Angangen Esilesil mi Kkolo Aücheaan fän iten ewe Achechchem!
1. Ifa ewe angang chon afalafala ewe Mwu repwe föri woon unusen fönüfan poputä seni March 21, 2009 me pwata?
1 Lon Arüänü, April 9, 2009, chon fel ngeni Jiowa Kot woon unusen fönüfan repwe mwichfengen le ekilonei ewe tong mi lapalap seni meinisin Jiowa a pwäratä ngeni aramas. (Rom 5:6-8) Sipwe fokkun pwapwaesini än fite million aramas fitikich le chechchemeni än Jises mälo. Eü taropween etiwetiw mi kkolo aüchea fän iten ewe Ächechchem epwe einetifetälei woon unusen fönüfan poputä March 21.
2. Met sokkun mettoch kopwe ekieki lupwen kopwe ngeni emön echö taropween etiwetiw?
2 Mettoch Sipwe Ekieki: Kopwe nöünöüöchü ekkewe lios, kapas eis me ekkewe wokisin mi mak lon ewe taropween etiwetiw. Ren chök awewe, kopwe fos ussun ewe äeüin lios woon ewe taropwe me apasa: “Üa mochen etiwok om kopwe fitikem le chechchemeni än Jises mälo lon Arüänü, April 9, 2009.” Mwirin apasa itelapen ewe taropwe me ekkewe kapas eis. Kopwe affata ngeni ewe chon imw pwe epwe tongeni pwal etiwa an famili me ekkewe ekkoch.
3. Ifa ussun sipwe pwal liwiniti chokkewe sia fen etiwa akkomw?
3 Ika a watte än ewe mwichefel leenien afalafal, eli ekkewe elter repwe ereniir pwe repwele chök likiti ewe taropween etiwetiw lon ekkewe imw esor aramas lon. Lon Ammol me Ränin fel, anöünöü ekkewe chassi me pwal eineti ewe taropween etiwetiw. Achocho le etiwa nöüm kewe return visit, chon käeö, aramasom, chienom chon sukul, chienom chon angang, chon orum kewe me pwal ekkewe ekkoch aramas ka sissilei. Lon ewe ier, emön sister a etiwa 30 aramasan kewe, me iteitan a äkkächema ngeniir lamotan ena rän. A ifa me watteen pwapwaan ena sister lupwen 25 ra fiti ewe Ächechchem me fömön leir ra poputä le käeö ewe Paipel!
4. Ikkefa ekkewe kokkot sipwe akkota iei me pwata?
4 Ammolnatä Iei: Eli chommong chon afalafal repwe tongeni alapalo ar angang fän March me April. Ika pwisin nöüm are nöüm chon käeö ra feffeitä lon ar käkkäeö Paipel, eli iei ewe fansoun mi öch pwe repwe wiliti chon afalafal esaamwo papatais. Iei ewe fansoun oupwe akkotaöchü ämi fansoun pwe oupwe tongeni fiti ei angangen esilesil le chechchemeni ekkewe ruu pisekin pwäratään tong mi lap seni meinisin.—Jon 3:16; 15:13.