“Pwarata ewe Kapas Allim”
1. Ifa ewe kapas allim sipwe pwäratä?
1 Lon ei fansoun, sise kon lien rongorong eü kapas allim, iwe nge, mei wor wisach ach sipwe “pwarata ewe kapas allim usun ewe chenin Kot.” (Fof. 20:24) A kapachelong lon ei, an aramas repwe silei pwe ekiselo chök “ekkewe ran le sopolon” repwe siwil ngeni än Jiowa we fönüfan sefö mi pwüng, ikena ie ‘ekkewe mettochun lom repwe morelo.’ (2 Tim. 3:1-5; Pwar. 21:4) Lon ena atun esap chuen wor semmwen. (Ais. 33:24) Aramas mi fen mälo repwe towu seni ekkewe leenien peias pwe repwe chufengen sefäl me ar famili me chiechier kewe. (Jon 5:28, 29) Unusen ewe fönüfan epwe wiliti eü paratis mi lingöch. (Ais. 65:21-23) Ikkeei chök ekkoch me lein ekkewe feiöch sipwe pwäratä!
2. Pwata ewe fansoun Ächechchem a atufichikich ach sipwe pwäratä ewe kapas allim?
2 Fän ekkewe maram March, April me May repwe suuk ngenikich chommong fansoun ach sipwe esilesilfeil ewe kapas allim. Pokiten a ränöch lon ekkeei maram me ekkewe rän ra ekis ttam me a rochommang lon ekkoch leeni, a atufichikich le alapalo ach fansoun le fiti ewe angangen afalafal. Pwal och, ewe mwich mi lamot seni meinisin, ewe Ächechchem, epwe fis woon unusen fönüfan mwirin tuputiuen ewe akkar lon Ammol, March 22. Iei ewe fansoun sipwe poputä le ammolnatä fän iten kalapaloon ach angang.
3. Met epwe tongeni älisi unusen ewe famili le alapalo ar angang?
3 Auxiliary Pioneer: Kopwe tongeni akkota om fansoun pwe kopwe auxiliary pioneer lon eü, rüü, are lon ekkewe ülüngät maram? Pwata kose awora fansoun lon ämi famili käeö le pwüngüpwüng woon ei mettoch? Ika mei wor tipeeüfengen, emön are ekkoch lon ewe famili repwe tongeni auxiliary pioneer. (SalF. 15:22) Ikkiotek ussun ei kokkot me küna ifa ussun Jiowa epwe efeiöchü om achocho. (SalF. 16:3) Ikaamwo ese tufich pwe emön me lein lon ewe famili epwe auxiliary pioneer, nge, meinisin chon ewe famili repwe tongeni achocho le alapalo ar fiti ewe angangen afalafal fengen me ekkewe ra pioneer.
4. Ifa ussun sipwe tongeni auxiliary pioneer inaamwo ikä sia angang iteiten rän?
4 Ikaamwo ka angang iteiten rän, ka tongeni akkotaöchü pwe epwe atufichuk om kopwe auxiliary pioneer. Neman en mi tongeni ekis afalafal atun om mongon leonowas. Are kopwe tongeni tingor pwe kopwe wisen afalafal lon ewe leeni arapakkan imwom are leenien om angang. Ka tongeni fiti ewe angangen afalafal mwaren eü awa me mwan ikä mwirin om angang. Eli kopwe tufichin alapalo om awa ren om afalafal unusen ränin Ammol me Räninfel, me kopwap föri ekkoch angang ese kon lamot lon pwal eü maram mwirin. Ekkoch ra asösö seni ar angang eü ikä ruu rän fän iten ar repwe afalafal.
5. Ifa ussun kopwe tongeni älisi ekkewe mi chinnap are mi apwangapwang lon inisiir ar repwe auxiliary pioneer?
5 Ikä en mi chinnap are kese kon lien pöchökkül, en mi tongeni auxiliary pioneer ikä kopwe afalafal fitu chök awa iteiten rän. Kopwe tingorei Jiowa pwe epwe awora ngonuk ewe “pochokkulen ewe manaman.” (2 Kor. 4:7) Emön sister a auxiliary pioneer nge a ierini 106! Ren älillisin märärin kewe chon Kraist me ekkoch chon ewe mwichefel, a afalafal imw me imw, chuurisefälli aramas, käeö ngeni aramas me fiti ekkoch kinikinin ewe angangen afalafal. A älillis le poputäni ewe kkotun käeöön Paipel ngeni engol aramas. A apasa, “Lupwen üa ekieki öchchün ai tufichin fiti ewe angangen auxiliary pioneer, letipei a ur ren tong me kilisou ngeni Jiowa, Nöün we Jises me an we mwicheich. Üa fokkun mochen apasa ‘kilisou ngonuk, Jiowa!’”
6. Ifa ussun ekkewe säräfö mi fen papatais nge ir mi chüen fiti sukul repwe tufichin auxiliary pioneer?
6 Ika en emön säräfö mi papatais nge ka chüen fiti sukul, en mi pwal tongeni fiti ewe angangen auxiliary pioneer. Ussun chök ekkewe mi angang iteiten rän, kopwe äkkäeüin afalafal lon Ammol me Räninfel. Lon ekkoch rän, neman kopwe tongeni afalafal eü awa are lap seni ssarin om sukul. Epwe wor eü ränin asösö lon sukul ka tongeni äeä fän iten ewe angangen afalafal? Ikä ka mochen auxiliary pioneer, kopwe fos ngeni semom me inom kewe.
7. Ifa ussun ekkewe elter repwe tongeni amwasangasanga ewe mwichefel fän iten ewe angangen afalafal lon fansoun ewe Ächechchem?
7 Amwasangasanga: Ekkewe elter repwe tongeni föri chommong mettoch ren ar isetiu eü leenien äppirü pwe repwe amwasangasanga ewe mwichefel. (1 Pit. 5:2, 3) Epwe tongeni wor pwal ekkoch kokkotun mwichfengen fän iten chokkewe repwe afalafal lesossorusich, ssarin sukul are ssarin angang. Ewe service overseer epwe awisa ngeni ekkewe chon afalafal mi lipwäköch ar repwe emmweni ekkewe mwich fän iten afalafal. Epwe pwal anaföchu ekkewe territory me ekkewe chassi me puk lon ekkeei maram mi sokkolo aüchean.
8. Met sia käeö seni pworausen eü mwichefel?
8 Lon eü mwichefel, ekkewe elter ra poputä le apöchökküla ewe angangen auxiliary pioneer fitu maram me mwan. Ra apio ngeni ewe mwichefel iteiten wiik fitemön ra fen fiti ewe angangen auxiliary pioneer. Ina popun, chokkewe mi ekiekin alapalo ar angangen afalafal ra lükülük pwe epwe wor chommong chiener chon afalafal. Ra akkota pwe epwe wor pwal ekkoch mwich fän iten afalafal fansoun lesossorusich me le pwin. Mwiriloon, 53 chon afalafal ra auxiliary pioneer fän April, arapakkan lesopwun ewe mwichefel!
9. Pwata a öch ewe fansoun Ächechchem ngeni ekkewe mi tufich le poputä le afalafala ewe kapas allim?
9 Älisi Ekkoch Pwe Repwe Afalafal: Lupwen ekkewe minefö me ekkewe säräfö ra wiliti chon afalafal resaamwo papatais, ir mi tongeni afalafalfengen me ekkewe chon afalafal mi lipwäköch. A fich ngeni ewe fansoun Ächechchem ei sokkun älillisfengen pwe mei wor chommong lon ewe mwichefel repwe alapalo ar angang. Mei wor nöüm chon käeö mi feffeitä me a fen atipeeüfengenni manauan ngeni än Jiowa emmwen mi pwüng? Mei wor nöüm semirit mi älleäsochis me feffeitä nge esaamwo chon afalafal? Ika ra fen apasawu ar mochen wiliti chon afalafal resaamwo papatais me ka meefi pwe ra tufich, kopwe esile ngeni emön elter. Ewe presiding overseer epwe akkota rüüemön elter repwe chuuruk fengen me nöüm we semirit are chon käeö woon ei mettoch.
10. Ifa ussun ekkewe elter repwe älisi chokkewe rese chüen akkafalafal?
10 Ekkewe maram repwe feito ra awora eü fansoun mi mürinnö ngeni ekkewe rese chüen akkafalafal pwe repwe poputäsefälli ar angangfengen me ewe mwichefel. Ekkewe elter mi emmweni ewe Kkotun Puk Study me pwal ekkoch elter repwe tinikken le chuuriir me etiwer ar repwe mwin lon ewe angangen afalafal. Ikä a fen ttam ar rese chüen akkafalafal, rüüemön elter repwe fos ngeniir akkom pwe repwe nennengeniöchü ikä mi chuen tufich ngeniir ewe wis chon afalafal.—km 11/00 p. 3.
11. “Chenin Kot” mi lapalap seni meinisin a pwäpwälo lon menni föfförün?
11 Ammolnatä Fän Iten ewe Ächechchem: Kaworen ewe möön kepich a pwäratä ewe “chenin Kot” mi lap seni meinisin. (Fof. 20:24) Fitu milion aramas woon unusen fönüfan, ir mi meefi kilisou, repwe chufengen lon Ammol, March 22, mwirin tuputiuen ewe akkar, pwe repwe föri Ächechchemenien mäloon Kraist we. Sia mochen etiwa me älisi ekkewe mi letip wenechar le fiti ei Ächechchem mi fokkun lamot mi pwäratä än Jiowa chen ngeni aramas meinisin.
12. Iö kewe sipwe etiwa ngeni ewe Ächechchem?
12 Kopwe makkei iten ekkewe ka mochen etiwer. Apachalong aramasom kewe, me chon orum kewe, chienom kewe chon angang ikä chon sukul, nöüm kewe chon käeö akkom me ekkewe iei, me pwal ekkewe ka fen chuchchuurir iteitan. Ikä ekkoch leir mei wor ar kapas eis ussun ewe Fääfen Ach Samol, kopwe katol ewe pekin taropwe 206-8 lon ewe Bible Teach (Äitien Paipel) puk. Epwe tongeni suuki ewe al om kopwe käeö ngeni emön ren om awewe ngeniir ewe puk sia kan nöünöü le käeö ngeni aramas.
13. Ifa ussun Jiowa a efeiöchü achochoon rüüemön chon afalafal le etiwa ekkoch ngeni ewe Ächechchem?
13 Emön sister a makketiu iten 48 aramas epwe etiwer. Mwirin an etiwer a tölalo iter me makkei ränin an a etiwer. A ifa me watteen än pwapwa lupwen 26 aramas ekkewe a fen etiwer ra fiti ewe Ächechchem! Emön brother mei wor än sitowa a etiwa emön nöün chon angang nge i emön patere me loom. Ewe mwän a fiti ewe Ächechchem nge mwirin a apasa, “Üa käeö chommong mettoch seni ewe Paipel lon chök eü awa lap seni ekkewe 30 ier üa fiti ewe lamalamen Katolik.” Iwe mwirin ewe Ächechchem, a etiwa ewe käeöön Paipel lon ewe Bible Teach puk.
14. Ifa ewe angangen esilesil epwe poputä woon unusen fönüfan lon March 1?
14 Angangen Esilesil: Lon Ammol, March 1 tori March 22, epwe fis einetin ewe taropween etiwetiw mi kkolo aüchean woon unusen fönüfan fän iten ewe Ächechchem. Meinisin chon afalafal repwe unusen fiti ei angangen esilesil mi aüchea. Mi öch sipwe pwisin ngeni ewe chon imw echö nöün taropween etiwetiw lap seni ach sipwe chök likiti lon ewe asam. Iwe, ikä a watte ewe territory, ekkewe elter repwe filatä ikä ekkewe chon afalafal mi tongeni likiti ekkewe taropwe lon ekkewe imw esor aramas lon. Lon ewe wiikend sipwe pwal anöünöü ngeni aramas ekkewe chassi mi minefö.
15. Met sipwe tongeni apasa lupwen sia eineti ewe taropween etiwetiw?
15 Pokiten mi chök mwochomwoch ach fansoun le eineti ekkewe taropween etiwetiw, mi öch ach awewe epwe chök mwoch. Sipwe pwäratä ach pwapwaiti aramas me mwasangasang. Sia pwal tongeni apasa: “Sia fokkun mochen etiwok, chon om famili meinisin me chiechiom kewe ngeni ewe mwich mi kkolo aüchean epwe fis lon March 22. Iei nöüm taropween etiwetiw. Ren titchikin pworaus ra fen makketiu lon.” Neman ewe chon imw epwe wor än kapas eis. Are epwe angei ewe taropween etiwetiw nge epwe pwal apasa pwe epwe fiti. Makkei iten ekkewe mi mochen, iwe akkota ewe fansoun kopwe liwinsefälitiir.
16. Ifa ewe pworaus a menlapei lamoten ewe angangen esilesil le etiwa aramas lon ach we territory ngeni ewe Ächechchem?
16 Lon ewe ier a lo emön sounfiu a küna echö taropween etiwetiw lon asaman we. Iwe, a filatä pwe epwe fiti ewe Ächechchem nge epwe akkom angei än mumutä seni ewe sachin. Lupwen a äiti ngeni ewe sachin ewe taropwe, ewe sachin a chök fanafanelo nge a erä pwe seman me inan kewe ir Chon Pwäratä me a pin fiffitiir le lo lon ekkewe mwich. Iwe, ese chök mut ngeni ewe sounfiu an epwe fiti nge ir me rüüemön ra fiti ewe Ächechchem!
17. Ifa ussun sia pwäratä pwe sise angeimwalli än Kot chen ngenikich?
17 Pwäratä Kilisou: Lon ei fansoun Ächechchem 2008 epwele feito, amwo emön me emön leich epwe ekiekiöchü än Jiowa chen a pwäratä fän asengesich ikaamwo ese fich ngenikich. Ewe aposel Paul a makkei: “Am aua tingor ngenikemi, pwe ousap angeimwalli ewe chenin Kot.” (2 Kor. 6:1) Ifa ussun sia pwäralo pwe sise angeimwälli chenin Kot ngenikich? Paul a apasa: “Nge usun chon angangen Kot, sia pwarata pwisin kich ren sokkun meinisin.” (2 Kor. 6:4) Ina popun, sia pwäratä ach aücheani än Jiowa liffang ren ach föfför mürinnö me afalafala ewe kapas allim fän tinikken. Ei fansoun Ächechchem epwe suuk ngenikich ewe fansoun sipwe tongeni alapalo ach angang me unusen pwäratä ewe kapas allim ngeni aramas.
[Pwóór lón pekin taropwe 3]
Iö kewe Repwe Tufichin Auxiliary Pioneer?
◼ Ekkewe Famili
◼ Ekkewe Chon Angang Iteiten Rän
◼ Ekkewe Mi Chinnap me Apwangapwang Inisiir
◼ Ekkewe Chon Sukul
[Pwóór lón pekin taropwe 4]
Lupwen Sia Einet Ekkewe Taropween Etiwetiw:
◼ Amwocha om awewe; fos ren mwasangasang
◼ Makkei iten ekkewe mi mochen me liwinsefälitiir
◼ Anöünöü ekkewe chassi lon wiikend