Kapas Eis Seni Chón Állea
Itá “uwaan ewe ngún mi fel” a chék wewe ngeni ekkewe napanap mi mak lón Kalatia 5:22, 23, NW?
Ekkena wokisin ra eiteitaatiw tiu napanapen Chón Kraist kewe: “Iei uwaan ewe ngún mi fel, tong, pwapwa, kinamwe, mosonottam, kirekiréch, aramaséch, lúkú, tipepwetete, nemenifichi pwisinkich.” Iwe nge, sisap ekieki pwe ikkena chék ekkewe napanap mi múrinné án Kot we ngún mi fel a tongeni álisikich le ámááraatá.
Nengeni met ewe aposel Paulus a makkeei mwen ekkena wokisin: “Ekewe angangen fituk: Lisowu, limengau, mocheisou, fel ngeni anümwäl, angangen rong, oputfengen me fiufengen, koumfengen, song, apangau, tipefesen, mwichaiei, lolowo, ünüpuch, mongömong me sokun föför mi wewe ngeni ekei.” (Kal. 5:19-21) Ren án Paulus apasa “sokun föför mi wewe ngeni ekei,” a wewe ngeni pwe ese féúni meinisin “ekewe angangen fituk” usun chék ekkewe Kolose 3:5 a fós usun. Pwal ina chék usun, mwirin án Paulus eiteitaatiw ekkewe tiu napanap mi múrinné, a erá: “Esap wor och allúk a ú ngeni ekkeei sókkun féffér.” Ina minne, Paulus ese féúni ekkewe napanap mi múrinné meinisin án Kot we ngún mi fel a tongeni álisikich le ámááraatá.
Sia weweiti ena lupwen sia aléllééi uwaan ewe ngún mi fel ngeni uwaan ewe saram, ewe Paulus a makkeei usun ngeni chón ewe mwichefel lón Efisos: “Uwan saram lon mettoch meinisin mi murinno, o mi pung, o mi enlet.” (Ef. 5:8, 9, Testament Mi Fö) Ewer, ewe napanap “murinno” are “aramaséch,” fengen me pwúng me enlet, iir kinikinin ewe “uwan saram” nge pwal ina kinikinin “uwaan ewe ngún mi fel.”
Pwal ina chék usun, Paulus a pese ngeni Timoty ekkeei wonu napanap mi múrinné: “Kopwe fokun achocho ngeni om kopwe eäni pwüng, soulängöch, lükülük, chen, likitü me kirikiröch.” (1 Tim. 6:11) Úlúngát chék me lein ekkena napanap (lükülük, chen, me kirikiröch) iir kinikinin “uwaan ewe ngún mi fel.” Iwe nge, epwe pwal lamot ngeni Timoty álillisin ewe ngún mi fel ren an epwe ámááraatá pwal ekkewe ekkóch napanap Paulus a fós usun, áwewe chék ren pwúng, soulengéch me likiitú.—Apépé ngeni Kolose 3:12; 2 Petrus 1:5-7.
Ina minne Kalatia 5:22, 23, ese eiteitaatiw meinisin ekkewe napanap mi lamot ekkewe Chón Kraist repwe ámááraatá. Án Kot we ngún mi fel a tongeni álisikich le ámááraatá ekkewe tiu napanap, iir kinikinin “uwaan ewe ngún mi fel.” Nge, a pwal wor ekkóch napanap mi lamot sipwe ámááraatá ren ach sipwe wiliti Chón Kraist mi ásimaw me “angei ewe manau mi fö mi för lon lapalapen Kot o pwäla lon eu manau mi enletin pwüng me pin.”—Ef. 4:24.