Älillis fän iten ekkewe Famili
1. Ifa usun ekkewe familien Chon Israel ra küna feiöch seni ewe Sapat iteiten wiik?
1 Pokiten än Jiowa tong, a awora ewe ränin Sapat pwe epwe efeiöchü ekkewe famili. Chon Israel ra kan asösö seni ar angang pwe epwe wor ar fansoun le ekilonei föfföröchün Jiowa kewe me ar riri ngeni. Ekkewe sam me in ra pwal äeä ena fansoun le fotukalong Allükün Jiowa lon letipen nöür kewe. (Tut. 6:6, 7) Nöün Jiowa kewe aramas ra tongeni afota ekiekiir woon ar fel ngeni Jiowa lon ewe ränin Sapat iteiten wiik.
2. Met ewe ränin Sapat a äiti ngenikich usun Jiowa?
2 Pwüngün, Jiowa ese chüen allükü ngeni ekkewe famili ar repwe pinini ewe Sapat. Iwe nge, ena allük a äiti ngenikich och mettoch usun ach Kot. Seni chök me loom, a äiti ngeni nöün kewe aramas ifa usun repwe feiöch ren ar ririöch ngeni. (Ais. 48:17, 18) Ikenäi, Jiowa a pwäri an chchüngükich ren an awora ewe kokkotun Famili Fel.
3. Met popun a kawor ewe kokkotun Famili Fel?
3 Met Popun A Kawor ewe Kokkotun Famili Fel? Lon ewe January 2009, ewe Puk Study a chu ngeni ewe Sukulen Afalafal me Service Meeting. Popun a fis ena, pwe epwe atufichi ekkewe famili le apöchökkülalo ar riri ngeni Jiowa ren ar akkota ar famili fel iteiten wiik lon ewe atun ra piin äkkäeä fän iten ewe puk study, ika mi tufich. Resap atapwalapwal lon ar käeöfengen Paipel me ekkewe pworaus mi lamot ngeni ar we famili.
4. Itä chon ewe famili repwe aükükü ttamen ar käeö pwe epwe chök eü awa? Äweweei.
4 Me mwen ach sipwe fiti ewe Puk Study, sia kan anükünük, säi ngeni ewe leeni, me met kkan. Chommong leich sia nöüni fitu awa fän iten ach sipwe fiti ena mwich eü awa ttaman. Iwe, pokiten a siwil kokkotun ena mwich, iei a wor än ekkewe famili fansoun le pwisin fel ngeni Jiowa. Ina minne, sisap aükükü ach fansoun Famili Fel ngeni eü chök awa. Nge sipwe fen ekieki tufichin me osupwangen ach famili atun sia filatä ükükün ttamen ach käeöfengen.
5. Itä chon ewe famili repwe käeöfengen unusen ewe fansoun? Äweweei mwo.
5 Itä Repwe Käeöfengen Lon Unusen Ewe Fansoun? Atun ekkewe pean pwüpwülü me famili mi wor nöür ra pworausfengen usun Paipel, ra kan apöchökkülafengeniir. (Rom 1:12) Chon ewe famili ra kan pacheöchfengen. Ina minne, ar käeöfengen pworaus seni Paipel, ina ewe kinikin mi aüchea seni meinisin lon ar Famili Fel. Iwe nge, emön me emön lon ewe famili a pwal tongeni pwisin käeö. Äwewe chök, mwirin än chon ewe famili käeöfengen, ra tongeni mommotfengen nge emön me emön a tongeni imulo woon an pwe epwe ammolnatä ekkewe lesen fän iten ekkewe mwich are älleani ewe Leenien Mas. Ekkoch famili ra filatä pwe resap katol TV unusen ena fansoun.
6. Ifa usun ewe famili epwe akkota ar käeöfengen?
6 Epwe Ifa Kokkotun Ar Käeöfengen? Esap iteiten fansoun ewe käeö epwe chök kapas eis me pölüwan. Chommong famili ra kan föri ar prokramin Famili Fel pwe epwe apwapwa ren ar äppirü napanapen ach we Sukulen Afalafal me Service Meeting. Weween, ra eineti ngeni emön me emön kinikinin met repwe käeö. Äwewe chök, eli repwe älleafengen ewe Paipel, ammolnatä ekkewe kinikin fän iten ekkewe mwich, me praktis fän iten ewe angangen afalafal. A mak ekkoch kapasen emmwen lon pekin taropwe 6.
7. Ekkewe sam me in repwe achocho pwe epwe fet napanapen ar käeöfengen?
7 Epwe Fet Napanapen Än ewe Famili Käeöfengen? Epwe kon mürinnö än ewe famili käeöfengen ika ra meefi pwe a wor tong me kinamwe lefiler. Ika a räniöch, oupwe tongeni käeöfengen lükün lon kieki. Oua tongeni asösö lefilen kinikinin ämi prokram. Ekkoch famili ra ekis möngöfengen mwirin. Ekkewe sam me in resap apwüngü are mina nöür kewe atun ewe Famili Fel, nge ra tongen fos ngeniir ika ra rong usun och osukosuk mi weneitiir. Iwe nge, ika a wor än emön nöür osukosuk, epwe fen öch ar repwe fos ngeni atun epwe chök iir, pwe resap ässäwa mwen mesen ekkewe ekkoch. Ewe fansoun Famili Fel esap äweires me echipwang, nge epwe pwäratä pwe sia fel ngeni ewe Kot mi pwapwa.—1 Tim. 1:11.
8, 9. Ifa usun möküren ewe famili a tongeni ammolnatä?
8 Ifa Usun Möküren ewe Famili epwe tongeni Ammolnatä? Chon ewe famili repwe feiöch ika möküren ewe famili epwe akkammolnatä met repwe pwoppworausfengen woon lon ar Famili Fel. (SalF. 21:5) Epwe mürinnö än emön mwän epwe pwoppworaus ngeni pwülüwan we usun ena. (SalF. 15:22) Ämi kana möküren famili, pwata ouse pwal kapas eis ngeni nöümi kewe fän ekkoch usun meefier? Ika ka ina usun, kopwe wewefichiti met ra pwapwaiti are lolilen ren.
9 Eli möküren ewe famili esap äeä watteen fansoun le ammolnatä met repwe käeöfengen iteiten wiik. Chon ewe famili repwe pwapwa le föri ekkoch mettoch iteitan, äwewe chök, ällea Paipel. Eli epwe öch epwe ammolnatä mwirin eü me eü fansoun käeöfengen, atun a chüen chechchemeni ekkewe pworaus mi lamot ngeni ewe famili. Ra tongeni makkeei ekkoch pworaus me pacheetä woon ewe icebox pwe chon ewe famili repwe tongeni küna. Repwe mwasangasang me mwötöres ren minne repwe pworausfengen woon me ammolnatä ika mei lamot.
10. Ifa usun iir mi äläemönülo ra tongeni äeä ewe fansoun Famili Fel?
10 E fet ika Ngang chök Chon Pwäratä Jiowa lon ai we famili? Chokkewe mi chök äläemönülo ra tongeni pwisin käeö lon ewe fansoun Famili Fel. Repwe tongeni älleani Paipel, ammolnatä fän iten ekkewe mwich, me älleani Ewe Leenien Mas. Ekkoch pwiich kewe ra pwal föri pwisin ar prokramin käeö. Fän ekkoch, ra tongeni etiwa chiener chon afalafal are eü famili an epwe fitiir le pworausfengen woon Paipel.
11, 12. Ifa feiöchün ach föfföri ach Famili Fel iteitan?
11 Ikkefa ekkewe Feiöch Sipwe Küna seni Ach Prokramin Famili Fel Iteitan? Chokkewe mi letip unus lon ar fel ngeni Jiowa ra akkarap ngeni. Ekkewe famili mi tipeeüfengen lon ar fel ra pwal apöchökküla ar ririfengen. Iei makkeien eü pean pwüpwülü usun ekkewe feiöch ra küna: “Aua pioneer me esor nöüm, iwe, aua pwapwaiti äm pwinin Famili Fel. Aua meefi pwe a pöchökkülelo äm ririfengen me pacheöch ngeni Jiowa. Atun aua nelo lon ewe ränin epwe fis äm käeö lon, aua apasa, “Kopwe erä met epwe fis lepwinei? Ach Famili Fel!”
12 Ewe kokkotun famili fel a pwal älisi ekkewe famili mi tawengaw. Emön in mi lipich a pioneer me mi wor rüüemön nöün, iwe, a makkeei: “Me loom, ese fiffis iteitan äm famili käeöfengen pun ua mölülü. Use silei met upwe föri pwe epwe fiffis iteitan. Ina minne, ua mochen apasa ai kilisou ren ewe kokkotun Famili Fel. Iei aua käeöfengen iteitan me küna feiöch seni.”
13. Met epwe nemeni ükükün feiöchün om famili seni ewe kokkotun famili fel?
13 Ewe kokkotun Famili Fel ina eü liffang seni Semach we lon läng mi usun chök ewe Sapat le äkkälisi ekkewe famili. (Jem. 1:17) Napanapen än ekkewe chon Israel äeä ar fansoun lon ewe Sapat a nemeni ükükün watteen ar alapalo ar riri ngeni Jiowa. Pwal ina chök usun, napanapen ach äeä ach fansoun lon ach famili fel a nemeni ükükün feiöchün ach famili. (2 Kor. 9:6; Kal. 6:7, 8; Kol. 3:23, 24) Ika sia äeäfichi ena kokkot, chon ach famili repwe aloni alon ewe sou makken köl ei mi erä: “Nge me rei, a mürina pwe üpwe kan ngeni Kot. Üa filätä Kot ewe Samol mi Lapalap pwe epwe ai lenien op.”—Kölf. 73:28.
[Ekis Pwóróus lón pekin taropwe 5]
Ewe fansoun Famili Fel esap äweires are echipwang, nge epwe pwäratä pwe sia fel ngeni ewe Kot mi pwapwa
[Pwóór lón pekin taropwe 6]
ISONI
Ekkoch Kapasen Emmwen fän iten ewe Famili Fel
Paipel:
• Älleafengen eü kinikinin ewe älleaan Paipel iteiten wiik. Ika ewe kinikin ra älleani a masou ren än fitemön pworausfengen, iwe, emön me emön lon ewe famili a tongeni älleani me ngingiini ngingiin iö we a älleani alon.
• Sipaiini eü pworaus lon ewe älleaan Paipel.
• Ewisa ngeni emön me emön chon ewe famili le älleani ewe älleaan Paipel me mwan, me makketiw eü are ruu kapas eis a eäni woon ena pworaus. Iwe mwirin, oupwe älillisfengen le kütta pölüwen än emön me emön kapas eis.
• Iteiten wiik oupwe ammolnatä ekkoch chökükkünün taropwe mi mak wokisin seni Paipel lon, me sotun le chechchemeni me äweweei. Isoni ekkena taropwe, me ekkenniwiliir iteiten wiik me ppii ika fitu wokisin oua chechchemeni.
• Aüseling ngeni eü älleaan Paipel mi record, me pwal fiti älleaan me lon noum we Paipel.
Ekkewe Mwich:
• Ammolnafengeni ekkewe kinikin fän iten ekkewe mwich.
• Praktis ekkewe köl sipwe eäni lon ewe wiik epwe feito.
• Ika a wor än emön leimi kinikin lon ewe Sukulen Afalafal are pwoomw lon ewe Service Meeting, oupwe pworausfengen ika ifa usun epwe föri are epwe praktis mwen mesen chon ewe famili.
Minne mi Lamot ngeni ewe Famili:
• Praktisfengen me pwomweni ifa usun ekkewe nau repwe pwäkini ekkewe sossot repwe küna lon sukul.
• Ekkewe nau repwe kütta pworaus me wokisin mi weneiti eü kapas eis are sossot. Iwe, repwe äweweei me pwomweni pwe itä kan iir ekkewe sam me in, nge ekkewe sam me in, iir ekkewe nau.
Angangen afalafal:
• Ammolnatä met oupwe eäni afalafal lon Ammol me Räninfel.
• Pwoppworausfengen woon met chon ewe famili repwe achocho ngeni pwe repwe alapalo ar älisatä ewe angangen afalafal atun ewe Ächechchem are atun asösöön angang are sukul.
• Emön me emön epwe kütta pölüwen ekkoch kapas eis mi piitä lon ewe angangen afalafal, me pwomweni ifa usun epwe pölüweni.
Pwal Ekkoch Kapasen Emmwen:
• Älleafengen ekkoch pworaus seni ewe mineföön Leenien Mas me Awake!
• Emön me emön epwe älleani eü pworaus seni ewe Leenien Mas me Awake! Mwirin, epwe apworausa ngeni chon ewe famili.
• Fän ekkoch, oupwe etiwa pwal eü famili are emön chon afalafal repwe fiti ämi famili fel me repwe tongeni apworausa pworauser.
• Katol me pworausfengen usun ekkewe fitio mi kawor seni ach mwicheich.
• Mwirin ämi fiti eü mwichelap, oupwe enniwili menlapen ekkewe afalafal oua sani.
• Nengeni förien Jiowa kewe me pworausfengen woon met ra äiti ngenikich usun Jiowa.
• Älillisfengen le föri eü map, ika chüngaani are anapanapa liosun och mettoch lon Paipel, äwewe chök, ewe waimw, imwenfel me met kan.