Tapwelo Mwirin Kraist ren Om Föfför mi Pwäratä Süföl
1. Ifa ussun itelapen ach mwichelap lon ei ier a weneiti ach eäni föfför mi pwäratä süföl?
1 Ewe Paipel a aweweei pwe Jiowa, ewe Epinkepiisom, a üföüf ngeni iteüöch [ammafel]. (Kölf. 104:1) Fansoun meinisin, Jises a fos me mwökütüküt lon ewe napanap mi asamolu Seman me an kewe kokkot. (Jon 17:4) Kich meinisin sia tongeni äppirü Jises me alingalo Jiowa atun ewe “Tapwelo Mwirin Kraist!” District Mwichelap.
2. Ifa ussun ach ammolnatä pwe sipwe fiti eü me eü kinikinin ewe mwichelap epwe asamolu Jiowa?
2 Fel mi Ammafel: Sia tongeni asamolu Jiowa ren ach föri kokkot fän iten ach sipwe fiti ewe kametip lon pekin ngün mi fen mmolnetä fän äsengesich. Ka fen fos ngeni nöüm boss me akkota om kewe angang pwe kopwe fiti iteiten kinikinin lon ewe mwichelap? Ka fen akkota pwe kopwe warekai le kütta om leenien mot me fiti ewe köl me iotek? Ka fen akkota änom leolowas pwe kopwe tongeni möngö ren pwiich kewe? Le poputään ewe prokram, ika ewe chairman a etiwakich ach sipwe mommot mwen ewe nikättik epwe poputä, sipwele pökü ach asos me mommot fän iten poputään ewe prokram.
3. Ifa ussun ach akkaüselingöch lon ewe prokram epwe pwäratä süföl ngeni ach fel?
3 Ach aüselingöch ngeni ewe prokram a pwal asamolu Semach lon läng. Mwirin an a küna eü district mwichelap lon pwisin leenian, emön reporter a makkei pwe ekkewe chon katol repwe fokkun ingeiti “napanapöchün ekkewe chon fiti atun ra kan aüselingöch fän süfölun mosonoson.” A pwal apünga “chommongun semirit . . . , ir meinisin mi mosonoson are ra pwal mwo nge sussuuki nöür Paipel le kütta ekkewe wokisin.” Atun ewe prokram, esap ina ewe fansoun akkasos, text lon cellfon, möngö, are fetälekis. Ekkewe säräfö repwe mommot ren semer me iner pwe repwe tongeni älisiir ar repwe küna feiöch seni ewe prokram. (Tut. 31:12; SalF. 29:15) Ekkena sokkun föfför ra pwäratä süföl ngeni ekkewe ekkoch me sia aücheani ewe möngöön ngün mi lamot a kawor fän itach.
4. Pwata üfach me mökürach repwe napanapöch atun ewe mwichelap?
4 Napanapöchün Üfach me Mökürach: Chommong ra pwäratä ar kilisou ngeni ekkewe kapasen ächechchem lon ewe afalafal itelapan “Pwäratä Napanapöchün Chon Kraist Fansoun Meinisin,” atun ewe district mwichelap lon ewe ier , iwe, a menlapei pwe nöün Kot chon angang repwe napanapöch ren üfer me mökürer ussun emön chon Kraist. Lon ei ier sipwe pwal ekilapei ekkeei mettoch. Ekiekich ussun Jiowa me wisach ussun nöün chon pwäratä a kan pwälo ren napanapöchuch. Fansoun meinisin föütach kewe repwe “fich ngeni” föüten emön chon fel ngeni Kot.”—1 Tim. 2:9, 10.
5. Ifa ussun sia tongeni eäni föfför mi pwäratä süföl atun sia kukkunou lon ewe leeni a fis ewe mwichelap ie?
5 Sipwe chök itä pwäralo napanapöchuch lupwen sia fiti ewe prokram? Chechchemeni pwe chommong ra nennengeni ach äeä ach kewe badge. Napanapach epwe itä asokkakichelo seni ekkewe aramas. Ina pwata, lupwen sia fiti mwichelap sipwe üföüf üfen chon Kraist lon pwal mwo nge fansoun kukkunou. Sisap itä üföüf sipiringü, anchupong are tangkiri. Ach föri ena epwe fokkun eü minen pwäratä ngeni aramas! Jiowa a pwapwa lupwen sia pwäratä pwe kich chon afalafal ren napanapach.
6. Ikkefa ekkewe uwa mi mürinnö seni ach pwäratä süföl ussun emön Chon Kraist.
6 Uwa mi Mürinnö: Ach föfför mi pwäratä süföl lon ach kewe mwichelap epwe eü minen pwäratä ngeni aramas me awora ekiek mürinnö fän itach. Wesin eü mwichelap, emön nöüwis a apasa: “Esaamwo fän eü ai aupwe küna aramas mi fokkun mürinnö napanaper ussumi. Kot a nöünöü ämi pwe am aupwe äppirükemi.” Ren föfförüch mi ammafel sia kan süföliti me tongei emön me emön, iwe, a alingalo Jiowa. (1 Pit. 2:12) A pwäralo ach niuokkusiti Kot me ach kilisou fän iten ewe feiöch seni an Semach asukulakich. (Ipru 12:28) Amwo sipwe achocho le eäni föfför mi pwäratä süföl atun sia ekekkieki ewe District mwichelap lon ei ier itelapan “Tapwelo Mwirin Kraist!”
[Pwóór lon pekin taropwe 5]
Minen Ächechchem fän iten ewe Mwichelap
◼ Kütta Leeniom me Leenien Chienom: Kütta chök leeniom me leenien chienom mi fituk woon waom are chon leimwom.
◼ Möngöön Leolowas: Kese mochen uwei anom möngöön leonowas pwe kesap feilo seni ewe leenien mwichelap le küt anom.
◼ Monien Asor: A watte moni epwe towu fan iten kokkotun ewe district mwichelap. Sia pwäratä ach aücheani ena kokkot ren ach awora monien asor.