ÁN PAIPEL KEWE KAPAS EIS RA PÉLÚ

Mi tufich án mwelele epwe móló seni wóón unusen fénúfan?

Iteiten ier, fite million aramas ra máló ren semmwen me nafangawen mwéngé pokiten ra fókkun mwelele. Inaamwo ika chón ekkóch fénú wóón ei fénúfan ra wéúéch, nge chómmóng aramas ra chúen fókkun mwelele. Ewe Paipel a pwáraatá pwe mwelele a chék fis seni me lóóm.​—Álleani Johannes 12:8.

Ren an epwe tongeni wesiló ewe mettóch mwelele, a lamot epwe wor eú mwú epwe nemeni unusen fénúfan. A lamot ena sókkun mwú epwe wor an tufich le einetéchú wéún fénúfan me pwal aúkatiw maun meinisin, pún maun a kan eselipato mwelele. Kot a fen pwon pwe epwe wor ena sókkun mwú epwe nemeni unusen fénúfan.​—Álleani Taniel 2:44.

Ié a tongeni amóeló mwelele?

Kot a seikaatá Néún we, Jesus, pwe epwe nemenem wóón aramasen fénúfan unus. (Kölfel 2:4-8) Jesus epwe angasaaló ekkewe mi wéúngaw me amóeló meinisin nemenemengaw me féfférún akkachofesá.​—Álleani Kölfel 72:8, 12-14.

Jesus ewe “Samolun kinamwe” mi fen pwonetiw, i epwe atoto kinamwe me núkúnúkéch ngeni unusen fénúfan. Lón ena fansoun, meinisin aramas wóón fénúfan repwe nónnóm lón pwisin imwer, pwapwaiti ar angang, me epwe naféch ener mwéngé.​—Álleani Aisea 9:6, 7; 65:21-23.