Álisi Chókkewe Rese Silei Állea
1. Ifa ewe osukosuk a fis atun sia asukula aramas lón Paipel nge rese kon lien silei állea?
1 Neman ekkóch ra mochen káé usun Kot nge ra niwokkus le káé Paipel me ekkewe ekkóch puk pokiten rese kon lien silei állea. Ach akkomw anéúnéú ngeniir ewe puk Paipel A Apasa, eli esap kon lien sópwéch. Ifa usun sia tongeni álisi chókkana le káé Paipel? Sipwe ppii pwóróusen met ekkóch chón afalafal mi lipwákéch ra féri lón 20 fénú. Ikkeei pwóróuseer.
2. Ikkefa ekkewe puk mi álilliséch ngeni chókkewe rese silei are ra ekis silei állea?
2 Ika eménna ese kon are ese fókkun silei állea, eli kopwe néúnéú eú me lein ekkewe brochure Akkaúseling Ngeni Kot are Akkaüseling ngeni Kot pwe Kopwe Küna Manau Esemuch. Emén pioneer seni Merika a eppii ngeni emén, iir me ruu ekkena brochure me eis ika menni a kon sani. Ewe keangen ofesilap lón Kenya a repotei pwe ekkeei puk ra fókkun álilliséch, pún lón eérenien chón Afrika ra káé seni ar kewe tutulap nge esap seni ar eáni kapas eis me pélúweni. Emén mi sukul eli epwe sani ena sókkun kapas eis me pélúwan nge emén ese watte an sukul epwe osukosuk. Ika ewe chón káé a ekis silei állea, chómmóng chón afalafal ra sani le poputá lón ewe brochure Pwóróus Allim seni Kot! are En Kopwe Tongeni Wiliiti Chiechien Kot! are neman Nei Puken Pwóróusen Paipel.
3. Met sia silei usun chókkewe rese silei állea epwe álisikich le lipwákéch lón ach asukuler?
3 Mwareitiir: Eli chókkewe rese silei állea repwe meefi sáw me meefi pwe ese wor lamoter. Lap ngeni ewe mettóch sipwe féri atun sia áiti ngeniir ewe enlet, ina ach akkomw féri met repwe meefi kinamwe ren. Chómmóng aramas rese tongeni állea, ra tipachem me tongeni tufichin káé. Pwár ngeniir pwe ka súfélitiir. (1 Pet. 3:15) Ika ra meefi pwe ar achocho a lamot me ra feffeitá lón ar silei usun Kot, repwe sani le sópweló ar káé. Iwe kopwe chék mwamwareitiir.
Eli chókkewe rese silei állea repwe meefi sáw me meefi pwe ese wor lamoter. Lap ngeni ewe mettóch sipwe féri atun sia áiti ngeniir ewe enlet, ina ach akkomw féri met repwe meefi kinamwe ren
4. Ifa usun sia tongeni álisi chókkewe rese lien silei állea ar repwe ammólnatá fán iten ar káé?
4 Pesei le ammólnatá fán iten an káé inaamwo ika ese kon lien silei állea. Ekkóch chón afalafal lón South Africa ra pesei néúr kewe chón káé pwe repwe tingorei emén lón ar famili are chiechier mi angéch állea epwe álisiir. Atun ewe káé, emén chón afalafal lón Britain a áiti ewe chón káé an epwe ammólnatá, ren an ngeni epwe mwo néúnéú néún we puk ren fitu chék parakraf pwe epwe weweiti mecheresin an kúna pélúwan pokiten a fen erier. Emén pwiich Chón Kraist mwán lón India a pesei néún kewe chón káé ar repwe nengeni ekkewe sasing lón ewe lesen repwap káé lón ewe wiik mwirin me ekiekifichi wóór me mwan ewe káé.
5. Ifa usun kopwe tongeni pwári mosonottam ngeni emén chón káé?
5 Kopwe Mosonottam: Ese lifilifil menni puk ka néúnéú, menlapei ewe mi kon lamot me álisi noum we chón káé an epwe fókkun weweitiir. Eli me lepoputáán ámi káé, a múrinné epwe 10 ngeni 15 minich ttaman. Kosap káé chómmóng lesen nge neman epwe chék fitu parakraf. Kopwe mosonottam ika a mmang ewe chón káé le állea. Atun a mámmááritá an aúcheani Jiowa, epwe amwékútú i le alapaaló an mochen silei állea. Ren óm kopwe álisi noum we chón káé le féri ena, a éch kopwe etiwa epwe fiti ekkewe mwich seni chék me lepoputáán.
6. Ifa usun sia tongeni álisi emén pwe epwe silei állea?
6 Ika ekkewe chón káé ra silei állea, repwe mwittir feffeitá lón pekin lúkú. (Kölf. 1:1-3) Chómmóng ra fen álisi néúr kewe chón káé ren ar néúnéún ewe puk Apply Yourself to Reading and Writing (Káé le Silei Állea me Mak), ren fitu minich wesin ar káé iteitan. Nge ika ewe chón káé a lichippúng, neman ka tongeni apéchékkúla ren óm eiteita ekkóch mettóch a fen tufichin silei le féri. Alúkúlúkú pwe Jiowa epwe efeiéchú an achocho me apéchékkúla ngeni an epwe tingorei Jiowa an álillis. (SalF. 16:3; 1 Joh. 5:14, 15) Ekkóch chón afalafal lón Britain ra pesei néúr kewe chón káé pwe repwe achocho le feffeitá. Áwewe chék ren ar akkomw le silei ekkewe mesen mak, mwirin kútta me álleani ekkóch wokisin me mwirin állea seni ekkewe puken áweween Paipel mi mecheres. Sisap chék álisiir le silei állea nge sipwe pwal amwékútúúr le pwúkún mochen silei állea.
7. Pwata sisap amwéchú seni chókkewe rese kon lien silei állea pwóróusen ewe enlet?
7 Jiowa a pwal aúcheani chókkewe rese áwesi ar sukul. (Hiop 34:19) Pún letipen aramas, ina met Jiowa a nennengeni. (1 Kron. 28:9) Iwe, kesap amwéchú seni chókkewe rese kon lien silei állea pwóróusen ewe enlet. Ka tongeni poputá le néúnéú ekkewe chómmóng minen álillis mi fókkun álilliséch. Iwe mwirin, ka tongeni mwet ngeni ewe puk Paipel A Apasa me álisi i le alapaaló an weweéchúti ewe Paipel.