Fán án Kot nemenem, meinisin férian kewe ra tipeeúfengen me kinamwefengen

Pwata Sia Osupwangen ewe Mwúún Kot?

Lepoputáán manawen aramas, ewe Chón Férikich, itan Jiowa, i chék ewe Sounemenem. A nemenem fán tong. A féri eú leeni mi lingéch, eú málámálen Eten, ikewe aramas repwe nónnóm ie. A pwal awora chómmóng mwéngé fán iter. Pwal och, a ngeni aramas angang mi aúchea ar repwe féri. (Keneses 1:28, 29; 2:8, 15) Itá aramas repwe nónnóm lón kinamwe ika rese atorowu seni fán án Kot nemenem.

Atam a kamwéch ewe féún irá mi pinepin ngeniir, ewe Efa a ngeni. — Ekkewe popun aramas rese mochen án Kot epwe néúr Sounemenem

Paipel a affata pwe emén chónláng a fókkun ú ngeni án Kot pwúúng le nemenem, iwe a iteni Satan ewe Tefil. Usun itá a erá pwe aramas repwe fókkun pwapwa ika rese nóm fán án Kot emmwen me nemenem. Iwe, a eletipechou pún ekkewe popun aramas, Atam me Efa, ra fiti Satan lón an ú ngeni án Kot nemenem.—Keneses 3:1-6; Pwärätä 12:9.

Pokiten Atam me Efa rese mochen onómuur fán án Kot nemenem, iwe ra katowu seni leenier we Paratis me a péút seniir ewe ápilúkúlúkún manaw mi unuséch tori feilfeiló. (Keneses 3:17-19) Minne ra filatá a kkúú mwirimwiriir kewe meinisin. Ewe Paipel a apasa pwe pokiten Atam a tipis, iwe “tipis a tolong lon fanüfan, nge an tipis a atoto mäla.” (Rom 5:12) Tipis a uwealong aramas lón pwal eú watteen osukosuk: “Eman aramas a nemeni aramas o ariaföüür.” (Än Salomon Afalafal 8:9) Weween pwe án aramas pwisin nemenem wóór epwe chék atoto osukosuk.

ÁN ARAMAS NEMENEM A POPUTÁ

Nimrot a útá lón an napen lamalamtekia. Lúkúsékúrún, a wor ekkewe aramas mi aúetá eú imw. — Nimrot a ú ngeni Jiowa

Ewe áeménún aramas sounemenem mi mak lón Paipel, ina i Nimrot. I a ú ngeni án Jiowa nemenem. Seni fansoun Nimrot, aramas mi wor ar nemenem ra áeámwáálli ar nemenem. Órun 3,000 ier a ló, King Salomon a makkeei: “Chokewe mi küna riaföü ra kechü, nge esap wor eman a alisiir. Iwe, ekewe chon ariaföüür a wor ar pöchökül.”—Än Salomon Afalafal 4:1.

Ikkena pwal ekkewe esin osukosuk sia kúkkúna ikenái. Lón ewe ier 2009, eú puk seni ewe United Nations a apasa pwe a lapóló án aramas meefi pwe nemenemengaw ina “eú populapen án mettóch mi ngaw meinisin fiffis lón ach ei fansoun.”

ÁN KOT NEMENEM A POPUTÁ!

Ei ótót a osupwangen sounemenem mi múrinné me eú mwú mi múrinné. Nge fen ina met ewe Chón Férikich a pwonei!

Sasing: Mwirilóón án aramas nemenem. 1. Emén fin Asia mi móót lón eú al mi limengaw fán néún semirit mi kechiw. 2. Emén mwán mi semmwen mi koon wóón an we peet lón pioing. 3. Ekkewe soufiu mi pek wóón néúr kewe pistor lón eú leenien maun. 4. Ekkóch chón ú ngeni mi púppúchér fán léúwommóng me kamwéch ar kewe sain. 5. Emén fefin me néún nengngin ra úkkúútá lúkún imwer we me kúna pwe a mék kilaasen asamalapen imwer we. 6. Eú leeni mi wor ekkewe éúmmóngun paip mi ititá me étúétún eú factory mi étútá seni loor me ekkewe selin fiifi. — Pwal mwo án aramas nemenem mi múrinné ra sópwongaw lón ar pwákini osukosuken aramas

Kot a fen féri eú Mwú, are nemenem, epwe siwili meinisin án aramas nemenem, me ena Mwú epwe “nom tori feilfeilachök.” (Taniel 2:44) Ina ewe Mwú fite million aramas ra kan ikkióteki. (Mateus 6:9, 10) Nge Kot i esap wisen nemenem lón ena Mwú. A fen seikaatá emén Sounemenem mi fen piin manaw usun emén aramas. Ié ena Kot a filatá?