Álilliséch Ngeni Pélúom we
1. Ifa usun sipwe áppirú án ewe aposel Paulus ekiek atun sia mwin me ekkewe ekkóch lón ewe angangen afalafal?
1 Me ren ewe aposel Paulus pwe ewe fansoun a kan nóm ren chienan kewe chón lúkú, ina eú fansoun epwe suuk ngeniir ar repwe ‘apöchökülafengeniir.’ (Rom 1:12) Atun oua mwin me emén chón afalafal lón ewe angangen afalafal, ka kan alamota ena fansoun ren óm apéchékkúla me álisi? Pwata kese apwóróusa met a álisuk le wiliti emén chón afalafal mi lipwákéch lap seni óm kopwe chék fanafaneló?
2. Atun sia mwin le afalafal me chienach we, met sipwe féri pwe sipwe apéchékkúlatá án núkúnúk, me pwata a lamot ena?
2 Ánúkúnúkú Pélúom we: Ekkóch chón afalafal a nafangaw ar núkúnúk. Eli epwe pwá ren wówóór are ngingiir. Sia tongeni apéchékkúlatá ar núkúnúk ren ach ngeniir kapasen apwúng mi wenechar. Ikkefa ekkóch alen ach sipwe ánúkúnúkú chienach kewe? Emén chónemmwen mi wisen sáifetál ese pireir le ereni chienan we usun pwisin an kewe niwokkus me ifa usun a kan ikkiótek ren álillisin an epwe ú ngeni ekkena esin memmeef. Pwal iei met emén Chón Kraist mwán a kúna pwe a álisi ren an epwe eáni núkúnúk: “A poputá ren ewe mettóch emelimel. Fán ekkóch a lamot ai upwe iótek ren álillis pwe upwe tongeni féri ena.” A fen wor met a fen kon álisuk le núkúnúk lón ewe angangen afalafal? Iwe kopwe pwal apwóróusa ngeni chienom we.
3. Met sipwe tongeni ereni pélúach we ren ach sipwe álisi le lipwákéchúló lón an we angangen afalafal?
3 Álillisfengen: Ka fen piin eáni eú kapasen lepoputáán mi mecheres are eú kapas eis eli usun met mi fich ngeni met a fiffis lón ewe leenien afalafal nge a álilliséch le poputááni eú pwóróusfengen? Ka fen kúna sópwéchún óm pwisin apachaatá och pwóróus ngeni eú ekkewe afalafal mi mak lón Ach Angangen Afalafala ewe Mwú? Iwe kopwe ereni pélúom we. (SalF. 27:17) Atun oua ló chuuri emén return visit, ka tongeni apwóróusa ngeni pélúom we met ka ekiekin féri me ifa usun kopwe féri ena. Pwal mwirin óm káé ngeni emén, ka tongeni áwewe ngeni pélúom we popun óm menlapei eú pwóróus, popun óm filatá eú wokisin are popun óm filatá och sókkun minen asukul pwe epwe álisi ewe chón káé.
4. Pwata sia mochen álisi chienach kewe chón afalafal?
4 Ekkewe chón afalafal lón fansoun ekkewe aposel rese chék mochen álisi ekkewe chón lúkún nge ra pwal kúna lamoten ar repwe pesefengeniir me apéchékkúlafengeniir. (Föf. 11:23; 15:32) Ewe aposel Paulus a ákkáiti ewe alúwél Timoty me a pesei an epwe pwal ereni ekkewe ekkóch met a fen káé. (2 Tim. 2:2) Ika sia kan féfféri minne epwe échiti chienach kewe Chón Kraist lón ewe angangen afalafal, iwe sise chék alapaaló ar pwapwa me lipwákéchúló nge sia pwal apwapwaai Semach we lón láng.—Ipru 13:15, 16.