‘Uwaan Irä lon ekkewe Tänipi Ra Nnupulo, pwe Ra Öchün Kinikin’
1. Ifa ewe angang mi lamot a fiffis iei?
1 Mwirin än Jises afalafal ngeni emön fin Sameria, Jises a ereni nöün kewe chon käeö: “Oupwe nenengeniöchu ekewe tanipi, pun üän irän lon ra nupula, pwe ra öchün ar repwe kinikin.” (Jon 4:35, 36) Iei a fiffis ewe angangen rääs, weween, ewe angangen kinikin, me Jises a silei pwe ena angang epwe tori unusen fönüfan. Seni leenian we lon läng, a chüen älisatä ena angang. (Mt. 28:19, 20) Met a änneta pwe a lallapolo ena angang tori le müchüloon?
2. Met a pwäratä pwe a lallapolo ewe angangen rääs woon unusen fönüfan?
2 Ewe Angangen Rääs Woon Unusen Fönüfan: Seni September, 2008 tori August, 2009, a chommongolo chochoon chon afalafal woon unusen fönüfan woon 3.2 percent. Lon ekkewe fönü ikewe ewe angangen afalafal a pinepin ie, a pwal lapolo woon 14 percent. Chochoon chon käeö iteiten maram a tori lap seni 7,619,000, weween, pwe a fen lap seni chochoon chon afalafal, me lap seni chochoon ekkewe chon käeö lon ewe 2008 woon arapakkan esopw million. Atun ewe angang a lallapolo lon chommong fönü, iwe, chommong ra tingorei ewe ofesilap an epwe tinalo ekkoch misineri mi sochungio seni ewe sukulen misineri. A pwal chommongolo ekkewe chon ekis ra etiwa ewe enlet lon chommong fönü. A ffat pwe Jiowa a emwittiri ena angangen rääs iei atun epwele muchulo. (Ais. 60:22) Ka eäni ekieköch usun om we “tanipi,” weween, om leenien afalafal?
3. Met ekkoch ra ekieki usun ar leenien afalafal?
3 Om Angangen Rääs lon Leeniom: Eli ekkoch repwe erä: “Ai leenien afalafal ese kon uwaöch.” Mi pwüng pwe ekkoch leeni rese uwaöch usun ekkewe ekkoch are usun chök me loom. Ina popun, ekkoch Chon Pwäratä Jiowa ra ekieki pwe ewe angangen afalafal lon ekkena leeni a fen wesilo, me iei ra chök ioni ekkoch chök lusun mi chokisikis. Nge mi pwüng ar na ekiek?
4. Ifa ewe ekiek mi pwüng sipwe eäni usun ach angangen afalafal, iwe pwata?
4 Seni lepoputään ewe angangen rääs tori wesiloon, ina eü fansoun angang weires mi atapwalapwal. Nengeni alon Jises mi menlapei atapwalapwalen ena angang: “Ewe räs a fokun watte, nge ekewe chon angangen räs ra chokükün. Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.” (Mt. 9:37, 38) Jiowa, ewe Samolun rääs, a wisen akkota ineet me ia ewe angangen rääs epwe uwaöch ie. (Jon 6:44; 1 Kor. 3:6-8) Met wisach? Ewe Paipel a pölüweni: “Lesosor kopwe amorafeili föün irä, kopwe pwal amorafeili lekuniol.” (SalAf. 11:4-6) Lon ei atun lupwen ewe angangen rääs epwele muchulo, esap iei fansoun sipwe asösö le angang!
5. Pwata sipwe sopwelo le afalafal fän tinikken ikewe aramas rese kon lien etiwakich me ie?
5 Sopwelo le Kinikin: Inaamwo ika sia fen piin akkafalafal lon ach we leenien afalafal me aramas ra chök akkachopwa, nge a wor popun sipwe öttüres le angang fän atapwalapwal. (2 Tim. 4:2) Siwilin napanapen fönüfan a efisi än aramas siwili ar ekiek usun mwachkkan. Atun ekkewe säräfö ra määritä, eli repwe meefi lamoten ar repwe küna nükünüköch me kinamween ekiekiir. Eli ach likiitü epwe achchüngü letipen ekkoch. Ekkoch repwe tongeni etiwa ewe enlet inaamwo ika rese etiwa me loom. A lamot sipwe pwal öüröüra chokkewe mi ü ngeni ach afalafal.—Is. 2:4, 5; 3:19.
6. Met epwe älisikich le öttüres ika a weires ach afalafal lon leeniach we?
6 Met epwe älisikich le öttüres le afalafal ika a weires lon leeniach we? Eli sia tongeni apachaatä pwal ekkoch sokkun angang ngeni ach afalafal imw me imw, usun choweän afalafal lon leenien amömö are woon foon. Are sia tongeni ämürinnölooi ach afalafal. Sia pwal tongeni afalafal lekuniol are atun aramas ra nom lon imwer. Sia tongeni käeö pwal eü fos pwe epwe chommongolo chokkewe sipwe älisiir le käeö Paipel, are mwöküt ngeni eü leeni ia a chokükkün chon afalafal ie. Sia pwal tongeni achocho le pioneer. Ika sia eäni ekiek mi pwüng usun ewe angangen rääs, iwe sipwe öttüres le afalafal.
7. Epwe tori ineet sipwe sopwelo le kinikin?
7 A kan aükük fansoun än ekkewe chon atake kini uwaan fotaar kewe irä, ina popun, rese kan asösö are akkammang tori an a wes ewe angang. A pwal ina usun ewe angangen afalafal, a mmen atapwalapwal. Tori ineet sipwe sopwosopwolo lon ei angangen kinikin? Le atun ekkeei “ränin lesopolan” tori ewe “sopolan.” (Mt. 24:14; 28:20) Usun chök Jises, nöün Jiowa we Chon Afalafal mi lap, sia mochen äwesalo ewe angang Kot a fen ewisa ngenikich. (Jon 4:34; 17:4) Ina popun, sipwe sopwelo le afalafal fän tinikken, pwapwa, me ekiek mi pwüng tori ewe sopwoloon. (Mt. 24:13) Esaamwo much ewe angangen rääs!
[Ekis Pwóróus lón pekin taropwe 2]
Seni lepoputään ewe angangen rääs tori wesiloon, ina ewe fansoun angang weires mi atapwalapwal