En Mi Tongeni Tolong lon “Eu Asam Lap Ngeni Angang Mi Lamot”?
1. Menni “asam lap ngeni angang mi lamot” a suuk ngenikich?
1 Lupwen “eu asam lap ngeni angang mi lamot” a fen suuk ngeni aposel Paul, a mwotoresiti le alamota ena fansoun fän iten äfeffeitään an angangen afalafal nge mei wor chommong chon oput (1 Kor. 16:9) Ikenäi 642,000 som chon afalafal woon unusen fönüfan ra fen tolong lon ena asamalap ren ar wiliti regular pioneer.
2. Pwata mei mürinnö sipwe kan etittina nonnomun manauach iteitan?
2 Nonnomuch A Tongeni Sissiwil: Inaamwo ika mi chök kaük ach angang iei pokiten pwisin nonnomuch, nge nonnomuch a tongeni siwil. Ina minne, a mürinnö ach sipwe kan etittina pwisin nonnomuch me sisap l witiwiti ewe fansoun epwe tufich. (SalAf. 11:4) En emön säräfö mi kopwele sochungio me high school? En emön sam are in nge noum kewe repwele poputä le sukul? En kopwele retire seni om angang? Ekkena sokkun siwil repwe tongeni suuk ngonuk eü fansoun pwe kopwe tongeni fiti ewe angang ussun emön regular pioneer. Emön sister mi osukosuk ren samau a filatä an epwe regular pioneer lupwen a 89 ierin. Pwata? Pokiten ese pwal nuing lon lap seni eü ier, a meefi pwe inisin a pöchökkül me a tongeni pioneer.
3. Ifa ussun ekkoch ra siwili ar kokkot pwe repwe regular pioneer?
3 Ren pworausen Paul, akkomwan a ekiekin chuuri pwiin kewe lon Korint. Nge, a siwili an kokkot pokiten ewe pworaus allim. Chommong mi pioneer ikenäi ra pwal föri och siwil lon ar kokkot pwe repwe tufichin pioneer. Ekkoch ra fen emecheresalo nonnomun manauer pwe ra chök angang ren fitu awa, nge a ianan fän iten möön ar kewe osupwang lon pekin aion. Ra fokkun küna pwapwa lon ei sokkun angang. (1 Tim. 6:6-8) Ekkoch mi pwüpwülü ra pwal föri siwil lon kokkotun manauer pwe ewe mwän chök epwe angang, ina minne, epwe atufichi ewe fefin an epwe tongeni pioneer.
4. Met sipwe tongeni föri ika sise lükülük pwe sipwe tongeni tori ewe ükükün awa fän iten regular pioneer?
4 Kosap mwittir ekieki pwe kese tongeni pioneer pokiten ka niuokkus pwe kosap tori ewe ükükün awa. Ruu awa ika ekis lap seni iteiten rän ina chök met ka osupwangen. Ika kese kon nükünük pwe kopwe tongeni föri ena, iwe, sotun auxiliary pioneer ren eü maram ika ruu, nge kopwe achocho ngeni 70 awa. Ei mettoch epwe suuki ngonuk om kopwe küna pwapwaan ewe angangen pioneer. (Kölf. 34:8) Fos ngeni ekkewe ra fen pioneer. Eli ra fen pwäkini och osukosuk ussun chök om.(SalF. 15:22) Tingorei Jiowa an epwe efeiöchü om achocho le alapalo om angangen afalafal.—1 Jon 5:14.
5. Met popun ewe angangen regular pioneer eü angang mi mürinnö?
5 Eü Angang Mi Mürinnö: Ach fiti ewe angangen regular pioneer a atoto rech chommong feiöch. A mut ngonuk om kopwe küna pwapwa wachemwuk mi feito seni lapeloon om liffang. (Föf. 20:35) Epwe pwal älipwäköchukolo lon om äkkäeä ewe kapas mi enlet fän pwüng. (2 Tim. 2:15) Epwe lapolo om kopwe küna pwe pöün Jiowa a kan älisuk. (Föf. 11:21, Fil. 4:11-13) Epwe pwal älisuk le ämääraatä ekkewe napanap lon pekin ngün, ussun chowean engnginö, me epwe atufichuk om kopwe pacheöch ngeni Jiowa. (Jem. 4:8) Kopwe tongeni tolong lon ei asamalap ren om kopwe wiliti emön regular pioneer?