“A Ngeni Ekewe Chon Malülü Pöchökül”
1 Kich meinisin sia meefi mölülü fän ekkoch. Eli sisap chök mölülü ren ach angang are mwökütükütün inisich nge pwal seni ekkewe osukosuk sia küna lon ekkeei “fansoun weires.” (2 Tim. 3:1) Ifa ussun, kich nöün Jiowa kewe chon angang, sipwe angei pöchökkül lon pekin ngün pwe sisap apwangapwangelo lon ach angangen afalafal? Sia tongeni föri ena ren ach eäni lükülük woon Jiowa, ewe emön mi watte “pöchökülen an manaman.” (Ais. 40:26) A silei ach kewe osupwang me a enletin mochen älisikich.—1 Pit. 5:7.
2 Minen Älillis seni Jiowa: Jiowa a apöchökkülakich ren an we ngün mi fel, ewe chök pwal manaman a fen äeä le föratä läng me fönüfan. Än Kot we ngün mi fel a älisikich ach sipwe angei “pöchökül mi fö” ika sia mölülülo. (Ais. 40:31) Kopwe pwisin eisinuk, ‘Ineet ewe saingoon fansoun ua iotek fän iten ewe ngün mi fel pwe epwe apöchökkülaei le apwönüetä wisei kewe ussun emön chon Kraist?’—Luk 11:11-13.
3 Ren ach äkkälleäni me ekkekiekifichi än Kot we kapas me ach akkangei möngöön ngün seni ach käkkäeö ekkewe puk seni ach mwicheich iteitan, sipwe tongeni pöchökkül ussun chök efoch ira aumanau mi “fotutiu unukkun chanpupu, mi uwa lon an fansoun ras, nge chön esap pwaselo.”—Kölf. 1:2, 3.
4 Jiowa a pwal nöünöü chienach chon lükü pwe repwe wiliti eü minen “alilis” [apöchökkül] ngenikich. (Kol. 4:10, 11) Ra apöchökkülakich lon ekkewe mwich ren ar kewe kapas mi äüfichikichetä, ren meefier, me ar kewe afalafal. (Fof. 15:32) Ekkewe älillis lon pekin ngün me kapasen apöchökkül mei kawor, lapaloon, me ren ekkewe elter.—Ais. 32:1, 2.
5 Ewe Angangen Afalafal: Ika ka kan meefi mölülülo, kesap ükütiu le afalafal! Ach fiffiti ewe angangen afalafal iteitan a wesewesen asösökich, nge esap ussun ekkoch angang mi amölülükich. (Mt. 11:28-30) Ach afalafala ewe kapas allim a älisikich ach sipwe afotä ekiekich ngeni ewe mwun Kot me nenneloi ekkewe feiöch mi amwarar lon fansoun esemuch.
6 Mei chüen wor chommong mettoch sipwe föri me mwen epwe talo ei otot mi ngaü. Mei wor chommong popun ach sipwe likiitü lon ach angang, “usun chok emon mi angang ren ekkewe manaman mi feito seni Kot.” (1 Pit. 4:11) Ren än Jiowa we älillis sipwe tongeni awesalo ach angang pun i a “ngeni ekewe chon malülü pöchökül.”—Ais. 40:29.