‘Met Jiowa A Mochen Pwe Kopwe Föri?’

MET Jiowa a kútta seni chókkewe mi mochen pwe Jiowa epwe etiwa ar fel? A itá kútta senikich ach sipwe unuséch? Iwe weween pwe ese tufich ngenikich aramas sise unuséch ach sipwe apwapwaai i? Are a chék kútta úkúkún ach tongeni? A mmen lamot pélúwen ekkena kapas eis ika sia mochen kúna pwapwa lón ach angang ngeni Kot. Iei sipwe etittina ifa usun ewe soufós Mika a áweweei met Kot a kútta senikich.​—Álleani Mika 6:8.

“A aiti ngonuk mine a mürina.” Ese lamot ach sipwe chék esissil ren met Kot a kútta senikich pún a fen affata lón ewe Paipel. Minne Kot a kútta senikich “a mürina.” Ese tongeni an epwe kútta och mettóch me lúkún minne mi múrinné. “Kot mi tong,” iwe, a ekieki minne mi fókkun échitikich. (1 Johannes 4:8; 5:3) Ach álleasochisi an kewe allúk esap chék apwapwaai i nge a pwal efeiéchúkich.​—Tuteronomi 10:12, 13.

“Met [Jiowa] a mochen pwe kopwe föri?” Itá mi wor án Kot pwúúng le erenikich minne sipwe féri? Mi fókkun wor an pwúúng! A fichiitikich ach sipwe álleasochisi pún i ewe Popun manaw me Chón Atufichi manawach. (Kölfel 36:9) Iwe met a mochen sipwe féri? Mika a affata met Kot a kútta senikich ren úlúngát mwuten kapas. Ekkewe ruu akkomw a ákkáeúin weneiti féfférúch ngeni aramas, nge ewe aúlúngátin a weneiti ach riri ngeni Jiowa.

“Föri mine a pwüng.” Me ren eú puk, ewe kapasen Ipru fán iten “pwüng,” a “wewe ngeni ach féri minne a pwúng me wenechar ngeni chón leeniach kewe.” Kot a kútta senikich ach sipwe féri ngeni aramas met mi pwúng me wenechar me ren an kewe allúk. Sia féri minne mi pwúng, ika sise lifilifil aramas me sia wenechar lón féfférúch ngeni ekkewe ekkóch. (Lifitikos 19:15; Aisea 1:17; Ipru 13:18) Lupwen sia féri minne mi pwúng ngeni ekkewe ekkóch, iwe, eli epwe chúng letiper me repwe pwal féfféréch ngenikich.​—Mateus 7:12.

“Eäni kirikiröch.” Ewe kapasen Ipru fán iten “kirekiréch” (cheʹsedh) a pwal tongeni afféú ngeni “kirekiréch mi fiti tong” are “tong mi tuppwél.” Emén sou káé Paipel a apasa: “Ika tong, úméúméch, me kirekiréch, repwe kochufengen, ra tongeni áweweei weween [cheʹsedh], nge ika eú chék me lein ekkeei kapas, ese tongeni áweweei.” Kot a erenikich ach sipwe eáni kirekiréch. Sipwe tipemecheres le pwári kirekiréch me pwapwa lón ach álisi ekkewe mi osupwang. Mwirilóón sia tongeni meefi ewe pwapwa mi feito seni ach fangóló.​—Föför 20:35.

“Kopwe pwal tipetekison [“le feffetál,” NW] fan mesen om we Kot.” Lón ewe Paipel, ewe kapas “feffetál” a tongeni wewe ngeni ach “manaweni och sókkun manaw.” Sia feffetál me Kot lón manawach ren ach feffetál wóón ewe al mi affatetiw lón ewe Paipel. A lamot sipwe “tipetekison” lón ach feffetál lón ena al. Ifa usun? Lupwen sia tipetekison mwen mesen Kot, sia mirititi enletin nónnómuch me ren Kot me silei aúkúkún ach tongeni. Iwe, ach feffetál ren “tipetekison,” a wewe ngeni ach sia eáni ekiek mi pwúng usun met Kot a kútta senikich me met sia tongeni fangóló.

Sia kilisou pwe esap mwo fán eú án Jiowa epwe kútta senikich met sise tufichin féri. A pwapwa ren ach achocho úkúkún ach tufich lón ach angang ngeni. (Kolose 3:23) A weweiti ach apwangapwang. (Kölfel 103:14) Atun sia pwal tipetekison le weweiti aúkúkún ach tufich, iwe, sia tongeni kúna pwapwa lón ach feffetál me Kot. Pwata kese káé ifa usun kopwe tongeni poputá le feffetál me Kot? Ena sókkun manaw epwe atoto ngonuk watteen feiéch.​—Än Salomon Fos 10:22.