Än Kot Manaman A Pwäpwälo Lon Ekkewe Füü

SAISIN ewe akkar a nom lefilen ekkewe mi föüwatte me ekkewe mi föükükkün. Iwe nge, ewe akkar a föüwatte seni ewe fönüfan fän 330,000. Lape ngeni ekkewe füü mi kkan ngeni ra föükükkün seni ewe akkar. Iwe nge, pwal ekkoch füü, awewe chök, ewe itan V382 Cygni, ra föüwatte seni ewe akkar fän 27.

Ifa ükükün pwichikkaren ewe akkar? Anchangei mwo ifa ükükün watteen pwichikkaren eü ekkei ika kopwe nom engol mail seni nge kopwe chüen meefi pwichikkaran. Lape ngeni fansoun, ewe akkar a 93 million mail towauan seni ewe fönüfan. Iwe nge, atun a ränöch, pwichikkaren ewe akkar epwe tongeni apwoi ünüchchach! A fokkun ämäirü pwe orun eü chök seni iteiten eü billion kinikinin pwichikkaren ewe akkar a tori ewe fönüfan. Iwe nge, ena ükükün manamanen ewe akkar a naföch le atufichi manau woon fönüfan.

Manamanen ewe akkar a popu seni lukanapan​—a ussun chök eü mwesin mi atafengenni ekkewe atom, iwe, a efisi manaman chapur. Pokiten ewe akkar a kon wachemwuk, ewe manaman seni lukanapan epwe kerän tori woon ewe akkar mwirin fite million ier. Ewe SWPC a apasa: “Ika ewe akkar epwe ükütiü le föratä manaman iei, fönüfan epwap meefi mwirin 50,000,000 ier!”

Iwe, ekieki ei pworaus: Lupwen ka netä läng lepwin atun a ffataffatöch, ka küna ngeröüün fuu, nge a katowu seniir manaman chapur, ussun chök minne ewe akkar a föri. Iwe, ekkewe sou käeö ra esissil pwe a wor fite, fite billion füü lon unuselapen läng!

Ia ekkena füü meinisin ra feito me ia? Lape ngeni ekkewe sou käeö rese weweiti met popun a fis, nge ra lükü pwe unuselapen läng me fönüfan a chök fisitä orun 14 billion ier loom. Ewe Paipel a chök apasa: “Lepopun Kot a föri lang me fanüfan.” (Keneses 1:1) Esor tipemwaramwar, Emönnewe mi föratä ekkewe füü mi ussun chök mwesinen fförün manaman mi wachemwuk a fokkun watte “pöchökkülen an manaman.”​—Aisea 40:26.

Ifa Ussun Kot A Äkkäeä An Manaman

Jiowa Kot a äkkäeä an manaman le apöchökkülatä iir kewe mi föri letipan. Awewe chök, ewe aposel Paul a äeä watteen an pöchökkül le äiti ngeni aramas ussun Kot. Sap minne Paul a pöchökkül lap seni aramas, nge a tongeni föri chommong angang mi mürinnö inaamwo ika a küna chommong riäfföü. Ifa ussun? A pwälo pwe a angei “pochokkulen ewe manaman” seni Kot.​—2 Korint 4:7-9.

Jiowa Kot a pwal äkkäeä an manaman pwe epwe nielo chokkewe mi lükümach ngeni an kewe allük. Jises Kraist a kapas ussun taloon Sotom me Komora me pwal ewe Noter lon ränin Noa we pwe epwe aweweei ussun än Jiowa äeä an manamanen kata le nielo ekkewe mi ngaü. Jises a oesini pwe ekiselo chök nge Jiowa epwe äeä an manaman le nielo iir kewe mi tunalo An kewe allük.​—Mattu 24:3, 37-39; Luk 17:26-30.

Ifa Ussun A Kküü Manauom?

Mwirin om ekilonei ussun än Kot manaman mi pwälo lon ekkewe füü, eli kopwe meefi ussun chök King Tafit, ewe a apasa: “Lupwen üa netä läng förien poum o nengeni ewe maram me ekewe fü ka anomuur lon lenier, met aüchean aramas pwe ka ekieki usun, nge met aüchean nöün aramas pwe ka tümwünü?”​—Kölfel 8:3, 4.

Ewer, sia meefi pwe kich mi fokkun kisikis seni wachemwuken unuselapen läng me fönüfan. Iwe nge, sisap meefi osukosuk ren watteen än Kot manaman. Jiowa a emmweni ewe soufos Aisea an epwe makkei ekkeei kapas pwe repwe aururukich: “A [Kot] ngeni ekewe chon malülü pöchökül, nge ekewe chon lipwäkingau a ngeniir tufich mi somwola. Iwe, pwal mwo nge ekewe alüal ra malülü o achanü, pwal ekewe alümau ra chepetek o turula. Nge chokewe mi anomu ar apilükülük won ewe Samol mi Lapalap repwe angei pöchökkül mi fö. Repwe ässitä ren pöükässir usun chök ekewe asaf. Repwe fefeil, nge resap achanü. Repwe fetal, nge resap malülü.”​—Aisea 40:29-31.

Ika ka mochen föri letipen Kot, kopwe tongeni lükülük pwe epwe ngonuk an we ngün mi fel pwe kopwe sopwelo le föfföri letipan. Nge a lamot om kopwe tingorei. (Luk 11:13) Ren älillisin Kot, kopwe tongeni likiitü fän sossot meinisin me angei pöchökkül pwe kopwe föri minne mi pwüng.​—Filipai 4:13.

[Sasing lón pekin taropwe 6]

Seni peliefefinom: Whirlpool galaxy, Pleiades star cluster, Orion Nebula, Andromeda galaxy

[Sasing lón pekin taropwe 6]

Ewe akkar a föüwatte seni ewe fönüfan fän 330,000

[Picture Credit Lines on page 6]

Pleiades: NASA, ESA and AURA/Caltech; ekkewe ekkoch asan: National Optical Astronomy Observatories