Eü Mineföön Minen Älillis fän iten Poputääni Chon Käeö
1. Ifa ewe mineföön minen älillis a kawor lon Ewe Leenien Mas minen February 1, me a äkkäeüin kawor fän iten met?
1 Eü mineföön minen älillis a kawor lon Ewe Leenien Mas poputä seni February 1, 2012 pwe epwe älisikich le poputääni chon käeö. Itelapan “Käeö Seni Än Kot we Kapas.” Ese mwääl chommong aramas lon ewe leenien afalafal repwe pwapwaiti le älleani eü me eü lesen lon ei mineföön minen älillis, nge äkkäeüin a kawor fän iten an epwe älisi än ewe chon afalafal me ewe chon imw pworausfengen.
2. Ikkefa ekkoch masouen ei sokkun mineföön lesen?
2 Masouen Ei Sokkun Mineföön Lesen: Ewe itelap me ekkewe itelap kisikis ra makketiw lon napanapen kapas eis pwe sipwe nöünöü le eisini ewe chon imw atun sia pworausfengen. Ekkewe menlapen wokisin mi makkechon nge ese makketiw masouer, repwe älisi ewe chon imw le älleani pwisin seni ewe Paipel me pwapwaiti le käeö seni. Ra chök mwochomwoch ekkewe parakraf pwe sia tongeni äeä le afalafal inaamwo ika sia chök ütä ppen ewe asam. Eü me eü lesen a emmwenikichelong lon ewe puk Paipel A Apasa pwe epwe älisikich le mwet ngeni ena puk ika mi fich.
3. Lupwen sia fiti ewe angangen afalafal imw me imw, ifa usun sipwe äeä ei mineföön minen älillis atun sia chök afalafal ppen asamen eü imw?
3 Usun Nöünöün: Lupwen kopwe anöünöü Ewe Leenien Mas, ka tongeni äeä kapas eis mi achchüngü aramas nge mi weneiti ewe lesen. Äwewe chök, a wor eü pworaus seni ewe lesen minen February 1 usun met sia käeö seni än Paipel oesini. Eli iei met kopwe eäni kapas eis: “Ka lükü pwe än Paipel kewe oesini ra pwönüetä iei? [Aüseling ngeni meefian.] Ua fen älleani eü mettoch mi mürinnö usun ei pworaus.” Itini ewe aülüngätin kapas eis, älleani ekkewe parakraf, me älleani ekkewe wokisin mi makkechon. Älleanisefäl ewe kapas eis me angei meefien ewe chon imw. Ika mi tufich, oupwe tongeni pworausfengen woon pwal ekkewe ekkoch pworaus me äeä ekkewe kapas eis mi nampatiw. Mwen om kopwe lo kopwe äiti ngeni ewe kapas eis mi tapwoto mwirin ewe ka fen pworaus ngeni woon, me akkota pwal eü rän kopwe liwiniti me pworaus woon. Atun om liwinsefäl kopwe pworaus woon pwal ekkoch pworaus lon ena lesen iteiten wiik tori om kopwe ngeni pwal eü mineföön Ewe Leenien Mas. Pwal iei och mettoch ka tongeni föri, kopwe chök eisini ewe chon imw ika a mochen käeö Paipel. Mwirin äeä ewe lesen le äiti ngeni ifa usun epwe käeö.
4. Ifa usun sipwe nöünöü ekkewe mineföön minen älillis atun sia chuursefäli aramas?
4 Ka tongeni äeäöchü ei mineföön minen älillis ngeni chokkewe ka kan anöünöü ngeniir Ewe Leenien Mas me pwal ekkewe ekkoch ka kan chuursefäliir. Ka tongeni apasa ei: “A wor eü mineföön minen älillis lon Ewe Leenien Mas. Ua mochen äiti ngonuk ifa usun kopwe käeö seni.” Sia ioteki pwe ei mineföön minen älillis epwe atufichi chommong aramas ar repwe “sineifichi minne mi enlet.”—1 Tim. 2:4, TF.