Ach Mwichelap lon Summer, ina eü Minen Pwäraatä mi Mürinnö usun ewe Enlet
1. Ekkewe chulap ra atufichi chon Israel le ekilonei me pworausfengen woon menni pworaus mi enlet?
1 Chon Israel loom ra kan chufengen fän ülüngät lon eü ier le föri ar chulap. Inaamwo ika mi lamot ngeni ekkewe chök mwan ar repwe fiti, nge fän chommong unusen ar famili ra säi ngeni Jerusalem pwe repwe pwapwaiti ekkewe chulap. (Tut. 16:15, 16) Ekkeei sokkun mwichelap ra atufichiir ar repwe ekilonei me pworausfengen woon ewe enlet mi aüchea lon ar riri ngeni Kot. Ikkefa ekkoch me lein ena enlet? Eü me leir, Jiowa ewe Chon Awora mi tong me kisäseü. (Tut. 15:4, 5) Pwal eü, sia tongeni lükülük woon an emmwen me tümün. (Tut. 32:9, 10) Chon Israel repwe pwal ekieki pwe pokiten ra iteit seni iten Jiowa, iwe a lamot repwe pwäriöchü an pwüng. (Tut. 7:6, 11) Pwal ina usun lon ach ei fansoun, ach kewe mwichelap lon summer ra pwal efeiöchükich.
2. Ifa usun ewe prokramin mwichelap lon summer epwe asarama ewe enlet?
2 Ewe Prokram a Asarama ewe Enlet: Lon ach we mwichelap lon summer, sia pwapwaiti ekkewe afalafal, sipai, pwoomw me interview mi asarama ewe enlet mi aüchea seni Paipel. (Jon 17:17) A chommong angang ra fen wes fän iten ewe mwichelap epwele fis. Än Jiowa mwicheich a ammolnatä eü prokram mi weneiti minne mi lamot ngeni aramas iei woon unusen fönüfan. (Mt. 24:45-47) Ka mwötöres le katol me aüseling ngeni met epwele katowu?
3. Met sipwe föri pwe sipwe feiöch seni ewe prokram?
3 Pwüngün, sipwe chök unusen feiöch ika pwe sia nonnom me aüselingöch ngeni ekkewe afalafal lon ekkewe ruu rän. Ika kesaamwo fos ngeni noum we poss, iwe kopwele ereni pwe kopwe asösö lon ekkena ruu rän. Mi öch epwe naföch om annut iteiten pwinin ekkena mwichelap pwe ka tongeni aüselingöch. Chommong ra küna pwe ar nennengeni ewe chon afalafal me makkeei menlapen ekkewe afalafal, a älisiir le akkaüselingöch. Kopwe tümünü pwe noum we cell phone esap osukosukok me ekkewe ekkoch. Kosap aasoos, text, me möngö atun ewe mwich.
4. Ifa usun sam me in ra tongeni älisi nöür kewe le feiöch seni ewe mwichelap?
4 Lon ekkewe ierin Sapat, atun ekkewe familien chon Israel ra mwichfengen le rongorong älleaan ewe Allük lon fansoun Chulapen Likächoch, nöür kewe “semirit” ra pwal nom rer pwe “repwe rongorong o kaiö.” (Tut. 31:12) A ifa me pöchökkületääch le küna än ekkewe famili mommotfengen atun ekkewe mwichelap me än ekkewe kükkün aüselingöch nge rese annut! Iteiten pwinin ekkena mwichelap, pwata ouse pworausfengen masouan kewe oua kon saniir? “Semirit ra chök föri föförün chon tiparoch,” ina popun a öch än ekkewe sam me in repwe tümünüür kapachelong nöür kewe säräfö atun asösöön leolowas are atun ra nonnom lon imwen ekkoch, lap seni ar repwe ‘föri pwisin tiper.’—SalF. 22:15; 29:15, Ewe Kapasen God.
5. Ifa usun sipwe elinga ewe enlet ren napanapen üfach ikewe epwe fis ie ewe mwichelap?
5 Ach äeä ach kewe badge esap chök atufichi aramas le silei pwe a wor mwichelap me atufichi ekkoch pwich kewe le esillakich, nge epwe pwal ina eü minen pwäraatä ngeni chokkewe mi künakich. Aramas repwe küna pwe chokkewe mi äeä ekkewe badge ra üföüf üf mi torotoröch me üküköch nge esap ekkewe üf mi torotorongaw me üf mi sikepwach, ekkewe chon fönüfan ra ükküföüf ikenäi. (1 Tim. 2:9, 10) Ina popun sipwe tümünü üfach me foutach atun ewe mwichelap. Ika sia filatä pwe sipwe siwili üfach särin ewe mwichelap me lo lon kafie, sipwe chechchemeni pwe sia chüen chon fiti ena mwichelap me sisap üföüf üföüfen kukkunou.
6. Ifa ewe mettoch sia pwal tongeni föri pwe sipwe pwapwaiti ach tipeeüfengen atun ewe mwichelap?
6 Atun ekkewe chulap, chon Israel ra pwapwaiti me pöchökkületä ren ar chiechi ngeni pwiir kewe mi feito seni ekkoch leeni me fönü, iwe ena mettoch a efisatä tipeeüfengen. (Fof. 2:1, 5) Än Chon Kraist pwipwifengen mi kkolo, epwe kon pwäpwäälo atun ekkewe mwichelap lon summer. Fän chommong a chüng letipen ekkoch ren ei sokkun napanap mi apwapwa. (Kölf. 133:1) Mi öch ach sisap lo ekis le kamö anach möngö, nge sipwe fen pwisin uwei ekis ach opento pwe sipwe alamota ach fansoun asösö le chiechi ngeni pwiich kewe mi mommot ünüküch!
7. Ikkefa ekkewe popun sipwe älillis ika mi fich ngenikich?
7 Chon künakich ra ingeiti ach kokkotöch me torotoröch atun ewe mwichelap, äkkäeüin atun ra silei pwe a fis angangan ren älillis chök. Ka tongeni fangolo ‘pwisin letipom’ le älillis atun ewe mwichelap? (Kölf. 110:3) Fän chommong unusen famili ra kan älillis pwe repwe asukula nöür kewe le sile älillisöch. Ika en emön mi nisässäü, iwe älillis ren ewe mwichelap epwe efisi om kopwe tongeni chiechi ngeni ekkoch pwich kewe. Iei alon emön fin Kraist: “Ua chök sissilei ai famili me ekkoch chienei nge use sissilei chommong pwiich kewe mi nom lon ewe leenien mwichelap. Nge atun ua älillis le elimelim, ua chuuri chommong pwiich kewe. A mmen apwapwa!” Ach alapaalo ach chiechi ngeni ekkewe ekkoch ren ach älillis atun ewe mwichelap epwe atoto ngenikich pwapwa. (2 Kor. 6:12, 13) Ika kesaamwo äkkälillis, eisini ekkewe elter ifa usun ka tongeni fich ngeni.
8. Ifa usun sipwe etiwa ekkoch le fiti ewe mwichelap?
8 Etiwa ekkewe ekkoch le Aüseling ewe Enlet: Sipwe poputä le etiwa aramas ngeni ewe mwichelap ülüngät wiik me mwan, usun chök pwal lon ekkewe ier. Ekkewe mwichefel repwe achocho le äwesaalo unusen ar we leenien afalafal ükükün ar tufich ren ar anöünöülo nöür taropween etiwetiw. (Ppii ewe pwoor “Ifa Usun Sipwe Anöünöü ewe Taropween Etiwetiw?”) Oupwe uwei lusun nöümi taropween etiwetiw ngeni ewe mwichelap pwe pwiich kewe repwe nöünöü le afalafal sereseröch ikewe ia epwe fis ewe mwichelap ie.
9. Apworausa ekkoch pworaus mi pwäri uwaöchün ach we angangen etiwetiw iteiten ier.
9 Itä a chüng letipen aramas ren ewe angangen etiwetiw iteiten ier? Lon eü mwichelap emön pwiich we chon älillis a älisi eü pean pwüpwülü le küt ngeniir ia repwe mommot ie. Ra ereni pwe ra angei ewe taropween etiwetiw me ra ekieki pwe usun “mi mürinnö.” Ra säi ükükün 200 mwail pwe repwe fiti! Lon pwal eü pworaus, emön fin Kraist a afalafal imw me imw me ngeni emön mwan echö taropween etiwetiw mi mochen silei usun ewe mwichelap. Iwe, a äwewe ngeni masouan. Mwirin fitu rän atun ewe mwichelap, ewe fefin a küna ewe mwan me emön chienan ra fiti ewe mwichelap, me ra kamwöch eü me lein ekkewe puk ra kerän katowu!
10. Pwata a lamot ach fiffiti ekkewe mwichelap mi fiffis iteiten ier?
10 Ekkewe chulap, ikkena met Jiowa a awora fän tong pwe epwe älisi ekkewe chon Israel le ‘angang ngeni fän leten leluker pwal fän allükülüköch.’ (Jos. 24:14) Pwal ina chök usun, ach fiti ekkewe mwichelap iteiten ier ra älisikich le “manaueni ewe manauen let,” me ina eü kinikin mi aüchea lon ach fel. (3 Jon 3) Amwo Jiowa epwe efeiöchü än chokkewe mi tongei ewe enlet achocho le fiti me unusen feiöch seni ewe mwichelap!
[Ekis Pwóróus lón pekin taropwe 4]
Ach föfför mürinnö atun ewe mwichelap a elinga ewe enlet
[Ekis Pwóróus lón pekin taropwe 5]
Sipwe poputä le etiwa aramas ngeni ewe mwichelap ülüngät wiik me mwan
[Pwoor lon pekin taropwe 3-6]
Kapasen Ächechchem Fän Iten Ewe 2012 Mwichelap Lon Summer
◼ Kulokun ewe Prokram: Ewe prokram epwe poputä kulok 9:20 lesossor iir me ruu rän. Ika a esilesil pwe epwele ttik nikättikin poputään ewe mwich, kich meinisin sipwe feilo ngeni ach kewe leenien mwoot pwe ewe prokram epwe poputä fän kokkotöch. Ewe prokram epwe sär kulok 4:55 lekuniolun Ammol me kulok 3:40 lekuniolun Räninfel.
◼ Käimuloon Leenien Mwoot: Sipwe chök äimuolo leenien chon lon imwach, chon fitikich woon waach, are nöüch kewe chon käeö.—1 Kor. 13:5.
◼ Möngöön Leolowas: Ouse mochen oupwe uwou ämi opento pwe ousap lo seni ewe leenien mwichelap atun möngöön leolowas. Oupwe tongeni uwou lon kükkünün ice chest mi tongeni kuch fän ämi sea pun ese mumutä ekkewe watteen ice chest me cooler are ekkewe sepi kilas lon ewe leenien mwichelap.
◼ Asor: Sia tongeni pwäri ach kilisou ren kokkotun ewe mwichelap ren ach walong ach asor lon ewe leenien mwichelap fän iten ewe angang woon unusen fönüfan. Ekkewe ra nöünöü check le asor repwe makkeei “Watch Tower” woon ena check.
◼ Äkseten me Weiweitään Semwen: Ika emön a feiengaw are semwen atun ewe mwichelap, ouse mochen esile ngeni ewe chon älillis lon ewe mwichelap pwe epwe mwittir esile ngeni ewe Pekin Säfei (First Aid).
◼ Säfei: Ika ka nom woon säfei, iwe, kopwe pwisin uwei ünümomw kana säfei, pun ese wor lon ewe leenien mwichelap. Oupwe kapichiöchü ekkewe minen oppos fän iten semwenin suke pwe ete efeiengawa ekkewe ekkoch.
◼ Taropween Please Follow Up (S-43): Oupwe amasoua ena taropwe ika oua chuuri emön mi pwapwaiti le käeö atun oua afalafal sereseröch atun ewe mwichelap. Chon afalafal repwe uwei echö are rüüachö ekkena taropwe atun ra lo ngeni ewe mwichelap. Ika a unus amasouen ena taropwe, oupwe walo lon ewe Puk Room are ngeni ewe seketeri lon pwisin om we mwichefel.—Nengeni Ach Angangen Afalafala ewe Mwu, minen November 2009, pekin taropwe 4.
◼ Älillis le Angang: Chokkewe mi mochen älillis repwe esilei ngeni ewe Volunteer Service Department lon ewe mwichelap. Ekkewe mi kis seni 16 ieriir ra tongeni pwal älillis nge epwe fän tümünüen semer are iner are emön watte nge epwe pwüngülo me ren iner are semer.
[Pwoor lon pekin taropwe 6]
Ifa Usun Sipwe Anöünöü ewe Taropween Etiwetiw?
Ren ach sipwe tikeri aramas meinisin lon ach we leenien afalafal, eli mi lamot sipwe ammwocha met sipwe apasa. Eli sia tongeni erä: “Rän allim. Äm aua fiti eü angangen eineti ei taropween etiwetiw mi fis woon unusen fönüfan. Iei noum kapi. Kopwe küna tichikin ekkoch pworaus lon ei taropween etiwetiw.” Kopwe mwasangasang. Atun ka fiti ewe angangen einet lon weekend, kopwe pwal anöünöü ekkewe Leenien Mas ika mi fich.