Lapólóón Fansoun le Mwareiti Jiowa
1. Ifa ewe mineféén kókkót mi atufichi an epwe lapóló ach mwareiti Jiowa?
1 Fán ewe maram March, eú minefé kókkót a poputá mi atufichi ekkewe chón afalafal ar repwe auxiliary pioneer ren ar néúni 30 awa fán maramen March me April me iteiten maramen án ewe chónemmwen mi wisen sáifetál chuchchuuri ar we mwichefel. Ika an chuuri ewe mwichefel a sereni lesópwólóón eú maram ngeni pwal ei mineféén maram, iwe ekkewe chón afalafal mi mochen néúni 30 awa repwe filatá menni maram repwe auxiliary pioneer lón. Meinisin ekkewe auxiliary pioneer ra ketiw ar repwe fiti unusen ewe mwich ewe chónemmwen mi wisen sáifetál epwe eáni ngeni ekkewe regular me special pioneer. Weween ika sise tongeni tikeri ewe kókkótun 50 awa, iwe sia tongeni mwareiti are “kilisou chapur ngeni ewe Samol mi Lapalap” ren ach auxiliary pioneer fán rúáánú lón eú ier ren ewe kókkótun 30 awa!—Kölf. 109:30; 119:171.
2. Met chókkewe mi auxiliary pioneer repwe pwapwaiti atun án ewe chónemmwen mi wisen sáifetál chuuri ewe mwichefel?
2 Atun Án ewe Chónemmwen mi Wisen Sáifetál Chuurikich: Iei epwele chómmóng repwe auxiliary pioneer atun án ewe chónemmwen mi wisen sáifetál chuuri ewe mwichefel me pwapwaiti ar apéchékkúlafengeniir ren ar angangfengen lón ewe angangen afalafal. (Rom 1:11, 12) Chómmóng auxiliary pioneer neman repwe akkóta pwe repwe asésé eú rán seni ar angang atun án ewe chónemmwen mi wisen sáifetál chuuri ewe mwichefel pwe repwe tongeni angangfengen. Chókkewe mi angangen moni Sárifál ngeni Enimu ra tongeni eisini ika ra tongeni angangfengen lón Ammól are Ráninfel. Pwal eú, a ifa me apéchékkúlen án ekkewe auxiliary pioneer fiti ekkewe regular me special pioneer lón ar we mwichen pioneer!
3. Pwata a kon múrinné le auxiliary pioneer atun ewe Áchechchem?
3 Fan March me April: Chókkewe mi fen auxiliary pioneer ren ar néúni 30 awa ren ewe kókkót lóóm atun ewe maramen Áchechchem, iei ra tongeni alapaaló fán ruu ar asoren “mwareiti Kot”! (Ipru 13:15) March me April ikkena ekkewe ruu maram a mmen múrinné ach sipwe alapaaló ach angangen afalafal ren ach fiti auxiliary pioneer. Iteiten ier atun ekkena maram, sia pwapwa le fiti ewe angangen etiwa aramas le fiti ewe Áchechchem. Pwal eú, pokiten chómmóng ra alapaaló ar angangen afalafal atun ewe Áchechchem, iwe sia tongeni fiti ese lifilifil ekkewe chón afalafal. Mwirin ewe Áchechchem, sipwe liwiniti chókkewe mi pwapwaiti mi pwáló ren ar fiti ewe Áchechchem me alapaaló ar mwasangasangeiti ewe afalafal mi kkóló aúchean. Itá letipom esap amwékútuk le auxiliary pioneer lón ekkena mineféén kókkót?—Luk. 6:45.