Sipwe Feffetal Fan Ewe It Jiowa Tori Feilfeilo Chok!

“Sipwe . . . feffetal fan ewe it Jiowa, iten ach we Kot, tori fansoun ese kauk, pwal mwo nge tori feilfeilo chok.”​—MAIKA 4:​5, NW.

1. Ikkefa ekkewe poraus mi ffatolo lon Maika sopwun 3 tori 5?

A WOR och mettoch Jiowa epwe ereni noun kewe aramas, me a nounou Maika pwe epwe wiisen noun soufos. Iei an Kot kokkot, pwe epwe apwungu chon fofforingau. Epwe ngeni Israel liwinin an tipisin rikilo seni. Nge iei och mettoch mi apwapwa: Jiowa epwe efeiochu ekkewe mi feffetal fan itan we. Ekkena poraus ra ffatoch lon sopwun 3 tori 5 lon an Maika we oesini.

² Iei alon noun Kot na soufos: “Ami oupwe rong, ami kana sou emmwen seni Jekop me ami kana nouwiis lon imwen Israel. Esap ita wiisemi pwe oupwe silei minne mi pwung?” Ewer, ita ina wiiser, nge met ra fori? Iei alon Maika: “Ami kana chon oputa minne mi murinno me chon tongei minne mi ngau, oua ettika seni aramas unucher me ettatiu futuker me won chuur; ami oua fen pwal ochei futuken nei kewe aramas, iwe, oua nooti unucher seniir, me amokkukkisi chuur, me atattakkisiir pwe repwe ussun masouen eu nape watte me futuken lon eu kama.”​—Maika 3:​1-3, NW.

³ Mwa met nge ekkena sou emmwen ra eriaffou ekkena aramas mi woungau me apwangapwang! Ekkewe mi rong alon Maika ra mecheresin weweiti ekkena kapas awewe. Lupwen aramas ra kuuku emon siip lon konik, ra akkom reilo silin, iwe, ra oruu lekailen chuun kewe. Fan ekkoch ra kupi ekkewe chuu pwe epwe towu masouer. Ra kuuku ewe futuk me chuu lon eu watteen nape, ussun minne Maika a makkei. (Isikiel 24:​3-5, 10) A fet pwungun ena kapas awewe fan iten ewe watteen riaffou ekkewe aramas lon fansoun Maika we ra kuna seni nour kewe sou emmwen mi ngau!

Wiisach me ren Jiowa Ach Sipwe Foffori Minne mi Pwung

⁴ A mmen watte sokkofesenin ewe Chon Masen Siip mi ur ren tong, Jiowa, me ekkewe sou emmwen lon Israel. Pokiten ar rese foffori minne mi pwung, rese apwonueta wiiser we, wiisen ar repwe tumunu ewe pwin siip. Nge, pokiten ar tipennap, ra kirikiringau ngeni nour kewe aramas, iwe, ra fori minne ese pwung ngeniir me ra eani “fofforun nni manau” ngeniir, ussun Maika 3:10 a apasa. Met sipwe tongeni kaeo seni ena poraus?

⁵ Wiisen ekkewe sou emmwen me ren Kot, sou emmwen lein noun kewe aramas, ar repwe foffori minne mi pwung. Sia kuna pwe mi enlet ena mettoch ren noun Kot kewe aramas lon ei fansoun. Pwal och, ena mettoch a tipeeu ngeni Aisea 32:​1 (NW) nge iei alon: “Nengeni! Emon king epwe nemenem fan iten minne mi pwung; iwe, ren ekkewe samol, repwe nemenem lon wiiser we, wiisen samol fan iten minne mi pwung.” Iwe nge, lon fansoun Maika we, me sia kuna? “Chon oputa minne mi murinno me chon tongei minne mi ngau” ra chok sopwei ar foffori minne ese pwung.

An Io kewe Iotek ra Polu?

⁶ Pilon Maika kewe mi ngau repwe tongeni ekiekin kuna chen seni Jiowa? Aapwi! Iei alon Maika 3:​4, NW: “Repwe kokko ngeni Jiowa ren alillis, nge esap polueniir. Iwe, epwe aopa wonmesan seniir lon ena fansoun, pokiten ar fori minne mi ngau.” Ena mettoch a menlapei eu poraus mi fokkun lamot.

⁷ Jiowa esap polueni ach kewe iotek ika sipwe foffori chok minne mi ngau. Mi wesewesen pwung ena ika manauach mi otuputup, weween, ika sipwe aopa ach foffor mi ngau, nge tipin angang ngeni Kot fan tuppwol. A iei ussun an Tafit kol lon Kol Fel 26:​4, NW: “Use mommot ren mwan mi kapas chofona; me use fiffiti ekkewe mi aopa wesewesen lapalaper.” Iwe, Jiowa esap fokkun polueni iotekin ir mi pukun filata pwe repwe ikkipweri an we Kapas!

A Pochokkul ren An Kot Ngun mi Fel

⁸ A fet ngauen ekkewe foffor mi choufetal lein ekkewe sou emmwen lon Israel, sou emmwen lon pekin lamalam! Soufos chofona ra oruka ekiekin noun Kot kewe aramas pwe repwe fetal rikirik lon pekin ngun. Ekkewe sou emmwen mi tipemmong ra kota “Kinamwe!” nge ra epini maun ngeni io kkan resap liffang ngeniir mongo. Iei alon Jiowa ngeniir: “Ina minne, epwe pwiniitikemi, pwe ousap kuna mwemi; iwe, rochopwak epwe torikemi, pwe ousap tufichin eani fofforun pwee. Iwe, ewe akkar epwe wesewesen tuputiu won ekkewe soufos, me ran epwe rochiitiir. Ekkewe sou oesini repwe sau, me ekkewe sou pwee repwe mitingau. Iwe, repwe apwolu enisen fan pwotur.”​—Maika 3:​5-7a, NW.

⁹ Pwata repwe “apwolu enisen fan pwotur”? Ina eu mettoch pilon Maika kewe repwe fori pokiten ar sau. Iwe, a wor popun ekkena mwan mi ngau repwe sau. Ekiekin ekkena aramas mi ngau pwe “Kot esap palueniir.” (Maika 3:7b) Jiowa esap auseling ngeni iotekin aramas mi ngau me lamalam tekia.

¹⁰ Esor popun Maika epwe ‘apwolu enisen fan pwotun.’ Sap minne a sau. Jiowa a kan polueni an kewe iotek. Nengeni mwo Maika 3:​8, NW, pwe ina alon ena soufos mi tuppwol: “Nge ngang ua fen ur ren manaman, ren ngunun Jiowa we, me pwal pwung me pochokkul.” A ifa me watteen kilisoun Maika pwe lon unusen an angang mi ttam me tuppwol, angangen afalafal, a fen “ur ren manaman, ren ngunun Jiowa we” fansoun meinisin! Ena mettoch a awora ngeni ena mwan ewe pochokkul fan iten an epwe “esile ngeni Jekop an fofforun rikilo me Israel an we tipis.”

¹¹ A lamot ngeni Maika ewe sokkun pochokkul mi lap seni pochokkulen aramas ren an epwe tufichin esileilo porausen an Kot apwung. A wenewenen lamot an Jiowa we ngun mi fel, are manaman. Nge kich? Sipwe tongeni apwonueta wiisach, wiisen chon afalafal ika Jiowa epwe apochokkulakich ren an we ngun mi fel. Epwe wesewesen sopwongau ach sotuni le afalafal ika sipwe pukun filata ach sipwe tittipis. Ika epwe ina ussuch, Kot esap polueni ach kewe iotek, iotekin tingor ren ewe pochokkul fan iten ach sipwe fori ena angang. Sisap tongeni ekkesilefeili ekkewe kapasen apwung seni Semach we mi nonnom lang ika “ewe ngunun Jiowa” ese nonnom woch. Ren an Kot akkauseling ngeni ach kewe iotek me pwal ren alillisin ewe ngun mi fel, sia kan tufichin afalafala ewe kapasen Kot fan pwora ussun chok Maika.

¹² Eli ka chechchemeni ewe poraus lon Fofor 4:​23-​31. Anchangei mwo pwe en emon lein noun Jises kewe chon kaeo lon ewe aewin senturi. Ekkewe chon eriaffou mi umwesimwes ra fen sotuni le aukatiu angangen noun Kraist kewe chon kaeo. Nge chokana mi tuppwol ra sio ngeni ewe Epinkepiisom ra fel ngeni, nge iei alor: “Jiowa, kopwe afanni ar kewe kapasen amosok, me mut ngeni noum keei chon angang ar repwe akkafalafala om kapas ren sokkun pwora meinisin.” Iwe, met a fis mwirin? Wesin ar iotek, a chchech ewe leeni ra chufengen lon, iwe, ir meinisin ra ur ren ewe ngun mi fel me ra afalafala ewe kapasen Kot fan pwora. Ina minne, amwo sipwe ikkiotek ngeni Jiowa me kukutta alillisin an we ngun mi fel lupwen sipwe foffori ach angangen afalafal.

¹³ Ekiekisefalli mwo fansoun Maika we. Me ren Maika 3:​9-​12, ekkewe sou nemenem mi tipisin nni manau ra uwawu ar apwung fan iten peiofuur le monomon, ekkewe samol fel ra angei liwinin ar kait, me ekkewe soufos chofona ra fori angangen pwee fan iten moni. Iwe, a ffat ewe popun Kot a apasa pwe iolapen Juta we, Jerusalem, “epwe wiliiti eu leenien chuukutaan mettoch mi tatakkis”! Pokiten an a pwal choufetal fel mi chofona me fofforingau lon Israel, fan an lang emmwen Maika a eani ourour pwe Kot epwe awilalo Sameria pwe epwe “eu leenien chuukutaan mettoch mi tatakkis.” (Maika 1:6) Mi enlet pwe ena soufos a manau tori an a kuna taloon Sameria ren sounfiun Asiria lon 740 B.C.E. (2 King 17:​5, 6; 25:​1-​21) A ffat pwe ren chok an Jiowa manaman Maika a tufichin esile ngeni Jerusalem me Sameria ekkena poraus mi chou.

¹⁴ Juta esap fokkun tongeni su seni an Jiowa apwung. Ren pwonutaan ewe oesini lon Maika 3:​12, Saion epwe ussun “eu malamal mi ttu ppwulun.” Me ren minne a fen ffatolo ngenikich lon ei fansoun, sia silei pwe a fis ekkena mettoch lupwen chon Papilon ra atteri Juta me Jerusalem lon 607 B.C.E. Ena mettoch a fis fite ier mwirin wesiloon an Maika we angangen oesini, nge ena mwan a wesewesen luku pwe epwe fis. Iwe, epwe chok pwal ina ussun ach sipwe luku pwe ei otot mi ngau epwe sopwolo lon “ranin Jiowa we” ussun Paipel a fen oesini.​—2 Piter 3:​11, 12.

Jiowa a Awenechara Mettoch Meinisin

¹⁵ Ika sipwe nengenisefalli an Maika we oesini, sipwe kuna pwe a uwawu eu poraus mi ammeseik, porausen eu apilukuluk mi murinno. A fet ochchun ewe kapas sia kuna lon Maika 4:​1-4, NW! Iei alon Maika: “Epwe enletin fis le sopwoloon ekkewe ran pwe chuukun imwen Jiowa we epwe nukunukutiu asetaan ekkewe chuuk, iwe, epwe wesewesen kekita asen ekkewe ppan; me aramas repwe kikkiilo ren. . . . Iwe, epwe fokkun uwawu an apwung lein chommong aramas, me awenechara mettoch meinisin ren ekkewe muu mi pochokkul lon fonu mi towau. Iwe, repwe usi nour kewe ketilas pwe repwe wiliiti minen ttu ppwul me wokur siles pwe repwe wiliiti minen fichin ira. Resap eitieta ketilas, muu ngeni muu, me resap chuen kaeo maun. Iwe, repwe wesewesen mommot, emon me emon fan en me ffotan iraan krep me iraan fiik, me esap wor emon epwe aniuokkusuur; pun wesewesen auen Jiowa, meilapen sounfiu, a fen apasata.”

¹⁶ Menni ekkena “chommong aramas” me “muu mi pochokkul” lon ena poraus? Esap ir ekkewe muu me nemenem won ei fonufan. Nge, ena oesini a weneiti ekkan aramas seni sokkun muu meinisin, iwe, ra tipeeufengen le fiti ewe angang mi fel lon chuukun Jiowa we, chuukun ewe fel mi enlet.

¹⁷ Me ren minne a mak lon an Maika we oesini, ewe fel mi limoch fan iten Jiowa epwele unusen pwonuta ekis meinisin won fonufan. Lon ei fansoun, aramas mi “fichiitiir ewe apilukulukun manau esemuch” ra kait ussun letipen Jiowa. (Fofor 13:48) Jiowa a ukkuwawu an apwung me a akkawenechara mettoch meinisin lon pekin ngun fan iten ekkan chon luku mi peni ewe Muu. Repwe kuna manau lon “ewe riaffou mi lapalap” pokiten ir chon ewe “mwich mi lapalap.” (Pwarata 7:​9, 14) Pokiten ra fen usi nour kewe ketilas pwe repwe wiliiti minen ttu ppwul, lon pwal mwo nge ei fansoun ra kinamwefengen me chiener kewe Chon Pwarata Jiowa me pwal io kkan mwo. A ifa me watteen ach chengel pokiten ach nonnom leir!

A Pposolo Letipach pwe Sipwe Feffetal fan ewe It Jiowa

¹⁸ Lon ach ei fansoun, lupwen niuokkus a pwoluelo fonufan ussun eu kuchuchol, sia fokkun pwapwa pwe chommong ra kakkaeo ussun letipen Jiowa. Sia mwotoresiiti ewe fansoun mi akkarap lupwen meinisin ekkena chon tongei Kot resap chuen kaeo maun, nge repwe mommot fan en me ffotan iraan krep me iraan fiik. Fan chommong iraan fiik ra ffot lon atakeen krep. (Luk 13:6) An emon mommot fan ffotan krep me iraan fiik a liosueta pwe mi kinamwe, apwapwa, me nukunukoch nonnomun. Pwal mwo nge iei chok ach ririoch ngeni Jiowa a atoto kinamween letip me nukunukoch lon pekin ngun. Lupwen ekkena lapalap repwe choufetal fan nemenien ewe Muu, sisap niuokkus me sipwe unusen nukunukoch.

¹⁹ Ren ach sipwe kuna chen me feioch seni Kot, sipwe feffetal fan ewe it Jiowa. A wesewesen ffatoch ena mettoch lon Maika 4:5, NW, nge iei alon: “Meinisin ekkewe aramas seni pwisin filier repwe feffetal fan iten en me an Kot; nge kich, seni pwisin filiach, sipwe feffetal fan ewe it Jiowa, iten ach we Kot, tori fansoun ese kauk, pwal mwo nge tori feilfeilo chok.” Ach feffetal fan ena it Jiowa esap wewe ngeni ach apasa chok pwe i ach Kot. Minne sipwe fori epwe lap seni ach fiffiti ach kewe mwich me ewe angangen afalafala porausen ewe Muu, inaamwo ika ekkena angang ra pwal lamot. Ika sia feffetal fan ewe it Jiowa, a wewe ngeni pwe sia fen fangolo manauach ngeni i me sia kan achocho ngeni ach sipwe tuppwol le angang ngeni pokiten ach tongei i ren unusen letipach. (Mattu 22:37) Iwe, pokiten kich chon fel ngeni i, ese mwaal a pposolo letipach pwe sipwe feffetal fan ena it Jiowa, iten ach Kot, tori feilfeilo chok.

²⁰ Iei sipwe mwo ngeni ewe oesini lon Maika 4:​6-​13. “Noun Saion we fopwul” epwe choisa, “nge ukuukun towauan ngeni Papilon.” A ina chok ewe mettoch mi fis ngeni chon Jerusalem lon ewe afisuen senturi B.C.E. Nge, an Maika na oesini a affata pwe och lusun epwe liwiniiti Juta, me lupwen Saion epwe utasefal, Jiowa epwe akkota pwe chon koputan repwe tatakkisilo.

²¹ Maika sopwun 5 a oesini ussun fisitaan pwal fitu mettoch mi amairu. Ren chok awewe, nengeni mwo minne a mak lon Maika 5:​2-4. Maika a oesini pwe emon Sou Nemenem mi seikita me ren Kot​—nge i emon “mi poputa seni lom lom”​—epwe towu seni Petlehem. Epwe nemenem ussun emon chon masen siip “fan pochokkulen Jiowa.” Pwal och, ena Sou Nemenem epwe lapalap, esap lon Israel chok, nge tori “le sopwun fonufan.” Eli chon fonufan resap silei ika io ena emon, nge itan a ffat ngenikich.

²² Menni ewe aramas mi lamot seni meinisin mi uputiu lon Petlehem? Io “epwe lapalap tori le sopwun fonufan”? Ina i ewe Messaia, Jises Kraist! Lupwen Erot Mi Lapalap a eisini ekkewe samol fel lapalap me ekkewe soumak ussun leenien uputiuen ewe Messaia, a iei ussun ar polueni: “Lon Petlehemin Jutia.” Ra pwal mwo nge aloni alon Maika 5:2. (Mattu 2:​3-6) Ekkoch me lein ekkewe aramas kisikis ra pwal silei ena mettoch, pun iei alor me ren Jon 7:​42: “Esap pwe ekkewe puk ra apasa pwe ewe Kraist mi mwirimwirin Tafit, o epwe feito seni Petleem, ewe telinim Tafit a nonnom ie?”

Minen Apochokkul mi Enlet ren Aramas

²³ Maika 5:​5-​15 a kapas ussun an sounfiun Asiria etto maun nge epwe ekis chok ar tufichin pworaiti chon ewe fonu, iwe, a apasa pwe Kot epwe apwungu ekkewe muu mi alleasolap. Maika 5:7 a pwonei pwe och lusun chon Jus mi aier repwe liwiniiti fonuer, nge ena poraus a pwal weneiti ach ei fansoun. Iei alon Maika: “Lusun mwirimwirin Jekop kewe repwe ussun amurenipwin lein chommong aramas, ussun chommong ut won ira me fetil.” Ena kapas awewe mi fokkun murinno eu oesini pwe lusun ewe Jekop are Israel lon pekin ngun epwe eu feioch seni Kot ngeni aramas. Noun Jises kewe “pwal fitemon siip,” nge ir mi eani ewe apilukulukun manau won fonufan, ra mmen pwapwa le angangfengen fan tipeeu me lusun “ewe Israelin Kot” mi manau iei, iwe, ra akkalisiir le apochokkula aramas lon pekin ngun. (Jon 10:16; Kalesia 6:​16; Sefanaia 3:9) A wor eu mettoch mi lamot sipwe ekieki fan iten ena mettoch. Pokiten kich chon afalafala porausen ewe Muu, sipwe aucheani wiisach mi auchea, wiisen ach sipwe ukkuwei ngeni aramas poraus mi enletin apochokkula letiper.

²⁴ Met ka fen kaeo seni sopwun 3 tori 5 lon an Maika we oesini? Eli ikkeei ekkoch lesen mi fen ffatolo: (1) Ekiekin Kot pwe ekkewe mi wiisen sou emmwen lein noun kewe aramas repwe foffori minne mi pwung. (2) Jiowa esap polueni ach kewe iotek ika sipwe pukun filata ach sipwe tittipis. (3) Sipwe tufichin apwonueta wiisach, wiisen chon afalafal pokiten chok an Kot apochokkulakich ren an we ngun mi fel. (4) Ren ach sipwe tufichin kuna chen seni Kot, sipwe feffetal fan ewe it Jiowa. (5) Pokiten kich chon afalafala porausen ewe Muu, sipwe aucheani wiisach mi auchea, wiisen ach sipwe ukkuwei ngeni aramas poraus mi enletin apochokkula letiper. Eli a wor pwal ekkoch poraus mi kku letipom. Pwal met sipwe tongeni kaeo seni ena puken oesini lon Paipel? Ena eu lesen mwirin ei epwe alisikich le kaeo pwal fitu lesen mi lamot seni ekkewe ruu lusun sopwun lon an Maika we oesini, ewe mi apochokkula ach luku.

Ifa Poluan me Reom?

• Me ren Kot, ifa wiisen ekkewe sou emmwen lein noun kewe aramas?

• Pwata a lamot iotek me ewe ngun mi fel lon ach angang fan iten Jiowa?

• Ifa ussun aramas repwe ‘feffetal fan ewe it Jiowa’?

2, 3. (a) Wiisen ekkewe sou emmwen lon Israel ar repwe pwarata menni lapalap, nge met ra fori? (b) Ifa ussun kopwe awewei ekkewe kapas awewe lon Maika 3:​2, 3?

4. Ifa ussun Jiowa a sokko seni ekkewe sou emmwen lon Israel?

5. Me ren Jiowa, met wiisen ekkewe sou emmwen lein noun kewe aramas?

6, 7. Maika 3:4 a menlapei menni poraus mi lamot?

8. A tori ekkewe soufos chofona lon fansoun Maika we kapasen ourour ussun met?

9, 10. Met weween an aramas ‘apwolu enisen fan pwootur’ me pwata esor popun an Maika fori ena mettoch?

11. Met aramas ra kan pochokkuleta ren fan iten ar repwe tufichin ekkesilefeili ekkewe poraus seni Kot?

12. Pwata noun Jises kewe popun chon kaeo ra tongeni ‘akkafalafala an Kot kapas ren sokkun pwora meinisin’?

13. Met epwe fis ngeni Jerusalem me Sameria, me met popun?

14. Ifa ussun an a pwonuta ewe oesini lon Maika 3:​12, me ifa ussun ena mettoch epwe ita kku manauach?

15. Lon pwisin om kapas, ifa ussun kopwe awewei ewe oesini mi mak lon Maika 4:​1-4?

16, 17. Ifa ussun Maika 4:​1-4 a pwopwonuta lon ei fansoun?

18. An aramas ‘mommot fan en me ffotan iraan krep me iraan fiik’ a liosueta met?

19. Met weween ach sipwe feffetal fan ewe it Jiowa?

20. Maika 4:​6-​13 a oesini ussun met?

21, 22. Ifa ussun an a pwonuta Maika 5:2?

23. Met a fiffis iei ren pwonutaan Maika 5:7?

24. Menni poraus seni Maika sopwun 3 tori 5 a kku letipom?

[Picture on page 11]

En mi tongeni awewei an Maika we kapas awewe ussun eu nape?

[Pictures on page 14]

Ussun Maika, sia foffori ach angangen afalafal fan pwora