Repwe Mwuuni Eü Mwu
“Iei och esisinen an Kot we kapung mi pung, pwe epwe atufichikemi ngeni ewe muun Kot, ewe oua kuna riaffou ren.”—2 TES. 1:5.
1, 2. Ifa än Jiowa kokkot ussun ewe kapwüng, me iö na epwe wisen apwüngü?
A ORUN 50 C.E., ewe aposel Paul a nom lon Atens. Pokiten a letipengaü ren chöüfetällin än aramas fel ngeni anü mwääl ikewe ie, a meefi lamoten an epwe afalafaler. A asopwalo an afalafal ren och pworaus mi amwökütü ekkewe chon aüseling chon lükün ar repwe ekilapei. A apasa: “Iei a [Kot] allükü ngeni aramas meinisin ekis meinisin pwe repwe aier. Pun a fen filata eu ran, ranin an epwe apungu fonufan ren minne mi pung, ren atewe a fen seikata. Iwe, a pwal alleta ei poraus ngeni aramas meinisin ren an amanauasefallieta atewe seni malo.”—Fofor 17:30, 31.
2 A ifa me öchün ach sipwe ekilapei ewe pworaus mi enlet pwe Jiowa a fen filatä eü ränin kapwüng ngeni aramas lon mwach kkan! Ena kapwüng epwe fis me ren ewe emön Paul ese affata lon an we afalafal me lon Atens, nge sia silei pwe emönna, i ewe mi fen manausefäl, Jises Kraist. Än Jises kapwüng epwe wewe ngeni manau ika mälo.
3. Pwata Jiowa a föri eü pwon ngeni Eperiam, me iön a wiseni eü wis mi sokkolo aüchean ren pwönüetään ewe pwon?
3 Ewe Ränin Kapwüng epwe 1,000 ier ttaman. Jises epwe tupuni Jiowa lon ewe wis Kingen än Kot we Mwu, nge esap chök äläemön. Jiowa a pwal filatä ekkoch me lein aramasen fönüfan pwe repwe eti Jises le nemenem me apwüngü fönüfan lon ena engeröü ierin nemenem. (Apöpöfengenni me Luk 22:29, 30.) Arapakkan 4,000 ier loom, Jiowa a isetiu longolongun ena Ränin Kapwüng lupwen a föratä eü pwon lefiler me nöün we chon angang mi tuppwöl, Eperiam (Älleäni Kenesis 22:17, 18.) A ffatolo pwe ewe pwon a poputä lon ewe ier 1943 B.C.E. Pwüngün, Eperiam ese unusen weweiti ifa ussun ewe pwon epwe weneiti aramasen fönüfan. Iwe nge ikenäi, sia tongeni küna pwe fän ewe pwon, mwirimwirin Eperiam kewe repwe wiseni eü wis mi sokkolo aüchean lon pwönüetään än Kot apwüngü aramas.
4, 5. (a) Iön ewe äkkäemönün mwirimwirin Eperiam, me met a apasa ussun ewe Mwu? (b) Ineet a suuk ewe äpilükülükün mwuuni ewe Mwu?
4 Ewe äkkäemönün mwirimwirin Eperiam, ina i Jises, ewe a kepit me ren ewe ngün mi fel lon 29 C.E. me wiliti ewe Messaia are Kraist. (Kal. 3:16) Ren ewe ülüngät esopw ier, Jises epwe afalafala ewe kapas allimen ewe mwu ngeni ekkewe chon Jus. Mwirin än Jon Papatais ares, Jises a pwäratä pwe pwal ekkoch repwe tongeni eäni ewe äpilükülük ar repwe pwal mwuuni ewe mwu lupwen a apasa: “Seni ekkewe ränin Jon Papatais tori ikenäi, ewe mwuun läng iei ewe mettoch aramas ra fokkun achocho ngeni, iwe, iir kewe mi öttüres repwe angei.”—Mt. 11:12., NW.
5 Mwen chök a kapas ussun iir kewe repwe ‘mwuuni’ ewe Mwuun Läng, Jises a apasa: “Enlet, upwe apasa ngenikemi, pwe ese mo wor emön a pwälo me lein ekkewe mi uputiu seni fefin a lap seni Jon Papatais, nge ewe mi kisikis seni meinisin lon muun lang a lap seni i.” (Mt. 11:11) Pwata a ina ussun? Pun ewe äpilükülükün ar repwe mwuuni ewe Mwu esaamwo unusen suuk ngeni ekkewe mi tuppwöl tori ewe fansoun ra angei ewe ngün mi fel lon Pentikos 33 C.E. Nge Jon Papatais a fen mälo mwen a fis ena mettoch.—Fofor 2:1-4.
Mwirimwirin Eperiam Kewe Ra Iteni Chon Pwüng
6, 7. (a) Ifa ussun mwirimwirin Eperiam kewe repwe ussun chök“ekewe fün läng”? (b) Ifa ewe feiöch Eperiam a angei me ifa ewe feiöch mi löllö ngeni ewe, mwirimwirin kewe repwe angei?
6 Jiowa a ereni Eperiam pwe mwirimwirin kewe repwe chommongolo ussun “ekewe fün läng”me pwal ussun ekkewe ppien oroset. (Ken. 13:16; 22:17) Weween pwe lon fansoun Eperiam we, ese tufich ngeni aramas ar repwe silei ika repwe fitemön mwirimwirin Eperiam kewe. Iwe nge, lo, lo, lo, epwe pwä ükükün chochoon mwirimwirin Eperiam kewe lon pekin ngün. Lükün Jises, repwe 144,000 aramas.—Pwar. 7:4; 14:1.
7 Ren än Eperiam we lükü, än Kot we Kapas a apasa: “Apram a lükü ewe Samol mi Lapalap o küna pwüng me ren Kot pokiten an lükülük.” (Ken. 15:5, 6) A enlet pwe ese wor emön mi unusen pwüng. (Jem. 3:2) Iwe nge, pokiten pöchökkülen an lükü, än Jiowa föfför ngeni a ussun emön mi unusen pwüng me pwal mwo nge eita ngeni chienan we. (Ais. 41:8) Jises me pwal mwirimwirin Eperiam kewe lon pekin ngün ra küna pwüng me ren Jiowa, iwe, epwe toriir ekkewe feiöch mi watte seni minne Eperiam a angei.
8. Ikkefa ekkewe feiöch ra suuk ngeni mwirimwirin Eperiam kewe?
8 Chon Kraist mi kepit ra küna pwüng me ren Jiowa pun ra anganga ar lükü lon än Jises we möön kepich. (Rom 3:24, 28) Me ren Jiowa, ra ngaselo seni ar tipis me ra tongeni kepit ren ewe ngün mi fel pwe repwe nöün Kot kewe lon pekin ngün, me pwal pwiin Jises Kraist kewe. (Jon 1:12, 13) Ra tolong lon ewe mineföön pwon me wiliti eü mineföön mwu, “ewe Israelin Kot.” (Kal. 6:16; Luk 22:20) A ifa me watteen amwararen ena mettoch! Pokiten än Kot kkeei föfför fän iter, Chon Kraist mi kepit rese eäni ewe äpilükülük pwe repwe manau woon fönüfan tori feilfeilo chök. Ra likitalo ena äpilükülük fän iten ewe pwapwa chapur repwe küna seni ar eti Jises le nemenem lon läng me ar repwe nom ren atun ewe Ränin Kapwüng.—Älleäni Rom 8:17.
9, 10. (a) Ineet ekkewe Chon Kraist ra akkom kepit me ren ewe ngün mi fel, me ifa ar äpilükülük? (b) Met sokkun älillis ekkewe Chon Kraist mi kepit ra angei?
9 Lon Pentikos 33 C.E., a suuk ngeni eü mwichen aramas mi tuppwöl ar repwe fiti chokkewe repwe eti Jises le nemenem lon ewe Ränin Kapwüng. Arapakkan 120 nöün Jises kewe chon käeö ra papatais ren ewe ngün mi fel me akkom le wiliti Chon Kraist mi kepit. Iwe nge, a kerän chök ina poputään ewe alen ar repwe küna manau lon läng. Seni ena fansoun, repwe pwäratä ar tuppwöl ngeni Jiowa fän ekkewe sossot meinisin seni Setan. Repwe fokkun lüküchar tori mälo ika repwe angei ewe mwärin manau lon läng.—Pwar. 2:10.
10 Ren an epwe älisiir, Jiowa, ren an we Kapas me ewe mwichefelin Chon Kraist a awora ngeni ekkewe Chon Kraist mi kepit kapasen apöchökkül me kapasen pesepes mi lamot ngeniir. Ren chök awewe, ewe aposel Paul a mak ngeni ekkewe Chon Kraist mi kepit lon Tesalonika: “Usun chok emon sam ren noun kewe, am aia afalafalakemi emon me emon, o apochokkulakemi, pwal fonuokemi, pwe ami fefetal epwe fich ngeni Kot, ewe mi korikemi ngeni pwisin muun o lingan.”—1 Tes. 2:11, 12.
11. Ifa ewe minen älillis Jiowa a föri pwe epwe makketiu fän iten “ewe Israelin Kot”?
11 Lap seni 60 ier mwirin filitään ekkewe akkom chon ewe mwichefelin Chon Kraist mi kepit, Jiowa a küna lamoten an epwe wor makken pworausen än Jises we angangen afalafal me An föfför me emmwen ngeni ekkewe Chon Kraist mi kepit lon ena fansoun. Ina minne, Jiowa a apachalong ewe Tesin Krik ngeni ewe Tesin Ipru mi fen wor. Ewe Tesin Ipru a akkom mak fän iten wesewesen ekkewe chon Israel loom atun a wor ar ririöch ngeni Kot. Ewe Tesin Krik a äkkäeüin mak fän iten “ewe Israelin Kot,” ekkewe ra kepit pwe repwe pwiin Kraist kewe me nöün Jiowa kewe lon pekin ngün. Pwüngün, esap weween pwe ekkewe chon lükün Israel resap tongeni küna feiöch watte seni ar käeö ewe Tesin Ipru. Pwal ina chök ussun, Chon Kraist rese kepit ren ewe ngün mi fel repwe pwal küna feiöch watte seni ar käkkäeö me akkapwönüetä ekkewe kapasen fön seni ewe Tesin Krik.—Älleäni 2 Timoti 3:15-17.
12. Ifa ewe kapasen ächechchem Paul a ngeni ekkewe Chon Kraist mi kepit?
12 Ekkewe popun Chon Kraist ra küna pwüng me ra kepit ren ewe ngün mi fel fän iten an epwe atufichiir pwe repwe angei alemwirier lon läng. Ar kepit ren ewe ngün mi fel ese ätekiaretä ngeni ewe wis king woon chiechier kewe chon kepit atun ra chüen nonnom woon fönüfan. A pwälo pwe ekkoch popun Chon Kraist a pöüt seniir ena ekiek me ra sotun ätekiaretä lein pwiir kewe lon ewe mwichefel. Iwe mwiriloon, Paul a eis: “Ämi oua fen mötulo! Oua fen pisekisekilo! Oua fen forikemi pwe samol, nge sap ren am. Amo ami oua fen samol, pwe am aupwe pwal etikemi le samol!” (1 Kor. 4: 8) Ina popun, Paul a ächema ngeni ekkewe mi kepit lon ränin we: “Esap pwe am aupwe nemeni ami luku; sia chok etikemi le angang pwe oupwe pwapwa.”—2 Kor. 1:24.
Aunusalo Ewe Ükükün a Oesini Ussun
13. Ifa ussun kefilitään ekkewe mi kepit a fiffis mwirin 33 C.E.?
13 Esap meinisin ekkewe 144,000 Chon Kraist mi kepit ra filitä lon fansoun ekkewe aposel. Kefilitäär a sopwosopwolo seni fansoun ekkewe aposel, nge ren ekkewe fitepükü ier mwirin, a chokisikisilo mi filitä. Iwe nge, kefilitään ekkewe mi kepit a sopwosopwolo lon ekkewe fitepükü ier mwirin tori ach ei fansoun. (Mt. 28:20) Lo, lo, lo, mwirin Jises a poputä an nemenem lon 1914, a mwittir fis ekkoch mettoch.
14, 15. Met a fis lon ach ei fansoun ren kefilitään ekkewe mi kepit?
14 Akkom, Jises a unusen limetawu seni läng ekkewe chon ü ngeni än Jiowa we nemenem. (Älleäni Pwarata 12:10, 12.) Iwe mwirin, Jises a äteneki chon än we mwu pwe epwe ionifengenni ekkewe lusun pwe epwe unusolo ekkewe 144,000. Orun 1935, a arapakkan wesilo ena angang, nge chommong me lein chokkewe mi etiwa ewe kapas allim rese ekiekin feitä läng. Ewe ngün mi fel ese pwäratä ngeniir pwe iir nöün Kot kewe. (Apöpöfengenni me Rom 8:16.) Iwe, ra ekiekin fiti ekkewe “pwal ekkoch siip,” iir kewe mi eäni ewe äpilükülükün manaufochofoch woon eü paratisin fönüfan. (Jon 10:16) Ina minne, mwirin 1935, ewe angangen afalafal a äkkäeüin ionifengenni “eü mwich mi lapalap” iir kewe ewe aposel Jon a küna lon eü längipwi pwe repwe manauewu seni “ewe riäfföü lapalap.”—Pwar. 7:9, 10, 14.
15 Iwe nge, seni 1930, chokisikis chök ra fen kökkö ngeni ewe äpilükülükün manau lon läng. Pwata? Pun ekkoch, inaamwo ika ra piin kökkö nge iei pokiten rese chüen tuppwöl, Jiowa epwe kütta siwiliir. (Apöpöfengenni me Pwarata 3:16.) Paul a pwal mwo nge kapas ussun pwisin chienan kewe mi tokolo seni ewe enlet. (Fil. 3:17-19) Nge iö Jiowa epwe köri pwe epwe wisen siwili chokkewe ra rikilo? Pwüngün, ena pwisin filian. Nge, sipwe tongeni erä pwe Jiowa esap filatä chokkewe mi kerän wililo, nge iir kewe mi fen pwäratä ar tuppwöl, ussun chök nöün Jises kewe chon käeö, iir kewe a fos ngeni lon ewe fansoun a poputäni ewe Ächechchem.a—Luk 22:28.
16. Ren ekkewe mi kepit, met sipwe kilisou ren, me met sipwe tongeni enletin lükü?
16 Iwe nge, esap meinisin mi filitä ngeni ewe äpilükülükün manau lon läng seni ewe ier 1930 epwe fän iten chök ar repwe siwili ekkewe mi rikilo seni ewe enlet. Jiowa a tümünü pwe epwe wor Chon Kraist mi kepit leich atun ekkeei ränin sopwoloon ei otot mi ngaü tori taloon ewe chon ü ngeni, weween, “Papilon mi Lapalap.”b (Pwar. 17:5) Sipwe tongeni lükülük pwe lon ewe fansoun Jiowa a filatä, epwe unusolo ekkewe 144,000,iwe, lo, lo, lo, iir meinisin repwe wisen sou nemenem lon än Kot we mwu. Sia pwal tongeni lükü ewe Kapasen oesini pwe ren eü mwichen aramas, weween ewe mwich mi lapalap mi chochchommongolo repwe tuppwöl. Ekiselo chök epwe towu “seni ewe riaffou mi lapalap” ewe a kküü än Setan ei fönüfan me sipwe pwapwa le mwökütülong lon än Jiowa we fönüfan sefö.
Epwele Unusolo Än Kot we Mwu lon Läng!
17. Me ren 1 Tesalonika 4:15-17 me Pwarata 6:9-11, met a fis ngeni ekkewe Chon Kraist mi kepit mi fen mälo lon tuppwöl?
17 Seni ewe ier 33 C.E. fitu kit Chon Kraist mi kepit ra pwäralo pöchökkülen ar lükü me ra engilo fän riäfföü tori mälo. Chokkeei ra fen kefilitä pwe repwe mwuuni ewe Mwuun läng, nge poputä seni le poputään än Kraist nemenem, ra küna manau lon läng.—Älleäni 1 Tesalonika 4:15-17; Pwarata 6:9-11.
18. (a) Lusun chokkewe mi kepit ra chüen manau woon fönüfan ra äpilükülükü met? (b) Ifa meefien ekkewe pwal ekkoch siip ngeni pwiir kewe mi kepit?
18 Chokkewe mi kepit mi chüen nom woon fönüfan ra wesewesen lükü pwe ika repwe amwöchü ar tuppwöl, iwe, ekiselo chök repwe küna manau lon läng. Fite milion pwal ekkoch siip, lupwen ra küna tuppwölün pwiir kewe mi kepit, ra tipeeü ngeni minne Paul a apasa ussun ekkewe mi kepit lon Tesalonika: “Äm aia pwisin sikasinikemi lon ekkewe mwichefelin Kot, ren ami likiitu o luku lon ami kewe ninni meinisin, o lon ami kewe riaffou oua fen kuna. Iei och esisinen an Kot we kapung mi pung, pwe epwe atufichikemi ngeni ewe muun Kot, ewe oua kuna riaffou ren.” (2 Tes. 1:3-5) Ren mäloon ewe säingoon chon ewe mwich mi kepit woon fönüfan, ese lifilifil ineet chök epwe fis, iwe, ina atun epwe unusolo än Kot we mwu lon läng. A ifa me watteen ewe pwapwa epwe fisitä woon läng me fönüfan!
[Footnotes]
a Kopwe nengeni Ewe Leenien Mas minen September 1, 1992, pekin taropwe 14 parakraf 17.
b Kopwe nengeni “Question From Readers ” (Kapas Eis Seni Chon Älleä) lon ewe The Watchtower minen May 1, 2007.
En Mi Tongeni Aweweei?
• Met Kot a pwäri ngeni Eperiam a weneiti ewe ränin kapwüng?
• Pwata Eperiam i emön mi pwüng me ren Kot?
• Ren än mwirimwirin Eperiam kewe küna pwüng, a emmwen ngeniir met?
• Ifa ewe äpilükülük Chon Kraist meinisin ra eäni?
[Sasing lón pekin taropwe]
Jises a pesei nöün kewe chon käeö repwe tinikken pwe repwe mwuuni ewe mwuun läng
[Sasing lón pekin taropwe 21]
Lon Pentikos 33 C.E., Jiowa a poputä le filatä chon ewe oruuen mwichen mwirimwir seni Eperiam
[Sasing lón pekin taropwe 23]
Ekkewe pwal ekkoch siip ra kilisou pwe ekkewe chon Kraist mi kepit ra nonnom rer le atun ekkeei ränin sopwoloon