Aururu Chokkewe mi Letipeta
1. Pwata mi lamot ngeni chokkewe mi letipeta aurur?
1 Pöütüloon emön attongach lon mälo, iei eü fansoun letipeta ngeni emön nge äkkäeüin ngeni chokkewe ese wor ar äpilükülük allim ussun ewe Mwu. (1 Tes. 4:13) Chommong ra kan ekieki ika: ‘Pwata aramas ra mämmälo? Ia ra lo ie? Upwe tongeni küna sefalli attongei we?’ A tetteletiu me fan ekkoch memmeef ren ach sipwe äeä le aururu letipen ekkewe aramas sia chuuriir nge iir mi letipeta ren mäloon emön attonger are chiechier.—Ais. 61:2.
2. Ika emön chon imw a erenikich pwe i mi letipeta, epwe öch ach attama ach afalafal?
2 Seni Imw Me Imw: Eli emön chon imw epwe erenikich pwe a wor emön a mälo me lon an we famili. Mi pwälo ren wowoon pwe a kerän sopwolo emön attongan? Mi masou ewe imw ren aramasan mi letipeta? Ika ina, eli epwe fokkun öch sisap attama ach afalafal ngeni. (SalAf. 3:1, 7) Eli sipwe apasa pwe sia tongei i, anöünöü ngeni ekkewe tract, chassi me brochure iwe, mwittir le emwiriwiri me feilo seni. Mwirin, sia tongeni liwinsefäl lon eü fansoun mi fich pwe sipwe äiti ngeni ekkewe kapasen aurur seni Paipel.
3. Ika pwe mi tufich, menni wokisin sipwe äiti ngeni emön mi letipeta?
3 Nge lon pwal ekkoch fansoun, eli sipwe esilla pwe sipwe tongeni ekis fos ttam ngeni lon ena atun sia kerän chuuri. Inaamwo ika esap iei ewe fansoun sipwe apwüngü ar ekiek mwääl nge sipwe chök tongeni älleä ngeniir än Paipel kewe pwon fän iten manausefäl. (Jon 5:28, 29) Are, sia tongeni äiti ngeniir ussun napanapen ekkewe mi mälo. (SalAf. 9:5, 10) Eli ach apworausa pworausen manausefäl seni Paipel epwe pwal aururur. (Jon 11:39-44) Pwal och, sipwe tongeni äiti ngeniir än ewe mi tuppwöl Hiop kapasen lükülük woon Jiowa. (Hiop 14:14, 15) Sipwe anöünöü ewe tract, Ifa Ewe Apilukuluk ren Atongach kewe mi Malo? me mwen ach sipwe feilo seniir. Are pwal likitatiu ewe Sile puk me äiti ngeniir ewe pworaus lon sopwun 9, me pwal akkota pwe sipwe pwoppworaus woon ekkena mettoch atun ach liwinitiir.
4. Ifa pwal ekkoch fansoun sipwe awora aurur?
4 Lon Ekkoch Fansoun: Fan ekkoch, pworausen felin woon mi mälo ra kawor lon simpung, iwe iei eü atun sipwe tongeni makkei ekis taropween aurur fän iten ekkewe famili mi letipechou. Lon eü atun, mwirin an emön mi mälo pwülüwan a angei echö tract, i me nöün we nengngin ra feilo ngeni imwen ewe publisher we me ra eis: “Ämi ekkewe aramas oua tinato rei ei taropwe? Iwe ngang ua mochen awatteelo ai silei ussun ewe Paipel. Ewe mwän me nöün we ra tipeeü pwe repwe käeö iwe ra poputä le fiffiti mwich lon ewe mwichefel.
5. Pwata sipwe chök mmolnetä ngeni fansoun mi fich ngeni ach sipwe aururu chokkewe mi letipeta?
5 Emön mi letipeta a kan tipemecheres le aüseling ngeni än Kot we kapas lap seni emön mi chök ekkekilapei pwapwaan letipan iteitan. Kich meinisin sipwe chök mmolnetä ngeni ekkewe fansoun mi fich ren ach sipwe aururu chokkewe mi letipeta ren mäloon attonger.