“Kopwe Mwüt Ngenikem pwe Aipwe Etikemi”

1, 2. (a) Met Jiowa a apasa epwe fis lón ach ei fansoun? (b) Ikkefa ekkewe kapas eis repwe pélú me lón ei lesen? (Ppii ewe sasing lepoputáán ei lesen.)

JIOWA a apasa pwe lón ach ei fansoun, “engol mwän seni ekewe mwü mi sokola ar kapas repwe amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’” (Sek. 8:23) Lón ena wokisin, ena “chon Juta,” are chón Jus, a liosuetá chókkewe Kot a filiretá pwe repwe kepit ren an we manaman mi fel. Ra pwal iteni “ewe Israelin Kot.” (Kal. 6:16, Testament Mi Fö) Ekkena “engol mwän” ra liosuetá chókkewe ra eáni ápilúkúlúkún manaw esemuch wóón fénúfan. Ra silei pwe Jiowa a fen efeiéchú ena mwichen chón kepit me ra meefi pwe a eú feiéch mi aúchea ar repwe etiir lón ar fel ngeni Jiowa.

² Jesus a apasa pwe néún Kot kewe aramas repwe tipeeúfengen, usun chék met ewe soufós Sekaraia a pwal apasa. Jesus a néúnéú ewe kapas “mwich mi kisikis” fán iten chókkewe ra ápilúkúlúkún kúna manaw lón láng, nge ‘ekoch sip’ fán iten ekkewe ra ápilúkúlúkún kúna manaw wóón fénúfan. Nge Jesus a apasa pwe iir meinisin repwe “eu chök mwichen sip” me repwe tapweló mwirin, pún i néúr we “eman chon mas.” (Luk. 12:32; Joh. 10:16) Pokiten mi wor ruu mwichen aramas, iwe ekkóch repwe tongeni ekieki: (1) Mi lamot án ekkewe ekkóch siip repwe silei iten meinisin ekkewe mi kepit lón ei fansoun? (2) Itá epwe ifa án ekkewe mi kepit ekiek usun pwisin iir? (3) Ika emén lón ai mwichefel a poputá le mwéngé ewe pilawa me ún ewe wain atun ewe Áchechchem, epwe itá ifa féfféri ngeni? (4) Mi wor popun upwe lólilen ika ua kúna pwe a chóchchómmóngóló chóchóón chókkewe mi mwéngé ewe pilawa me ún ewe wain atun ewe Áchechchem? Ei lesen epwe pélúweni ekkena kapas eis.

MI LAMOT SIPWE SILEI ITEN MEINISIN EKKEWE MI KEPIT LÓN EI FANSOUN?

3. Pwata ese tufich ach sipwe wesewesen silei ika ié kewe repwe chóni ewe 144,000?

³ Mi lamot án ekkewe ekkóch siip repwe silei iten meinisin ekkewe mi kepit mi chúen nóm wóón fénúfan lón ei fansoun? Aapw. Pwata? Pokiten ese tufich ach sipwe wesewesen silei ika chókkana repwe angei ar feiéch.^[1] Inaamwo ika Kot a fen etiwer ar repwe feitá láng, nge repwe chék tongeni angei ar feiéch ika ra amwéchú ar tuppwél. Satan a silei ena, me a néúnéú “soufos chofona” ar repwe sótun ‘atupur.’ (Mat. 24:24) Ese tongeni ffat ngeni ekkewe Chón Kraist mi kepit ika repwe angei ar feiéch tori án Jiowa epwe affata ngeniir pwe a fen apwúngaló pwe iir mi tuppwél. Jiowa a ngeniir ar we sáingolóón pwaau lón ewe fansoun me mwen ar repwele máló, are mwen chék epwe poputá ewe “riaföü mi lapalap.”​—Pwär. 2:10; 7:3, 14.

4. Ika ese tufich ach sipwe silei iten meinisin ekkewe mi kepit wóón fénúfan lón ei fansoun, iwe ifa usun sipwe ‘etiir’?

⁴ Ika ese tufich ach sipwe silei iten meinisin ekkewe mi kepit wóón fénúfan lón ei fansoun, iwe ifa usun ekkewe ekkóch siip repwe ‘etiir’? Ewe Paipel a apasa pwe “engol mwän” repwe “amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’” Ena wokisin a fós usun emén chón Juta. Nge a pwal weneiti chómmóng aramas pún a néúnéú ewe kapas “etikemi.” Weween pwe ewe chón Juta esap chék emén nge a liosuetá unusen ewe mwichen chón kepit. Ekkewe ekkóch siip ra silei ena, me ra fiti ena mwich lón ar angang ngeni Jiowa. Ese pwal lamot ngeniir ar repwe silei iten emén me emén chón ena mwich me tapweló mwirin emén me emén leir. Jesus, i ach Sou Emmwen, me ewe Paipel a áiti ngenikich pwe sipwe chék tapweló mwirin i.​—Mat. 23:10.

ITÁ EPWE IFA ÁN EKKEWE MI KEPIT EKIEK USUN PWISIN IIR?

5. Ifa ewe kapasen éúréúr mi lamot ekkewe mi kepit repwe ekiekiéchú, me pwata?

⁵ A lamot ekkewe mi kepit repwe ekiekiéchú ewe kapasen éúréúr mi mak lón 1 Korint 11:27-29. (Álleani.) Atun ewe Áchechchem, ifa usun emén mi kepit a tongeni mwéngé ewe pilawa me ún ewe wain nge “lon an esap fich ngeni”? Ika eménna ese túmúnú an ririéch ngeni Jiowa me ese tuppwél ngeni, iwe lupwen a mwéngé ewe pilawa me ún ewe wain, i a pwáraatá súfélúngaw. (Ipru 6:4-6; 10:26-29) Ei kapasen éúréúr mi péchékkúl a áchema ngeni ekkewe mi kepit lamoten ar repwe akkamwéchú ar tuppwél ika ra mochen angei “ewe win, iei än Kot kö ren Kraist Jesus ngeni ewe manau esemüch.”​—Fil. 3:13-16.

6. Itá epwe ifa án ekkewe mi kepit ekiek usun pwisin iir?

⁶ Iei alon Paulus ngeni ekkewe Chón Kraist mi kepit: “Ngang eman chon fötek pokiten ai angang ngeni ach Samol, üa mochen pese ngenikemi pwe oupwe manaueni eu manau mi fich ngeni ewe kö seni Kot.” Ifa usun repwe féri ena? Paulus a áweweei: “Oupwe tipetekison fansoun meinisin, oupwe tipepwetete o mosonotam. Oupwe echenifengenikemi ren ämi songomangfengen lefilemi. Oupwe fokun achocho le tümwünü ämi tipeeufengen lon ewe Ngünmifel ren ewe kinamwe mi rifengenikemi.” (Ef. 4:1-3) Án Jiowa we manaman mi fel a álisi néún kewe chón angang ar repwe tipetekison nge esap lamalamtekia. (Kol. 3:12) Ina minne, ekkewe mi kepit rese ekieki pwe ra múrinné seni ekkewe ekkóch. Rese ekieki pwe ewe manaman mi fel Jiowa a fang ngeniir epwe chék lap seni ewe manaman a fang ngeni néún kewe pwal ekkóch chón angang. Rese meefi pwe ra weweéchúti ekkewe pwóróus mi enlet lón Paipel lap seni aramas meinisin. Resap pwal ereni emén pwe i a pwal kepit me a tongeni poputá le mwéngé ewe pilawa me ún ewe wain atun ewe Áchechchem. Nge ra fen tipetekison me ra silei pwe Jiowa chék mi tongeni etiwa aramas ar repwe feitá láng.

7, 8. Itá epwe ifa ekiekin me féfférún ekkewe Chón Kraist mi kepit ngeni ekkewe ekkóch, iwe pwata?

⁷ Inaamwo ika ekkewe mi kepit ra meefi pwe a eú feiéch mi aúchea ar ketiw pwe repwe feitá láng, nge rese ekieki pwe epwe kkóló aúchean napanapen féfférún aramas ngeniir. (Ef. 1:18, 19; álleani Filipi 2:2, 3.) Ra pwal silei pwe lupwen Jiowa a filiretá, I ese pwal esilei ngeni meinisin aramas. Ina popun emén mi kepit esap máirú lupwen emén ese mwittir lúkú pwe i mi kepit. A weweiti pwe ewe Paipel a erenikich ach sisap mwittir lúkú alon emén pwe a angei och wis mi kkóló aúchean seni Kot. (Pwär. 2:2) Pokiten emén mi kepit ese ekieki pwe aramas repwe fókkun áfánni i, ese pwal ereni chókkewe ra kerán chufengen pwe i mi kepit. Ren enletin, neman ese pwal apwóróusa ngeni aramas pwe i mi kepit. Esap pwal esika ekkewe mettóch mi amwarar epwe féri lón láng.​—1 Kor. 1:28, 29; álleani 1 Korint 4:6-8.

⁸ Ekkewe Chón Kraist mi kepit rese meefi pwe a lamot repwe awora fansoun ar repwe chék nóm ren ekkewe pwal ekkóch mi kepit, usun itá iir chón eú kúmi mi kkóló me imuló seni ekkóch. Rese sótun kútta pwal ekkóch mi kepit pwe repwe tongeni fós usun ar ra kepit are mwichfengen lón kúmi pwe repwe káé ewe Paipel. (Kal. 1:15-17) Esap tongeni wor tipeeúfengen lón ewe mwichefel ika ekkewe mi kepit repwe féri ena. Ar féri ena epwe ú ngeni angangen án Kot we manaman mi fel, ewe a álisi néún Kot aramas an epwe wor kinamwe me tipeeúfengen lefiler.​—Álleani Rom 16:17, 18.

ITÁ EPWE IFA FÉFFÉRUM NGENIIR?

9. Pwata a lamot sipwe túmúnú napanapen féfférúch ngeni chókkewe mi mwéngé ewe pilawa me ún ewe wain atun ewe Áchechchem? (Ppii ewe pwóór “Tong ‘Esap Föri Mine A Asäw’”)

⁹ Itá epwe ifa féfférum ngeni pwiich kewe mi kepit? Iei met Jesus a ereni néún kewe chón káé: “Ämi meinisin oua pwipwi.” A pwal apasa: “Iö a püsin atekiatä epwe tekisonotiu, nge iö a püsin atekisonatiu epwe tekiatä.” (Mat. 23:8-12) Iwe, ese pwúng án emén epwe fókkun átekiatáái pwal emén, inaamwo ika eménna i emén pwiin Kraist kewe mi kepit. Lupwen ewe Paipel a fós usun ekkewe mwán mi ásimaw, a pesekich ach sipwe áppirú ar lúkú, nge ese erenikich pwe sia tongeni féri pwe emén aramas epwe ach sou emmwen. (Ipru 13:7) Pwúngún pwe Paipel a apasa pwe a fich ngeni ekkóch ar repwe angei “liwiniir fän ruu.” Nge a erá ena pokiten ra “angangöch le emweni mwichefel” me “angang weires lon ar afalafal me asukula aramas ewe kapasen Kot,” nge esap pokiten iir mi kepit. (1 Tim. 5:17) Sia tongeni ássáwá ekkewe mi kepit ika sia kon mwareitiir me eáni féffér ngeniir pwe usun iir aramas tekia. Nge ewe a fen kon ngaw seni ena, sia tongeni efisi ar repwe lamalamtekia. (Rom 12:3) Sise mochen ach sipwe féri och mettóch epwe tongeni efisi án emén pwiin Kraist kewe mi kepit epwe fókkun mwáálliló ren ena esin mettóch!​—Luk. 17:2.

10. Ifa usun sipwe pwáraatá pwe sia súféliti ekkewe Chón Kraist mi kepit?

¹⁰ Ifa usun sipwe pwáraatá pwe sia súféliti chókkewe ra kepit me ren Jiowa? Sisap eisiniir ifa usun ra wiliti emén mi kepit. Ese pwal wor ach pwúúng ach sipwe silei ena, pún mi weneiti pwisin manawer. (1 Tes. 4:11; 2 Tes. 3:11) Sisap pwal ekieki pwe pwúlúwer, semer me iner, are ekkóch chón ar famili iir mi pwal kepit. Pún emén ese álemwiri an ápilúkúlúk seni an famili. (1 Tes. 2:12) Sipwe pwal túmúnú ach sisap eáni ekkewe sókkun kapas eis epwe tongeni eletipechou ekkewe ekkóch. Áwewe chék, sisap eisini pwúlúwen emén mi kepit ika met meefian an epwe manaw wóón fénúfan feilfeiló chék nge pwúlúwan we ese fiti. Pún lón ewe Paratis, sia fókkun silei pwe Jiowa epwe “ngeni ekewe mönümanau meinisin mine repwe menemenöch ren.”​—Kölf. 145:16.

11. Pwata ach sisap kon ingeiti aramas a eú minen túmún ngenikich?

¹¹ Ika sise átekiatá ekkewe mi kepit pwe usun iir mi lamot lap seni ekkewe ekkóch, iwe, ina eú minen túmún fán itach pwisin. Pwata? Ewe Paipel a erenikich pwe a tongeni wor lón ewe mwichefel chókkewe repwe “pomweni pwe ir chiechiach chon lükülük.” Chókkana ra pwal mwo nge tongeni apasa pwe iir mi kepit. (Kal. 2:4, 5; 1 Joh. 2:19) Pwal och, ekkóch ekkewe mi kepit eli resap amwéchú ar tuppwél ngeni Kot. (Mat. 25:10-12; 2 Pet. 2:20, 21) Nge ika sipwe túmúnúkich seni ach sipwe kon ingeiti aramas, iwe sisap tapweló mwirin ekkewe ekkóch pwal mwo nge ekkewe mi kepit are chókkewe mi watte wiser lón ach mwicheich are chókkewe ra fen angang ngeni Jiowa ren fansoun langattam. Iwe, ika ra rikiló are likitaló ewe mwichefel, esap péút senikich ach lúkú me sisap úkútiw le angang ngeni Jiowa.

MI WOR POPUN SIPWE LÓLILEN REN CHÓCHÓÓR?

12, 13. Pwata ese wor popun sipwe lólilen ren chóchóón chókkewe mi mwéngé ewe pilawa me ún ewe wain atun ewe Áchechchem?

¹² Lón fite fite ier, chóchóón chókkewe mi mwéngé ewe pilawa me ún ewe wain atun ewe Áchechchem a kisikisiló. Nge kukkuto chék, chóchóór a lallapóló iteiten ier. Mi wor popun ach sipwe lólilen ren ei mettóch? Aapw. Sipwe ppii ika pwata sisap lólilen.

¹³ “Ach Samol a silei chokewe ir nöün.” (2 Tim. 2:19) Pwiich kewe mi wisen álleani ekkewe chón mwéngé pilawa me ún ewe wain atun ewe Áchechchem rese usun Jiowa pún rese silei ika ié kewe wesewesen mi kepit. Iwe, minne ra álleani a kapachelong chókkewe ra ekieki pwe iir mi kepit nge ren enletin esap iir mi kepit. Áwewe chék, ekkóch ra fen piin mwéngé ewe pilawa me ún ewe wain nge mwirin ra kaúló. Ekkóch neman a semmwen lón tupwuer are wor ar osukosuken memmeef, iwe ra lúkú pwe repwe eti Kraist le nemenem lón láng. A ffat pwe sise wesewesen silei ika fitemén mi kepit ra chúen nóm wóón fénúfan.

14. Met ewe Paipel a apasa usun chóchóón ekkewe mi kepit wóón fénúfan lupwen a poputá ewe riáfféú mi lapalap?

¹⁴ Lupwen Jesus epwe war pwe epwe uwei ngeni láng ekkewe mi kepit, iir repwe nóm ekis meinisin wóón fénúfan. Ewe Paipel a erá pwe Jesus “epwe tinala nöün kewe chon läng fän tikin rappwa mi leüömong, pwe repwe amwichafengeni afilian kana seni lepelien fanüfan me rüanü, seni esopun läng tori esopun.” (Mat. 24:31) Ewe Paipel a pwal áiti ngenikich pwe lón ekkewe ránin lesópwólóón, epwe wor lusun ekkewe mi kepit repwe chúen nóm wóón fénúfan. (Pwär. 12:17) Nge ese affata ika fitemén leir repwe chúen nóm lupwen a poputá ewe riáfféú mi lapalap.

15, 16. Met a lamot sipwe weweiti usun ekkewe 144,000 mi kefilitá me ren Jiowa?

¹⁵ Jiowa a wisen fili ineet epwe filatá ekkewe mi kepit. (Rom 8:28-30) Jiowa a poputá le filatá ekkewe mi kepit mwirin án Jesus we manawsefál. Usun meinisin ekkewe Chón Kraist mi enlet lón fansoun ekkewe aposel, iir mi kepit. Nge ren fitepúkú ier mwirin ena, lap ngeni chókkewe ra erá pwe iir Chón Kraist rese wesewesen tapweló mwirin Kraist. Ikaamwo a ina usun, nge lón ekkena ier Jiowa a filatá ekkewe fitemén Chón Kraist mi enlet ar repwe kepit. Iir ra usun chék ekkewe wiich Jesus a erá pwe repwe máárfengen me ekkewe pétéwélingaw. (Mat. 13:24-30) Atun ekkewe ránin lesópwólóón, Jiowa a sópweló an filatá chókkewe repwe chón ewe 144,000.^[2] Ina popun, ika Kot a filatá pwe ekkóch repwe kepit me mwen chék ewe sópwólóón, sisap tipemwaramwareiti pwúngún minne a féri. (Ais. 45:9; Tan. 4:35; álleani Rom 9:11, 12, 16.)^[3] Sipwe túmúnú pwe site pwal usun ekkewe chón angang mi lal ren féfférún néúr we masta ngeni chókkewe ra kerán poputá angang me mwen chék an epwele sáreló angang.​—Álleani Mateus 20:8-15.

¹⁶ Esap meinisin mi eáni ewe ápilúkúlúkún manaw lón láng iir chón ewe “chon angang mi allükülük o tipachem.” (Mat. 24:45-47) Lón ei fansoun Jiowa me Jesus ra néúnéú fitemén chék aramas ar repwe amwéngééni are asukula chómmóng aramas, usun chék met a fis lón fansoun ekkewe aposel. Jiowa a néúnéú fitemén chék Chón Kraist mi kepit le makkeei ewe Tesin Krik. Lón ei fansoun, fitemén chék ekkewe Chón Kraist mi kepit ra eáni ewe wis ar repwe awora ngeni néún Kot aramas ewe “mongö lon fansoun fich.”

17. Met ka fen káé seni ei lesen?

¹⁷ Met sia fen káé seni ei lesen? Jiowa a fen filatá an epwe fang ngeni lap ngeni néún kewe aramas manaw esemuch wóón fénúfan, nge manaw lón láng ngeni chókkewe repwe eti Jesus le nemenem. Jiowa a efeiéchú meinisin néún kewe chón angang, ewe “chon Juta” me ekkewe “engol mwän.” I a mochen pwe iir meinisin repwe akkamwéchú ar tuppwél me álleasochis nge epwe chék léllé ekkewe allúk repwe nóm fan. Mi lamot iir meinisin repwe tipetekison. Repwe angang ngeni Jiowa me repwe tipeeúfengen. Meinisin repwe túmúnúéchú ewe kinamwe lón ewe mwichefel. Lón ei fansoun a chék arapoto ewe sópwólóón, amwo oukich meinisin sipwe akkangang ngeni Jiowa me tapweló mwirin Kraist usun eú chék mwichen siip.