Kopwe Älillisöch ngeni Chienom Chon Afalafal
1. Met feiöchün an epwe wor chienach le afalafal?
1 Lon eü fansoun, Jises a tinalo 70 nöün kewe chon käeö “akaruoman” pwe repwe afalafal. (Luk 10:1) Ese mwääl, ei kokkot a atufichiir le älillisfengen me apöchökkülafengeniir atun ra afalafal. Iwe, ifa usun sipwe älillisöch ngeni emön chienach chon afalafal?
2. Ifa usun me pwata sipwe aüselingöch atun chienach we a afalafal?
2 Ren Om Aüselingöch: Atun chienom a afalafal, kopwe aüselingöch. (Jem. 1:19) Ika a älleani eü wokisin, kopwe pwal suuki noum Paipel. Nengeni chienom we are ewe chon imw atun a fos. Ika ka aüselingöch atun ra pworaus, eli epwe älisi ewe chon imw an epwe pwal aüselingöch.
3. Ineet chienach we epwe mochen sipwe fosetä?
3 Ren Om Sileöchü Ineet Kopwe Kapas: Atun sia mwin me emön nge a wisen afalafal, sipwe süföliti ren ach mut ngeni an epwe wisen fos. (Rom 12:10) Sipwe tümünü pwe site atai ar pworausfengen, nge ika chiechiom we a tingor älillis pun a mönüki met epwe itä apasa, are ewe chon imw a eäni kapas eis, iwe, kopwe apöchökkülatä meefien chienom we, nge kosap fen epiietä pwal eü pworaus mi sokkolo. (SalF. 16:23; SalAf. 3:1, 7) Ika sia kapas, aloch epwe älisatä an pworaus.—1 Kor. 14:8.
4. Met epwe efisi ach pwapwa me sopwöch lon ewe angangen afalafal?
4 Atun ekkewe 35 pean chon käeö ra äwesalo ar afalafal, ra “liwinto fän pwapwa chapur.” (Luk 10:17) Sipwe pwal pwapwa me sopwöch lon ach angangen afalafal ika sia aüselingöch me silei ineet atun sipwe kapas lupwen sia älisi chiechiach kewe.