Akkapöchökküla Ach Lükü Ren Ach Pwisin Käkkäeö
Usun chök pöchökkülen inis a alongolong woon möngö mi mürinnö, ririöch ngeni Kot me pöchökkülen lükü ra alongolong woon käeöön Paipel. Sisap tongeni ririöch ngeni Kot ika esor ach kokkotun pwisin käkkäeö Paipel. Pwal och, ika sia eörenaalo ach pwisin käkkäeö, epwe atufichi ach akkamwöchü pöchökkülen ach lükü me pöönaalo än Setan kewe mesen äsefich mi usun pulopulen ekkei, äwewe chök, än aramas eriäfföwükich, tongen pisek, me sossotun föfföringaw.—Ef. 6:16.
Feiöchün Ach Pwisin Käeö: Ach pwisin käeö a alapaalo ach weweiti Paipel. A älisikich le föraatä lükü mi pöchökkül me miritiiti chölapen, ttamen, tekian, me alolloolun än Kraist tong. (Rom 11:33; Ef. 3:16-19) Pokiten lükü, uwaan än Kot manaman, iwe, a ina eü minen amwöküt lon manauach. A älisikich le pwilitalong ewe napanap sefö me wiliiti aramas mi apwönüetä än Jiowa kewe allük me akkomwa letipan lon manauach. (Kal. 5:22, 23; Ef 4:24) A alapaalo ach tufichin ataweei osukosuken lon manauach. A atufichikich ach sipwe okkomusalo tipisin aramas me älisaatä kinamween me tipeeüin ach mwichefel. (Kol. 3:10, 13, 14) Ekkena mettoch repwe apöchökkülakich me chiechiach kewe.
Ach pwisin käeö a pwal alapaalo ach tufichin älisi aramas sia chuuriir lon ach angangen afalafal. Sipwe tipeppos le ‘pölüweni chokkewe mi eisinikich, pwe sipwe äwewe ngeniir usun ewe äpilükülük sia eäni.’ (1 Pit. 3:15) Usun ach we Leenien Äppirü, Jises Kraist, sipwe tufichin fos fän lükülük pun sia enletin silei letipen Jiowa, iwe, sipwe tongeni äiti ngeni aramas met ewe Paipel a wesewesen apasa lon kapas mi ffatöch me itiitiöch.—Mt. 7:28, 29.
Ineet me Ifa Usun Sipwe Käeö: Käeö a lap seni ach chök älleani pworaus. A lamot fansoun le ekilonei met sia älleani. Pwisin eisinuk: Ifa usun ei pworaus a weneitiei? Met ei pworaus a äiti ngeniei usun Jiowa, napanapan kewe, me an kewe al? Ifa usun upwe tongeni äeä ei pworaus le älisi aramas? Ifa usun a riri ngeni minne ua fen silei usun ei pworaus? Ren ach kütta pölüwen än aramas kewe kapas eis, epwe lapolo ach weweiti met sia käeö me küna ifa usun a kapachelong lon chüülapen ewe enlet. Epwe iei usun ach sipwe weweöchülo.—SalF. 4:5.
Ren ach sipwe föraatä eü kokkotun pwisin käeö mi mürinnö, a lamot sipwe awora fansoun me apwönüetäfichi kokkotun. Ewe Paipel a erä, “Ousipwe chök fefetal ngeni mwach lon pwüngün ekewe allük [“kokkot,” NW] sia fen aleasochisi tori iei.” (Filipai 3:16) Eli a weires ngeni ekkoch ar repwe föri ena, nge epwe mecheresilo ika ra likiitü le akkachocho ngeni. Iwe, epwele ifa me efeiöchün! Eli kopwe tongeni käeö mwen om kopwe annut lepwin. Nge ekkoch ra efich ar repwe pwäätäkkäi lesossor me äeä ena fansoun mi kinamwe. Sipwe tongeni käeö atun möngöön leolowas lon ach leenien angang. Ese lifilifil menni fansoun sipwe filaatä, nge sipwe kütta eü leeni mi älisaatä ach käeö pwe esap rikilo ekiekich, me sipwe chechchemeni met sia käeö. Iwe, epwe chchüng letipach le fiffiti ewe alen pwüng.
Met Sipwe Käeö: Lon ach kokkotun pwisin käeö, sipwe akkomwa ach ammolnaatä ekkewe lesen lon ach kewe nimu mwich mi fis iteiten wiik. Lükün om ammolnaatä käeöön ewe Leenien Mas me Än ewe Mwichefel Käeöön Paipel, ka pwal küna feiöch seni ewe möngö mi echipwör mi kawor lon ewe Sukulen Angangen Chon Kraist? Sipwe fiffiti ewe kokkotun älleaan Paipel me kütta menlapen pworausen Paipel lon nöüch kewe puk. Ika sipwe käeö me mwan ekkewe pworaus repwe katowu lon afalafal nampa 3 me 4, epwe lapolo ach pwapwaitiir atun a fis ewe sukul. Ekkewe pworaus mi lamot seni Paipel repwe fotolong le alolloolun ekiekich.
Esap kon lien watte ewe fansoun sipwe äeä ren mmolnetään masouen ewe mwich itan Käitin Chon Afalafal, nge epwe pwal kapachelong lon ach kokkotun käeö. Ika sipwe äeä fitu chök minich le käeö ewe kokkotun mwich mi mak lon Ach Angangen Afalafala ewe Mwu, epwe älisikich le akkamwöchü pöchökkülen ach lükü me kapas ngeni aramas usun ach lükü lon ewe angangen afalafal.
Eü kokkot mi itepök me rüüepek fän iten om pwisin käeö epwe älisuk pwe kopwe ‘pöchökkül lon letipom.’ (Ef. 3:16) A wesewesen aüchea om pwisin käeö pun kopwe küna chommong feiöch seni, äwewe chök, epwe pöchökkülelo om lükü, alolloololo om tongei Jiowa me Kraist Jises, me pwal lapolo sileom me lipwäköchüm lon ewe angangen afalafal. A wor om kokkot mi mürinnö fän iten om pwisin käeö?