Arongafeili Än Jiowa kewe Manaman
1. Met a amwökütükich le arongafeili än Jiowa kewe manaman?
1 “Ai Samol mi Lapalap, en ewe mi tekia me manaman me ling me pwora me itefoula. Pun meinisin mine a nom lon lang pwal won fanufan om.” (1 Kron. 29:11) Ifa ussun ach tong me kilisou ngeni Jiowa a achüngükich? A amwökütükich ach sipwe ‘arongafeili poraus ussun ekkewe manaman i mi korikich seni lon rochopwak ngeni an we saram mi amwarar.’ (1 Pit. 2:9) Sise tongeni ükütiu seni ach afalafala aramas ussun ach Kot mi lapalap! Sipwe tongeni esilefeili än Jiowa kewe manaman fän ekkewe maram March, April me May.
2. Ifa ewe angangen esilesil mi kkolo aüchean a fen kokkotolo pwe epwe esilefeil ewe Ächechchem, me iö kewe repwe tongeni fiti?
2 Angangen Esilesil mi Sokkolo Aüchean le Esilefeili ewe Ächechchem: Lon Särinfel, April 2, sipwe menlapei än Jiowa kewe manaman ren ach chechchemeni ewe Fääfen Ach Samol. Ewe taropween etiwetiw mi kkolo aüchean fän iten ei rän mi lamot epwe ainet woon unusen fönüfan seni March 12 ngeni April 2. Meinisin chon afalafal repwe unusen fiti ei angang. Mi öch ei fansoun fän iten ekkewe minefö ar repwe poputä le afalafala ewe kapas allim ika mi fich ngeniir. Ika mi fich ngeni noum are noum chon käeö an epwe eäni ei wis, kopwe fos ngeni ekkewe elter ussur.
3. Met sipwe tongeni apasa lupwen sia etiwa aramas ngeni ewe Ächechchem?
3 Ei angangen esilesil a löllö ngeni met sia fen föri fän iten ewe “Ach Amanau a Arapoto!” District Mwichelap. Epwe titiilo ngeni ekkewe mwichefel ekkewe taropween etiwetiw pwe emön chon afalafal epwe tongeni nöüni 50 kapi. Eäni eü afalafal mi mwochomwoch, neman kopwe apasa: “Iei noum taropween etiwetiw fän iten eü ächechchem a kan fis iteiten ier. Äm aua fokkun etiwok. Titchikin pworausen ei ächechchem a mak lon ei taropwe.” Nge ika ewe chon imw a kapas eis, awora naföchün fansoun ren om kopwe pölüeniir. Ewe pworaus lon ewe Sile puk, pekin taropwe 127 mi tongeni älisuk le aweweei lamoten ewe Ächechchem. Lon Ammol me Räninfel, sipwe anöünöü ekkewe chassi fengen me ewe taropween etiwetiw mi kkolo aüchean. Makkei iten me leenien chokkewe mi pwapwaiti ewe pworaus, me akkota om kopwe liwiniitir.
4. Epwe ifa ainetin ekkewe taropween etiwetiw fän iten ewe Ächechchem?
4 Ika mi tufich, ei taropween etiwetiw epwe einet ngeni ewe chon imw. Ina minne, kopwe makkei ekkewe imw esor aramas lon me mwirin kopwe liwinsefällitir. Iwe nge, ika mei chüen chommong lusun ewe taropween etiwetiw atun ewe saingoon wiiken March, mwen ewe Ächechchem, ka tongeni likitalo ewe taropween etiwetiw ngeni ekkewe imw esor aramas lon. Piiöchü pwe noum kewe return visit, chon käeö, aramasom kewe, chienom chon angang, chon orum me chokkewe ka sissileer repwe nöüni echö taropween etiwetiw.
5. Pwata sipwe poputä le föri ach kokkot le auxiliary pioneer iei?
5 Auxiliary Pioneer: En mi tongeni alapalo om arongafeili an Jiowa kewe manaman ren om kopwe auxiliary pioneer fän ewe maram March, April are May? Om fiti epwe tongeni wewe ngeni pwe kopwe siwili ekkoch mettoch lon om kokkot iteiten rän. (Ef. 5:15-17) Kopwe tongeni lükülük pwe om achocho le alapalo om angang ngeni Jiowa epwe atoto pwapwa me än Jiowa we feiöch. (SalF. 10:22) Pokiten a akkarap ewe fansoun Ächechchem, iei ewe atun kopwe poputä le föri om kewe kokkot.—SalF. 21:5.
6. Met sipwe tongeni käeö seni pworausen pwiich we tiwe ierin, ewe a auxiliary pioneer lon ewe ier?
6 Pwiich we, emön fefin tiwe ierin, a pwapwaiti an tufichin auxiliary pioneer lon ewe ier. A erä: “Inaamwo ika ua wenewenen pwapwaiti ai upwe ffot irä me ua mochen poputä le ffot, nge ua küna lamoten ai upwe akkomwa ekkewe mettoch mi wesewesen lamot lon manauei. Ren ai mochen upwe loom föri ekkewe mettochun ngün, ua filatä le auxiliary pioneer fän March.” Pwiich we a küna feiöch fän iten an achocho? A apasa, “Ua meefi pwe ua akkarap ngeni ewe mwichefel, ina ewe mettoch a pwal lükieito le arap ngeni Jiowa.” Sipwe tongeni nengeni met sia kan akkomwa lon manauach me siwili ekkoch mettoch ika mi lamot?
7. Mi weires an emön epwe eäni ewe wis auxiliary pioneer?
7 Ese kon lien weires ussun met ka ekieki, pwe kopwe tikeri ewe 50 awa sia kan achocho ngeni fän iten ewe wis auxiliary pioneer. Fän iotek, kopwe nengeni om kewe angang iteiten rän, mwirin föri eü schedule me makketiu lon om kokkotun angang lon pekin ngün. Ka fokkun silei nonnomum. Ika ka apwangapwang me ka mölükäi, neman kopwe chök afalafal ruu ika fite chök awa lon eü rän. Ika ka angang full time are fiti sukul, kopwe tongeni auxiliary pioneer ren om afalafal lekunion are lon Ammol me Räninfel.
8. Met a atufichi ewe eü pean pwüpwülü an epwe auxiliary pioneer?
8 Lon chommong famili, unusen ar famili ra angangfengen le auxiliary pioneer. Lon ekkoch ier me loom, eü pean pwüpwülü ra pireir ar repwe auxiliary pioneer pun ra meefi pwe nonnomur ese atufichiir ar repwe pioneer. Met ra föri ussun ei osukosuk? “Äm aua iotek ngeni Jiowa pwe epwe älisikem pwe äm aupwe tongeni pioneer fengen, eü angang äm mi fokkun mochen föri seni chök loom.” Ren kokkotöchür, ra tufichin tikeri ar goal. Ra apasa: “A mmen och. Äm me rüüemön aua pwapwafengen ren chommongun ekkewe feiöch. Äm aua peseikemi pwe oupwe chök sotuni. Ika äm famili a tufichin föri, neman ämi mi pwal tongeni.”
9. Met oupwe tongeni föri atun ämi famili käeö ren ämi oupwe ammolnatä fän iten ekkan maram epwe feito mi kkolo aüchean?
9 Pwata ouse awora fansoun lon ämi famili käeö le pwüngüpwüng woon ifa ussun oupwe tongeni alapalo ämi angang lon ekkan maram epwe feito? Inaamwo ika unusen ämi famili esap tongeni auxiliary pioneer, neman emön me leimi mi tongeni ren älillisin meinisin chon ewe famili. Ika ese tufich, eli ämi famili mi tongeni achocho ngeni pwe oupwe alapalo ämi fansoun le fiti ewe angangen afalafal lon ekkeei maram mi kkolo aüchean.
10. Pwata sipwe apworausa ngeni ekkoch ach mochen le auxiliary pioneer lon ei fansoun Ächechchem?
10 Älillisfengen: Mwasangasang epwe tongeni chöüfetäl. Apworausa om mochen le auxiliary pioneer. Ei mettoch epwe pwal tongeni amwasangasanga ekkoch ar repwe mochen pioneer. Pwal eü, ekkewe mi pin pioneer me loom repwe tongeni älisuk le akkotafichi om kewe angang pwe kopwe tongeni tikeri om goal. (SalF. 15:22) Ika en mi tongeni auxiliary pioneer, pwata kose etiwa pwal emön, neman emön mi löllö ngeni nonnomum, an epwe fituk lon ei angang mi apwapwa?
11. ifa ussun ekkewe elter mi tongeni efisi ewe mwasangasang fän iten auxiliary pioneer ren ekkan maram epwe feito?
11 Chommong ekkewe elter ra föri ar kokkot pwe repwe tufichin fiti ei angang mi sokkolo aüchean. (Ipru 13:7) Ei mettoch a mmen apöchökküla ewe mwichefel! Ekkewe elter repwe pwal tongeni amwasangasanga ekkewe ekkoch ren ar pworausfengen. Ekkoch kapasen apöchökkül are minen älillis mi tongeni amwökütü ekkoch ar repwe auxiliary pioneer. Ewe service overseer epwe tongeni akkota pwal ekkoch mwich fän iten afalafal pwe meinisin repwe tongeni fiti ewe kümiin chon afalafal, pwal mwo nge atun ssarin ar angang are sukul. Epwe apio ekkeei kokkot iteitan. Epwe pwal tümünü naföchün ekkewe territory me ekkewe chassi me puk.
12. Met kopwe tongeni föri ika kose tongeni auxiliary pioneer?
12 Inaamwo ika nonnomum esap atüfichuk om kopwe auxiliary pioneer, nge ka tongeni apöchökküla me ioteki ir kewe ra fiti ei angang. (SalF. 25:11; Kol. 4:12) Neman ka tongeni akkota le apachatä pwal eü rän lon eü wiik ren om kopwe fiti ei angangen afalafal are kopwe ekis awattei ewe fansoun om afalafal lon eü rän.
13. Ifa ewe mettoch sipwe achocho ngeni me ren ewe Guam Branch, me ifa ussun ach mwichefel epwe älisi le tikeri ena goal?
13 Achocho Ngeni 225 Auxiliary Pioneer fän April: Ewe Guam Branch a tikeri 211 auxiliary pioneer fän March 2004, eü mineföön choochoon auxiliary pioneer. Ina popun, sipwe tongeni achocho ngeni fän ewe maram April ach sipwe tikeri 225 auxiliary pioneer. Sipwe tongeni tikeri ei nampa ika emön me lein limmön chon afalafal lon eü me eü mwichefel epwe auxiliary pioneer. Pwüngün pwe lon ekkoch mwichefel epwe wor chommong chon afalafal nonnomur mi atufichiir ar repwe auxiliary pioneer. Lapengeni ekkewe mwichefel ra tongeni tufichin tikeri ena goal. Anchangei mwo ewe chengel ei mettoch epwe pwal efisatä me epwe eü minen amwöküt ngeni ei angangen afalafal lon ach territory!
14. Pwata a mmen öch ewe maram April ren an emön epwe auxiliary pioneer?
14 Pwata a mmen och ewe maram April ren an emön epwe auxiliary pioneer? Ewe Ächechchem epwe fis lepoputään ewe maram, ina epwe atufichikich le chuurisefälli ir kewe ra fiti. Sipwe anöünöü ekkewe chassi, me achocho ngeni le anöünöü ewe Sile puk ngeni ekkewe aramas sipwe chuurisefälli me poputä le käeö ngeniir ewe Paipel. Ina minne, ika emön a auxiliary pioneer fän ewe maram April, epwe suuk chommong atun an epwe poputäni käeön Paipel ngeni aramas. Pwal eü, a wor nimu Ränin Fel me eü holiday fän April, me fän iten ekkewe chon angang me chon sukul ei mettoch epwe amecheresi ar fiti ei angangen pioneer.
15. Pwata sipwe meefi atapwalapwalen ei fansoun lupwen sia akkarap ngeni ewe fansoun Ächechchem?
15 Iteiten eü fansoun Ächechchem a wesilo, sia pwal kkan ngeni sopwoloon ei otot. Ewe lusun fansoun le esilefetälei ussun ach Kot mi lap a chök mwochomwoch. (1 Kor. 7:29) Lupwen ei fansoun Ächechchem a wesilo, epwe pwal lo senikich ewe tufich mi aüchea le mwareiti Semach lon läng. Sipwe ammolnafichi iei pwe sipwe tongeni föri ükükün ach tufich le ärongafeili an Jiowa kewe manaman fän ekkewe maram March, April, me May!
[Pwóór lón pekin taropwe 4]
Kich mi tongeni tikeri 225 Auxiliary Pioneer fän April?
◼ Ätittina minne ka kan akkomwa
◼ Pwüngüpwüng woon met ewe famili a tongeni achocho ngeni
◼ Fos ngeni ekkoch ussun om kewe kokkot