Akkapöchökkülafengenikich Atun Sia Afalafal
1 Kich meinisin sia pwapwaiti ach rongorong och kapasen apöchökkül, “eu kapas lon fansoun mi fich.” (SalF. 25:11) Lupwen sia angangfengen lon ach angangen afalafal, ifa ussun sipwe tümünü pwe ach pworausfengen epwe apöchökkülafengenikich?
2 Pworausfengen mi Apöchökkül: A mmen apöchökkül ika sia fos ussun mettochun ngün atun sia afalafalfengen! (Kölf. 37:30) Sia tongeni fos ussun napanapen ach afalafal are och mettoch a fis lupwen sia afalafal nge mi apöchökkülakich. (Fof. 15:3) Mei wor och lesen sia käeö seni ach älleään Paipel, nöüch kewe chassi, are seni ach mwich? Sia tongeni pworaus woon ewe afalafal sia kerän rongorong lon ewe Kingdom Hall.
3 Eli sipwe meefi letipengaü lupwen ewe chon imw a eppietä och kapasen eppet nge sise silei pölüan. Epwe öch ika, mwirin ämi lo seni ewe imw, oupwe pworausfengen me chienom we ren ifa ussun oupwe tongeni pölüeni ena kapasen eppet ren älillisin ewe Reasoning puk. Ika ka pwapwaiti och mettoch seni an chienom na afalafal, om kapasen apunga i seni letipom epwe fokkun aüfichietä chienom we.
4 Mwökütüküt Akkom: Sisaamwo fen angangfengen me ekkoch lon ach we puk study? Ika sia etiwer pwe sipwe mwin le afalafal “sipwe apöchökülafengenikich ren ach lükülük.” (Rom 1:12) Ekkewe pioneer ra kilisou ika epwe wor repwe tongeni fitiir, äkkäeüin lesossorusich are lekuniol pun ese kan wor chommong chon fiti afalafal lon ekkena atun. Sipwe tongeni älisi ekkewe pioneer ren ach fiffitiir. Mei wor ekkoch chon afalafal mi apwangapwang inisiir, ina popun a aükük ar fiti ewe angangen afalafal? Sipwe älillisfengen ika sia tongeni akkota än emönnewe fitikich le käeö ngeni nöüch we chon käeö.—SalF. 27:17.
5 Och kapasen apunga me kapasen kilisou pwal mwo nge lon ekkewe mettoch mi kukkun, ir minen apöchökkül iteitan. Sipwe kan ekieki ei mettoch lupwen sia afalafalfengen me pwiich kewe pun sia mochen sipwe ‘akkapöchökülafengenikich o alilisfengen lefilach.’—1 Tes. 5:11.