Äkkämääraatä Ririöch Ngeni Jiowa
1. Pwata a lamot sipwe ämääraatä ach ririöch ngeni Jiowa?
1 A lamot achocho lon ach ämääraatä pwisin ach ririöch ngeni Jiowa. Mi pwal wor mettoch mi lamot me lukun chök ach eörenaalo le fiffiti angangen Chon Kraist. Ika sia tunalo le foffos ngeni Jiowa iteitan, iwe ekis me ekis i epwe usun chök emön chiechiach ese chüen wor ach riri ngeni. (Pwar. 2:4) Sipwe etittina ifa usun pwisin ach käeö Paipel me iotek ra tongeni älisikich le ämääraatä ririöch ngeni Jiowa.—Kölf. 25:14.
2. Met sokkun napanapen pwisin käeö epwe älisuk le arap ngeni Kot?
2 Iotek me Ekilon ra Lamot: Pwisin käeö mi apöchökküla letipach ese chök wewe ngeni erii ekkewe pworaus mi lamot lon ewe puk me älleani ekkewe wokisin mi mak lon. A lamot ach sipwe ekieki met ewe pworaus a pwäri ngenikich usun föfförün Jiowa kewe, an emmwen, me napanapan kewe. (Eks. 33:13) Ach wekeweiti ekkewe mettochun lükü a achchüngü meefiach me amwökütükich pwe sipwe ekieki pwisin manauach. (Kölf. 119:35, 111) Ach föri ach pwisin käeö, epwe fän iten ach sipwe arap ngeni Kot. (Jem. 4:8) Ach ngeni leten ach käeö, a lamot fansoun, me leeni mi mürinnö. A lamot nemenifichi mochenich pwe epwe fis ach käeö iteitan. (Tan. 6:10) Ka kan awora fansoun iteiten rän le ekilonei napanapen Jiowa kewe mi amwarar inaamwo ika ka tawengaw?—Kölf. 119:147, 148; 143:5.
3. Ifa usun ach iotek atun pwisin käeö epwe älisikich le ämääraatä ach ririöch ngeni Jiowa?
3 Iotek seni letipach, ina ewe kinikin mi lamot lon ach pwisin käeö mi mürinnö. Ika sia mochen pwe ewe enlet lon Paipel epwe achchüngü letipach me amwökütükich le “fel ngeni Kot ren sokkun fel . ren mennin o niuokus,” iwe a lamot ngenikich än Kot we manaman mi fel. (Ipru 12:28, TF) Ina minne, iteiten ach käeö, mi lamot sipwe poputääni ren ach tingormaü än Jiowa manaman mi fel pwe epwe älisikich le aüseling me älleasochisi an kapas. (Luk 11:28) Sia suuki letipach ngeni Jiowa, atun sia ekiekifichi ewe Paipel me nöünöü ekkewe älillisin Paipel mi kawor seni än Jiowa we mwicheich. (Kölf. 62:8) Ach achocho le käeö lon ei napanap, ina eü föfförün fel mi pwäri ach tüppwöl ngeni Jiowa me apöchökküla ach riri ngeni.—Juta 20, 21.
4. Pwata a lamot ngenikich ach sipwe ekilonei än Kot we Kapas iteiten rän?
4 A lamot sipwe akkapöchökkülalo ach riri ngeni Jiowa pwe epwe mämmäärilo lon unusen manauach usun chök lon sokkun riri meinisin. Amwo sipwe awora fansoun iteiten rän le akkarap ngeni Kot, pun sia silei pwe epwe pwal arap ngenikich.—Kölf. 1:2, 3; Ef. 5:15, 16.