Filatä Pwe Kopwe Angang Ngeni Jiowa Le Säräfoom

“Kopwe chok likiitu lon minne ka fen kaeo o luku.”​—2 TIM. 3:14.

1. Met ekiekin Jiowa ussun angangen ekkewe säräfö me lein nöün kewe Chon Pwäratä?

POKITEN Jiowa a fokkun aücheaani än ekkewe säräfö angangen fel ngeni, a efisi eü oesini mi mak ussur. Ewe sou makkei kölfel a kölü: “Lon ränin om kopwe maun ngeni chon oputom, noum aramas repwe etuk fän püsin letiper o üföüf ekewe üf mi pin. Usun amurenipwin mi nom lesosorusich, iei usun noum kewe alüal repwe feito reöm.” (Kölf. 110:3) Enlet, Jiowa a fokkun aücheaani ekkewe säräfö mi akkangang ngeni fän pwisin letiper.

2. Met sokkun etipetipaen chon fönüfan ekkewe säräfö ra küna ussun filier ren mwachkkan?

² Ämi kana säräfö lon ewe mwichefelin Chon Kraist, oua fen fangolo manauemi ngeni Jiowa? Eli epwe weires ngeni chommong ar repwe filatä pwe repwe angang ngeni ewe emön chök Kot mi enlet. Ekkewe chon sopai, sense, me fän ekkoch, märäriir me chiener kewe ra etipetiper ar repwe achocho ngeni ar repwe wöüöch. Fän chommong, lupwen ekkewe säräfö repwe achocho lon ar fel ngeni me angang ngeni Kot, chon fönüfan ra esiiter. Nge pwüngün pwe ach angang ngeni ewe Kot mi enlet, ina ewe alen manau mi mürinnö seni meinisin. (Kölf. 27:4) Ina minne, sipwe äfänni ekkeei ülüngät kapas eis: Pwata kopwe angang ngeni Kot? Ifa ussun kopwe sopwöch le manaueni ewe manau mi fich ngeni Kot, ese lifilifil met aramas repwe apasa are föri? Ikkefa ekkoch angang mi fel repwe suuk ngonuk?

Ach Angang ngeni Jiowa Ina ewe Alen Pwüng

3. Ifa ussun förien Jiowa kewe repwe kküü kich?

³ Pwata kopwe angang ngeni ewe Kot mi enlet? Pwarata 4:11 a äiti ngenikich popunlapan: “Ach Samol me ach Kot, en ka fich ngeni om kopwe angei ling o iteuoch me manaman. Pun ka fori mettoch meinisin, nge ren letipom ra fis o manau.” Jiowa, ewe Chon Föratä mi lingemwarar mi föratä mettoch meinisin. A ifa me watteen lingöchün ewe fönüfan! Jiowa a föratä ekkewe irä, pöön irä, maan, matau, chuuk, me chanpupu meinisin. Kölfel 104:24 a apasa, “Fanüfan a ur ren [förien Kot kewe] mönümanau meinisin.” A ifa me watteen ach kilisou pwe Jiowa a ngenikich inisich me tupwuach pwe sipwe tongeni pwapwaesini fönüfan me masouen kewe mi mürinnö! Ach meefi kilisou esap achchüngü letipach pwe sipwe mochen angang ngeni i?

4, 5. Ikkefa än Kot kewe föfför ra lukiato Josua ngeni Jiowa?

⁴ Me ren alon Josua, ewe sou emmweni Chon Israel, sia küna pwal eü popun sipwe angang ngeni Jiowa. Atun a fen chinnap, Josua a ereni nöün Kot kewe aramas: “Ämi meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi mürina meinisin a pwon ngenikemi. Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä.” Pwata Josua a tongeni apasa ena?​—Jos. 23:14.

⁵ Le ätin we lupwen a määritä lon Isip, ese mwääl Josua a rongorong ussun än Jiowa we pwon pwe epwe ngeni Chon Israel pwisin fönüer. (Ken. 12:7; 50:24, 25; Eks. 3:8) Iwe, Josua a nennengeni än Jiowa poputä le apwönüetä ena pwon ren an awarato ekkewe Engol Riäfföü woon Isip me an eriäni Farao, ewe mi tipeförea, pwe epwe mut ngeni chon Israel ar repwe lo seni Isip. Josua a nom lein ekkewe aramas Jiowa a angaserelo seni lon ewe Setipar me pwal katol ewe säät an a pwölüelo Farao me nöün kewe sounfiu. Atun ra fetälfeil lon “ewe fanüapö mi watte o eniwokus,” Josua a küna ifa ussun Jiowa a awora mettoch meinisin mi lamot ngeni chon Israel. Ese fokkun wor emön a mälo seni kaka are echik. (Tut. 8:3-5, 14-16; Jos. 24:5-7) Lupwen a tori fansoun Chon Israel repwe pworaiti ekkewe mwuun Kenaan me fönüeni ewe Fönüen Pwon, Josua a küna ifa ussun ewe Kot iir me chon Israel ra fel ngeni a apöchökküleretä lon ena angang.​—Jos. 10:14, 42.

6. Met epwe älisuk le ämääri om mochen angang ngeni Kot?

⁶ Josua a silei pwe Jiowa a apwönüetä Än kewe pwon. Ina minne, Josua a apasa: “Ngang me chon leimwei, äm aipwe angang ngeni ewe Samol mi Lapalap.” (Jos. 24:15) Nge en? Lupwen ka ekieki ussun ekkewe pwon ewe Kot mi enlet a fen apwönüetä me ekkewe pwon epwap apwönüetä, kesap mochen angang ngeni i ussun chök Josua?

7. Pwata a lamot papatais lon konik?

⁷ Ürürün, om nennengeni förien Jiowa kewe me ekilonei an kewe pwon mi amwarar me lüküchar epwe amwökütük om kopwe fangolo manauom ngeni Jiowa me pwal esissillatä ren om papatais lon konik. Iir meinisin mi mochen angang ngeni Kot repwe papataiselo. Jises, ach Leenien Äppirü, a affata ena mettoch. Mwen an epwe poputäni an angangen Messaia, a feilo ren Jon Papatais pwe epwe papatais. Pwata? Ekiselo mwirin, Jises a apasa, “Pun üa feitiu seni läng pwe üpwe föri letipen ewe mi tiniei, nge sap püsin letipei.” (Jon 6:38) Jises a papatais fän iten an epwe wor liosun an fangolo manauan pwe epwe föri letipen Seman.​—Mt. 3:13-17.

8. Pwata Timoti a filatä pwe epwe fel ngeni Kot, iwe, met epwe lamot om kopwe föri?

⁸ Pwal ekieki ussun Timoti, emön alüwöl Chon Kraist Jiowa a awisa ngeni chommong angang me wis aüchea lupwen a äsimaüetä. Pwata Timoti a filatä an epwe fel ngeni ewe Kot mi enlet? Ewe Paipel a erenikich pwe a ‘chök likiitü lon minne a fen käeö o lükü.’ (2 Tim. 3:14) Ika ka fen käeö Kapasen Kot me lükü pwe mei enlet an kewe afalafal, ka ussun chök Timoti. Iwe, iei a wor om kefil. Pwata kese fos ngeni semom kewe me inom ussun met ka mochen föri? Iir fengen me ekkewe elter lon om mwichefel repwe tongeni älisuk le weweiti ifa ussun kopwe fich ngeni papatais me ren ewe Paipel.​—Älleäni Fofor 8:12.

9. Ifa ussun om papatais epwe kküü ekkoch aramas?

⁹ Ika kopwe papataiselo, ina poputään om angang ngeni ewe Kot mi enlet. Ren om föri ena, kopwele fiti eü marasong, iwe, liffangom, manau esemuch me pwapwaan om föfföri letipen Kot. (Ipru 12:2, 3) Kopwe pwal apwapwai chon om famili mi fen fiti ena marasong me chiechiom kewe lon ewe mwichefelin Chon Kraist. Nge ewe mettoch mi lamot seni meinisin, kopwe apwapwai letipen Jiowa. (Älleäni Än Salomon Fos 23:15.) Enlet, epwe wor ekkoch aramas resap weweiti pwata ka filatä om kopwe fel ngeni Jiowa, me eli resap tipeeü ngeni. Eli repwe pwal ü ngonuk. Nge kopwe tongeni pworaiti ekkena sossot.

Lupwen Ekkoch Rese Tipeeü Ngonuk are Ra Ü Ngonuk

10, 11. (a) Ikkefa ekkewe kapas eis aramas repwe tongeni ekkeis ussun om filatä pwe kopwe angang ngeni Kot? (b) Met kopwe tongeni käeö seni napanapen än Jises pölüweni kapas eis ussun fel mi enlet?

¹⁰ Lupwen kopwe filatä om kopwe angang ngeni Jiowa, eli ekkoch chienom kewe chon sukul, chon orum kewe, me märärum kewe repwe osukosuk. Eli repwe eisinuk ika pwata ka filatä ena alen manau me kapas eis ussun om lükü. Ifa ussun kopwe pölüweniir? Pwüngün, epwe lamot om kopwe etittina ekiekum me meefiom fän iten om kopwe tongeni aweweei popun ka filatä ena al. Ika kopwe pölüweni kapas eis ussun om lükü, mei wor emön mi mürinnö lap seni Jises kopwe äppirü?

¹¹ Lupwen ekkewe nouwisen lamalamen Jus ra eisini Jises ussun ewe manausefäl, a äiti ngeniir eü wokisin rese mwo ekieki. (Eks. 3:6; Mt. 22:23, 31-33) Lupwen emön sou mak a eisini menni allük a nampa eü, Jises a aloni alon ekkewe wokisin mi fichiiti. Ena mwän a kilisou ngeni Jises ren pölüwen an we kapas eis. (Lif. 19:18; Tut. 6:5; Mark 12:28-34) Än Jises nöünöüfichi ekkewe Wokisin me napanapen an kapas a efisi “pwe ekkewe aramas ra tipefesen lefiler pokiten i,” me ekkewe chon ü ngeni rese tongeni efeiengaüa i. ((Jon 7:32-46)) Lupwen kopwe pölüweni kapas eis ussun om lükü, kopwe nöünöü ewe Paipel me pölüweni “fan mosonoson o mennin.” (1 Pit. 3:15) Ika kese silei pölüwen eü kapas eis, kopwe pwäri ena me apasa pwe kopwe kütta pölüwan. Mwirin, kopwe nöünöü ewe Watch Tower Publications Index are Watchtower Library woon CD-ROM le kütta pölüwan ika a wor lon eü fosun fönüfan ka weweiti. Ika kopwe ammolnaöchü, kopwe “sinei meeta [kopwe] polueni ngeni emon me emon.”​—Kol. 4:6.

12. Pwata kesap mut ngeni riäfföü an epwe äletipengaüok?

¹² Epwe tongeni fis pwe aramas resap chök kapas eis ussun om filatä om kopwe angang ngeni Kot me minne ka ächiföüa. Pun ewe chon oput Kot, Setan ewe Tefil, a nemeni ei fönüfan. (Älleäni 1 Jon 5:19.) Kesap ekieki pwe aramas meinisin repwe pwapwaituk are tipeeü ngonuk, iwe, eli ekkoch repwe fen appölüok. Eli epwe chök sopwosopw än ekkoch aramas ‘turunufaseok.’ (1 Pit. 4:4) Nge kopwe chechchemeni pwe kesap äläemön chök. Jises Kraist a pwal küna riäfföü. A pwal fis ngeni ewe aposel Piter, iwe, a makkei: “Ami mi achengicheng, ousap weitifengen ren sokkun riaffou mi feito remi usun chok ekkei pwe epwe sotunikemi, usun chok ita och mettoch mi fo a torikemi. Nge ukukun oua eti Kraist lon an kewe riaffou, oupwe chok pwapwa, pwe oupwe pwal pwapwa o chengel lupwen an we ling epwe pwapwalo.”​—1 Pit. 4:12, 13.

13. Pwata Chon Kraist repwe pwapwa lupwen ra küna riäfföü-mwääl?

¹³ Ach likiitü fän riäfföü are esiit pokiten kich Chon Kraist, ina eü popun ach sipwe pwapwa. Pwata? Pun ika chon fönüfan repwe echenuk, epwe wewe ngeni pwe ka manaueni ewe manau me ren äitien Setan, nge esap än Kot allük. Jises a öüröüra: “Riaffou ngenikemi, lupwen aramas meinisin ra mwareitikemi, pun a iei usun semer kewe ra fori ngeni ekkewe soufos chofona.” (Luk 6:26) Om küna riäfföü a wewe ngeni pwe Setan me an we fönüfan ra song ngonuk pun ka angang ngeni Jiowa. (Älleäni Mattu 5:11, 12.) Iwe, “are ra lalengau ngenikemi fan asengesin iten Kraist,” oupwe pwapwa ren.​—1 Pit. 4:14.

14. Met mwiriloon än emön epwe likiitü lon an tuppwöl ngeni Jiowa inaamwo ika a küna riäfföü?

¹⁴ Lupwen kopwe amwöchü om tuppwöl ngeni Jiowa fän riäfföü, epwe fis rüänü mettoch mi mürinnö. Kopwe pwäratä ewe enlet ussun Kot me Nöün we. Om likiitü fän tuppwöl epwe apöchökkülatä pwiom kewe Chon Kraist. Epwe amwökütü ekkoch rese silei Jiowa ar repwe poputä le kükkütta i. (Älleäni Filipai 1:12-14.) Atun kopwe pwisin küna ifa ussun Jiowa a apöchökkülakich pwe sipwe likiitü fän sossot, epwe lapolo om tongei i.

“Eu Asam Lap” A Suuk Ngonuk”

15. Menni “asamalap” a suuk ngeni ewe aposel Paul?

¹⁵ Ewe aposel Paul a mak ussun an angangen afalafal lon Efisus: “Eu asam lap ngeni angang mi lamot a fen suuk ngeniei.” (1 Kor. 16:8, 9) Ina ewe asamalap mi suuk ngeni ewe angangen afalafala ewe kapas allim me föralo chon käeö lon ena telinimw. Ren an tolong lon ena asam, Paul a älisi chommong ar repwe käeö ussun Jiowa me fel ngeni I.

16. Ifa ussun ewe lusun mi kepit ra tolong lon “eu asam mi suuk” lon 1919?

¹⁶ Lon 1919 Jises Kraist lon lingan we a isetiu “eu asam mi suuk” ngeni ewe lusun mi kepit. (Pwar. 3:8) Ra tolong lon ena asam me poputä le afalafala ewe kapas allim, iwe, ra asukula aramas enletin ewe Paipel fän tinikken lap seni me loom. Iwe, ifa uwaan ar angangen afalafal? Ewe kapas allim a fen tori unusen fönüfan, iwe, orun fisu milion aramas ra eäni ewe äpilükülükün manau esemuch lon än Kot we otot sefö.

17. Ifa ussun kopwe tongeni tolong lon “eu asam lap ngeni angang mi lamot”?

¹⁷ “Eu asam lap ngeni angang mi lamot” a chüen sussuuk ngeni nöün Jiowa kewe chon angang meinisin. Iir kewe mi tolong lon ra meefi pwapwa me kinamwe atun ra alapalo ar fiffiti ewe angangen afalafala ewe kapas allim. Ämi kana säräfö mi angang ngeni Jiowa, ifa watteen ämi akkaücheani ewe wis esor löllöön, wisen älisi aramas ar repwe “luku ewe kapas allim”? (Mark 1:14, 15) Ka ekiekin föri angangen emön regular are auxiliary pioneer? Epwe pwal tongeni suuk ngeni chommong leimi ewe angangen aüetä Kingdom Hall, angang lon Bethel, me angangen misineri. Pokiten epwele muchulo fansoun fän iten än Setan otot mi ngaü, a fokkun atapwalapwal ach sipwe tolong lon ekkeei angangen ewe Mwu. Kopwe tolong lon ewe “asam lap ngeni angang mi lamot” atun mi chüen wor fansoun?

“Neni o Nengeni pwe Jiowa mi Murinno”

18, 19. (a) Met a älisi Tafit an epwe fokkun mochen angang ngeni Jiowa? (b) Met a pwäratä pwe Tafit ese namanamelo an angang ngeni Kot?

¹⁸ Ewe sou makkei kölfel a etiwa aramas ar repwe “neni o nengeni pwe [Jiowa] mi murinno!” (Kölf. 34:8) Le ätin King Tafit lon Israel loom, atun i emön chon masen siip, Jiowa a seläni i seni ekkewe manmwocho. Kot a pwal älisi lon an fiu ngeni Koliat me a seläni i seni chommong minen efeiengaü. (1 Sam. 17:32-51; Kölf. 18, kapasen me mwan) Pokiten än Kot tong enlet mi lap, a amwökütü Tafit an epwe makkei: “SAMOL; ai Kot, ka fen alapalo om kewe fofor mi amwarar o om kewe ekiek ngenikem; esor emon mi usun chok en! Are upwe pwarata o aporausa usun foforum kewe, repwe chommong seni minne aramas ra tongeni alleani.”​—Kölf. 40:5.

¹⁹ A fokkun mämmääritä än Tafit tongei Jiowa me a mochen apwapwai I ren unusen letipan me ekiekin. (Älleäni Kölfel 40:8-10.) Fite ier ra lo, nge Tafit ese fokkun namanamelo an äkkäeä manauan le fel ngeni ewe Kot mi enlet. An manaueni ewe manau mi fich ngeni Kot, ina met a aücheaani lap seni meinisin, me a atoto ngeni pwapwa chapur. Atun a chinnap, Tafit a apasa: “Pun en, [Jiowa], ai apilukuluk allim, ua chok lukuk, SAMOL, seni le aluwoli. Iwe, inaamwo ika upwe chinnapelo, o meten mokurei epwe uanelo, nge kosap likitieilo, Kot.” (Kölf. 71:5, 18) A pöchökkülelo än Tafit lükülük woon Jiowa me an chiechiöch ngeni, inaamwo ika pöchökkülen inisin a rosolo.

20. Pwata om angang ngeni Kot, ina ewe alen manau mi mürinnö seni meinisin?

²⁰ Manauen Josua, Tafit, me Timoti ra ännetatä pwe ach angang ngeni Jiowa a mürinnö seni alen manau meinisin. Feiöchün angang fän iten wöün fönüfan epwe nom fansoun mwochomwoch chök, nge ese fokkun löllö ngeni ekkewe feiöchfochofoch kopwe küna seni om ‘angang ngeni Jiowa ren unusen letipom me ngünüm.’ (Jos. 22:5) Ika kesaamwo fangolo manauom ngeni Jiowa lon iotek, kopwe pwisin eisinuk, ‘Met a eppeti ai upwe wiliti emön Chon Pwäratä Jiowa?’ Ika ka fen papatais, kesap mochen alapalo pwapwaan manauom? Iwe, kopwe alapalo om angangen afalafal, me feffeitä lon pekin Chon Kraist. Ewe lesen mwirin ei epwe äiti ngonuk ifa ussun kopwe feffeitä lon pekin ngün ren om äkkäppirü ewe aposel Paul.

Ifa Ussun Kopwe Pölüweni?

• Ikkefa ruu popun sipwe angang ngeni Kot?

• Met a älisi Timoti an epwe filatä pwe epwe angang ngeni Kot?

• Pwata a lamot om kopwe tipeppos fän riäfföü?

• Ikkefa ekkoch angang mi suuk ngonuk?

[Sasing lón pekin taropwe 23]

Kopwe tongeni pölüweni kapas eis ussun om lükü?

[Sasing lón pekin taropwe 24]

Ach angang ngeni Kot, ina ewe alen manau mi mürinnö seni meinisin