Ewe Sópwólóón A Arapoto?

Itá Kot epwe mut ngeni aramas ar repwe sópweló le nemeni aramas me efeiengawa manawer lón mwach? Aapw, sia fen pwóróus usun me mwan pwe Kot epwe mwékút me efisi muchúlóón riáfféú me nemenemengaw, ewe a fiffis seni me lóóm. Ewe Chón Fératá aramas me fénúfan a mochen kopwe silei pwe an we fansoun mwékút a arapoto. Ifa usun a pwári ena sile mi lamot?

Ekieki ei kapas áwewe: Neman akkomw kopwe ppii ekkewe álillis wóón Internet, map me kapasen emmwen mi makketiw lón taropwe atun ka ssá wóón waóm we. Iwe, atun ka kúna ekkewe esissil seni ekkena minen álillis, ka lúkúlúk pwe ka akkarap ngeni ewe leeni ka mochen feiló ie. Pwal ina chék usun, Kot a ngenikich an we Kapas mi pwári ekkewe mettóch repwe fis wóón unusen fénúfan iir mi kkóló. Iwe atun sia kúkkúna ekkena mettóch ra fiffis, sia lúkúlúk pwe sia nónnóm lón ewe fansoun epwele tori ewe sópwólóón.

Ewe Paipel a áweweei pwe nónnómun manawen aramas epwele tori eú fansoun mi fókkun kkóló nge epwele much lón ewe sópwólóón. Lón ena atun epwe fis sókkópaten mettóch wóón unusen fénúfan nge mi sókkóló seni met aramas ra fen kúkkúna seni me lóóm. Ekieki ekkeei mettóch mi mak lón án Kot we Kapas.

1. OSUKOSUK WÓÓN UNUSEN FÉNÚFAN Eú oesini lón Mateus sópwun 24 a kapas usun ekkewe mettóch repwe fis wóón fénúfan, epwe ina ewe esissil. Ena esissil ina esissillen “ewe fansoun sopolan” mwirin “epwapw tori fansoun sopolan.” (Wokisin 3, 14) A kapachelong ekkewe maun mi lap, lengita, chechchechin fénú lón eú me eú fénú, lapólóón atai allúk, nafangawen tong me angangen otuputup án ekkewe néúwisin lamalam mi asona aramas. (Wokisin 6-26) Ewer, ekkena mettóch ra fen fis lón ekkewe fansoun lóóm. Nge atun epwe waroto ewe sópwólóón, ekkena mettóch meinisin repwe fisippék lón eú chék fansoun mi aosukosuk. Nge ikkeei pwal úlúngát esissil lón ena atun.

2. NAPANAPEN ARAMAS Ewe Paipel a apasa pwe lón “ekewe ränin lesopolan,” ewe fansoun epwe fetál ngeni lesópwólóón, epwe fókkun ngawóló napanapen aramas. A erá: “Aramas repwe ekieki chök püsin ir, repwe efich moni, repwe tunomong me lamalamtekia, repwe turunufas o aleasolap ngeni semer me iner, resap sile kilisou, resap meniniti lamalam, resap eäni tong, resap amusala tipisin aramas, ra luapas, resap tongeni püsin nemeni inisir, ra lingeringerikai, ra oput mine a mürina, ra rawangauei aramas, ra rochongau o uren lamalamtekia, ra efich pwapwan fanüfan, nge resap echeni Kot.” (2 Timoty 3:1-4) Ewer, seni lóóm aramas ra súfélúngawfengen lefiler nge lón chék “ekewe ränin lesopolan” ena féffér epwe kon ssenúkúló pwe epwe fich an epwe iteni “fansoun weires.” Ka fen kúna ngangngawolóón napanapen aramas?

3. EWE FÉNÚFAN A TATAKKIS Ewe Paipel a apasa pwe Kot epwe “afeiengaua chokewe mi afeiengaua fanüfan.” (Pwärätä 11:18) Ifa usun aramas repwe efeiengawa fénúfan? Ewe Paipel a erá pwe epwe usun ewe fansoun Noa, a apasa: “Nge chon fanüfan ra fokun föföringau fän mesen Kot o eäni föförün mwäneson ekis meinisin. Iwe, Kot a nengeni fanüfan o küna pwe a unusen ngau.” Ina popun, iei met Kot a apasa usun ekkena aramas mi ngaw: “Üpwe fokun aroserela.” (Keneses 6:11-13) Ka kúna lallapólóón ekkewe pisekin ánnet pwe ei fénúfan a ur ren mwááneson? Pwal och, a tori eú fansoun mi sókkóló pún aramas ra tufichin efeiengawa ewe fénúfan ren ar repwe arosaló ekkewe mwán, fefin me semirit. A wor rer ewe pisekin maun epwe tongeni efisatá ena ninni. Me aramas ra efeiengawa ewe fénúfan lón pwal eú mettóch. Ra ámwááli me angawaló ekkewe mettóch mi álisatá manaw wóón fénúfan, áwewe chék ren ewe ásepwál sia ngangngaseralong, ekkewe man me irá me mataw.

Pwisin eisinuk, ‘Lón ekkewe ipúkú som ier ra ló, itá a wor án aramas tufich le unusen pwisin arosereló?’ Nge ikenái a wor ren aramas ena tufich. Nge ra áeá ena tufich le achómmóngaaló pisekin maun mi péchékkúl me atatakkisi fénúfan. A mwittir lallapóló án aramas tipachem le féri mettóch lap seni ar wewefichiti are nemeni mwirilóón. Iwe, minne epwe fis ngeni fénúfan ese lóngólóng wóón met aramas ra apwúngaló. Me mwen ménúmanaw meinisin repwe rosoló, Kot epwe mwékút le nieló chókkewe mi efeiengawa fénúfan. Ina an we pwon!

4. ANGANGEN AFALAFAL WÓÓN UNUSEN FÉNÚFAN Paipel a apasa pwal eú kinikinin esissillen ewe sópwólóón, ina epwe fis eú angang mi fókkun sókkóló seni ekkewe angang meinisin, a erá: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.” (Mateus 24:14) Ei angangen afalafal epwe fókkun sókkóló seni met lap ngeni lamalam ra féri lón fitepúkú ier lóóm. Lón ekkeei ránin lesópwólóón eú pwóróus mi tichik epwe menlapei, “ewe Pworausen Manau usun ewe Mwün Kot.” Ka silei eú lamalam mi menlapei ena pwóróus? Nge ikaamwo usun itá ekkóch ra afalafal usun ena pwóróus, nge met, ra chék afalafal lón leenier are ra esilefeili ewe kapas allim “won unusen fanüfan, pwe epwe eu minen pwärätä ngeni aramas meinisin”?

Ewe Web site www.pr2711.com a menlapei ewe “Pworausen Manau usun ewe Mwün Kot.” A wor lón ena Web site puk mi áweweei ewe kapas allim lón lap seni 700 fósun fénúfan. En mi silei án ekkóch aramas achocho le esilefeili ewe kapas allim usun ewe Mwú ren ena úkúkún chéúfetálin wóón unusen fénúfan? Me mwen ewe Internet a fis, Chón Pwáraatá Jiowa ra fen silleló ren ar achocho le arongafeili ewe kapas allim usun Mwúún Kot. Seni ewe ier 1939, a mak wóón Ewe Leenien Mas ekkeei kapas, “A Esilefeili án Jiowa we Mwú.” Eú puk usun lamalam a erá pwe án Chón Pwáraatá Jiowa angangen afalafal ese wor eú angang a léllé ngeni péchékkúlan me chéúfetálin. Ena angangen afalafal a menlapei ewe kapas allim pwe ekiseló chék epwele fis ewe “fansoun sopolan” ren efisien ewe Mwúún Kot.

EÚ FANSOUN MI FÓKKUN KKÓLÓ LÓN URUWOON ARAMAS

En mi kúna pwe a pwá lón ánein manawom ekkena rúáánú esissil seni Paipel ei lesen a pwóróus usun? Lón lap seni ipúkú ier, ei puk a akkawora pwóróus usun met a fiffis wóón fénúfan pwe epwe álisi chón állea le pwisin ánnetatá pwe sia akkarap ngeni ewe sópwólóón. Ewer, ekkóch mi lúkúlúkúmmang rese tipeeú, ra erá pwe aramas ra tongeni waalong pwisin meefier me siwili pwóróusen ekkena pisekin ánnet. Ra pwal erá pwe pokiten chék lallapólóón án aramas alen pwóppwóróusfengen, iwe met a fiffis wóón fénúfan a usun itá ngangngawoló. Iwe nge, a lallapóló ekkewe pisekin ánnet mi pwáraatá pwe sia nónnóm lón ewe fansoun epwele much, ewe fansoun mi fókkun kkóló lón uruwoon aramas.

Ekkóch souáák ra ekieki pwe sia akkarap ngeni ewe fansoun watteen siwil epwe fis wóón ei fénúfan. Áwewe chék, lón 2014, ewe Science me Security Board of the Bulletin of the Atomic Scientists ra éúréúra ewe United Nations Security Council usun minen efeiengaw watte ngeni aramas. Ekkena scientist ra erá: “Ren ám etittinaéchú ekkena mettóch mi efeiengaw, aua meefi pwe mi fókkun tongeni chúen fis och feiengaw watte seni pekin computer are mwesin mi tongeni ataieló ótóten aramas.” A lallapóló án chómmóng aramas lúkú pwe sia tori eú fansoun mi fókkun kkóló lón uruwoon aramas. Ekkewe chón féri ei puk me chómmóng chón állea rese tipemwaramwareiti pwe ei fansoun mi fókkun sókkóló iei wesewesen ewe ránin lesópwólóón me sópwólóón a arapoto. Nge kosap niwokkusiti met epwe fis lón mwachkkan pwe ka tongeni pwapwaiti mwirilóón ena sópwólóón. Pwata epwe ina usun? Pún ka tongeni manawewu seni ena sópwólóón!