Asukula Ekkewe Rese Kon Lien Silei Ällea
1. Ifa ewe mettoch mi weires sia küna lupwen sia afalafal?
1 Lon ach afalafal, fän ekkoch sia chuuri chokkewe rese lien silei ällea nge a mmen weires ngenikich ach sipwe asukuler ussun ewe enlet. Met sipwe tongeni föri?
2. Ifa ussun me pwata sipwe süföliti iir kewe rese lien silei ällea?
2 Süfölitiir: A lamot ngeni Jiowa napanapen letipen emön nge esap nengeni ika emön a fiti sukul. (1 Sam. 16:7; SalF. 21:2) Ina popun, sisap ekieki pwe ekkewe rese lien silei ällea iir mi lamotongaü. Ika sia süfölitiir me mosonottam ngeniir, repwe fen tipemecheres le etiwa ach älillis. (1 Pit. 3:15) A wewe ngeni ach sisap aumwesiir le älleani eü wokisin are ewe parakraf. Lupwen emön a fen feffeitä lon an käeö ussun ewe enlet, eli pwisin i epwe fokkun achocho an epwe lipwäköchülo me pwapwaiti an älleani än Kot we kapas o “ekieki usun lerän me lepwin.”—Kölf. 1:2, 3.
3. Ikkefa ekkewe minen asukula ekkewe rese lien silei ällea?
3 Minen Asukula Ekkewe Chon Käeö: A mmen älillisöch ekkewe lios le asukula aramas me älisiir le chechchemeni met ra käeö. Ka tongeni eisini ewe chon käeö ussun met a küna lon ewe lios lon ewe puk ka nöünöü. Mwirin, eisini ekkoch kapas eis mi titchik pwe epwe älisi i le weweiti met ewe lios a äiti ngeni. Nöünöü ekkoch wokisin mi menlapei ewe pworaus lon ewe lios. Sia pwal tongeni nöünöü ekkewe lios le enniwili ewe lesen. Kosap pwal awattei ewe lesen lon fansoun käeö. Menlapei ewe itelap me ekkewe pworaus mi lamot nge kosap pwal apachaalong chommong pworaus me lükün ewe lesen. Älleani seni Paipel ekkewe wokisin me kapas eis ngeni pwe kopwe silei ika ewe chon käeö a wesewesen weweiti met a fen älleani. Ren ei epwe tongeni amwökütü i le amürinnölo an tufichin ällea me pwisin alapalo an käeö ewe enlet lon Paipel.
4. Ifa ussun sipwe tongeni älisi nöüch chon käeö an epwe lipwäköchülo lon an tufichin ällea?
4 Minen Älillis Fän Iten Öchüloon Ällea: Ekkewe aramas rese lien silei ällea eli repwe mwittir weweiti me chechchemeni ekkewe pworaus. A tongeni aüselingöch ngeni chon ällea ewe Leenien Mas me pwisin fiti le ällea lon nöün we kapi, mi pwal tongeni epwe apasasefäli met a fen rongorong lon ewe ällea nge meseniau chök. Ei mettoch epwe älisi emön le angangöchülo lon an ällea. Lon ekkoch fönü, ekkewe elter ra akkota eü sukul pwe epwe asukula chokkewe rese lien sile ällea. Ekkeei minen älillis epwe tongeni älisiir ar repwe weweiti “kapasen ekewe Toropwe mi Pin,” me atipatchemer le küna ewe manau.—2 Tim. 3:15.