Ka Fen Piin Regular Pioneer?
1. Ifa ewe wis mi aüchea chommong ra fen pwapwaiti? Met a fis ngeni ekkoch?
1 Lon ekkewe ier ra lo, fite ngeröü pwiich kewe ra fen pwapwaiti ewe angangen pioneer le “aiti ngeni aramas ewe Pworausen Manau.” (Fof. 5:42) Iwe nge, ekkoch ra ükütiw le pioneer ren ekkoch popun. Ika ka piin pioneer, ka fen etittina nonnomum iei, ika ka tongeni pioneersefäl?
2. Pwata chokkewe mi piin pioneer me loom repwe etittina nonnomur iei?
2 Nonnomum A Siwil: Eli iei ese chüen wor ewe popun ka ükütiw le pioneer. Äwewe chök, ika ka ükütiw le pioneer pokiten kese tongeni tikeri ewe 90 awa iteiten maram, iwe met, kese tongeni fitisefäli pwe iei a kisitiw woon 70 awa? A chüen lamot ewe ükükün angangen moni ka eäni? A kisilo wisom lon famili seni ewe atun ka kaülo le pioneer? Emön sister mi ükütiw le pioneer ren apwangapwangen inisin, a poputäsefäl atun a 89 ierin. A fen lap seni eü ier an ese chüen mwo lüing, iwe, a meefi pwe a pöchökkül le pioneersefäl!
3. Ifa usun chon ewe famili repwe älisi emön leir pwe epwe pioneer?
3 Eli kese mwo fen piin pioneer, nge emön lon om we famili a ükütiw le pioneer pwe epwe älisi emön chon ewe famili, äwewe chök, papa chi are mama chi. (1 Tim. 5:4, 8) Ika ina, ouse tongeni alapaalo ämi älisi ewe emön mi piin pioneer pwe epwe pioneersefäl? Pwata ouse pworausfengen usun? (SalF. 15:22) Atun chon ewe famili ra angangfengen pwe emön me leir a tongeni pioneer, repwe meefi pwe ra älisatä ewe angangen afalafal.
4. Epwele ifa ika kese tufichin fitisefäli ewe angangen pioneer lon ei fansoun?
4 Kosap letipechou ika pwe nonnomum iei ese atufichuk le pioneersefäl. Om na mochen a apwapwaai Jiowa. (2 Kor. 8:12) Äeä ekkewe tufich ka käeö seni om fansoun pioneer lon om angangen afalafal iei. Ioteki om na mochen, me achocho le ppii ifa usun kopwe siwili nonnomum. (1 Jon 5:14) Eli mwirin och fansoun, Jiowa epwe suuki ngonuk ‘eu asam mi suk chöchöla pwe kopwe föri ewe angang mi aüchea’ pwe kopwe tongeni fitisefäli ewe angangen pioneer!—1 Kor. 16:9.