Anöünöü Ekkewe Chassi Mi Pwäratä ewe Enlet
1. Ifa wisen nöüch keei chassi Ewe Leenien Mas me Awake!?
1 Ekkewe chassi Ewe Leenien Mas A Esilefeili Än Jiowa We Mwu me chienan we Awake!, ir äkkäeüin kinikinin ach angang mi chüen äkälisatä esilefeilin ewe kapas allim me ewe angangen föralo chon käeö. (Mt. 24:14; 28:19, 20) Sia kan pwapwa le äiti ngeni aramas ekkeei chassi lupwen sia fiti sokkopaten kinikinin ach angang fän iten ewe Mwu.
2. Met sokkun siwil ra fis ngeni ekkewe chassi Ewe Leenien Mas me Awake!, me met popun ra fis ekkena?
2 Lon ekkewe ier ra lo, sia küna ekkewe siwil ra fis ren saisin me masouen ekkeei chassi me pwal ekkewe napanap sia äeä le anöünöür. A fis ekkena siwil pwe repwe öchüolo ekkewe chassi pwe pworausen ewe Mwu epwe tongeni kkü letipen aramas pwe “meinisin repwe kuna amanauen ngunur o sineifichi minne mi enlet.”—1 Tim. 2:4.
3. Ifa ussun sipwe tongeni nöünöü ekkewe chassi lon ach angangen afalafal?
3 A mak lükünupen nöüch we Ach Angangen Afalafala ewe Mwu ekkewe afalafal sipwe tongeni äeä ussun ekkewe chassi. Ra kan menlapei ekkewe itelap le poputään ewe chassi nge fän ekkoch ra menlapei ekkewe pworaus chommong aramas ra kan ekieki ussun. Ika sia silefichi ekkena itelap me fos lon pwisin ach fos atun sia chuuri aramas, sipwe fokkun lipwäköch lon ach eäni ekkena afalafal.
4. Pwata a mürinnö ach sipwe nöünöü pwal ekkoch afalafal me lükün ekkewe ra fen mak lon Ach Angangen Afalafala ewe Mwu?
4 Ka tongeni nöünöü pwal eü afalafal mi sokkolo seni minne a mak lon Ach Angangen Afalafala ewe Mwu. Mei öch ena pokiten eli mei pwal wor ekkoch itelap lon ewe chassi mi fokkun fichiiti om territory. Are ka efich pwal och pworaus lon ewe chassi me kopwe mwasangasangeiti le anöünöü ngeni aramas ewe chassi.
5. Met kopwe föri me mwan kopwe ammolnatä ewe afalafal ka mochen menlapei?
5 Ifa Ussun Kopwe Ammolnatä Om Afalafal: Äkkäeüin, kopwe älleäniöchü ewe pworaus ka filatä le menlapei. Eli kese tongeni sileöchü iteiten pworaus lon ewe chassi me mwan om we lo afalafal. Iwe nge, mi lamot kopwe pwäratä om mwasangasang me wenewenen efich ewe pworaus ka fili le apworausa ussun. Ka chök tongeni föri ena ika ka silefichi ekkewe pworaus kopwe fos ussun ngeni aramas.
6. Ifa ussun sipwe ammolnatä pwisin ach afalafal?
6 Oruuan, kopwe tipemecheres le akkasiwili om kapasen le poputään. Kopwe tongeni eäni eü kapas eis mi lamot mi weneiti ewe pworaus ren om kopwe poputäni ämi pworausfengen. Iteitan kopwe lükülük woon manamanen ewe kapasen Kot le kkü letipen aramas. (Ipru 4:12) Filatä eü wokisin lon Paipel mi weneiti ewe itelap ka fos ussun. Nge mi öch ika ena wokisin a fen mak lon ewe pworaus ka menlapei. Ekieki ifa ussun kopwe rifengenni ewe wokisin ngeni ewe pworaus lon ewe chassi.
7. Ifa ussun sipwe amürinnölo ach afalafal?
7 Lon Iteiten Fansoun: Ren ach sipwe lipwäköchülo, mi lamot ach sipwe äkkeäni ekkewe afalafal. Fiti ewe mwichefel le afalafal me anöünöü ekkewe chassi lon ränin Ammol. Anöünöü ekkewe chassi ngeni aramas mi fen etiwa nöüch kewe puk me chassi me loom. Kopwe anöünöü ewe chassi iteitan ngeni nöüm kewe chon käeö me pwal ekkoch aramas lon imwen noum we return visit. Neman kopwe tufichin anöünöü ekkewe chassi ngeni aramas fansoun om feilo kamö, säi are lupwen ka chök witiwit fän iten ewe tokter lon pioing. Äkkäeä om afalafal unusen ewe maram pwe epwe öchchülo.
8. Ikkefa ekkewe popun Ewe Leenien Mas me Awake! mi sokkolo aüchean?
8 Mi sokkolo aüchean nöüch kewe chassi Ewe Leenien Mas me Awake! Ra ätekiatä Jiowa ewe emön Epinkepiisom woon läng me fönüfan. (Fof. 4:24) Ra aururu letipen aramas ren ewe kapas allim ussun Mwuun Kot me apöchökkülatä ar lükü ngeni Jises Kraist. (Mt. 24:14; Fof. 10:43) Pwal och, ra mammasa mwökütükütün fönüfan lupwen ra apwönüetä ekkewe oesini lon Paipel. (Mt. 25:13) Kopwe tongeni älisi aramas lon om territory le küna feiöch seni ekkewe chassi ren om ammolnatä om kewe afalafal le anöünöür iteiten fansoun mi fich!
9. Met sipwe föri pwe epwe suuk ewe al ren ach sipwe tongeni chuurisefälli ekkewe chon aüseling?
9 Ika emön a etiwa ewe chassi are oua chök fosfengen ussun mettochun ngün, kopwe mmonletä le likiti eü kapas eis are och pworaus mi efisi pwe ewe chon imw epwe ekieki. Ei mettoch epwe suuki ewe al om kopwe chuurisefälli me sopweilo ämi pworausfengen woon ewe Paipel. Ika sipwe angang weires le amoratiu ekkewe pwikilin enlet, sipwe tongeni lükü pwe Jiowa epwe suuki letipen ir kewe mi letip wenechar ar repwe tufichin silei me angang ngeni I.—1 Kor. 3:6.