Eü Kokkot Mi Lamot Kopwe Achocho Ngeni lon ei Mineföön Ier
1. Epwe met sipwe achocho ngeni lon ei ierifö?
1 Sipwe isetiu eü kokkot ngeni ei ier sefö pwe sipwe feffeitä lon pekin ngün. Met ka eäni kokkot ngeni ei ier mi fö? Eü kokkot mi fokkun mürinnö om kopwe auxiliary pioneer lon eü maram ika lap seni. Mei fokkun lamot om kopwe mmolnetä ika kopwe fiti ei angangen auxiliary pioneer mi apwapwa. Iei chök atun a mürinnö om kopwe poputä le ekieki ussun me föri om kokkot. Pwata ka ekieki pwe auxiliary pioneer ina met kopwe achocho ngeni?
2. Pwata sia filatä auxiliary pioneer pwe ina eü mettoch sipwe achocho ngeni?
2 Popun Ach Auxiliary Pioneer: Auxiliary pioneer a atufichikich ach sipwe “achocho ngeni” le apwapwai Semach lon läng ren lapaloon ach fansoun afalafal. (1 Tes. 4:1) Lupwen sia ekieki ussun ükükün met Jiowa a fen föri fän itach, letipach a amwökütükich ach sipwe esilei ngeni aramas ussun i. (Kölf. 34:1, 2) Jiowa a küna me aücheani om pwisin fangelo om tufich le alapalo om angangen afalafal. (Ipru 6:10) Ach silei pwe sia apwapwai Jiowa ren ach achocho lon an we angang, iwe, iei met sia fokkun meefi pwapwa ren.—1 Kron. 29:9.
3, 4. Ifa ussun sia küna feiöch ren auxiliary pioneer?
3 Iteiten fansoun ka föfföri om angang, kopwe küna pwe a mecheresilo, iwe, a pwal lapalo om meefi pwapwa ren. Lupwen ka alapalo om fansoun lon ewe angangen afalafal epwe älisuk om kopwe meefi kinamwe lupwen ka kakkapas ngeni aramas mesen imwer kewe. Kopwe pwal angöchülo le poputäni om kapas me nöünöü ewe Paipel. Om lükü epwe pöchökkülelo lupwen ka kakkapas fän chommong ussun om lükü. Chokkewe ese wor nöür chon käeö, ra poputäni emön lupwen ra fiti ewe angangen pioneer.
4 Ewe angangen auxiliary pioneer pwal ina eü minen älillis ngeni emön a fen elingapin chök lon an angang ngeni Kot. Emön regular pioneer me loom a küna pwe a kon lap an angang ren pekin aion, a filatä an epwe auxiliary pioneer sefäl ren eü maram. A apasa: “Ua fokkun mäirü pwe ewe eü maram ua pioneer a apöchökkülaei lon pekin ngün! Ua akkota pwe upwe pioneer iteitan, iwe, iei met a esenipato ai ua wiliti emön regular pioneer sefäl.”
5. Ifa ussun sipwe pworaiti ach meefi lipwakingaüen ach tufich le afalafal?
5 Pworaiti Ekkewe Minen Eppet: Ekkoch ra pireir ar repwe auxiliary pioneer pun ra meefi pwe rese lipwäköch le afalafal. Iwe, ika pwe iei met a eppetuk, Jiowa a tongeni älisuk ussun chök an a älisi Jeremaia. (Jer. 1:6-10) Inaamwo ika Moses esap emön “sousilei kapas,” nge Jiowa a nöünöü i pwe epwe apwönüetä letipan. (Eks. 4:10-12) Ika ka meefi pwe ka lipwakingaü, tingorei Jiowa an epwe apworai en.
6. Ifa ussun epwe tufich le auxiliary pioneer inaamwo ika emön a apwangapwang ren samau are emön a osukosuk ren chommong angang?
6 Ka tipemwaramwar pwe kese tufich le pioneer pokiten samau are chommongun om angang? Ika pwe ka meefi apwangapwang pokiten samau, iwe ka tongeni fiti ewe angangen pioneer ren om akkota om angang ka kinamwe ren. Ika pwe a chommong om angang, iwe, ka tongeni akkota pwe kopwe likitalo ekkoch angang ese kon lamot ngeni ewe maram mwirin. Chommong mi wor ar angang iteiten rän ra tongeni pioneer ren ar nöüni eü ika ruu ränin ar asösö fän iten ar pioneer.—Kol. 4:5.
7. Pwata a lamot ach sipwe apachalong lon ach iotek ussun ewe angangen auxiliary pioneer?
7 Met Kopwe Föri: Kopwe iotek ussun om mochen auxiliary pioneer. Tingorei Jiowa an epwe efeiöchü om tinikken le alapalo om angangen afalafal. (Rom 12:11, 12) Jiowa a tongeni älisuk om kopwe filiöch le akkota om kokkotun angang. (Jem. 1:5) Ika pwe ese wor om pwapwa le fiti ewe angangen pioneer, tingorei Jiowa an epwe älisuk om kopwe küna pwapwa lon ewe angangen afalafal.—Luk 10:1, 17.
8. Ifa ussun Än Salomon Fos 15:22 a atufichuk le auxiliary pioneer?
8 Pwüngüpwüngfengen me om famili woon ewe angangen auxiliary pioneer pwe epwe eü mettoch oupwe achocho ngeni. (SalF. 15:22) Eli emön me lon om we famili epwe tongeni pioneer ren älillisin ekkoch chon om famili. Kopwe pwal pwüngüpwüng ngeni ekkoch lon ewe mwichefel ussun om mochen pioneer äkkäeüin ekkewe mi chök wewe fengen nonnomumi. Iwe, chommong ra tongeni pwapwaiti ar repwe auxiliary pioneer.
9. Menni maram kopwe filatä om kopwe auxiliary pioneer?
9 Lupwen ka nengenisefäli nöüm we pwinin maram ren ei minefön ier, ineet kopwe tongeni auxiliary pioneer? Ika en emön chon angang are emön chon sukul, eli kopwe filatä ewe maram mi wor ränin asösö lon, are ewe maram mei wor nimu ränin Ammol are nimu Räninfel lon. Ren chök awewe, September, December, March, me August mi wor nimu wiikend lon. Lon May mei wor nimu Ränin Ammol lon, lon June mei wor nimu Räninfel lon. Ika pwe mei wor om samau, iwe kopwe ekieki woon ekkewe maramen räniöch. Eli kopwe pwal mochen pioneer lon ewe maram ewe circuit overseer epwe chuuri om mwichefel. Lupwen a chuuri ewe mwichefel, ka tongeni fiti esopun ewe mwich epwe fis fän iten ekkewe regular pioneer. Pokiten ewe ächechchem a sereni March 22 lon en ier, iwe March, April, me May repwe mürinnö om kopwe filiretä. Lupwen a fen fatelo menni maram kopwe auxiliary pioneer lon, poputä le makkei om kokkotun afalafal pwe kopwe tikeri ewe awaan pioneer.
10. Met sia tongeni föri ika sise tufichin auxiliary pioneer?
10 Inaamwo ika en mi meefi pwe kosap tufichin auxiliary pioneer lon ei ier mi fö epwe feito nge ka chüen tongeni achocho lon ewe angangen afalafal. Sopwelo chök le föri ükükün om tufich lon ewe angangen afalafal. Kopwe lükülük pwe Jiowa a pwapwa ren om achocho le äeä unusen om tufich me letipom le angang ngeni. (Kal. 6:4) Kopwe älillisöch, me peppesei chokkewe mi tongeni auxiliary pioneer. Neman, ka tongeni föri kokkotun om angang pwe epwe wor eü rän lon ewe wiik pwe kopwe fiti ekkewe ra pioneer.
11. Pwata sipwe fokkun lefäreni atapwalapwalen ei fansoun?
11 Nöün Jiowa kewe aramas ra lefäreni atapwalapwalen ei fansoun. Mei wor eü angang repwe awesalo, ina ewe angangen afalafala ewe kapas allim. Manauen aramas repwe feiengaü, pwal ewe lusun fansoun iei a mochomocholo. (1 Kor. 7:29-31) Ach tong fän iten Kot me chon oruch epwe amwökütükich ach sipwe föri ükükün ach tufich lon ewe angangen afalafal. Ren tinikken me kokkot mi mürinnö, eli sipwe tongeni auxiliary pioneer ren eü maram lon ei ier mi fö, eü mettoch mi fokkun lamot ach sipwe achocho ngeni!