Ach kewe Mwichelap, Iir Fansoun Fel mi Apwapwa
1. Ifa usun än chon Israel kewe fetellap ra usun chök ach kewe mwichelap ikenäi?
1 Josef, Meri, nöür kewe, me pwal ekkewe ekkoch ra kan feffeilo Jerusalem pwe repwe fiti ekkewe fetellap iteiten ier. Lon ekkena atun, meinisin ekkewe chon fel ra likiti ekiekin pwisin ar kewe osukosuk, nge ra chök afota ekiekiir woon ar fel mi aüchea ngeni manauer. Ekkewe fetellap ra awora fansoun ar repwe ekkekieki me kakkapas usun mürinnöön Jiowa me etittina an Allük. Iwe, sipwe pwal tongeni fel ngeni Jiowa fän pwapwa atun epwe fis ach kewe mwichelap.
2. Met sipwe föri le mmolnetä ngeni ewe mwichelap epwele fis?
2 Lamoten Mmolnöch: Jises me an we famili ra fetäl ükükün 60 mwail ngeni Nasaret me liwinsefäl 60 mwail. Inaamwo ika sise silei fitemön pwiin me fefinen Jises, nge sia tongeni anchangei ükükün achochoon Meri me Josef le akkotaöchü me mmolnetä. Ka fen mmolnetä le fiti ewe mwichelap epwele fis? Ika ka akkangang, iwe, mi lamot kopwe tingorei noum we pos pwe kopwe asösö lon ena atun. Ka tongeni älisi chon ewe mwichefel mi osupwang pwe repwe tufichin fiti ena mwichelap?—1 Jon 3:17, 18.
3. Ifa usun sipwe pwäratä ach aücheani ach mwichen pwipwi mi tipeeüfengen?
3 Ewe chon angang mi alükülük me tipatchem ese chök peresei pworaus, nge a pwal akkota pwe sipwe mwichfengen lon ekkena mwichelap me aüseling afalafal fän iten ach sipwe apöchökkülafengenikich. (Ipru 10:24, 25) Ina minne, kopwe akkota le warekkäi lon ekkena ränin mwichelap me pwapwaiti om chiechi ngeni ekkewe ekkoch me mwen an epwe ttik ewe nikättik, esissillen pwe sipwele mwotiw. Sipwe uwou ach opento pwe sipwe chök nomwotiw ren ewe leenien mwichelap, pwe sipwe tongeni chuuri me pwoppworaus ngeni pwich kewe. Sipwe aücheani ach we mwicheichen pwipwi mi tipeeüfengen pwe ina eü liffang seni Jiowa.—Mika 2:12.
4. Met epwe älisikich le unusen feiöch seni ewe mwichelap?
4 Eü Fansoun Käeö: Jises a käkkäeö usun Seman we lon läng ren an fiffiti ekkewe fetellap seni chök le kükkünün. (Luk 2:41-49) Met epwe älisikich me chon ach famili pwe sipwe unusen feiöch seni ekkewe kinikin repwe katowu lon ena mwichelap? Atun mwich, kopwe chök pwosolo lon leeniom, nge kosap aasoos ika ese lamot. Kopwe offelo noum cell phone are ekkewe mettoch repwe tongeni aosukosukok me ekkewe ekkoch. Afota mesom woon ewe chon afalafal me makketiw ekkewe menlapen pworaus mi lamot. Motfengen me om we famili pwe oupwe ppii pwe nöümi kewe repwe pwal aüselingöch. Särin mwich, oupwe enniwili ekkewe pworaus oua sani.
5. Met sipwe chechchemeni usun üfach me foutach?
5 Üfach me Foutach: A mecheres än ekkewe chon fetäl woon ewe al repwe esilla Jises me an we famili me ekkewe ekkoch chon Jus, pun a wor och offout lesopwun üfer kewe me efoch sääl mi araw woon iteiten eü me eü ekkena offout. (Num. 15:37-41) Chon Kraist rese kan üföüf sokkun üf mi asokkolor, nge ra sillelo ren üfer mi fich, torotoröch, me limelimöch. Sipwe kan tümünüöchü napanapöchüch atun sia lo ngeni ewe leenien mwichelap me liwin, me sipwe äeä ach kewe badge. Ika ina, chon künakich repwe mwaar me esilla pwe sia sokko seni ekkewe chon lükün.
6. Pwata sipwe älillis le angang fän iten ewe mwichelap?
6 A Lamot Chon Älillis: Atun ewe mwichelap, a lamot chommong chon älillis pwe epwe kokkotöch. Ka tongeni älillis? (Kölf. 110:3) Ekkewe angang sia föri atun ewe mwichelap, ina kinikinin ach fel, iwe, a achchüngü letipen aramas. Emön meilapen eü leeni ikewe a fis ewe mwichelap ie a ingeiti ekkewe chon älillis mi limetiöchü ewe leeni, iwe, a makkeei: “Ua mochen apasa ai kilisou ren amwararen ewe atun oua äeä ei leeni. Use mwo küna ei sokkun fän eü. Seni chök loom, ua kan rongorong pwe Chon Pwäratä Jiowa ra itöch pun ra kan limetiöchü eü leeni ra sattaani mwen repwe lo seni. Chon ämi ei mwicheich oua aöchüolo ei leeni fän iten chon ei sopw, me oua mürinnö seni meinisin ekkewe ra piin äeä.”
7. Ifa usun sipwe tongeni afalafal ikewe a fis ewe mwichelap ie?
7 Eäni ei Fansoun le Afalafal: Chommong repwe nennengenikich atun sia üföüföch me äeä ach kewe badge. Eli, repwe kapas eis ngenikich usun, iwe, sia tongeni ereniir usun ewe mwichelap. Emön ät, 4 ierin, a uwei nöün we puk a kerän katowu lon ewe mwichelap me a eppii ngeni emön chon angangen eü imwen möngö. A atufichi seman kewe me inan ar repwe etiwa ewe fefin ngeni ewe mwichelap.
8. Ifa usun sipwe äppirü Jises me an we famili le aücheani ekkewe fansoun mwichelap?
8 Ekkewe chon Jus mi mochen alapalo ar silei Jiowa ra pwapwaiti ekkewe fansoun fetellap. (Tut. 16:15) Chon än Jises we famili ra pwapwa le pennüküolo chommong mettoch fän iten ar repwe fiti me unusen feiöch seni ekkewe fetellap. Sia pwal aücheani ach kewe mwichelap, pun iir liffang seni Semach we mi tong lon läng. (Jem. 1:17) Iei ewe atun sipwele mmolnetä ngeni ena fansoun fel ngeni Jiowa mi apwapwa!
[Pwóór lón pekin taropwe 6]
Kapasen Ächchem Fän Iten ewe Mwichelap
◼ Möngöön Leolowas: Ouse mochen uwou ämi opento pwe ousap lo seni ewe leenien mwichelap atun möngöön leolowas. Ka tongeni uwou onom lon eü kükkünün ice chest ika epwe kuch fän om we sea. Ese mumutä ekkewe watteen ice chest me rume lon ewe leenien mwichelap.
◼ Monien Asor: Sia tongeni pwäratä ach aücheani kokkotun ekkewe mwichelap ren ach awora monien asor lon ach kewe Leenien Fel are mwichelap fän iten ewe angang woon unusen fönüfan. Ika ke asor lon chek, iwe, kopwe makkeei “Jehovah’s Witnesses” woon.