Likiitü Fän Letipeta pwe Kopwe Pöchökkülsefäl

“Iwe, nöün [Jakop] kewe mwän me fefin meinisin ra sotun achipa, nge Jakop esap mochen chipila. Iwe, a üra, ‘Lon ai letipeta üpwe feitiu lon lenien sotup ren nei ät.’ Iei usun Jakop a kechüeiti Josef.”​—KENESES 37:35

EWE semelap Jekop a fokkun letipeta ren mäloon nöün we. A ekieki pwe esap fokkun pöchökkülsefäl tori ewe rän epwe mälo. Ussun chök Jekop, neman ka pwal meefi pwe a kon lululo om letipeta pwe esap fokkun wes. Nge lululoon om letipeta a itä wewe ngeni pwe esap naf om lükü Kot? Aapwi!

Ewe Paipel a aweweei pwe Jekop emön chon lükü. A itöch lon Paipel ren watteen an lükü, ussun chök semelapan we Eperiam me seman we Aisek. (Ipru 11:8, 9, 13) Iwe, fän eü, a pwal mwo nge aülap are pöchökkül ngeni emön chonläng unusen eü pwin pwe epwe angei feiöch seni Kot! (Keneses 32:24-30) Jekop emön mwän mi fokkun ririöch ngeni Jiowa. Met sipwe tongeni käeö seni än Jekop letipeta? Inaamwo ika emön a fokkun lükü Kot, nge epwe chüen tongeni meefi letipeta me letipechou ren mäloon emön attongan. Kich meinisin sia meefi letipeta atun emön attongach a mä senikich.

Meta Letipeta?

Letipeta a tongeni kküü aramas lon sokkopaten napanap, nge äkkäeüin, lap ngenikich sipwe fokkun meefi metekin letipach. Nengeni pworausen Leonardo, a chök 14 ierin atun seman we a mälo pun a üri semmwenin ngasangas. Leonardo ese fokkun mönükalo ewe rän atun pwiin inan we kükkün a ereni ewe pworaus ämäirü. Akkomw, ese fokkun lükü. Atun ewe felin mei mä, a küna somään seman we, nge ese fokkun lükü pwe a mälo. Leonardo ese tongeni kechiu ükükün wonu maram. Fän chommong, a witiwiti än seman we epwe liwiniti imwer we särin me angang. Ina epwe arapakkan eü ier me mwen an epwe unusen weweiti pwe seman we a mälo. Lon na atun, a fokkun pwos. Atun epwe liwiniti imwan we mi pöön, a cheme ngeni pwe seman we ese chüen nom. Ina atun, a kechiu. A ifa me watteen an pwositi seman we!

Ussun sia küna seni pworausen Leonardo, aramas ra tongeni fokkun meefi letipeta. Nge iei ewe pworaus mi apwapwa, pwe aramas ra tongeni pöchökkülsefäl, nge esap mwittir fis. Ussun chök kinäsach mi alollool epwe mmang le molo, pwal ina chök ussun ach letipeta ren mäloon attongach epwe pwal mmang le wesilo. Ach pöchökkülsefäl epwe fis mwirin ekkoch maram, ika fen fitu ier. Inaamwo ika le poputään epwe fokkun watte metekin letipom, nge epwe kisikisilo mwirin och fansoun, me kesap chüen meefi pwe esor lamoten manauom, are esor epilükülük allim.

Sipwe chüen kechiueiti me lolileniesini attongach we nge atun sia eörenalo an ese chüen nom rech, ekis me ekis sipwe pöchökkülsefäl. A pöönnülo leenian we. A lamot sipwe eörenalo pwe emönnewe ese chüen nom. Ach kechiu me letipechou epwe angasalo ach riäfföü. Pwüngün pwe mi sokkofesen än emön me emön pwärawu an letipeta. Iwe nge, mei wor eü mettoch mi enlet ussun aramas meinisin: Ach pwouni ach letipeta epwe efeiengawa kich lon pekin ekiek, memmeef, me aion. Iwe, epwe ifa ussun sipwe pwärawu ach letipeta pwe sipwe pöchökkülelo ren? Ewe Paipel a awora kapasen fön mi mirit.

Minen Älillis Pwe Sipwe Pöchökkülsefäl

Chommong mi letipeta ra küna pwe ar kakkapas epwe atoto rer kinamween letiper. Awewe chök, ekieki alon Hiop atun meinisin nöün kewe engol ra mälo me a küna pwal ekkoch riäfföü. A apasa: “Üa anioputa püsin manauei. Iei mine üpwe fokun pwärawu ai siö, üpwe kapas fän riaföün letipei.” (Hiop 1:2, 18, 19; 10:1) Nengeni pwe a lamot pwe Hiop epwe “pwärawu” riäfföün letipan. Ifa ussun an epwe föri? A erä, “Üpwe kapas fän riäföün letipei.”

Inan Paulo we a mä seni, iwe, Paulo a apasa: “Iei eü mettoch a älisiei, ai upwe kakkapas ussun inei we.” Iwe, om kakkapas ussun meefiom ngeni emön chiechiom epwe tongeni älisuk. (Än Salomon Fos 17:17) Mwirin än inen Yone we a mä seni, a tingorei chienan kewe Chon Kraist ar repwe alapalo ar etto chuchchuuri. Neminnewe a chechchemeni: “Ai kakkapas a akükkünalo metekin letipei.” Eli kopwe pwal küna pwe om uwawu meefiom le kakkapas ngeni emön chiechiom mi tongeök epwe apöchökkülasefälliuk.

Ach makkei meefiach epwe pwal älisi ach ngaselo seni letipeta. Ekkoch ra meefi pwe a weires ar repwe kapas ussun meefier nge eli epwe fen mecheres ika repwe makkei meefien letiper. Tafit a makkei echö kölün kechiu ussun Saul me Jonatan mwirin ar we ra mälo, iwe, a fokkun uwawu masouen letipan fän letipeta. Ena kölün kechiu a kapachelong lon ewe puken Oruuen Samuel.​—2 Samuel 1:17-27.

Sipwe kechiu pwe epwe ngasewu ach riäfföü. Ewe Paipel a apasa, “Ren mettoch meinisin a wor ar fansoun. . . . a wor fansoun kechiü.” (Än Salomon Afalafal 3:1,  4) Enlet, fansoun emön attongach a mälo, ina eü “fansoun kechiu.” Sisap säü le kechiu fansoun sia letipeta. A mak lon Paipel pworausen chommong chon lükü ra pwärawu ar letipeta ren ar kechiu. (Keneses 23:2; 2 Samuel 1:11, 12) Jises Kraist a “kechiu” atun a arap ngeni peiasen Lasares, chienan we mi ächengicheng mi kerän mälo.​—Jon 11:33, 35.

Sipwe mosonottam atun sia letipeta, pun epwe sokkopat me mwittir sissiwil meefiach. Chechchemeni pwe kesap säü le kechiu. Chommong chon lükü ra küna pwe ar kekkechiu lon ar letipeta a älisiir ar repwe pöchökkülsefäl.

Arap Ngeni Kot

Ewe Paipel a erenikich: “Oupwe arap ngeni Kot, iwe, epwe arap ngenikemi.” (Jemes 4:8) Sipwe äkkäeüin arap ngeni Kot lon ach iotek. Sisap aücheaangaüa! Ewe Paipel a aururukich ren an pwonei: “Ewe SAMOL [Jiowa] a chok arap ngeni chon letipeta, a pwal amanaua ekkewe mi ta lon ngunur.” (Kölfel 34:18) A pwal anükünükü ngenikich: “Kopwe monätä won ewe Samol mi Lapalap om weires, pwe i epwe tümwünük.” (Kölfel 55:22) Ekieki mwo. Ussun sia fen küna, chommong ra meefi pwe a älisiir ar repwe pwäpwärawu meefier ngeni emön chiener ra lükülük woon. Nge epwele fen ia me lapeloon ewe älillis ika kopwe pwärawu meefiom ngeni ewe Kot mi pwonei pwe epwe aururu letipach?​—2 Tesalonika 2:16, 17.

Ätewe sia fen kapas ussun itan Paulo a apasa: “Lupwen ua meefi pwe ese chüen ki rei choun letipei, ua fotopwükütiw me iotek ngeni Kot. Ua tingormaü ngeni pwe epwe älisiei.” Paulo a lükülük pwe a fokkun lamot an kewe iotek. Kopwe küna pwe ren an epwe pölüweni om kewe iotek, ewe “Koten sokkun aururu meinisin” epwe awora ngonuk pwora pwe kopwe pöchökkülsefäl.​—2 Korint 1:3, 4; Rom 12:12.

Ewe Epilükülükün Manausefäl

Jises a apasa: “Ngang ewe manausefäl me ewe manau. Iö a lüküei epwe manau inamwo are epwe fen mäla.” (Jon 11:25) Ewe Paipel a apasa pwe ekkewe mi mälo repwe manausefäl.a Atun Jises a nonnom woon fönüfan, a pwälo pwe a tufichin amanaua ekkewe mi mälo. Fän eü, a amanaua emön nengngin, 12 ierin. A fet seman kewe me inan? Iwe, “ra muttir weitifengennir chapur.” (Mark 5:42) Fän nemenien an we Mwu, ewe King lon läng Jises Kraist epwe amanausefällitä chommong aramas ngeni manau woon fönüfan, nge epwe fän kinamwe me pwüng. (Fofor 24:15; 2  Piter 3:13) Anchangei ewe pwapwa chapur lupwen ekkewe mi mälo repwe manausefäl me chuursefälli attonger kewe!

Nöün Claudete we itan Renato a mälo lupwen a ta ewe sepenin a fiti. Fän chommong, Claudete a nennengeni sasingin Renato we a pachetä woon ewe reichoko. Claudete a fos ngeni pwisin i, ‘Sipwap chufengen lon ewe manausefäl.’ Leonardo a anchangei än seman we epwe manausefällitä lon än Kot we otot sefö. Ewer, ewe epilükülükün manausefäl a wesewesen aururu letiper me pwal ekkewe ekkoch mi fen mä seniir attonger kewe. Epwe pwal tongeni aururu letipom!

[Footnote]

[Sasing lón pekin taropwe 4]

Jises a pwonei pwe ekkewe mi anganga ar lükü i repwe manausefäl