Emmwenien Ewe Ngün Mi Fel A Älisikich Le Apwönüetä Ach Pwon Ngeni Kot
“Oupwe tipeni pwe ewe Ngünmifel epwe emwenikemi, mürin ousap apwönüetä mochenian fitukemi.”—KAL. 5:16.
1. Met sokkun papatais a fis lon ewe ränin Pentikos?
LON Pentikos 33 C.E., mwirin än nöün Jises kewe chon künö papatais ren ewe ngün mi fel, ra kakkapas lon sokkopaten fos. Ina eü manaman seni liffangen ewe ngün. (1 Kor. 12:4-10) Met mwiriloon ena liffang me ewe pworaus Piter a apworausa? Chommong “a el letiper.” Än Piter kapasen pesepes a amwökütüür le aier me papataiselo. Ewe Paipel a apasa: “Iwe, chomong me leir ra lükü an afalafal o ra papatais. Lon ewe rän ina epwe ükükün ülüngat ngeröü aramas ra pach ngeni ewe mwichen chon lükü Jesus.” (Fof. 2:22, 36-41) Ra fen papatais fän iten ewe Sam, ewe Nau, me ewe ngün mi fel usun met Jises a fen apasa pwe repwe föri.—Mt. 28:19, TF.
2, 3. (a) Äweweei sokkofesenin papatais ren ewe ngün mi fel me papatais fan iten ewe ngün mi fel. (b) Pwata a lamot ngeni meinisin mi mochen wiliti chon Kraist mi enlet ar repwe papatais lon konik?
2 Iwe nge, mi wor sokkofesenin papatais ren ewe ngün mi fel me papatais fan iten ewe ngün mi fel? Ewer. Chokkewe mi papatais ren ewe ngün mi fel ra upsefäl pwe repwe nöün Kot. (Jon 3:3) Ra kepit pwe repwe king me samolfel lon än Kot we mwu, me iir kifetin inisin Kraist lon pekin ngün. (1 Kor. 12:13; Kal. 3:27; Pwar. 20:6) Lon ewe ränin Pentikos me pwal mwirin, lupwen Jiowa a filatä ekkoch aramas pwe repwe eti Kraist le älemwiri ewe Mwu, a papataisiir ren ewe ngün mi fel. (Rom 8:15-17) Nge ifa usun papatais fan iten ewe ngün mi fel, ewe a kan fiffis lon ach kewe mwichelap lon ei fansoun?
3 Än chon Kraist mi enlet papataiselo lon konik, ina esissillen ar pwonen fangolo manauer ngeni Jiowa Kot. A ina usun ren chokkewe mi angei ewe kökkö seni läng. Nge papatais lon konik a pwal lamot ngeni fitu million mwän me fefin lon ach ei fansoun, chokkewe mi eäni äpilükülükün manau esemuch woon fönüfan. Ese lifilifil än emön äpilükülük, nge an papatais lon konik fän iten ewe Sam, me ewe Nau, me ewe Ngun mi Fel, ina ewe mettoch mi lamot emön epwe föri pwe epwe ketiw me ren Kot. Meinisin chon Kraist mi eäni ei sokkun papatais repwe “fefetal lon Ngun.” (Älleani Kalesia 5:16, TF.) Ka kan feffetäl ren ewe ngün mi fel me apwönüetä om pwonen fangolo manauom?
Weween “Fefetal lon Ngun”
4. Met weween “fefetal lon ngun”?
4 “Fefetal lon ngun” a wewe ngeni ach etiwa angangen ewe ngün mi fel wooch, me mut ngeni an epwe anapanapakich. Weween, sia anomu manauach fän nemenien ewe ngün mi fel rän me rän. Kalesia sopwun 5 a äweweei sokkofesenin ach nonnom fän emmwenien ewe ngün mi fel me emmwenien mochenin fitukach.—Älleani Kalesia 5:17, 18.
5. Ach nom fän emmwenien ewe ngün mi fel a wewe ngeni ach ti senikich met sokkun angang?
5 Ika ka nonnom fän nemenien ewe ngün mi fel, iwe, kosap föri ekkewe angangen fituk. A kapachelong “lisowu, limengau, mocheisou, fel ngeni anümwäl, angangen rong, oputfengen me fiufengen, koumfengen, song, apangau, tipefesen, mwichaiei, lolowo, ünüpuch, mongömong.” (Kal. 5:19-21) Weween, ka “amäloi ekewe föförün tipis ren Ngünmifel.” (Rom 8:5, 13) Epwe älisuk le afota ekiekum woon minne mi pwüng, limöch, tong, me mürinnö, me älleasochisi emmwenien än Kot we ngün, nge sap mochenin fitukom.
6. Äweweei met a lamot fän iten ach sipwe uwaani uwaan ewe ngün mi fel.
6 Ika ewe ngün mi fel a angang woom, iwe, kopwe napanapeni napanapen Kot kewe, weween, ekkewe “uän Ngün.” (Kal. 5:22, 23) Iwe nge, kopwe mirititi pwe a lamot kopwe öttüres. Äwewe chök, emön chon atake a atakeni fönüan. Pwüngün, a lamot ttinen ewe akkar me konik pun ika esor ekkena mettoch, esap wor räsin an na atake. Iwe, ewe ngün mi fel a tongeni wewe ngeni ttinen akkar. A lamot ewe ngün mi fel fän iten ach sipwe uwaani uwaan. Iwe nge, itä met uwaan ika pwe ewe chon atake ese angang weires? (SalF. 10:4) Iwe, ükükün mürinnölöön me watteen om uwaani uwaan ewe ngün mi fel epwe longolong woon om äpwetetei letipom. Iwe, kopwe pwisin eisinuk, ‘Ua kan mut ngeni ewe ngün mi fel epwe emmweniei pwe upwe uwaani uwaan?’
7. Ika sia mochen ämääri uwaan ewe ngün mi fel, pwata a fokkun lamot ach käkkäeö me ekilonei Paipel?
7 Ekkewe chon atake repwe pwal atütüi fotar kewe pwe repwe uwaöch. Iwe, a lamot ewe enlet seni Paipel mi usun chök konik me pwal älillisin ewe mwichefelin Chon Kraist ikenäi pwe sipwe uwaani uwaan ewe ngün. (Ais. 55:1) Eli ka fen äiti ngeni chommong aramas pwe ewe Paipel a popu seni ngün mi fel. (2 Tim. 3:16) Iwe, ewe chon angang mi alükülük me tipatchem a älisikich le wewefichiti ewe enlet lon Paipel mi usun chök konik. (Mt. 24:45-47) A ffat pwe sipwe älleani me ekilonei än Kot Kapas pwe sipwe anomukich fän emmwenien ngün mi fel. Ika ka föri ena, ka kan äppirü ekkewe soufos mi “kukutta o eisfichi” usun ekkewe pworaus a kawor ngeniir. Ekkewe chonläng ra pwal mwo nge mochen weweiti ekkewe pworaus mi enlet usun ewe Mwirimwir mi pwonetiw me ewe mwichefelin mi kepit.—Älleani 1 Piter 1:10-12.
Ifa Usun ewe Ngün a Emmwenikich?
8. Pwata a lamot om kopwe tingorei Jiowa an we ngün mi fel?
8 Ese naf ach sipwe chök käeö Paipel me ekilonei met sia käeö. A lamot sipwe tingor än Jiowa älillis me emmwen. A tongeni “föri mettoch meinisin lap seni mine sia tongeni tüngor ika ekieki.” (Ef. 3:20; Luk 11:13) Iwe nge, ifa usun kopwe pölüweni emön ika a eis, “Pwata upwe tingor ika pwe Kot a fen silei ‘met ua osupwang ren mwen usaamwo tüngor ngeni’?” (Mt. 6:8) Iwe, akkomw, ka pwäri om lükülük woon Jiowa ren om tingorei an we ngün mi fel. Äwewe chök, ika emön a tingor om älillis, iwe, kopwe älisi ükükün om tufich, pun a fen pwäri an lükülük woom ren an tingoreok. (Apöpö ngeni Än Salomon Fos 3:27) Iwe, a ina usun Jiowa, a pwapwa ika ka tingor an we ngün, iwe, epwe liffang ngonuk.—SalF. 15:8.
9. Ifa usun om fiffiti ach kewe mwich epwe älisuk le nom fän nemenien än Kot we ngün mi fel?
9 Sia pwal tongeni anomukich fän emmwenien ewe ngün mi fel ren ach fiffiti me aüselingöch lon ach kewe mwich me mwichelap. Epwe älisikich le weweiti “ekiekin Kot mi alolol.” (1 Kor. 2:10) Sia pwal küna feiöch seni ach uwawu meefiach iteitan lon ach kewe mwich. Lesöküriiti ekkewe mwich ka piin fiti lon ekkewe rüänü wiik ra lo. Fän fitu ka eitietä poum pwe kopwe pölüweni kapas eis me pwäratä om lükü? Mi lamot kopwe amürinnölo om föri ena? Ika ina, filatä met kopwe föri lon ekkan wiik repwe feito. Jiowa epwe küna om achocho me epwe fang ngonuk an we ngün mi fel, iwe, epwe lapolo feiöchum seni ekkewe mwich ka kan fiffiti.
10. Ach feffetäl ren ewe ngün mi fel a wewe ngeni ach sipwe etiwa aramas ar repwe fet?
10 Ach feffetäl ren ngün mi fel a pwal wewe ngeni ach ngüüri ewe etiwetiw mi mak lon Pwarata 22:17: “Iwe, Ngünmifel me ewe Fin apwüpwülü söfö ra apasa, ‘Etto!’ Ir meinisin mi rongorong ekei kapas repwe apasa, ‘Etto!’ Iwe, iö mi kaka epwe etto, nge iö a mochen epwe ünümi ewe kolukun manau, nge esap möni, epwe etto.” Ewe ngün mi fel a akkangang woon ewe Fin apwüpwülü sefö, weween, ewe mwichen aramas mi kepit, pwe epwe esilefeili ei etiwetiw usun ewe konikin manau. Ika ka fen etiwa ei etiwetiw mi erä, “Etto!” iwe, ka pwal tipeppos le erä, “Etto!”? A ifa me feiöchün ach tufichin fiti ei angangen amanau!
11, 12. Ifa wisen ewe ngün mi fel lon ewe angangen afalafal?
11 Ikenäi, ei angang mi aüchea a fen pwönütä fän emmwenien ewe ngün mi fel. Sia älleani pworausen än ewe ngün mi fel suuk ngeni ekkewe misineri mineföön leenien afalafal lon ewe äeüin senturi. ‘Ewe Ngünmifel esap mwüt ngeni [ewe aposel Paul me chienan kewe] pwe repwe afalafala ewe Kapasen Kot lon ewe fanü Asia;’ ese pwal mutatä ar repwe tolong lon Pitinia. Sise kon lien silei ifa usun ewe ngün mi fel a eppeti ar tolong lon ekkena fönü, nge a ffat pwe a emmweni Paul ngeni Iurop. Lon eü längipwi, Paul a küna än emön re Masetonia tingormaü älillis.—Fof. 16:6-10.
12 Ikenäi, än Jiowa we ngün mi fel a pwal ekkemmweni ewe angangen afalafal woon unusen fönüfan. Jiowa ese chüen äeä längipwi, nge a emmweni ekkewe mi kepit ren ewe ngün mi fel. Iwe, ena ngün mi fel a kan amwökütü pwich kewe le föri ewe angangen afalafal me asukul ükükün ar tufich. Eli ka fen fiffiti ei angang mi aüchea. Ka tongeni alapalo om pwapwaiti ei angang mi ammwötöres?
13. Ifa usun kopwe älleasochisi emmwenien ewe ngün mi fel? Äweweei mwo.
13 Ka tongeni älleasochisi emmwenien ewe ngün mi fel ren om apwönüetä ekkewe pworaus mi kawor fän iten nöün Kot kewe. Sipwe nengeni pworausen emön mineföön pioneer itan Mihoko, nengnginin Japan. A meefi pwe a tufichingaw le liwiniti chokkewe a fen chuuriir are amwasangasanga ewe chon imw. Lon chök ena atun, a kawor älillis lon ewe Ach Angangen Afalafala ewe Mwu ren ifa usun sipwe liwiniti chokkewe sia fen chuuriir, nge epwe chök mwoch ach pworaus ngeniir. Mwirin, a pwal katowu ewe puk itan A Satisfying Life—How to Attain It (esor lon fosun Chuuk). A mmen älillisöch lon ewe angangen afalafal lon Japan. Iwe, Mihoko a apwönüetä ekkewe kapasen pesepes usun nöünöün ena puk, nge äkkäeüin ifa usun sipwe liwiniti chokkewe sia fen chuuriir. Ekiselo mwirin, a poputä le käeö Paipel ngeni chokkewe rese mochen käeö me mwan. Mihoko a erä, “Ua nöüni chommong chon käeö, ina epwe engol me rüüemön lon eü fansoun, ina popun, ua tingorei ekkoch ar repwe witiwit!” Pwüngün, atun ka feffetäl ren ewe ngün mi fel me apwönüetä ekkewe kapasen emmwen fän iten nöün Jiowa kewe chon angang, kopwe tongeni kini chommong feiöch mi somwolo.
Lükülük woon än Kot we Ngün mi Fel
14, 15. (a) Pwata aramas rese unusöch ra tufichin apwönüetä ar pwonen fangolo manauer? (b) Ifa usun kopwe tongeni künökün chiechiom mi mürinnö seni meinisin?
14 Ämi chon afalafal, mi wor wisemi le föri ei angang mi aüchea. (Rom 10:14) Eli ka meefi pwe kese lipwäköch le föri ei angang. Nge Jiowa epwe elipwäköchük, usun chök än elipwäköchü ekkewe mi kepit. (Älleani 2 Korint 3:5.) Ka tongeni apwönüetä om pwonen fangolo manauom ren om achocho ükükün om tufich me om lükülük woon än Jiowa we ngün mi fel.
15 Pwüngün, ese mecheres ngeni aramas rese unusöch le apwönüetä ar pwonen fangolo manauer ngeni ach Kot mi unusöch, Jiowa. Eli ekkoch chienemi me loom repwe mäirü ren ämi siwili manauemi, iwe, repwe “turunufaseikemi.” (1 Pit. 4:4) Iwe nge, ousap mönüki pwe a wor chiechiemi minefö, äkkäeüin Jiowa me Jises Kraist. (Älleani Jemes 2:21-23.) A pwal lamot kopwe sissilei pwiom kewe lon om we mwichefel, pun iir chochoon ‘ewe mwicheichen pwipwi’ woon unusen fönüfan. (1 Pit. 2:17; SalF. 17:17) Ren an we ngün mi fel, Jiowa epwe älisuk le chiechi ngeni chokkewe mi apöchökkülok le föri minne mi mürinnö.
16. Pwata kopwe usun Paul le ‘pwapwa lon om apwangapwang’?
16 Inaamwo ika a wor chiechiom kewe mi älisuk lon ewe mwichefel, nge eli epwe chüen weires om ataweei osukosuk rän me rän. Eli ka fokkun meefi pekkus ren om kewe osukosuk mi äweires, usun itä nge ka nonnom lon eü pokungo mi alolloololong. Ina ewe äkkäeüin atun kopwe kuliiti Jiowa me tingor an we ngün mi fel. Ewe aposel Paul a makkeei: “Lupwen üa apwangapwang, ngang üa pöchökül.” (Älleani 2 Korint 4:7-10; 12:10.) Paul a silei pwe än Kot we ngün mi fel a tongeni aöchüolo än aramas kewe apwangapwang meinisin. Ina popun, än Kot we ngün mi fel a tongeni apöchökkülok atun ka meefi apwangapwang me osupwangen älillis. Paul a makkeei pwe a ‘pwapwa lon an apwangapwang.’ Atun a apwangapwang, a meefi än ewe ngün mi fel angang woon. Ka pwal tongeni meefi ina usun!—Rom 15:13.
17. Ifa usun ewe ngün mi fel epwe älisuk le sesseres ngeni ikewe kopwe säilo ia?
17 A lamot ngenikich än Kot we ngün mi fel pwe sipwe tongeni äeä manauach fän itan. Ka mochen angang ngeni Jiowa tori feilfeilo chök. Ekieki mwo pwe itä en emön chon uwei efoch waseres. Ewe ngün mi fel a usun ewe äsepwäl ka mochen epwe eniti amaran ewe waseres pwe kopwe sesseres ngeni ikewe kopwe säilo ia fän nükünüköch. Kosap mochen mammaanfeil ren enienin äsepwälin än Setan ei otot. (1 Kor. 2:12) Kopwe esilla ewe äsepwäl mi öch, weween, än Kot we ngün mi fel. Ewe ngün mi fel epwe emmwenuk ngeni ewe al mi pwüng ren an we kapas me mwicheich.
18. Met kopwe üppos le föri iei, iwe pwata?
18 Ika ka fen käeö ren Chon Pwärätä Jiowa me pwapwaesini om chiechi ngeniir, nge kese mwo fangolo manauom me papatais, iwe, kopwe pwisin eisinuk, ‘Met a ammangaei?’ Ika ka mirititi wisen ewe ngün mi fel lon än Jiowa akkapwönüetä letipan ikenäi me aücheani angangan, iwe, kopwe apwönüetä minne ka fen käeö. Jiowa epwe efeiöchuk. Epwe kisäseü le akkawora ngonuk an we ngün mi fel. Ika ka fen papatais seni chök me loom, iwe, ka fen meefi än Kot apöchökkülok ren ewe ngün mi fel. Epwe tongeni sopwosopwolo tori feilfeilo chök. Ina minne, kopwe üppos le feffetäl ren ewe ngün mi fel.
Ka Chechchemeni?
• Met weween “fefetal ren ngün”?
• Met epwe älisuk le “fefetal ren ngun”?
• Ifa usun kopwe apwönüetä om pwonen fangolo manauom?
[Sasing lon pekin taropwe 17]
A lamot kopwe öttüres le äpwetetei letipom
[Ekkewe sasing lón pekin taropwe 19]
Ka nom fän emmwenien än Kot we ngün mi fel?