Chommong Minen Apöchökkülen Ach Lükü
1. Ifa usun sipwe küna feiöch seni ach we mwichelap lon ei ier?
1 Jiowa a kan akkapöchökküla nöün kewe chon angang mi nom lon än Setan ei otot mi ngaw. (Ais. 58:11) Eü mettoch a äkkäeä, ina ewe district convention a kan fiffis iteiten ier. Atun sia arap ngeni ach na mwichelap, ifa usun sipwe mmolnetä pwe epwe apöchökkülakich lon pekin lükü?—SalF. 21:5.
2. Ikkefa ekkewe mettoch mi lamot sipwe ammolnatä?
2 Ika kese mwo akkotaöchü pwisin om schedule me kokkotun om angangen moni, kopwe föri iei pwe kopwe tongeni fiti iir me ülüngät ränin ewe mwichelap. Ka älleani ükükün ttamen ewe fansoun kopwe ssä ngeni ena leenien mwich iteiten rän pwe epwe naföch fansoun le tori me kütta ia kopwe mot ie? Sise fokkun mochen etiwaalo eü me lein ekkeei minen apöchökkül Jiowa a fen ammolnatä fän itach! (Ais. 65:13, 14) Ka fen akkota menni waa kopwe fiti?
3. Ikkefa ekkewe kapasen pesepes repwe älisikich me chon ach famili le unusen feiöch seni ewe mwichelap?
3 Met epwe älisuk le aüselingöch atun kinikinin ena mwichelap? Mi öch epwe naföch om annut iteiten pwinin ena mwichelap. Afota mesom woon ewe chon afalafal. Suuk ngeni meinisin ekkewe wokisin. Makkeei menlapen ekkewe afalafal. A mmen öch än chon ewe famili repwe mommotfengen pwe ekkewe sam me in repwe tongeni älisi nöür kewe le aüselingöch. (SalF. 29:15) Eli oua tongeni pworausfengen me om we famili woon masouen ena mwich särin ekkena ränin mwichelap. Sipwe awora fansoun lon ach Famili Fel le fos usun titchikin pworausen ekkewe afalafal sipwe apwönüretä, pwe epwe sopwosopwolo pöchökkülen chon ach famili mwirin ena mwichelap.
4. Ifa usun sipwe tongeni älisi ekkewe ekkoch lon ewe mwichefel pwe repwe pöchökkületä lon pekin lükü?
4 Älisi Ekkewe Ekkoch le Pöchökkületä: Sia mochen ekkewe ekkoch repwe pwal pöchökkületä ren ewe mwichelap. Mei wor ekkoch chon ewe mwichefel mi osupwangen älillis le fiti ewe mwichelap, äwewe chök ekkewe chinnap? Ka tufichin älisiir? (1 Jon 3:17, 18) Ekkewe elter, äkkäeüin ekkewe mi tümünü ekkewe kümiin chon afalafal, repwe ppii iö kewe ra osupwangen älillis.
5. Ifa usun sipwe eineti ewe taropween etiwetiw ngeni ewe mwichelap? (Nengeni ewe (pwoor lon pekin taropwe 5.)
5 Sipwe poputä le etiwa aramas ngeni ewe mwichelap ülüngät wiik me mwan usun chök pwal lon ekkewe ier ra lo. Ekkewe mwichefel repwe achocho le einetielo meinisin nöür taropween etiwetiw lon unusen ar we leenien afalafal ükükün ar tufich. Ika a much ewe angangen etiwetiw nge ese it nöün chon om we famili kewe taropween etiwetiw, iwe, ouse mochen oupwe uwei ekkewe lusun ngeni ewe mwichelap. Eli oupwe nöünöü le etiwa aramas ese lifilifil lon ewe sopw ikewe a fis ena mwichelap ie. Lon Enimu, epwe katowu pworausen ifa usun sipwe föri ena. Ika chon om famili rese ekiekin anöünöü ekkewe lusun taropween etiwetiw atun ewe mwichelap, oupwe ngeni emön pwich we chon älillis atun oupwe tolong lon ewe leenien mwich. Kopwe isoni echö noum pwe kopwe nöünöü atun ewe säingoon afalafal lon Räninfel.
6. Ifa usun sipwe pwäri süföl atun ewe mwichelap?
6 Föfförün Süföl A Apöchökküla Aramas: Lon ach ei fansoun, atun chommong ra “ekieki chök püsin ir” nge rese chüen äfänni meefien ekkewe ekkoch, a ifa me apöchökkülen ach nonnom lein chienach kewe Chon Kraist mi achocho le eäni föfförün süföl! (2 Tim. 3:2) Sia pwäri süföl ren ach wareiti ewe leenien mwichelap fän kinamwe me kkotöch atun a suuk kulok 8:00 lesossor me pwal ren ach käimulo leenien mot fän iten chök chon lon imwach, chienach woon waach, are nöüch kewe chon käeö. Sipwe aüselinga ewe chon ätettel atun epwe tingor pwe sipwele mommot me aüseling ngeni ewe nikättik me mwen poputään eü me eü kinikinin ewe prokram. Ach offei nöüch kewe cell phone a pwäratä süföl pwe sisap aosukosuka aramas atun ewe prokram. Sisap pwal aasoos, text, möngö, are töpaat atun ewe mwichelap.
7. Ifa usun sipwe apöchökkülafengenikich atun sia chiechi ngeni pwiich kewe?
7 Pöchökkületä ren Ach Chiechifengen: Sia tongeni pwapwaiti ach tipeeüfengen me pwipwifengen mi apöchökkülakich lon ach kewe mwichelap. (Kölf. 133:1-3) Pwata kese akkomw le ‘suki letipom’ me chiechi ngeni pwiich kewe seni ekkewe ekkoch mwichefel? (2 Kor. 6:13) Eli kopwe tongeni akkota pwe kopwe achocho le mwaren sissilei emön pwiich are fen eü famili lon eü me eü rän. Sia tongeni föri ena atun asösöön leolowas. Epwe fen öch om kopwe uwou onom me pwapwaiti le möngöfengen me chiechifengen me pwiich kewe lap seni om lo möngö lon imwen möngö. Eli kopwe feiöch ren om küna mineföön chiechiom.
8. Pwata sipwe älillis le angang lon ewe mwichelap, iwe, ifa usun sipwe föri ena?
8 A ifa me apöchökkülen ach fiti pwiich kewe lon ach angang mi fel! Ka tongeni awora älillis lon eü ekkewe kinikinin angang are älisi chon om we mwichefel le elimelim? (Kölf. 110:3) Ika ese mwo wor wisom, kese mochen fos ngeni ewe chon tümünü kümien ekkewe chon älillis. Älillisfengen a efisi apwapwaan me ppänetään ewe angang.
9. Ifa usun sipwe fokkun tümünüöchü föfförüch me foutach atun ewe mwichelap?
9 Ach Föfför A Apöchökküla Chokkewe mi Künakich: Kich chon fiti ewe mwichelap lon unusen ekkewe ülüngät rän, nge esap chök atun ewe prokram. Chokkewe mi künakich atun sia nom lon ewe leeni ikewe a fis ewe mwichelap ie, repwe pöchökkületä ren ar esilla sokkofesenin ekkewe Chon Pwäratä Jiowa me ekkewe chon lükün. (1 Pit. 2:12) Üfach me foutach ikewe a fis ewe mwichelap ie me pwal lon ekkewe imwen möngö repwe elingaalo Jiowa. (1 Tim. 2:9, 10) Sipwe watiw ach tip ika ina eörenien ewe fönü. Ach äeä ach kewe badge epwe atufichi chon künakich le esilla ika kich iö are eli epwe atufichikich le ereniir usun ewe mwichelap me afalafal ngeniir.
10. Ikkefa ekkoch pworaus ra pwäraalo sopwöchün ach eäni föfförün süföl?
10 Ifa usun föfföröchüch atun ewe mwichelap a achchüngü aramas? Eü simpung a apworausa alon emön meilapen eü leeni Chon Pwäratä Jiowa ra äeä le mwichelap, “Ekkewe aramas ra fokkun tipetekison. Äm aua pwapwa ar repwe äkkäeä ei imw iteiten ier.” Lon ewe ier, a pöüt seni emön an pwees me lon eü hotel ikewe ekkewe chon fiti ewe mwichelap ra nom ie. Atun emön Chon Pwäratä Jiowa a eliwini ngeni ewe manager ewe pwees fitifengen me masouan meinisin, ena manager a ereni minne an ewe pwees: “Ka feiöch pwe Chon Pwäratä Jiowa ra fiti ar we mwichelap kkan ngenikich, me chommong leir ra nonnom lon ei hotel. Ika esap pwünür, eli ena pwees esap liwinsefäl.”
11. Met sipwe achocho ngeni atun a arapoto ewe mwichelap, iwe, pwata?
11 Ach we mwichelap lon ei ier a chök arapoto. Pwich kewe ra fen äeä watteen ar fansoun, me ra angang weires ren mmolnetään fisöchün ena mwich. Achocho le fiti ekkena rän, me aücheani met Jiowa me an we mwicheich ra fen ammolnatä fän itom. Kopwe tipeppos le apöchökküla ekkewe ekkoch ren napanapöchum, chiechiöchum, me föfföröchum. Iwe, eli ämi me pwiich kewe oupwe meefieni meefien emön mi fiti ewe mwichelap lon ewe ier, a erä: “Use tongeni mönüki apwapwaan ewe mwichelap!”
[Ekis Pwóróus lón pekin taropwe 4]
Sipwe poputä le etiwa aramas ngeni ewe mwichelap ülüngät wiik me mwan, usun chök pwal lon ekkewe ier ra lo
[Ekis Pwóróus lón pekin taropwe 6]
Üfach me foutach lon ewe leenien mwichelap me lon ekkewe imwen möngö repwe elingaalo Jiowa
[Ekis Pwóróus lón pekin taropwe 7]
Kopwe tipeppos le apöchökküla ekkewe ekkoch ren napanapöchum, chiechiöchum, me föfföröchum
[Pwóór lón pekin taropwe 4-6]
Kapasen Ächechchem fän iten ewe 2011 District Convention
◼ Kulokun Ewe Prokram: Ewe prokram epwe poputä kulok 9:20 a.m. Ekkewe asam repwe suuk kulok 8:00 lesossor. Atun a ttik ewe nikättikin poputään mwich, kich meinisin sipwe feilo ngeni ach kewe leenien mot pwe ewe prokram epwe poputä fän kokkotöch me süföl.
◼ Käimuloon Leenien Mot: Sipwe chök äimuolo leenien chon lon imwach, chon fitikich woon waach, are nöüch kewe chon käeö.—1 Kor. 13:5.
◼ Cellphone: Me mwen an epwe poputä ewe mwich, ouse mochen offeelo nöümi kewe cellphone are anomu woon silent, pwe esap atümününgawa chon mwich.
◼ Möngöön Leolowas: Ouse mochen oupwe uwou ämi opento pwe ousap lo seni ewe leenien mwichelap atun möngöön leolowas. Oupwe tongeni uwou lon kükkünün ice chest mi tongeni kuch fän om sea pun ese mumutä ekkewe watteen ice chest me cooler are ekkewe sepi kilas lon ewe leenien mwichelap.
◼ Asor: Sia tongeni pwäri ach kilisou ren kokkotun ewe mwichelap ren ach walong ach asor lon ewe leenien mwichelap. Ekkewe ra nöünöü check le asor repwe makkeei “Christian Congregation of Jehovah’s Witnesses” woon ena check.
◼ Äkseten me Weiweitään Semwen: Ika emön a feiengaw are semwen atun ewe mwichelap, ouse mochen esile ngeni ewe chon mas lon ewe mwichelap mi kkan ngeni ikewe oua mot ie, pwe epwe mwittir esile ngeni ewe Pekin Säfei (First Aid). Ika a lamot, chon ewe pekin säfei repwe wisen köri 911, pwe esap kon chommong chon kökköri 911.
◼ Säfei: Ika ka nom woon säfei, iwe, kopwe pwisin uwei ünümomw kana säfei, pun eli esap wor lon ewe leenien mwichelap.
◼ Taropween Chuursefäli Aramas: Ekkewe ra afalafal sereseröch atun ewe mwichelap repwe nöünöü ei taropween chuursefäli aramas pwe epwe awora titchikin pworausen ewe mi mochen käeö. Ekkewe chon afalafal repwe uwei echö are rüüachö ekkena taropwe atun ra lo ngeni ewe mwichelap. Ika a unus ammasouen ena taropwe, kopwe walo lon ewe Puk Room are ngeni ewe seketeri lon pwisin om we mwichefel.—Nengeni ewe Ach Angangen Afalafala Ewe Mwu, minen November 2009, pekin taropwe 4.
◼ Imwen möngö: Sipwe elingaalo Jiowa ren föfföröchüch lon ekkewe imwen möngö. Sipwe watiw ach tip ika ina eörenien fönüach.
◼ Älillis le Angang: Epwe lapolo ach pwapwa ika sia älillis le angang lon ewe mwichelap. (Fof. 20:35) Chokkewe mi mochen älillis repwe esilei ngeni ewe Volunteer Service Department lon ewe mwichelap. Ekkewe mi kis seni 16 ieriir ra tongeni pwal älillis nge epwe fän tümünüen semer are iner are emön watte nge epwe pwüngülo me ren iner are semer.
[Pwóór lón pekin taropwe 5]
Ifa Usun Sipwe Anöünöü ewe Taropween Etiwetiw?
Ren ach sipwe tikeri aramas meinisin lon ach we leenien afalafal, sipwe chök ammwocha met sipwe apasa. Eli sia tongeni erä: “Rän allim. Äm aua fiti eü angangen eineti ei taropween etiwetiw mi fis woon unusen fönüfan. Iei noum kapi. Kopwe küna titchikin ekkoch pworaus lon ei taropween etiwetiw.” Atun ka eiti ngeni ewe taropwe, epwe öch epwe küna lükünpöön pun a achchüngü aramas. Kopwe mese pwapwa. Atun ka fiti ewe angangen einet lon wiikend, kopwe pwal anöünöü ekkewe Leenien Mas ika mei fich.